Gule lu iza 1955, napaʼ xhupa bicheʼ ne naa nga xhuncu. Biniiseʼ gaxha de costa ni nuu ladu gueteʼ de Finlandia, ti lugar ni runibiáʼcabe yanna casi Vantaa.

Guyuunisa jñaaʼ casi testigu stiʼ Jehová ante galeʼ. Peru bixhozeʼ qué ñuulaʼdxiʼ gúcabe Testigu ne gudxi laabe cadi gusiidibe laadu de lu Biblia ne cadi chinebe laadu reunión. Ngue runi, ora qué guinni bixhozeʼ nga rusiidibe laadu de Jehová.

Dede dxi nahuiineʼ gudixheʼ iqueʼ cadi gucheeniáʼ Jehová. Dxi napaʼ gadxe iza, bidxiichiné maestra stinneʼ naa purtiʼ qué ninaʼyaʼ ñahuaʼ verilättyjä (ti panhuiiniʼ ni nuchaʼ rini ni rócabe ndaaniʼ guidxi Finlandia). Gudiebe xhagaʼ para guxhélebe ruaaʼ ne gucaláʼdxibe niguube ti ndaa de laani ndaaniʼ ruaaʼ né ti trinchi. De ti golpe bisaabeʼ trinchi que layú.

Dxi napaʼ 12 iza, guti si bixhozeʼ, maʼ gunda guyaaʼ reunión. Cumu nabé bizaalaʼdxiʼ ca hermanu naa la? nga bicaa naa guneʼ progresar. Bizuluáʼ biindaʼ Biblia guiráʼ dxi ne bineʼ estudiar chaahueʼ ca publicación stinu. Ni bineʼ ca gucané ni naa chuaanisaʼ 8 de agosto de 1969, dxi napaʼ 14 iza.

Beeda gacaʼ precursor regular binduuxeʼ siaʼ scuela. Chupa chonna semana despué, yendezaʼ Pielavesi, ti guidxi ni riaana galahuiʼ de guidubi naca guidxi Finlandia.

 Ne racá nga binebiaʼyaʼ Sirkka, gunaa ni bichaganayaʼ. Ni jma guyuuladxeʼ de laabe nga nácabe ti binni ni napa modestia ne nabé nadxiibe Jehová. Qué ruyúbibe gusisaca xcaadxi laabe ne laaca qué riuuláʼdxibe gápabe cosa risaca. Guirópadu racaláʼdxidu gúnidu jma lu xhiiñaʼ Jehová ne nuudu dispuestu gúnidu intiica dxiiñaʼ gudiicabe laadu. Bichaganadu 23 de marzo de 1974. Ne lugar de ñuudu luna de miel la? guyuudu yeguni servirdu ndaaniʼ guidxi Karttula, ti lugar ra caquiiñeʼ Testigu para guni predicar.

Dede dxi bichaganadu, cusihuinni Jehová zudii laadu guiráʼ ni caquíʼñedu pa gúnidu ni ná Reinu stiʼ Dios primé lu xquendanabánidu (Mat. 6:33). Dxi nuudu Karttula qué ñápadu carru, ngue runi biʼniʼ viajardu lu bicicleta. Peru tiempu nanda la? nagana guireʼnedu bicicleta. Ne cumu guizáʼ naroʼbaʼ territorio stiʼ congregación que la? caquíʼñedu ti carru, peru qué gápadu bueltu para sidu ni.

Ti dxi málasi beeda ganna tobi de ca bicheʼ laadu ne gúdxibe laadu zanda guiaananedu carru stibe. Qué ninábabe laadu nin ti bexu, nin saca seguru stini. Ni caquiiñeʼ si gúnidu nga caʼdu gasolina ndaaniʼ ni. ¡Yanna huaxa maʼ nápadu ti carru!

Bisihuinni Jehová zudii laadu guiráʼ ni caquíʼñedu. Ni caquiiñeʼ si nga gúnidu ni ná Reinu stibe primé lu xquendanabánidu.

Lu iza 1978, dxi nuudu lu Escuela del Servicio de Precursor, Raimo Kuokkanen, a tobi de ca instructor stidu, guluu gana laadu para guinábadu chuudu Escuela de Galaad. Ne pur ngue gudixhe íquedu guizíʼdidu inglés para guni cumplirdu ca requisitu ni caquiiñeʼ ti ganda chuudu. Peru maʼ qué nuséʼndadu solicitud stidu purtiʼ lu iza 1980 biʼniʼ invitárcabe laadu chiguni servirdu ndaaniʼ sucursal ni nuu Finlandia. Tiempu que la? qué randa rinabaʼ ca betelita checaʼ Galaad. Cumu nuudu gúnidu ni ná Jehová ra racalaʼdxiʼ ne cadi ra rábidu la? ngue runi gucuaadu invitación que. Peru qué nusaana de nizíʼdidu inglés pa málasi guni invitárcabe laadu chuudu Galaad.

Chupa chonna iza despué, biʼniʼ aprobar Grupu ni Zániru zanda guinabaʼ ca betelita checaʼ  Galaad. Ngue runi nagueendaca biséʼndadu solicitud stidu, peru cadi purtiʼ maʼ qué racaláʼdxidu chuʼdu Betel, sínuque ni racaláʼdxidu ngue —pa guni cumplirdu ca requisitu que— chigacanedu ra jma caquiiñeʼ. Biʼniʼ invitárcabe laadu chuudu clase 79 stiʼ Galaad ne guca graduardu lu beeu septiembre de 1985. ¿Paraa biseendacabe laadu yaʼ? ¡Colombia!

Ora yendadu Colombia, biseendacabe laadu chigúnidu dxiiñaʼ ndaaniʼ sucursal stiʼ guidxi ca. Bineʼ stipa guneʼ xhiiñaʼ jneza, peru despué de ti iza guníʼ iqueʼ caquiiñeʼ gúnidu sti cosa. Ngue nga primé ne últimu biaje gunabaʼ guchaacabe asignación stidu. Ngue runi biseendacabe laadu casi misioneru ndaaniʼ guidxi Neiva, ti lugar láʼ Huila.

Nabé riuuladxeʼ guneʼ predicar. Tiempu gulezaʼ Finlandia, dxi caʼruʼ guichaganaʼyaʼ ne cayuneʼ de precursor, nuu biaje bineʼ predicar dede siadóʼ hasta huaxhinni. Ne nacubi bichaganaʼyaʼ Sirkka la? guidubi dxi runi predicardu. Ora riuudu lu ca territorio ni riaana zitu, nuu biaje rásidu ndaaniʼ carru. Zaqué qué runítidu tiempu ne nagueendaca ruzulú runi predicardu sti dxi que.

Gucané asignación riʼ laadu guni predicardu né stale guendanayecheʼ cásica bínidu ni dxiqué. Bizulú biroobaʼ congregación ra nuudu que, ca hermanu ne ca hermana de Colombia nabé agradecidu laacaʼ, nadxiicaʼ ne runi respetarcaʼ xcaadxi.

Gaxha de Neiva nuu caadxi guidxihuiiniʼ ra gastiʼ nin ti Testigu. Peligroso ca lugar ca para ca binni de sti guidxi purtiʼ nabé nuudinde binni raqué. ¿Ximodo ganna ca binni que ni rusiidiʼ Biblia pue? Nisi laani maʼ caníʼ iqueʼ. Ngue runi bizuluáʼ bineʼ orar Jehová ne gunabaʼ laa guidxelaʼ ti binni de ca guidxihuiiniʼ ca, ni nabeza Neiva, para gueeda gaca Testigu. Laaca gunabaʼ laabe, despué de chúʼnisa binni ca, gaca ti binni espiritual ne quixhe ique guibiguetaʼ xquidxi para guni predicar. Para naa la? ngue nga ni caquiiñeʼ gaca, peru maca nannaʼ zuni Jehová xiixa jma galán que ni canabaʼ laa que.

Despué, bizulú bidieeʼ estudiu ti joven láʼ Fernando González, ni nabeza Algeciras, tobi de ca guidxihuiiniʼ ra gastiʼ nin ti Testigu. Guiráʼ semana runi viajarbe 50 kilómetru para gúnibe dxiiñaʼ ndaaniʼ guidxi Neiva. Nabé raca prepararbe ante guni estudiardu ne bizulú guyebe reunión. Dede primé semana cacaabe estudiu, bizulú bisiidibe caadxi binni de guidxihuiiniʼ ra nabézabe que ni caziidibe.

Lu beeu enero de iza 1990, guyuunisa Fernando, xhoopaʼ beeu despué de cacaa estudiu, ne nagueendaca gúcabe precursor regular. Yanna huaxa maʼ nuu ti Testigu ndaaniʼ guidxihuiiniʼ Algeciras, ngue runi maʼ gunda biseendaʼ sucursal precursor especial raqué. Ne lu beeu febrero de 1992 maʼ guyuu ti congregación ndaaniʼ guidxihuiiniʼ ca.

Peru cadi ndaaniʼ guidxi Algeciras si biʼniʼ predicar Fernando. Despué de bichaganabe Olga, yendézacabe San Vicente del Caguán, sti guidxihuiiniʼ ra gastiʼ Testigu. Laaca gucanécabe chuʼ ti congregación raqué. Ne lu iza 2002 guca nombrar  Fernando, superintendente de circuito ne dede yanna cayúnicabe dxiiñaʼ ca.

Ni bizaaca riʼ, rusiidiʼ ni naa pabiáʼ risaca guinabaʼ Jehová ni peʼ caquiiñeʼ lu ca asignación ni napaʼ. Laabe zanda gúnibe stale cosa ni laanu qué zanda gúninu purtiʼ stibe dxiiñaʼ riʼ, laabe nga «Dueñu stiʼ cosecha» ca (Mat. 9:38).

Lu iza 1990, biʼniʼ nombrárcabe naa superintendente, ne primé circuito yegánnadu nga Bogotá, Colombia. Naa ne Sirkka nácadu cásica restu binni, ne nin peʼ ti graciahuiiniʼ qué gápadu. Laaca cadi biaʼdu cuézadu ndaaniʼ ti guidxi naroʼbaʼ. Ngue runi nabé bidxíbidu asignación que. Peru biʼniʼ cumplir Jehová ni riete lu Filipenses 2:13: «Dios nga cudii stipa laatu, ne cayacané laatu para gápatu deseu ne poder para gúnitu guiráʼ ni riuuláʼdxibe».

Gudiʼdiʼ si ti tiempu, biseendacabe laadu ti circuito ni nuu Medellín, guidxi ni bizeeteʼ ra bizulunu que. Cumu maʼ biaa ca binni que guiráʼ guendaquéiquiiñeʼ raca neza ra nabézacaʼ la? dede maʼ qué ridxíbicaʼ. Rietenalaʼdxeʼ ti dxi laga cudieeʼ estudiu, málasi binadiágadu bizulú caree tiru. Gucalaʼdxeʼ ñataʼ lu pisu que, peru estudiante stinneʼ la? cayuundaʼ casi ora cadi cazaaca gastiʼ. Biluxe biindasibe gúdxibe naa chiguireebe ti ratuhuiiniʼ. Qué nindaa, biguetanebe chupa hombrehuiiniʼ stibe, ne guizáʼ tranquilu nuube ora gúdxibe naa: «Bitiidilaʼdxiʼ, peru gupaʼ xidé yecaaʼ ca xiiñeʼ».

Peru cadi ngasi sustu gucuaadu. Ti dxi cayuni predicardu de yoo pur yoo, málasi biiyaʼ zeeda guxooñeʼ xheelaʼ ra nuaaʼ, dede naté biiyaʼ lube. Guizáʼ cadxíbibe gúdxibe naa bicuaagu tuuxa laabe, ne naa laaca bidxibeʼ. Peru despué bidiʼdu cuenta cadi xheelaʼ diaʼ ngue cucuaagu hombre que, sínuque ti señor ni zeeda gaxha de laabe.

Ne ra gudiʼdiʼ tiempu biaʼdu guidúʼyadu ca guendaquéiquiiñeʼ que. Neca cadiʼdiʼ ca hermanu que lu ca guendanagana riʼ, guizáʼ bidxagayaadu guidúʼyadu cayuni huantárcabe ne nápacabe stipa para gudxiilúcabe ca ni. Raqué nga biénedu, pa cayacané Jehová laacabe la? laaca zacané laadu. Siempre yenándadu ca conseju ni bidii ca ancianu de ca congregación que laadu, nabé gúpadu laadu ne bisaanadu ca cosa ca lu náʼ Jehová.

Dxandíʼ, cadi guiráʼ diʼ biaje guyuʼdu lu preligru. Rietenalaʼdxeʼ ti dxi yeganna’ ti binni, ne málasi binadiagaʼ casi ora cadinde diidxaʼ chupa gunaa. Naa la? cadi cá iqueʼ gannaʼ xii ngue cazaaca, peru gudxi dueña stiʼ yoo que naa cueeʼ luaʼ para guuyaʼ xi cazaaca. ¡Guca si ni chupa lorohuiiniʼ ni cayuni modo riníʼ ca vecinu que!

Lu iza 1997, biʼniʼ nombrárcabe naa instructor stiʼ Escuela de Entrenamiento Ministerial. b Nabé guyuuladxeʼ chaaʼ ca scuela ca, peru qué ñuu dxi niníʼ iqueʼ pa ñapaʼ privilegiu nusiideʼ lu tobi de laacani.

 Despué laaca gucaʼ superintendente de distrito. Peru dxi maʼ qué ñuu tipu asignación ca la? gucaʼ superintendente de circuito sti biaje. Maʼ ziniáʼ jma de 30 iza casi instructor ne superintendente. Maʼ gucuaaʼ stale ndaayaʼ biaʼ tiempu cayuneʼ ca dxiiñaʼ riʼ, peru laaca huadxaagaluáʼ guendanagana.

Nannaʼ napaʼ ti carácter nadipaʼ. Ne huayacané ni naa ora ridideʼ lu guendanagana naroʼbaʼ, peru nuu biaje ruyubeʼ gaca chaahuiʼ xiixa cosa ndaaniʼ congregación modo rabeʼ. Nuu biaje nadipaʼ modo rabeʼ ca hermanu ca naquiiñeʼ gannaxhiicaʼ ca hermanu ne guiénecaʼ laacabe. Ni nayaahui nga, óraque la? ngue peʼ nga ca cualidad ni caquiiñeʼ gusihuinneʼ (Rom. 7:​21-23).

Nuu biaje riuaaʼ triste pur modo nacaʼ (Rom. 7:24). Ti dxi guizáʼ feu bineʼ sentir ne gudxeʼ Jehová ni jma galán nga maʼ cadi gacaʼ misioneru ne guibiguetaʼ Finlandia. Peru dxi que, lu reunión binadiagaʼ xiixa ni gucané naa gudieeʼ cuenta cadi naquiiñeʼ gusaanaʼ asignación stinneʼ ne guneʼ stipa guchaaʼ modo naa. Qué ziuu dxi gusiaandaʼ modo bicabi Jehová oración stinneʼ. Ne laaca nabé rudieeʼ xquixe peʼ laabe purtiʼ cayacanebe naa guchaaʼ modo naa.

Naa ne Sirkka, qué ridxéladu ximodo gudiʼdu xquixe peʼ Jehová purtiʼ maʼ xadxí cayúnidu xhiiñaʼ lu serviciu de tiempu completu. Laaca rudieeʼ xquixe peʼ laabe purtiʼ bidiibe naa ti gunaa ni nabé nadxii naa ne ni nabé huayacané naa lu ca iza riʼ.

Mayaca gusaaʼ 70 iza, nga runi zusaanaʼ de gaca instructor ne superintendente. Peru qué riuaaʼ triste pur laani. ¿Xiñee yaʼ? Purtiʼ nannaʼ dxicheʼ para gusisácanu Jehová cadi caquiiñeʼ peʼ gápanu xiixa privilegiu risaca. Ni jma risaca nga gácanu humilde ra gúninu ni nabe ne gusisácanu laabe de guidubi ladxidoʼno (Miq. 6:8; Mar. 12:​32-34).

Lu guidubi xquendanabaneʼ huayapaʼ stale privilegiu nabé galán. Ne cadi purtiʼ si nannaʼ o jma risacaʼ que xcaadxi, sínuque bidii Jehová ca ni naa pur guendanachaʼhuiʼ stiʼ neca nuu ra naquiiñeʼ guchaaʼ. Nannaʼ dxicheʼ pa qué ñacané Jehová naa la? qué ñanda ñuneʼ cumplir nin tobi de ca asignación stinneʼ. Zanda peʼ guinieeʼ jma naroʼbaʼ poder stiʼ Dios que ca debilidad stinneʼ (2 Cor. 12:9).