1. ¿Xi guníʼ David de Jehová?

¿ÑEE dxandíʼ humilde Jehová la? Dxandíʼ pue, purtiʼ David guníʼ: «Lii rudiiluʼ naa escudu stiluʼ ni rulá, ne rusisaca humildad stiluʼ naa» (2 Sam. 22:36; Sal. 18:35). Ora bicaa David ca diidxaʼ riʼ la? zándaca caníʼ íquebe dxi guyé profeta Samuel ra lidxi bixhózebe para cuí tu gaca rey de guidxi Israel. Neca David nga ni jma nahuiiniʼ lade xhono xiiñiʼ bixhoze, gulí Jehová laabe para gácabe rey lugar stiʼ Saúl (1 Sam. 16:1, 10-13).

2. ¿Xi zadúʼyanu lu artículo riʼ?

² Nanna dxíchinu guyuu David de acuerdu né ni guníʼ ti salmista de Jehová: «Ratagudaabe para gúʼyabe guibáʼ ne guidxilayú, para guindísabe ca humilde de layú. Rindísabe pobre [...] para gucuibe laacaʼ cueʼ ca binni nachaʼhuiʼ» (Sal. 113:6-8). Lu artículo riʼ, zadúʼyanu guiráʼ biaje bisihuinni Jehová humilde laa ne xi zanda guizíʼdinu de laabe. Despué zadúʼyanu nuu cosa ni qué zanda gúninu casi rusiidiʼ ejemplu stiʼ rey Saúl, profeta Daniel ne Jesús laanu.

3. ¿Ximodo runi tratar Jehová laanu, ne xi rusihuinni ni?

³ Ni rusihuinni humilde Jehová nga modo runi tratarbe ca xpínnibe ni naca imperfectu. Qué rudiisibe lugar guni adorarnu laabe, sínuque laaca ruuyabe laanu casi xhamígube (Sal. 25:14). Zanda gaca xhamígunu laabe purtiʼ bidiibe xiiñibe para gatiʼ pur ca pecadu stinu. ¡Rihuinni dxíchica guizáʼ riabe laanu!

4. ¿Xi maʼ bidii Jehová laanu, ne xiñee?

 ⁴ Guzéʼtenu sti cosa ni rusihuinni humilde Jehová. Neca cadi caquiiñeʼ guzaʼbe laanu para cuinu xi gúninu né xquendanabáninu la? bíʼnibe ni. Bizaʼbe laanu casi laabe ne rudiibe lugar guicaanu ca decisión stinu. Neca gastiʼ nga laanu nezalube, racaláʼdxibe gúninu ni nabe purtiʼ nadxiinu laabe ne purtiʼ nánnanu pa gúninu ni nabe zié ni laanu galán (Deut. 10:12; Is. 48:17, 18). Guizáʼ rudiʼnu xquixe peʼ Jehová purtiʼ humilde laa.

5. ¿Ximodo rusiidiʼ Jehová laanu gácanu humilde? (Biiyaʼ dibuju ni zeeda lu portada).

⁵ Rusiidiʼ Jehová laanu gácanu humilde pur modo runi tratarbe binni ni bizaʼbe. Neca laabe nga binni ni jma nuu xpiaaniʼ lu universu, rucaadiágabe sugerencia ni gudii tuuxa laabe. Guzéʼtenu ti ejemplu, bidiibe lugar gacané xiiñibe laabe dxi guyáʼ guiráʼ xixé cosa (Prov. 8:27-30; Col. 1:15, 16). Ne neca Jehová nga ni jma napa poder la? rudiibe autoridad xcaadxi binni. Guzéʼtenu ti ejemplu, bíʼnibe Jesús Rey stiʼ Reinu stibe ne zudiibe caadxi autoridad 144,000 binni para guni mandárnecaʼ Jesús (Luc. 12:32). Nanna dxíchinu biʼniʼ prepararbe Jesús para gaca Rey ne Sumo Sacerdote (Heb. 5:8, 9). Laaca cusiidibe ca ni chiguni mandarné Xiiñibe, peru qué rudiibe laacaʼ dxiiñaʼ riʼ ne despué guni controlarbe guiráʼ ni rúnicaʼ. Lugar de nga la? nápabe confianza zúnicaʼ ni nabe (Apoc. 5:10).

6, 7. ¿Ximodo zanda chinanda ca ni napa autoridad ejemplu stiʼ Bixhózenu ni nuu guibáʼ?

⁶ Pa Bixhózenu ni nuu guibáʼ rudii autoridad xcaadxi binni neca cadi caquiiñeʼ tu gacané laa, jma nápanu razón para gúninu ni. Yanna, ¿ximodo zanda chinanda  ca ni naca xaíque ndaaniʼ familia ne ca ancianu de congregación ejemplu stiʼ Jehová yaʼ? Ora rudiicaʼ dxiiñaʼ xcaadxi hermanu o familia sticaʼ naquiiñeʼ gucueezacaʼ laacaʼ para cadi guni controlarcaʼ guiráʼ ni rúnicabe. Zacá la? qué zaca si ti dxiiñaʼ, sínuque laaca zuni capacitárcabe xcaadxi ne zacanécabe laacaʼ gápacaʼ confianza (Is. 41:10). ¿Xiruʼ zanda guiziidiʼ ca ni napa autoridad de ejemplu stiʼ Jehová?

⁷ Biblia ná rucaadiaga Jehová opinión stiʼ ca ángel (1 Rey. 22:19-22). ¿Ximodo zanda chinanda ca ni napa xiiñiʼ ejemplu stiʼ Jehová yaʼ? Ora zanda, guinabadiidxacabe ca xiiñicabe ximodo rábicaʼ caquiiñeʼ gaca xiixa dxiiñaʼ. Ne pa ganda la? guicaacabe sugerencia sticaʼ.

8. ¿Ximodo bisihuinni Jehová gupa paciencia Abrahán ne Sara?

⁸ Rusihuinni Jehová humilde laa ora rapa paciencia. Guzéʼtenu ti ejemplu, rápabe paciencia ca xpínnibe ora rinabadiidxacaʼ laabe né respetu xiñee chigúnibe xiixa. Guietenaláʼdxinu ximodo bicaadiágabe Abrahán ora gunabadiidxaʼ laabe xiñee chigunitilube Sodoma ne Gomorra (Gén. 18:22-33). Ne cadi guiaandaʼ laanu xi bíʼnibe dxi bixidxi Sara, xheelaʼ Abrahán, ora binadiaga zaca xiiñiʼ neca maʼ huaniisi. Lugar de nidxiichibe la? biʼniʼ tratarbe laa né respetu.

9. ¿Xi zanda guiziidiʼ ca ni napa xiiñiʼ ne ca ancianu de ejemplu stiʼ Jehová?

⁹ Pa nápaluʼ xiiñiluʼ o ancianu de congregación lii, ¿xi zanda guiziidiluʼ de ejemplu stiʼ Jehová? Guníʼ ique xi rúniluʼ ora rinabadiidxaʼ xiiñiluʼ o tuuxa hermanu lii xiñee cacaaluʼ xiixa decisión. ¿Ñee nagueendaca riguu jnézaluʼ laabe la? ¿O rúniluʼ stipa guiéneluʼ laabe? Rihuinni dxichi ribeendú ca familia ne congregación ni galán ora rinanda ca ni napa autoridad ejemplu stiʼ Dios. Né ca ni maʼ bizéʼtenu riʼ, maʼ guninu xi rusiidiʼ Jehová laanu purtiʼ humilde laa. Yanna, guidúʼyanu ejemplu stiʼ caadxi binni ni bibani tiempu gucuá Biblia ne guidúʼyanu xi zanda guizíʼdinu ra bisihuínnicabe nuu cosa ni qué zanda gúnicabe.

10. ¿Xi riquiiñeʼ Jehová para gusiidiʼ laanu?

¹⁰ Cumu Jehová nga maestru ni jma nanna gusiidiʼ la? cusiidibe laanu né caadxi ejemplu ni zeeda lu Stiidxabe (Is. 30:20, 21). Zanda guiníʼ íquenu ni bizaaca ca binni ni bibani dxi gucuá Biblia ca ni bisihuinni ca cualidad ni riuulaʼdxiʼ Dios, casi humildad ne xcaadxi ni qué nusihuinni cani (Sal. 37:37; 1 Cor. 10:11).

11. ¿Xi rizíʼdinu de ni bizaaca rey Saúl?

¹¹ Guiníʼ íquenu ni bizaaca rey Saúl. Dxi joven laabe, gúnnabe nuu cosa ni qué zanda gúnibe ne biʼniʼ sentirbe guirutiʼ nácabe dede guca nagana para laabe guicaabe jma dxiiñaʼ (1 Sam. 9:21; 10:20-22). Peru dxi maʼ nácabe rey, gúcabe orgulloso ne bíʼnibe cosa ni qué gápabe derechu gúnibe. Ti biaje, birá paciencia stibe laga cabézabe profeta Samuel. Lugar de ñánnabe nuu cosa ni qué zanda gúnibe ne ñápabe confianza zacané Jehová xquidxi, bíʼnibe sacrificiu neca cadi laabe naquiiñeʼ gúnibe ni. Ne pur ngue, maʼ qué ñuulaʼdxiʼ Jehová ni rúnibe ne despué gulee laabe de gácabe rey (1 Sam. 13:8-14). Guizíʼdinu de ni bizaaca rey riʼ ne gánnanu nuu cosa ni cadi laanu caquiiñeʼ gúninu.

12. ¿Ximodo bisihuinni Daniel humilde laa?

 ¹² Qué ñaca profeta Daniel casi Saúl, purtiʼ Daniel bisaana ti ejemplu galán para laanu. Biaʼ dxi bibánibe, gúcabe ti hombre humilde, gúnnabe nuu cosa ni qué zanda gúnibe ne biyúbibe gacané Jehová laabe. Guzéʼtenu ti ejemplu, dxi biquiiñeʼ Jehová laabe para guiniʼbe xi riníʼ bacaandaʼ gupa Nabucodonosor la? qué niníʼ Daniel laa biʼniʼ ni, sínuque gúcabe humilde ne guniʼbe Jehová nga biʼniʼ ni (Dan. 2:26-28). Ndiʼ rusiidiʼ laanu, pa riuulaʼdxiʼ ca hermanu ca discursu ni rudiʼnu o ribeendunu ni galán ora runi predicarnu, caquiiñeʼ guininu Jehová nga racané laanu. Gácanu humilde ne gánnanu qué zanda gúninu gastiʼ pa qué gacané Jehová laanu (Filip. 4:13). Pa gúninu ni, zinándanu ejemplu sicarú bisaana Jesús. Guidúʼyanu xiñee.

13. Casi ná Juan 5:19, 30, ¿xi rizíʼdinu de Jesús?

¹³ Neca Xiiñiʼ Dios nga Jesús ne perfectu laa la? siempre biyubi gacané Jehová laa (biindaʼ Juan 5:19, 30). Qué ñuu dxi ñaxha Jesús autoridad ni napa Bixhoze ni nuu guibáʼ. Filipenses 2:6 ná «qué niníʼ íquebe ñuube lugar stiʼ [Dios], ne ñácabe biaʼca laa». Gúnnabe pa guidubi rindá autoridad stibe, biʼniʼ respetarbe autoridad stiʼ Bixhózebe ne bizuubabe stiidxaʼ.

14. ¿Xi biʼniʼ Jesús dxi gunábacabe laa guni ti cosa ni qué gapa autoridad para guni?

¹⁴ Guiníʼ íquenu ni biʼniʼ Jesús dxi gunabaʼ jñaa discípulo Santiago ne Juan laabe cuiʼ ca xiiñiʼ ladu derechu ne ladu bigaʼ stibe ora guni mandarbe. Oraqueca bicabi Jesús laabe Bixhoze si ni nuu guibáʼ nga napa autoridad para gudii privilegiu ca (Mat. 20:20-23). Zacá bisihuínnibe nuu cosa ni qué zanda gúnibe. Gúcabe humilde ne qué ñuu dxi ñúnibe xiixa cosa ni qué ñabi Jehová laabe gúnibe (Juan 12:49). ¿Ximodo zanda chinándanu ejemplu galán stiʼ Jesús yaʼ?

15, 16. ¿Ximodo zanda chinándanu mandatu ni zeeda lu 1 Corintios 4:6?

¹⁵ Rusihuínninu humilde laanu cásica Jesús ora rúninu ni ná mandatu ni zeeda lu 1 Corintios 4:6: «Cadi gúnitu ni maʼ cadi cá lu Stiidxaʼ Dios». Nga runi, ora guinabaʼ tuuxa laanu ti conseju la? cadi casi ziuunu gábinu laabe primé ca cosa ni gueeda ndaaniʼ íquenu.  Ni jma jneza gúninu nga guluinu laabe ca conseju ni zeeda lu Biblia ne lu ca publicación ni nápanu. Zacá zusihuínninu humilde laanu, purtiʼ nánnanu nuu cosa ni qué zanda gúninu ne ca conseju stiʼ Jehová si nga ni jma «jneza» que ca conseju ni gudiʼnu tuuxa (Apoc. 15:3, 4).

¹⁶ Casi maʼ bidúʼyanu, ora humilde laanu ne nánnanu nuu cosa ni qué zanda gúninu, rusisácanu Jehová. Yanna guidúʼyanu ximodo laaca racané ca cualidad riʼ laanu guibáninu nayecheʼ ne chuʼnu tobi si né xcaadxi.

17. ¿Xiñee nayecheʼ nabani ca binni humilde ne ca ni nanna nuu cosa ni qué zanda guni?

¹⁷ Pa humilde laanu ne nánnanu nuu cosa ni qué zanda gúninu, zándaca jma nayecheʼ zabáninu. ¿Xiñee yaʼ? Purtiʼ ora nánnanu nuu cosa ni qué zanda gúninu, zudiʼnu lugar gacané xcaadxi laanu. Guietenaláʼdxinu dxi bisianda Jesús chii hombre napa lepra. Tobi si bibiguetaʼ para gudii xquixe peʼ laabe pur bisiándabe laa. Guca hombre riʼ humilde ne gúnnabe qué ñuu dxi ñándabe laasibe, ngue runi bidiibe xquixe peʼ ne bisisácabe Dios (Luc. 17:11-19).

18. Casi ná Romanos 12:10, ¿xi ribeendú ca binni humilde ne ca ni nanna nuu cosa ni qué zanda guni?

¹⁸ Casi guiráʼ ca binni humilde ne ca ni nanna nuu cosa ni qué zanda guni raca llevarcaʼ tutiica binni ne rápacaʼ jma xhamígucaʼ. ¿Xiñee yaʼ? Purtiʼ nánnacabe nuu binni napa cualidad galán ne rápacabe confianza laacaʼ. Laaca riéchecabe ora ruuyacabe cabeendú xcaadxi ni galán ra cayúnicaʼ ni ná Jehová, runi felicitárcabe  ne runi respetárcabe laacaʼ (biindaʼ Romanos 12:10).

19. ¿Xiñee cadi naquiiñeʼ gácanu orgulloso?

¹⁹ Peru ca binni orgulloso raca nagana para laacaʼ guni felicitarcaʼ xcaadxi ne racaláʼdxicaʼ guni felicitárcabe laacaʼ. Ruchaagacaʼ ni rúnicaʼ né ni runi xcaadxi ne ruyúbicaʼ guni ganarcaʼ laacabe. Ne lugar de gusiidicabe sti binni ne gudiicabe autoridad laacaʼ, guiráʼ ni laacabe rúnicabe, purtiʼ riníʼ íquecabe pa gúnicabe ni zaree ni jneza o modo racaláʼdxicabe. Ruyubi ca binni riʼ puru si para laacaʼ ne rápacaʼ envidia xcaadxi (Gál. 5:26). Huaxiéʼ rápacabe xhamígucabe. Nga runi, pa gudiʼnu cuenta cayácanu orgulloso, guinábanu Jehová gacané laanu guchaʼnu modo riníʼ íquenu ne cueenu ni de ndaaniʼ ladxidoʼno (Rom. 12:2).

20. ¿Xiñee caquiiñeʼ gácanu humilde ne gánnanu nuu cosa ni qué zanda gúninu?

²⁰ Rudiʼnu xquixe peʼ Jehová purtiʼ humilde laa. Ridúʼyanu modo rusihuínnibe cualidad riʼ ora runi tratarbe ca xpínnibe, ne racaláʼdxinu chinándanu ejemplu stibe. Laaca racaláʼdxinu chinándanu ejemplu stiʼ ca xpinni Dios de dxiqué ni guca humilde ne ni gupa privilegiu de sánecaʼ Dios. Qué chuʼ dxi gusaana de guni respetarnu ne gusisácanu Jehová purtiʼ laasibe runi merecerbe ni (Apoc. 4:11). Zacá ziuʼnu gaxha de Bixhózenu ni nuu guibáʼ, ni nadxii ca binni humilde ne ca ni nanna nuu cosa ni qué zanda guni.