1, 2. ¿Xiruʼ naquiiñeʼ gúninu despué de chuʼnísanu, ne xiñee?

 ¿PANDA biaje rusialuʼ ra lídxiluʼ? Zándaca ante chindézaluʼ ndaaniʼ ni bisialuʼ. Peru ¿xi nizaaca pa ñaca qué nusialuʼ ni yaʼ? Nidxá yú ndaaniʼ ni ne ñacabiidiʼ ni nagueenda. Nga runi para gaca ra lídxiluʼ nayá naquiiñeʼ gusialuʼ ni gatigá.

² Zacagá nga naquiiñeʼ gúninu né ca ni riníʼ íquenu ne modo nácanu. Ante chuʼnísanu bíninu stipa pur guchaʼnu modo nabáninu, bisianu laanu de «guiráʼ ni runi biidiʼ cuerpu stinu ne espíritu stinu» (2 Cor. 7:1). Peru yanna naquiiñeʼ chinándanu conseju ni bidii apóstol Pablo ora guníʼ: «Laguchaa modo riníʼ íquetu» (Efes. 4:23). ¿Xiñee nabé risaca cadi gusaana de gúninu stipa pur guchaʼnu yaʼ? Purtiʼ nagueenda zanda guicá modo riníʼ ique binni guidxilayú laanu ne guni biidiʼ ni laanu nezalú Jehová. Para cadi guizaacanu nga ne chuʼnu nayá nezalú Jehová la? naquiiñeʼ guidúʼyanu pa jneza modo riníʼ íquenu, modo nácanu ne ca deseu stinu.

3. ¿Xi naquiiñeʼ gúninu para guchaʼnu modo riníʼ íquenu yaʼ? (Romanos 12:2).

³ ¿Xi naquiiñeʼ gúninu para guchaʼnu modo riníʼ íquenu yaʼ? (Biindaʼ Romanos 12:2). Cadi caquiiñeʼ si gúninu caadxi cosa galán lu xquendanabáninu. Ni naquiiñeʼ gúninu nga guiduʼyaʼ chaahuinu ximodo nácanu pur  dentru ne guchaʼnu modo laanu pa caquiiñeʼ gúninu ni, para chinándanu ca norma stiʼ Jehová lu xquendanabáninu. Cadi ti biaje si naquiiñeʼ gúninu ni bizéʼtenu riʼ, sínuque naquiiñeʼ gúninu ni gatigá.

4. ¿Xi naquiiñeʼ gúninu para cadi guicá modo riníʼ ique binni guidxilayú laanu yaʼ?

⁴ Ora maʼ gácanu perfectu, siempre zusiéchenu Jehová lu guiráʼ ni gúninu. Peru laga cabézanu guedandá dxi ca dede ca yanna zanda gúninu stipa para gusiéchenu laabe. Lu Romanos 12:2 bizeeteʼ apóstol Pablo naquiiñeʼ guchaʼnu modo riníʼ íquenu para gánnanu xi racalaʼdxiʼ Dios gúninu. Nga runi, lugar de guicá modo riníʼ ique binni guidxilayú laanu ne maʼ qué gúninu stipa pur guchaʼnu, nabé risaca guidúʼyanu pa zinándanu modo riníʼ ique Dios lu ca meta ni riguíxhenu o lu ca decisión ni ricaanu.

5. ¿Ximodo zanda gánnanu pa nuunu pendiente maʼ gaxha nuu dxi stiʼ Jehová? (Biiyaʼ ca foto ca).

⁵ Guzéʼtenu ti ejemplu, racalaʼdxiʼ Jehová chuʼnu «pendiente ora guedandá dxi stiʼ» (2 Ped. 3:12). Nga runi galán gúninu pa guiníʼ íquenu ca pregunta riʼ: «¿Ñee rusihuinneʼ pur modo nabaneʼ rieneʼ mayaca guinitilú guidxilayú stiʼ Binidxabaʼ riʼ la? Ora guiníʼ iqueʼ pa ziaaʼ universidad o xi dxiiñaʼ guneʼ, ¿ñee rusihuinneʼ ni jma risaca para naa nga guneʼ ni ná Jehová la? ¿Ñee napaʼ fe zápabe naa ne familia stinneʼ la? o siempre nuaaʼ xizaa pur ca cosa material?». Riecheʼ Jehová ora guʼyaʼ rúninu stipa gúninu ni ná lu guiráʼ decisión ni guicaanu (Mat. 6:25-27, 33; Filip. 4:12, 13).

6. ¿Xi cadi naquiiñeʼ gusaana de gúninu?

⁶ Gatigá naquiiñeʼ guidúʼyanu pa jneza modo riníʼ íquenu ne guchaʼnu ra naquiiñeʼ gúninu ni. Ndiʼ nga conseju  bidii Pablo ca xpinni Cristu de Corinto: «Siempre laguuyaʼ ximodo nuutu para gánnatu pa zuhuaatu dxiichiʼ lu fe stitu. Siempre laguuyaʼ tu clase binni nácatu» (2 Cor. 13:5). Ti binni ni zuhuaa dxiichiʼ lu fe cadi rié si reunión ne runi predicar ora ganda si. Laaca rusihuínnini pur modo riníʼ ique, ca deseu ni napa ne ni rucaa laa guni ni ná Jehová. Nga runi para cadi gusaana de guchaʼnu modo riníʼ íquenu, naquiiñeʼ guidúʼndanu Biblia, guizíʼdinu guiníʼ íquenu modo riníʼ ique Dios ne despué guchaʼnu modo laanu para gúninu ni gusiecheʼ laabe (1 Cor. 2:14-16).

7. Casi ná Efesios 4:31, 32, ¿xiruʼ naquiiñeʼ gúninu, ne xiñee raca nagana para laanu gúninu ni?

⁷ (Biindaʼ Efesios 4:31, 32). Naquiiñeʼ guchaʼnu modo riníʼ íquenu, peru laaca naquiiñeʼ guibáninu modo rusiidiʼ Dios (Efes. 4:24). Ne para ganda gúninu ni la? naquiiñeʼ gúninu stipa gusaana de gúninu caadxi cosa ni cadi jneza, casi guidaʼnu xiana ne guidxiichinu. ¿Xiñee zanda gácani nagana para laanu yaʼ? Purtiʼ zándaca dede dxi nahuiininu zacá laanu. Biblia riníʼ de binni ni «nagueenda ridaa xiana» ne binni «ni nabé ridxiichi» (Prov. 29:22). Ne zándaca para gucueezanu laca laanu naquiiñeʼ gúninu stipa pur guchaʼnu modo laanu, neca maʼ guyuʼnísanu. Guzéʼtenu ti experiencia.

8, 9. ¿Ximodo rusihuinni experiencia stiʼ Stephen pabiáʼ risaca gusaananu modo gúcanu dxiqué?

⁸ Ti hermanu láʼ Stephen gupa xidé bíʼniruʼ stipa para cadi guidxiichi nagueenda. Laabe guniʼbe: «Despué de guyuaanisaʼ bineruaʼ stipa para cadi guidxiicheʼ nagueenda. Ti dxi cayuni predicardu caadxi familia ni nabeza ndaaniʼ ti barriu, biiyaʼ ziné ti gubaanaʼ radiu stiʼ carru stinneʼ. Óraque bixooñeʼ zinandaʼ laabe. Ora bíʼyabe mayaca ugaandaʼ laabe, bisáʼbibe radiu que layú ne ziguxooñebe. Ora gunieniáʼ ca hermanu ni canayuneʼ predicarniaʼ que xi bineʼ para qué ninécabe radiu stinneʼ, ti hermanu ni napa stale experiencia gunabadiidxaʼ naa: “¿Xi ñúniluʼ pa ninaazeluʼ gubaanaʼ que yaʼ?”. Ni gunabadiidxabe naa ca, bicaa ni naa guiníʼ iqueʼ caquiiñeruʼ guchaaʼ modo naa». b

⁹ Ni bizaaca Stephen riʼ rusiidiʼ ni laanu zanda guibiguetaʼ gácanu modo gúcanu dxiqué neca guiníʼ íquenu maʼ rucueezanu laca laanu. Pa guizaacanu ni bizaaca Stephen, cadi guireʼnu gana ne cadi guiníʼ íquenu malu laanu. Dede apóstol Pablo guníʼ: «Ora runeʼ desear guneʼ ni jneza, laga cosa malu maʼ zuhuaa nezaluáʼ» (Rom. 7:21-23). Cumu nácanu binni ruchee la? guiranu, ca xpinni Cristu, nápanu defectu ni ribiguetaʼ ni zeeda gaca casi yú ni runi biidiʼ ti yoo. Nga runi naquiiñeʼ gúninu stipa para gácanu nayá. ¿Xi zacané laanu yaʼ?

10. ¿Xi zanda gúninu para gusaananu modo gúcanu dxiqué? (1 Juan 5:14, 15).

¹⁰ Guinínenu Jehová lu oración ne gábinu laa xii nga defectu ni cayúninu stipa gusaananu ne ganna dxiichinu zucaadiágabe laanu ne zacanebe laanu (biindaʼ 1 Juan 5:14, 15). Qué zúnibe ti milagru para cueebe ni nagueenda, peru zudiibe stipa laanu para gucueezanu laanu (1 Ped. 5:10). ¿Ximodo zanda gúninu ca ni canábanu lu oración yaʼ? Naquiiñeʼ  gucáʼnanu intiica cosa ni gucaa laanu guluinu modo gúcanu dxiqué. Guzéʼtenu ti ejemplu, cadi jneza nga guidúʼyanu ti película, programa de televisión o guidúʼndanu xiixa información ni gucaa laanu guiníʼ íquenu jneza nga modo gúcanu dxiqué. Ne cadi gudiʼnu lugar chuʼ xiixa deseu malu ndaaniʼ ladxidoʼno (Filip. 4:8; Col. 3:2).

11. ¿Xi naquiiñeʼ gúninu para cadi gusaana de guibáninu modo rusiidiʼ Dios?

¹¹ Naquiiñeʼ gusaananu modo gúcanu dxiqué, peru laaca risaca cadi gusaana de guibáninu modo rusiidiʼ Dios. ¿Ximodo zanda gúninu ni yaʼ? Quíxhenu meta gunibiáʼ chaahuinu Jehová, ca cualidad stiʼ ne chinándanu ejemplu stiʼ (Efes. 5:1, 2). Ora guidúʼndanu ti relatu ni zeeda lu Biblia ni caníʼ modo runi perdonar Jehová, guiníʼ íquenu ndiʼ: «¿Ñee runeʼ perdonar xcaadxi la?». Ne ora ridúʼndanu modo riá Jehová ca ni cadiʼdiʼ ra nagana. Guiníʼ íquenu: «¿Ñee laaca riuaaʼ xizaa pur ca hermanu pobre ne racaniaʼ laacaʼ la?». Cadi gusaana de guchaʼnu modo riníʼ íquenu, guibáninu modo rusiidiʼ Dios ne gápanu paciencia laca laanu.

12. ¿Ximodo rusihuinni ejemplu stiʼ Stephen napa Biblia poder para guchaa modo naca binni?

¹² Stephen, hermanu ni bizéʼtenu lu párrafo 8 que, chaahuiʼ chaahuiʼ bisaana modo guca dxiqué. Laa guníʼ: «Dede dxi guyuaanisaʼ, huayaca nagana para naa gucueezaʼ laca naa. Ni runeʼ para cadi tindeʼ nga riaaʼ sti lugar o runeʼ stipa gucueezaʼ naa. Stale binni dede né xheelaʼ huayuni felicitarcaʼ naa pur rucueezaʼ laca naa, dede naa ridxagayaaʼ. Qué ñanda nuchaaʼ pa guirutiʼ tu ñacané naa. Rudieeʼ cuenta dxandíʼ napa Biblia poder para guchaa modo naca binni».

13. ¿Xi zacané laanu gúninu ni jneza? (Gálatas 5:16).

¹³ (Biindaʼ Gálatas 5:16). Nachaʼhuiʼ Jehová ne rudii laanu espíritu santu stiʼ para gúninu ni jneza. Ora runi estudiarnu Stiidxaʼ Dios, rudiʼnu lugar gacané espíritu ca laanu. Laaca ricaanu espíritu riʼ ora riuunu reunión. Lu ca reunión ca ridúʼyanu ca hermanu stinu, ne cumu laaca cayúnicabe stipa para gúnicabe ni jneza la? riguu ni gana laanu (Heb. 10:24, 25; 13:7). Ne ora runi orarnu Jehová de guidubi ladxidoʼno ne guinábanu laa gacané laanu gudxíʼlunu xiixa debilidad, rudiibe espíritu santu stibe laanu para gápanu stipa ne cadi gusaana de gudxíʼlunu. Zándaca neca gúninu ca cosa ni bizéʼtenu riʼ, qué zaree gá ca deseu malu ni nápanu, peru zudii ca ni stipa laanu para cadi gúninu ni ná ca deseu ca. Casi ná Gálatas 5:16, ca ni nabani casi ná espíritu qué zúnicaʼ nin ti deseu stiʼ cuerpu sticaʼ.

14. ¿Xiñee nabé risaca cadi gusaana de gúninu ni jneza?

¹⁴ Ora maʼ biaʼnu gúninu cosa ni ruchiña laanu gaxha de Jehová, nabé risaca cadi gusaana de gúninu ni para gápanu deseu de gúninu ni jneza. ¿Xiñee yaʼ? Purtiʼ guiráʼ ladu nuu tentación ni zanda gusaba laanu. Ne despué de chuʼnísanu zándaca uquiinde laanu gúninu cosa ni cadi jneza, casi quítenu para guni ganarnu bueltu, guideʼ xhaatanu nisadxuʼniʼ o guidúʼyanu pornografía (Efes. 5:3, 4). Sicaríʼ guníʼ ti joven testigu stiʼ  Jehová: «Tobi de ca cosa ni cadi jneza ni cudxieeluáʼ nga gusaana de chuuladxeʼ ca hombrehuiiniʼ. Guníʼ iqueʼ ti tiempu si ñuneʼ sentir zacá, peru qué ganda diʼ gusaanaʼ ni». ¿Xi zacané laanu gudxíʼlunu ca deseu ni cadi jneza ca yaʼ?

15. ¿Xiñee riuʼnu gana gánnanu guiráʼ binni nga cudxiilú xiixa deseu ni cadi jneza? (Biiyaʼ imagen).

¹⁵ Pa cudxíʼlunu ti deseu ni cadi jneza ne pur laani cadi nuunu nayecheʼ, guietenaláʼdxinu cadi stúbinu nuunu. Biblia ná: «Guiráʼ binni ridiʼdiʼ prueba ni cadíʼditu ca» (1 Cor. 10:13a). Sicaríʼ guca traducir versículo riʼ lu sti Biblia: «Huayápatu prueba ni huayapa xcaadxi». Ca diidxaʼ riʼ gucuá ni para ca xpinni Cristu ni bibani ndaaniʼ guidxi Corinto. Caadxi de laacaʼ gúpacaʼ jnadxiicaʼ, gúcacaʼ muxeʼ ne gúcacaʼ binnigüeʼ (1 Cor. 6:9-11). Zándaca despué de guyuunísacabe gupa xidé bidxiilurúcabe ca deseu malu stícabe. Dxandíʼ neca guirácabe nácacabe ungidu, peru binni ruchee laacabe. Ngue runi zándaca bidxiilurúcabe xiixa deseu ni cadi jneza. Riguu ndiʼ gana laanu purtiʼ cásica gunda bidxiilú ca binni ni guyuu dxiqué ca deseu malu stiʼ, laanu laaca zanda gúninu ni. Nga runi zanda gaca fe stinu naguidxi ne cadi guiaandaʼ laanu laaca cayuni sufrir ca hermanu stinu ni nuu lu guidubi Guidxilayú cásica cayuni sufrirnu (1 Ped. 5:9).

16. ¿Xi trampa naquiiñeʼ chuʼnu cuidadu, ne xiñee?

¹⁶ Ti trampa nga guiníʼ íquenu guirutiʼ tu riene ca debilidad ni nápanu. Purtiʼ zándaca guiníʼ íquenu qué zaca chaahuiʼ guendanagana nápanu ne qué zanda gudxíʼlunu debilidad stinu. Peru maʼ gadxé ni ná Biblia: «Jneza runi Dios ne qué zudii lugar gueeda xiixa prueba luguiatu ni qué zanda guni huantartu, sínuque zacané laatu guni huantartu prueba ca»  (1 Cor. 10:13b). Nga runi neca nabé nadipaʼ gaca ti deseu, zanda gácanu fiel Jehová. Pa gacanebe laanu qué zúninu ni ná ca deseu stinu.

17. Neca ráparunu deseu ni cadi jneza, ¿xi zanda gúninu?

¹⁷ Cadi guiaandaʼ laanu cumu nácanu binni ruchee, rápanu deseu ni cadi jneza. Ora guizaaca nga nagueendaca naquiiñeʼ gucáʼnanu ni, cásica biʼniʼ José dxi bicaanáʼ xheelaʼ Potifar (Gén. 39:12). Cadi caquiiñeʼ diʼ gácanu esclavu stiʼ ca deseu malu stinu.

18, 19. ¿Gunáʼ nga ca pregunta ni zacané laanu guchaʼnu modo riníʼ íquenu?

¹⁸ Para guchaʼnu modo riníʼ íquenu, cadi naquiiñeʼ gusaana de guidúʼyanu pa riuulaʼdxiʼ Jehová ni riníʼ íquenu ne ni rúninu. Nga runi gatigá naquiiñeʼ guiníʼ íquenu: «¿Ñee rusihuinni ca cosa ni runeʼ nannaʼ maʼ gaxha nuu fin la? ¿Ñee rusihuinneʼ nabaneʼ modo riuulaʼdxiʼ Dios la? ¿Rudieeʼ lugar gacané espíritu stiʼ Jehová naa para cadi guneʼ ni ná ca deseu malu stinneʼ la?».

¹⁹ Ra guiníʼ íquenu ca pregunta riʼ, guidúʼyanu pabiáʼ maʼ biʼniʼ progresarnu ne cadi cuézanu gácanu perfectu lúcani. Pa guidúʼyanu caquiiñeʼ guni mejorarnu lu xiixa cosa cadi guireʼnu gana. Ni jma jneza nga chinándanu conseju ni zeeda lu Filipenses 3:16: «Dede biaʼ ra biʼniʼ progresarnu, cadi gusaana de gúninu ni». Pa gúninu ni, zaguu Jehová ndaayaʼ stipa ni gúninu pur guchaʼnu modo riníʼ íquenu.