ÑEE nannuʼ xiñee zeeda gácanu casi ca profeta bibani dxiqué la? Primeru guidúʼyanu tuu nga ti profeta. Libru Perspicacia para comprender las Escrituras na ti profeta nga ti «binni ni riquiiñeʼ Dios para guiníʼ xi racalaʼdxiʼ ne xi naguixhe ique guni». Profeta nga ti binni ni «riníʼ xiixa mensaje ni zeeda de Dios». Ca profeta que guniʼcaʼ ni gudxi Dios laacaʼ, laaca guníʼcabe xi chiguizaaca, bisiidicabe ni na Dios ne ca mandamientu stiʼ ne guníʼcabe de ca juiciu stiʼ. Neca qué rininu xi chiguizaaca, peru rábinu binni xi racalaʼdxiʼ Jiobá ora rusíʼdinu laacaʼ ni zeeda lu Biblia (Mateo 24:14).

Nápanu ti ndaayaʼ de gusíʼdinu binni de Jiobá, Dios stinu, ne gábinu laacaʼ ni naguixhe íquebe gúnibe para binni. Cayuninenu ángel ni «zipapa galahui ibáʼ» dxiiñaʼ (Apocalipsis 14:6). Peru zándaca guidxaagalunu guendanagana ne pur nga gusiáʼndanu pabiáʼ risaca dxiiñaʼ nápanu riʼ. Xi ndiʼ ca guendanagana caninu yaʼ. Zándaca guni sentirnu maʼ bidxáganu, maʼ bireʼnu gana o guiníʼ íquenu pur gana si cayúninu ni na Jiobá. Ca profeta que laaca biʼniʼ sentircaʼ zacá, peru qué ñuu dxi nusaana de ñúnicaʼ xhiiñacaʼ. Gucané Jiobá laacabe gúnicabe xhiiñacabe. Guzéʼtenu caadxi ejemplu ne guidúʼyanu ximodo zanda gúninu zaqueca.

Cumu nabé stale cosa nga rúninu guiráʼ dxi la? zándaca ziuu ora zusidxaga cani laanu ne zabee cani gana laanu de gucheechenu diidxaʼ. Dxandíʼ, guiranu caquiiñeʼ guiziiláʼdxinu; Jesús ne ca apóstol stiʼ laacaʼ biziiláʼdxicaʼ (Marcos 6:31). Peru guníʼ ique de Ezequiel, hombre guca profeta lade ca israelita dxi guyuucaʼ de esclavu Babilonia. Gudxi Dios laabe guni dibujarbe guidxi Jerusalén lu ti ladríu. Naquiiñeʼ uguube leʼ ladríu que ne gátabe ladu bigaʼ stibe 390 dxi, despué maʼ gátabe sti  40 dxi ladu derechu stibe. Jiobá gudxi laabe: «¡Biiyaʼ!, zundiibe lii né ti doo ti cadi guicá biéqueluʼ sti ladu, dede ora maʼ bizaa ca dxi chinduuluʼ leʼ ni» (Ezequiel 4:1-8). Nabé bidxagayaa ca israelita que ni bíʼnibe. Jma de ti iza biʼniʼ Ezequiel ngueca ca ngueca guiráʼ dxi. Xi gucané laabe para gunda bíʼnibe dxiiñaʼ nadipaʼ bidiicabe laabe riʼ yaʼ.

Biene Ezequiel xiñee naca profeta. Dxi biseendaʼ Jiobá laabe, gudxi laabe: «Zánnacabe guyuu ti profeta ládecabe». Pa gucaadiaga ca israelita o pa coʼ, naquiiñeʼ gúnibe dxiiñaʼ que (Ezequiel 2:5). Gunna dxichi Ezequiel xii nga dxiiñaʼ stiʼ ne bisihuínnibe dxandíʼ gúcabe ti profeta: bizuubabe diidxaʼ de guidubi ladxidoʼbe ne bíʼnibe casi ora niguube leʼ Jerusalén. Despué, laabe ne xcaadxi ni nuu de esclavu gucuaacabe ti noticia: «¡Maʼ binitilú guidxi que!». Ca israelita que bidiicaʼ cuenta guyuu ti profeta ládecaʼ (Ezequiel 33:21, 33).

Ca dxi riʼ, cayábinu binni mayaca gunduuxeʼ Jiobá guidxilayú stiʼ Binidxabaʼ. Neca nuu biaje ridxáganu, rúninu stipa para gucheechenu diidxaʼ, gúninu revisita ne guidúʼndanenu binni de Biblia. Ora guidúʼyanu maʼ cayaca cani na ca profecía ni caníʼ de fin stiʼ ca cosa malu riʼ, riuʼnu nayecheʼ purtiʼ caquiiñeʼ Dios laanu para guininu xi chigaca ne ni naguixhe ique guni.

Jiobá racané laanu né espíritu stiʼ para gudxíʼlunu né guiráʼ stipa stinu. Neca zacá, nuu biaje rireʼnu gana purtiʼ qué riná binni gucaadiaga laanu. Pa guizaacanu zacá, guiníʼ íquenu de Jeremías. Nabé gudindené ca israelita laabe ne biʼniʼ búrlacaʼ laabe purtiʼ gúdxibe laacaʼ xiná Dios. Ti dxi guniʼbe: «Maʼ qué zanieruáʼ de laabe, ne maʼ qué zanieruáʼ lu labe». Laaca guca Jeremías ti binni ni runi sentir cásica laanu. Peru qué nusaana de nucheechebe diidxaʼ. Xiñee yaʼ. Sicaríʼ guniʼbe de ca diidxaʼ canazanebe que: «Peru beeda gaca ni casi ti bele ndaaniʼ ladxiduáʼ, ni daguyoo ndaaniʼ dxita ladeʼ; maʼ qué ñanda diʼ nucueezaʼ ni ne maʼ qué ñanda ñuneʼ huantar ni» (Jeremías 20:7-9).

Pa careʼnu gana purtiʼ qué naʼ binni gucaadiaga laanu, zanda gudxíʼlunu guendanagana ca pa guiníʼ íquenu xi cusíʼdinu laacabe. Zeeda gaca ni «casi ti bele» ndaaniʼ dxita ládinu. Ne pa guidúʼndanu Biblia guiráʼ dxi la? qué zazuíʼ diʼ bele ca.

Nuu hermanu nabé riuu xizaa ora rudiicabe laacaʼ sti asignación, purtiʼ qué gánnacaʼ xiñee gucuaacaʼ ni o purtiʼ qué gánnacaʼ ximodo gúnicaʼ ni. Zándaca nga nga ni biʼniʼ sentir profeta Oseas. Jiobá gudxi laabe: «Guyé, bichaganáʼ ti gunaa ni zapa jnadxii ne gupané laabe xiiñiluʼ» (Oseas 1:2). Bixuiʼlú chichaganaluʼ, peru ñabi Dios lii zapa xheelaluʼ stale jnadxii. Ximodo ñuni sentirluʼ yaʼ. Biʼniʼ Oseas ni gudxi Jiobá laa, ne bichaganáʼ ti gunaa láʼ Gómer ne gupanebe laa ti xiiñibe. Despué gupa gunaa que ti dxaapahuiiniʼ ne sti hombrehuiiniʼ, peru ruluíʼ maʼ cadi xiiñiʼ diʼ Oseas laacabe. Jiobá maca guníʼ «ziyubi xheelabe ca jnadxii» —biiyuʼ la? racá na «ca jnadxii» ne cadi «jnadxii» si— ne despué zuyubi guibiguetané laabe. Xi ñúniluʼ yaʼ. Ñee ninaluʼ nibiguétaluʼ gunaa que la? Pue ngapeʼ nga ni gudxi Jiobá Oseas guni. Ne cadi ngasi, sínuque gudíxebe para bibiguetané gunaa que laabe (Oseas 2:7; 3:1-5).

Zándaca guníʼ ique Oseas xiñee cayuni ngue. Peru bíʼnibe cásipeʼ modo gúdxicabe laabe. Ejemplu stibe riʼ racané ni laanu guiénenu ximodo biʼniʼ sentir Jiobá pur bidxiideche guidxi Israel laa. Ni dxandíʼ nga bibiguetaʼ caadxi israelita ra nuu Jiobá.

Ca dxi riʼ, qué rinabaʼ diʼ Dios laanu guichagananu «ti gunaa ni zapa jnadxii». Peru rusiidiʼ ejemplu stiʼ Oseas laanu stale cosa risaca. Cásica modo biʼniʼ Oseas xhiiñaʼ, laanu naquiiñeʼ gucheechenu stiidxaʼ Reinu nezalú stale binni ne de yoo pur yoo, neca gaca ni nagana para laanu (Hechos 20:20). Zándaca chuʼ xiixa ni gaca  nagana para laanu ora gucheechenu diidxaʼ. Guzéʼtenu ti ejemplu, stale binni ni bíʼndanenu laacaʼ Biblia guniʼcaʼ nabé riuuláʼdxicaʼ guiziidicaʼ, peru qué ziuu dxi chigucheechecaʼ diidxaʼ de yoo pur yoo. Peru gudiʼdiʼ si tiempu, stale de laacabe bíʼnicabe ni guníʼcabe qué ziuu dxi gúnicabe. ¡Nabé sicarú ni rizíʼdinu racá!

Nuu sti cosa ni rusiidiʼ ejemplu stiʼ Oseas laanu. Bíʼnibe ni gudxi Dios laabe neca nagana ni, peru laaca ñanda ñábibe Dios qué zúnibe ni. Ne nuu sti cosa, tuu ndiʼ ñanna pa bíʼnibe ni o pa coʼ, pa qué nucaabe ni yaʼ. Zacaca nga laanu, pa qué ninínenu ti binni de Jiobá neca ñanda ñúninu ni, tuu nga ganna pa bíninu ni o pa qué ñúninu ni. Zacá bizaaca Anna, ti dxaapahuiiniʼ de Estados Unidos ni canazá secundaria. Bisaanané maestra stícabe laacabe ti tariá, gusiénecabe ti tema ni nabé riuuláʼdxicabe. Cada tobi de laacabe zaníʼ de tema stiʼ ne naquiiñeʼ gucuudxi ca xcompañeru para guni crecaʼ ni. Ñándaca niníʼ Ana de sti tema, peru biiyabe óraque nga caquiiñeʼ guiniʼbe de Jiobá. Guníʼ íquebe xi zándaca guiníʼ ca xcompañérube, ngue runi biʼniʼ orarbe Jiobá. Xi guleendube yaʼ. Biale de ndaaniʼ ladxidoʼbe guiniʼbe de Jiobá óraque. Bizulú bicaabe tema stibe ne gulee labe ni: «Evolución: ñee nuu prueba ni rusihuinni dxandíʼ ni la?».

Ora gudiʼdiʼ Anna nezalú ca xcompañeru la? biree ti dxaapahuiiniʼ ni runi cré de evolución ni gunabadiidxaʼ laabe stale cosa. Gunda bisiene Anna xiñee qué runi cré evolución. Nabé bidxagayaa maestra stibe ne bidii laabe ti premiu purtiʼ bicuudxibe ca xcompañérube. Dede dxi que, stale biaje huaniʼné Anna dxaapahuiiniʼ ni gunabadiidxaʼ laa stale cosa que de creación. Cumu biiyaʼ Anna ni biʼniʼ que casi ti dxiiñaʼ ni bidii Jiobá laa la? nga runi guníʼ: «Yanna maʼ qué ridxibeʼ ora gucheecheʼ diidxaʼ».

Neca nagana dxiiñaʼ gucuaa Ezequiel, Jeremías ne Oseas, peru bíʼnicabe ni. Yanna, laanu yaʼ. Dxandíʼ cadi profeta diʼ laanu casi laacabe, peru zanda chinándanu ejemplu stícabe. Zacá zúninu ni cabeza Jiobá guni ca xpinni. Ñanda ñuundaluʼ o ñuundaneluʼ familia stiluʼ modo bibani xcaadxi profeta la? Pa guiníʼ íquenu ni bíʼnicabe zacané cani laanu chinándanu ejemplu stícabe.