1. ¿Ximodo nga ti binni ni riá?

¿XIMODO nga ti binni ni riá? Zándaca guiníʼ íquenu tuuxa ni nachaʼhuiʼ ne rudii de ni napa para gacané xcaadxi. Casi xa samaritanu ni bizeeteʼ Jesús lu parábola ni guníʼ. Neca naca hombre riʼ de sti guidxi, peru gucanebe ti judíu ni biree gubaanaʼ lu. Guizáʼ biá samaritanu que judíu que ora biʼyaʼ laabe, ne ngue bicaa laa gacané laabe (Luc. 10:29-37). Rusiidiʼ parábola riʼ riá Jehová laanu purtiʼ nadxii laanu ne rusihuinni riá laanu guiráʼ dxi ne rúnini gadxé gadxé modo.

2. ¿Xi sti modo rusihuinni tuuxa riá?

² Rusihuinni tuuxa riá ora qué runi castigar ti binni neca nuu razón para gúnini. Riá Jehová laanu neca napa razón para guni castigar laanu. Sicaríʼ guníʼ ti hombre ni bicaa ti salmo: «Qué huayuni castigarbe laanu biaʼ ca pecadu stinu» (Sal. 103:10). Peru nuu biaje caquiiñeʼ guni disciplinar Jehová tuuxa ni maʼ biʼniʼ ti pecadu.

3. ¿Gunáʼ nga ca pregunta ni zacábinu lu artículo riʼ?

³ Lu artículo riʼ zadúʼyanu ximodo ricabi Biblia guionnaʼ pregunta riʼ: ¿xiñee riá Jehová laanu?, ¿ñee zanda guni disciplinárcabe tuuxa ne gusihuínnicabe riácabe laa la? ne ¿xi zacané laanu gusihuínninu cualidad riʼ?

4. ¿Xiñee riá Jehová laanu?

⁴ Purtiʼ nadxiibe laanu. Apóstol Pablo bicaa «nabé riá Dios laanu». Ora guniʼbe ca diidxaʼ riʼ caniʼbe de ca ungidu,  neca nácacaʼ binni ruchee rudii Dios laacaʼ esperanza de guibánicaʼ guibáʼ (Efes. 2:4-7). Peru cadi ca ungidu si nga riá Jehová. Sicaríʼ guníʼ David lu ti salmo: «Nachaʼhuiʼ Jehová né guiráʼ binni, ne rihuinni riabe laanu lu guiráʼ ni rúnibe» (Sal. 145:9). Cumu nadxii Jehová guiráʼ binni la? nga runi riabe laanu ora gúʼyabe nuu razón para gúnibe ni.

5. ¿Ximodo biziidiʼ Jesús riá Jehová binni?

⁵ Nanna Jesús pabiáʼ riuulaʼdxiʼ Jehová gusihuinni riá laanu. Ante gueeda lu Guidxilayú riʼ, stale iza guyuu gaxha de Bixhoze guibáʼ (Prov. 8:30, 31). Stale biaje biiyabe ximodo biá Jehová ca binni ni bichee (Sal. 78:37-42). Dxi beeda Jesús lu Guidxilayú riʼ, bisiidibe nabé riá Bixhózebe binni.

6. ¿Xi parábola guníʼ Jesús para bisiidiʼ riá Jehová laanu?

⁶ Casi bidúʼyanu lu artículo ni gudiʼdiʼ que, guníʼ Jesús parábola stiʼ hijo pródigo que para gusiidiʼ riuulaʼdxiʼ Jehová guiá laanu. Biree hombrehuiiniʼ riʼ de ra lidxi ne «gudxite herencia stiʼ purtiʼ bibani modo ná ique» (Luc. 15:13). Gudiʼdiʼ si tiempu guca arrepentirbe pur modo nabánibe ne biguétabe ra lídxibe. ¿Xi biʼniʼ bixhózebe ora biʼyaʼ laabe yaʼ? Jesús guníʼ: «De zíturuʼ zeedabe, biiyaʼ bixhózebe laabe, biá laabe, bixooñeʼ ne gudiidxi laabe ne bidii bixiduʼ laabe». Lugar de nusituí bixhózebe lube, biá laabe, biʼniʼ perdonar laabe ne gucuaa laabe sti biaje casi xiiñiʼ. Neca biʼniʼ hombrehuiiniʼ riʼ stale pecadu, biʼniʼ perdonar bixhózebe laabe purtiʼ guca arrepentirbe. Bixhoze hombrehuiiniʼ ni guníʼ Jesús lu parábola riʼ nga zeeda gaca Jehová. Né ejemplu riʼ bisiidiʼ Jesús racalaʼdxiʼ Jehová guni perdonar ca binni ni gaca arrepentir de guidubi ladxidóʼ pur xiixa cosa malu ni bíʼnicaʼ (Luc. 15:17-24).

7. ¿Ximodo rusihuinni Jehová guizáʼ nuu xpiaaniʼ pur modo riá laanu?

⁷ Purtiʼ guizáʼ nuu xpiaaniʼ Jehová. Riá Jehová laanu purtiʼ guizáʼ nuu xpiaaniʼ. Biblia ná «guendabiaaniʼ ni zeeda de guibáʼ racaneni binni [...] guiá binni ne guni ni jneza» (Sant. 3:17). Cásica nadxii ti hombre ca xiiñiʼ, nanna Jehová ora riá laanu racaneni laanu (Sal. 103:13; Is. 49:15). Ndiʼ rudii esperanza laanu neca nácanu binni ruchee. Cumu guizáʼ nuu xpiaaniʼ Jehová la? riabe laanu ora guidxélabe razón para gúnibe ni. Jneza riquiiñebe cualidad riʼ. Cumu nabé nuu  xpiaaniʼ Jehová la? nánnabe pora caquiiñeʼ guiabe ne pora coʼ.

8. Nuu biaje, ¿xi naquiiñeʼ gaca, ne xiñee?

⁸ Guiníʼ íquenu ndiʼ, ti xpinni Dios laa peʼ riguixhe ique guni pecar stale biaje. Yanna, ¿xi naquiiñeʼ gaca yaʼ? Sicaríʼ gudxi Dios apóstol Pablo gucaa: «Cadi guidxaagatu [...] binni ca» (1 Cor. 5:11). Ca binni ni guni pecar ne qué gaca arrepentir raca expulsarcaʼ de ndaaniʼ congregación. Naquiiñeʼ gaca ndiʼ para guiaapaʼ ca hermanu ne purtiʼ naca Jehová ti Dios santo. Peru nuu tu laa riníʼ ique qué riá Dios binni ora gaca expulsar. Guidúʼyanu pa dxandíʼ ni.

9, 10. a) Casi ná Hebreos 12:5, 6, ¿xiñee zanda guininu riácabe tuuxa ora raca expulsar? b) ¿Xi ejemplu racané laanu guiénenu ni?

⁹ Guizáʼ riuʼnu triste ora riete ra reunión maʼ cadi testigu stiʼ Jehová ti binni ni nadxiinu. Zándaca guiníʼ íquenu pa caquiiñeʼ peʼ gaca expulsarbe. ¿Ñee dxandíʼ nga cayácabe tuuxa ora gaca expulsar la? Dxandíʼ. Pa caquiiñeʼ tuuxa guicaa disciplina jma jneza nga gudiicabe ni laa, purtiʼ zacá zusihuínnicabe cayácabe laa ne nadxiicabe laa (Prov. 13:24). Ora gaca expulsar ti binni ni biʼniʼ ti pecadu zanda gacaneni laa gaca arrepentir ne guchaa. Stale de ca binni ni biʼniʼ ti pecadu grave, maʼ biiyacaʼ biaʼsi ngue disciplina ni bidii ca ancianu laacaʼ, purtiʼ gucaneni laacaʼ gudiicaʼ cuenta cadi jneza ni bíʼnicaʼ, guchaacaʼ ne guibiguétacaʼ ra nuu Jehová sti biaje (biindaʼ Hebreos 12:5, 6).

¹⁰ Guzéʼtenu ejemplu riʼ. Biiyaʼ ti pastor huará tobi de ca dendxuhuiiniʼ stiʼ. Nánnabe naquiiñeʼ cueechube laame de xcaadxi dendxuʼ para ganda gusiándabe laa. Peru cadi biaa diʼ ca dendxuhuiiniʼ ca chuʼcaʼ stúbicaʼ. Riuuláʼdxicame chúʼcame lade xcaadxi dendxuʼ ne ridxíbicame ora rireecame de lade xcaadxi. Yanna, pa cueechú pastor ca ti dendxuhuiiniʼ para gusiándabe laa, ¿ñee riníʼ nga cayuninabe laame la? ¡Coʼ xa! Nánnabe pa gudiibe lugar guiaana dendxuhuiiniʼ ca lade xcaadxi dendxuʼ la? zacá guendahuará ca laacame. Nga runi napa xidé cueechube dendxuhuiiniʼ ni huará ca para gápabe xcaadxi dendxuʼ (bichaaga ni né Levítico 13:3, 4).

11. a) ¿Xiñee zanda guchaaganu ti binni ni guca expulsar né ti dendxuhuiiniʼ ni huará? b) ¿Xi zanda gacané ca binni ni maʼ guca expulsar?

¹¹ Zanda guininu zeeda gaca ti binni ni guca expulsar casi dendxuhuiiniʼ ni guleechú pastor ca purtiʼ casi ñaca huarabe nezalú Jehová (Sant. 5:14). Cásica zanda guicá ti guendahuará binni, ora maʼ bixeleʼ tuuxa de Jehová, zanda gucaa xcaadxi guni cosa ni cadi jneza. Nga runi nuu biaje napa xidé cueechúcabe binni ca de ndaaniʼ congregación. Ora ricaacabe disciplina riʼ, rusihuinni ni pabiáʼ nadxii Jehová ca dendxuhuiiniʼ ni nuu ndaaniʼ congregación, zanda chindani ndaaniʼ ladxidóʼ binni ni biʼniʼ pecar ca ne gucaani laa gaca arrepentir. Neca nuube expulsadu, zándaruʼ chebe reunión ne gucaadiágabe stiidxaʼ Dios ni zacané laabe guquídxibe fe stibe sti biaje. Laaca zanda guicaabe publicación para gúʼndabe ne gúʼyabe programa JW Broadcasting^®. Ne ora guʼyaʼ ca ancianu cuchaabe, gatigá zanda gudiicaʼ conseju laabe ne zacanecaʼ laabe chuʼbe gaxha de Jehová ne gácabe testigu stiʼ Jehová sti biaje. *

12. ¿Xii nga ni jneza zanda guni ca ancianu pa qué náʼ ti pecador gaca arrepentir?

 ¹² Nabé risaca gánnanu ca binni ni biʼniʼ pecar ni qué náʼ gaca arrepentir nga ca ni raca expulsar de ndaaniʼ congregación. Nanna ca ancianu cadi guendariguite ni. Ne laaca nánnacabe runi disciplinar Jehová binni dede biaʼ caquiiñeʼ si (Jer. 30:11). Nadxiicabe ca hermanu stícabe ne qué racaláʼdxicabe gúnicabe xiixa ni guxheleʼ laacaʼ de Jehová. Peru nuu biaje, ni jma jneza nga cueecabe binni ni biʼniʼ pecar ca de ndaaniʼ congregación.

13. ¿Xiñee gupa xidé guca expulsar ti xpinni Cristu ndaaniʼ congregación de Corinto?

¹³ Guidúʼyanu xi biʼniʼ apóstol Pablo lu primé siglu né ti binni ni biʼniʼ ti pecadu ne qué náʼ gaca arrepentir. Cayuni xpinni Cristu de Corinto que ti cosa ni qué riuulaʼdxiʼ Jehová, nabezanebe xheelaʼ bixhózebe. ¡Guizáʼ feu ngue ni cayúnibe! Maca gudxi Jehová guidxi Israel: «Hombre ni gapa relación sexual né xheelaʼ bixhoze la? Zusituí lú bixhoze. Guirópacabe naquiiñeʼ gáticabe» (Lev. 20:11). Qué zanda diʼ gabi Pablo ca hermanu de congregación de Corinto que naquiiñeʼ guuticaʼ hombre que, peru gúdxibe laacaʼ guni expulsarcaʼ laabe. Ni cayuni hombre que maʼ cacá ni caadxi hermanu de congregación que. Dede nuu tu laa guníʼ ique cadi malu pecadu ni cayúnibe que (1 Cor. 5:1, 2, 13).

14. ¿Ximodo bisihuinni Pablo biá hombre ni guca expulsar de congregación de Corinto, ne xiñee? (2 Corintios 2:5-8, 11).

¹⁴ Gudiʼdiʼ si tiempu, gunna Pablo maʼ bichaa hombre ni biʼniʼ pecadu que ne dxandíʼ maʼ guca arrepentir. Neca guníʼ binni mal de congregación que pur ni biʼniʼ hombre riʼ, gudxi Pablo ca ancianu que maʼ qué racalaʼdxiʼ guiníʼ ruʼ de laani. Ne laaca guniʼbe: «Lagaca nachaʼhuiʼ ra guni perdonartu laabe ne laquixhedxí ladxidoʼbe». Ne gúdxibe laacaʼ xiñee naquiiñeʼ gúnicaʼ ni: «Ti cadi guireebe gana purtiʼ nuube triste». Biá Pablo hombre ni guca arrepentir que. Qué racalaʼdxiʼ Pablo guiree hombre que gana ne chuʼ triste pur ni biʼniʼ dede guiníʼ ique maʼ qué zuni perdonar Dios laa (biindaʼ 2 Corintios 2:5-8, 11).

15. ¿Ximodo rusihuinni ca ancianu riacaʼ ne runi disciplinarcaʼ ora caquiiñeʼ?

¹⁵ Cásica runi Jehová, ca ancianu laaca riuuláʼdxicaʼ gusihuínnicaʼ riacaʼ binni.  Zudiicabe disciplina nadipaʼ ora caquiiñeʼ gúnicabe ni, peru laaca riácabe ora ruuyacabe nuu razón para gúnicabe ni. Pa qué guni disciplinárcabe ti binni ni cayuni ti pecadu, qué zusihuínnicabe cayácabe laa, sínuque cudiicabe lugar laa guni ni gapa gana. Yanna, ¿ñee ca ancianu si nga naquiiñeʼ gusihuínnicaʼ riacaʼ tuuxa la?

16. Casi ná Proverbios 21:13, ¿xi runi Jehová né ca binni ni qué riá?

¹⁶ Guiranu ca xpinni Cristu, naquiiñeʼ guianu cásica runi Jehová ni. ¿Xiñee yaʼ? Purtiʼ qué rucaadiágabe ca ni qué riá binni (biindaʼ Proverbios 21:13). Cumu racaláʼdxinu gucaadiágabe ca oración stinu la? rúninu stipa guianu xcaadxi ne cadi gácanu naduxhuʼ né laacaʼ. Lugar de gácanu ti «binni ni qué riná gucaadiaga ora guinabaʼ ti pobre laa xiixa la?», siempre naquiiñeʼ chuʼnu listu para gucaadiáganu ti xpinni Cristu ni cayacaná. Ne laaca rinándanu conseju ni rudii Biblia laanu: «Ti binni ni qué riá la? laaca qué ziácabe laa ora gaca juzgar» (Sant. 2:13). Pa humilde laanu, zánnanu laaca caquiiñeʼ guiácabe laanu. Ne nga zucaa laanu chuʼnu dispuestu guianu xcaadxi binni. Ne naquiiñeʼ gusihuínninu ni ora guibiguetaʼ ti binni ni maʼ guca arrepentir ndaaniʼ congregación.

17. ¿Ximodo bisihuinni rey David dxandíʼ riá?

¹⁷ Lu Biblia ridxélanu ejemplu ni rusiidiʼ laanu guianu xcaadxi ne cadi gácanu naduxhuʼ né laacaʼ. Guiníʼ íquenu de rey David, laa guca ti hombre ni bisihuinni dxandíʼ riá. Neca gucalaʼdxiʼ Saúl ñuuti laabe, biabe hombre que purtiʼ Dios peʼ nga gulí laa para gaca rey ne qué nuquíxebe laa ni biʼniʼ laabe (1 Sam. 24:9-12, 18, 19).

18, 19. Bizeeteʼ chupa biaje ra qué nusihuinni David riá.

¹⁸ Peru laaca guyuu ora qué ñá diʼ David binni. Guininu ni bizaaca ti dxi, ti hombre ni nabé neciu láʼ Nabal, gudindené ne qué niná nudii guendaró David né ca xpinni. Guizáʼ bidxiichi David pur ngue ne guníʼ zuuti Nabal ne ca xpinni. Cumu nagueendaca guniʼné, Abigaíl xheelaʼ Nabal, David, ne bíʼnini né diidxaʼ nadóʼ né respetu la? ngue runi maʼ qué ñuuti David binni (1 Sam. 25:9-22, 32-35).

¹⁹ Ti biaje, guníʼ profeta Natán historia stiʼ ti hombre ricu ni gulaʼnaʼ ti dendxuhuiiniʼ stiʼ ti hombre pobre. Guizáʼ bidxiichi David ora binadiaga ni ne guníʼ: «¡Casi peʼ nabani Jehová, naquiiñeʼ gatiʼ hombre biʼniʼ nga!» (2 Sam. 12:1-6). Nanna David lu ley stiʼ Moisés que ná pa cuanaʼ tuuxa ti dendxuʼ napa xidé gudii tapa dendxuʼ para quixe ni gulaʼnaʼ que (Éx. 22:1). Peru qué ñá diʼ David hombre ni gulaʼnaʼ que ora guníʼ naquiiñeʼ gátibe. Biquiiñeʼ Natán ejemplu que para gacané David guiene jma malu ca cosa ni biʼniʼ ne biá Jehová laa peru laa qué ñá hombre ni biquiiñeʼ Natán lu ejemplu que (2 Sam. 12:7-13).

20. ¿Xi rizíʼdinu pur ni bizaaca David?

 ²⁰ Raca ridúʼyanu ora bidxiichi David ne qué nucueeza laa, guníʼ naquiiñeʼ gatiʼ Nabal ne ca xpinni. Ne despué, casi zebe guniʼbe naquiiñeʼ gatiʼ hombre ni guníʼ Natán lu ejemplu que. Ne zándaca guiníʼ íquenu pa naca David ti hombre nachaʼhuiʼ, ¿xiñee guniʼbe naquiiñeʼ gatiʼ hombre ni gulaʼnaʼ ti dendxuhuiiniʼ que? Peru cadi guiaandaʼ laanu xii ngue cazaaca David. Maʼ nuabe donda purtiʼ maʼ bicheebe. Naquiiñeʼ gánnanu pa nadipaʼ modo runi juzgarnu binni, nga riníʼ maʼ cadi galán diʼ nuunu nezalú Jehová. Jesús guníʼ: «Cadi guni juzgartu. [...] Purtiʼ modo guni juzgartu xcaadxi zacaca guni juzgárcabe laatu» (Mat. 7:1, 2). Nga runi cadi gácanu naduxhuʼ né binni ne gúninu stipa guianu xcaadxi casi runi Dios stinu ni.

21, 22. ¿Ximodo zanda gusihuínninu rianu binni?

²¹ Cadi naquiiñeʼ guinísinu rianu binni, sínuque laaca naquiiñeʼ gusihuínninu ni. Guiranu zanda guiníʼ íquenu tu binni gacanenu ndaaniʼ familia stinu, ndaaniʼ congregación o lu territorio stinu. Zándaca zadxélanu stale modo gusihuínninu rianu laacabe. ¿Ñee runibiaʼnu tuuxa ni caquiiñeʼ quixhedxinu ladxidóʼ la? ¿Ñee zanda gudiʼnu ni gobe o guyúbinu xcaadxi modo gacanenu laabe? ¿Ñee nuu tuuxa ni deruʼ biguetaʼ de ndaaniʼ xquidxi Jehová, ni caquiiñeʼ tu cuʼ gana laa ne tu quixhedxí ladxidóʼ la? ¿Ñee zanda chinenu esperanza stiʼ ca noticia galán ra nuu xcaadxi binni la? Ndiʼ nga caadxi modo zanda gusihuínninu rianu binni (Job 29:12, 13; Rom. 10:14, 15; Sant. 1:27).

²² Pa chuʼnu listu, zudiʼnu cuenta nuu stale hermanu ni zanda gusihuínninu rianu laacaʼ. Pa gusihuínninu cualidad riʼ, zusiéchenu Bixhózenu ni nuu guibáʼ, Dios ni nabé riá laanu.