1. ¿Xi zacané laanu chuuláʼdxinu guni estudiarnu ca profecía ni zeeda lu Biblia?

 TI HERMANU joven láʼ Ben guníʼ: «Guizáʼ riuuladxeʼ guneʼ estudiar ca profecía ni zeeda lu Biblia». ¿Ñee laaca runi sentirluʼ zacá la? o riníʼ íqueluʼ nagana ca profecía ca o ribee ca ni gana lii. Pa nga nga ni rizaacaluʼ la? zándaca guchaa modo riníʼ íqueluʼ ra guiene chaahuiluʼ xiñee bidii Jehová lugar guicaa lu Stiidxaʼ ca profecía ca.

2. ¿Xi zadúʼyanu lu artículo riʼ?

² Lu artículo riʼ zadúʼyanu xiñee caquiiñeʼ gunibiáʼ chaahuinu ca profecía ni zeeda lu Biblia ne xi caquiiñeʼ gúninu para ganda guni estudiarnu ca ni. Laaca zadúʼyanu chupa profecía ni zeeda lu libru stiʼ Daniel ne ximodo zanda gacané ca ni laanu ra guiénenu ni riníʼ ca ni.

3. ¿Xi caquiiñeʼ gúninu para guiénenu ca profecía ni zeeda lu Biblia?

³ Caquiiñeʼ guinábanu gacanécabe laanu para ganda guiénenu ca profecía ni zeeda lu Biblia. Quíxhenu ti ejemplu, guníʼ ique nuuluʼ ndaaniʼ ti guidxi ni qué runibiaʼluʼ peru ziné ti xhamíguluʼ lii ni runibiáʼ lugar que, nánnabe paraa peʼ nuutu ne runibiaʼbe guiráʼ ca calle que. ¡Aque galán nga yené xhamíguluʼ  lii! Zeeda gaca Jehová casi amigu ni bizéʼtenu lu ejemplu riʼ, nánnabe xi tiempu nabáninu ne xi chiguizaaca. Nga runi, para ganda guiénenu ca profecía ni zeeda lu Biblia caquiiñeʼ gácanu humilde ne guinábanu Jehová gacané laanu (Dan. 2:28; 2 Ped. 1:19, 20).

4. ¿Xiñee gucalaʼdxiʼ Jehová guicaa ca profecía ca lu Biblia? (Jeremías 29:11; biiyaʼ foto ca).

⁴ Ca padre ni nadxii xiiñiʼ racaláʼdxicaʼ guibani ca xiiñicaʼ galán ne ngaca nga ni racalaʼdxiʼ Jehová para ca xiiñiʼ (biindaʼ Jeremías 29:11). Peru laabe zanda guiniʼbe xi guiráʼ chiguizaaca despué. Nga runi, gucaláʼdxibe guicaa lu Stiidxabe ca profecía para ganda gánnanu ca cosa risaca ni chiguizaaca (Is. 46:10). Zeeda gaca ca profecía ca ti regalu ni rudii Bixhózenu ni nuu guibáʼ laanu purtiʼ nadxii laanu. ¿Peru ximodo nánnanu dxandíʼ zaca cumplir ca ni yaʼ?

5. ¿Xi zanda guiziidiʼ ca joven de ni bizaaca Max?

⁵ Ca joven Testigu ni rié scuela nuucaʼ lade binni ni huaxiéʼ runi respetar o qué lica runi respetar Biblia. Zándaca gucaa ca binni riʼ laacabe gápacabe duda lu ni runi crécabe. Guidúʼyanu ni bizaaca ti hermanu láʼ Max, laa guníʼ: «Dxi riaaʼ scuela, bizuluáʼ bineʼ dudar pa religión ni rusiidiʼ ni dxandíʼ nga ra riné bixhozeʼ ne jñaaʼ naa, ne pa dxandíʼ zeeda Biblia ca de Dios». ¿Xi biʼniʼ bixhózebe ne jñaabe yaʼ? Laabe guniʼbe: «Neca nuucabe xizaa pur laani, peru gúcacabe nachaʼhui né naa». Biquiiñeʼ bixhoze ne jñaa Max Biblia para bicábicaʼ ca pregunta stibe. Ne laabe laaca bíʼnibe xiixa. Max bizeeteʼ: «Bizuluáʼ bineʼ estudiar ca profecía ni zeeda lu Biblia ne gunieniaʼ xcaadxi joven ni nuu ndaaniʼ congregación de ni caziideʼ que». ¿Ximodo gucané ndiʼ laabe yaʼ? Laabe guniʼbe: «Ne ngue gucané naa gannaʼ dxicheʼ Dios nga guníʼ xi guicaa lu Biblia».

6. ¿Xi caquiiñeʼ gúninu, ne xiñee?

⁶ Pa casi Max guzulú gápaluʼ duda pa dxandíʼ ni rusiidiʼ Biblia la? cadi chuʼluʼ xizaa peru laaca cadi gusaanaluʼ ni zacasi, galán gúniluʼ xiixa. ¿Xiñee yaʼ? Purtiʼ ca duda ca zeeda gácacani casi tini. Pa nápanu xiixa nabé risaca ne gudiʼnu lugar guicaa tini ni ne qué gúninu gastiʼ la? zanda guniná tini ca ni ne gaca feu ni. ¿Ximodo zanda gáxhanu ca duda ni nápanu ni zeeda gaca casi tini lu ni runi crenu yaʼ? Galán guiníʼ íqueluʼ ndiʼ: «¿Ñee runeʼ cré ni ná Biblia chiguizaaca la?». Pa nápaluʼ duda riʼ caquiiñeʼ guni estudiarluʼ ca profecía ni maʼ guca cumplir. Yanna, ¿xi zacané lii yaʼ?

7. ¿Xi gucané Daniel guni estudiar ca profecía? (Daniel 12:10; biiyaʼ foto ca).

⁷ Galán chinándanu ejemplu stiʼ Daniel ora guni estudiarnu ca profecía. ¿Xiñee yaʼ? Purtiʼ ora biʼniʼ estudiar Daniel ca profecía, gunna xiñee cayuni ni: racaláʼdxibe gánnabe ni dxandíʼ. Ne sti cosa ni gucané laabe nga gácabe humilde. Gunna dxiichibe rudii Jehová guendabiaaniʼ ca ni runibiáʼ laa ne rinanda ca norma ni jneza ne nayaʼ stiʼ (Dan. 2:27, 28; biindaʼ Daniel 12:10). Ra biyubi Daniel gacané Jehová laa bisihuinni naca humilde (Dan. 2:18). Ne  laaca biʼniʼ estudiarbe ne guníʼ ique chaahuibe lu ni cayuundabe. Biʼniʼ estudiar chaahuibe Stiidxa Dios ni maca cá tiempu bibánibe que (Jer. 25:11, 12; Dan. 9:2). ¿Ximodo zanda chinándanu ejemplu stibe yaʼ?

8. ¿Xiñee runi estudiar caadxi binni ca profecía ni zeeda lu Biblia, peru laanu xi caquiiñeʼ gúninu?

⁸ Galán guiníʼ íqueluʼ xiñee cayúniluʼ ni. ¿Xiñee runi estudiarluʼ ca profecía ni zeeda lu Biblia? ¿Ñee purtiʼ racaláʼdxiluʼ gánnaluʼ ni dxandíʼ la? Pa zacá ni, zacané Jehová lii (Juan 4:23, 24; 14:16, 17). Peru nuu binni runi estudiar Biblia para si guidxela razón ni gusihuinni cadi de Dios zeeda ni ne zacá ganda gúnicaʼ ni racaláʼdxicaʼ ne laapecaʼ guicaacaʼ decisión xii nga ni jneza ne ni cadi jneza. Peru laanu ora guni estudiarnu ca profecía zeeda lu Biblia gúninu ni purtiʼ racaláʼdxinu gánnanu ni dxandíʼ. Ne para guiénenu ca ni caquiiñeʼ gápanu ti cualidad nabé risaca.

9. ¿Xi cualidad caquiiñeʼ gápanu para ganda guiénenu ca profecía ni zeeda lu Biblia, ne xiñee?

⁹ Guca humilde. Cayuni prometer Jehová zacané ca ni naca humilde (Sant. 4:6). Nga runi, pa racaláʼdxinu guiénenu ca profecía zeeda lu Biblia, caquiiñeʼ guni orarnu para gacanebe laanu. Pa nácanu humilde laaca zudiʼnu lugar gacané mozo ni nuu xpiaaniʼ laanu, purtiʼ laa nga riquiiñeʼ Jehová para gudii guendaró espiritual laanu ora peʼ caquíʼñenu ni (Luc. 12:42). Cumu naca Jehová ti Dios ni riguixhe chaahuiʼ ca cosa ca la? nga runi, maca gudixhe chaahuibe tu gacané laanu guiénenu ca ni zeeda lu Biblia (1 Cor. 14:33; Efes. 4:4-6).

10. ¿Xi rusiidiʼ ejemplu stiʼ Esther laanu?

¹⁰ Biʼniʼ estudiar chaahuiʼ Stiidxa Dios. Gulí ti profecía ni riuuláʼdxiluʼ ne bizulú biindaʼ ni. Nga nga ni biʼniʼ ti hermana láʼ Esther. Nabé riuuláʼdxibe ca profecía ni ruzeeteʼ zedandá Mesías. Laabe guniʼbe: «Dxi napaʼ 15 iza gucalaʼdxeʼ gannaʼ pa dxandíʼ gucuá ca profecía riʼ ante gueeda Jesús lu Guidxilayú». Yanna, ¿xi bíʼnibe para gánnabe ni yaʼ? Bizulú biʼniʼ investigarbe de ca Rollo del mar Muerto. Ni biindabe de laani gucané ni laabe maʼ cadi gápabe duda. Laabe guniʼbe: «Caadxi de ca rollo ca gucuá ca ni ante gale Jesús. Nga runi, ca profecía ni zeeda luni zeeda ca ni de Dios». Ne laaca bizeetebe: «Peru guyuu caadxi cosa ni huaxiéʼ bieneʼ, ngue runi gupa xidé biindaʼ ca ni stale biaje dede ra bieneʼ ca ni». Neca zaqué nuube nayecheʼ pur stipa bíʼnibe que. Guníʼ Esther ximodo biʼniʼ sentir despué de biindaʼ chaahuiʼ caadxi profecía zeeda lu Biblia. Laa guníʼ: «Bieneʼ dxandíʼ guiráʼ ni zeeda lu Biblia purtiʼ naa piaʼ bineʼ estudiar chaahueʼ ca ni».

11. Ra guyúbinu gánnanu dxandíʼ guiráʼ ni zeeda lu Biblia ¿Ximodo racané ni laanu?

¹¹ Ora ruyúbinu gánnanu modo huayaca cumplir ca profecía zeeda lu Biblia racané ni laanu gápanu jma confianza Jehová ne ca instrucción ni zeeda de laabe. Laaca racané ca profecía ca laanu neca gápanu guendanagana cadi gunítinu esperanza stinu ne chuʼnu nayecheʼ. Yanna, chiguidúʼyanu chupa profecía ni zeeda lu libru stiʼ Daniel ni cayaca cumplir ca dxi stinu riʼ. Ra guiénenu ca ni zacané ca ni laanu guicanu decisión jneza.

12. ¿Xi riníʼ ca batañee nuchaʼ beñe ne guiibaʼ stiʼ estatua que? (Daniel 2:41-43).

¹² (Biindaʼ Daniel 2:41-43). Biiyaʼ rey Nabucodonosor lu ti bacaandaʼ ti estatua ne batañee ni «nuchaʼ beñe ne guiibaʼ». Ra guchaaganu profecía riʼ né xcaadxi ni zeeda lu libru stiʼ Daniel ne Apocalipsis rudiʼnu cuenta zeeda gaca ca batañee ca Reino Unido ne Estados Unidos, ni naca potencia mundial ni jma napa poder tiempu stinu riʼ. Ora bisiene Daniel xi riníʼ bacaandaʼ stiʼ Nabucodonosor que, ndiʼ nga ni guniʼbe de potencia ca: «Reinu ca, nuu parte de laani zaca naguidxi ne nuu parte zaca nadá». ¿Xiñee nuu parte de laani nadá yaʼ? Purtiʼ ca binni ni zeeda gaca casi beñe ni nabeza ra runi mandar reinu riʼ qué rudiicaʼ lugar gaca reinu riʼ naguidxi casi guiibaʼ. b

13. ¿Xi caadxi cosa risaca racané profecía riʼ laanu guiénenu?

¹³ Ni guníʼ Daniel de estatua riʼ ne jmaruʼ si de batañee ni racané ni laanu guiénenu caadxi cosa risaca. Primé, potencia mundial stiʼ Reino Unido ne Estados Unidos maʼ bisihuinni pabiáʼ poder napa. ¿Ximodo yaʼ? Nabé gucané potencia riʼ para gaca ganar Primera ne Segunda Guerra Mundial. Peru cuniti potencia riʼ poder ne zunitiruʼ ni purtiʼ qué riuu ca xpinni de acuerdu ne rucaalú gobiernu. Guiropa, laani nga últimu potencia ni ziuu ante gunduuxeʼ Reinu stiʼ Dios guiráʼ ca gobiernu nuu lu guidxilayú. Neca gacalaʼdxiʼ xcaadxi guidxi gaca potencia mundial xlugar ni la? qué zanda diʼ. ¿Ximodo nánnanu ni yaʼ? Purtiʼ profecía que cusiene zunidé «guié» que, ni zeeda gaca Reinu stiʼ Dios, batañee estatua que (Dan. 2:34, 35, 44, 45).

14. Ra guiénenu profecía ni riníʼ de batañee nuchaʼ beñe ne guiibaʼ ¿Ximodo racané ni laanu guicanu decisión jneza?

¹⁴ ¿Ñee runi creluʼ dxandíʼ ni guníʼ Daniel de batañee estatua que la? Pa dxandíʼ runi creluʼ ni zusihuínniluʼ ni pur modo nabániluʼ. Qué zuyúbiluʼ gápaluʼ stale bueltu o stale cosa risaca purtiʼ nánnaluʼ maʼ cadi candaa zanitilú guidxilayú malu riʼ (Luc. 12:16-21; 1 Juan 2:15-17). Ra gánnaluʼ xi riníʼ profecía riʼ zacané ni lii guiéneluʼ pabiáʼ risaca guni predicarluʼ ne gúniluʼ discípulo (Mat. 6:33; 28:18-20). Yanna, ra maʼ bidúʼyanu profecía riʼ galán guiníʼ íqueluʼ ndiʼ: «¿Ñee rusihuinni ca decisión ni ricaaʼ runeʼ cré maʼ cadi candaa zunítiluʼ Reinu stiʼ Dios guiráʼ ca gobiernu ni nuu lu guidxilayú riʼ la?».

15. ¿Tuu nga naca «rey del norte» ne «rey del sur» ca dxi stinu riʼ? (Daniel 11:40).

¹⁵ (Biindaʼ Daniel 11:40). Lu Daniel capítulo 11 riete de chupa rey o gobiernu ni cadindesaa purtiʼ racalaʼdxiʼ tobi de laacaʼ guni mandar lu guidubi guidxilayú riʼ. Ra guchaaganu profecía riʼ ne xcaadxi profecía ni ruzeeteʼ Biblia la? nánnanu «rey del norte» nga Rusia ne ca guidxi runi apoyar laa ne «rey del sur» nga Reino Unido ne Estados Unidos potencia mundial ni nuu tiempu riʼ. c

16. Ra cayuni mandar «rey del norte», ¿xi guendanagana ridxaagaluʼ ca xpinni Dios?

¹⁶ Canazananda «rey del norte» ca xpinni Dios ni nabeza ca lugar ra runi mandar. Huaguíñecabe ne huaguucabe cárcel caadxi testigu pur ni runi crecaʼ. Neca zacá guiráʼ ni huayuni «rey del norte» qué huabee ca ni gana ca hermanu stinu sínuque ruquidxi ni fe sticaʼ. ¿Xiñee yaʼ? Purtiʼ nánnacabe maca  bicaa Daniel zazaaca ndiʼ (Dan. 11:41). d Ra gánnanu cayaca cumplir ca profecía riʼ zacané ca ni laanu gápanu fe Jehová ne cadi guchéʼnenu laa.

17. ¿Xi guendanagana rapa ca xpinni Dios ndaaniʼ ca guidxi ra runi mandar «rey del sur»?

¹⁷ Lu ca iza ni maʼ gudiʼdiʼ ca «rey del sur» laaca guzananda xquidxi Jehová. Casi lu Primera ne Segunda Guerra mundial stale de ca xpinni Cristu biseguyoocabe laacaʼ purtiʼ qué ninacaʼ ñecaʼ lu guerra ne biʼniʼ expulsárcabe ra scuela caadxi xcuidihuiiniʼ ni naca Testigu purtiʼ qué runi saludarcaʼ bandera. Lu ca últimu iza riʼ ca xpinni Cristu cadíʼdicaʼ guendanagana de xcaadxi modo ra caquiiñeʼ gusihuínnicaʼ pa qué zucheenecaʼ Jehová. Guzéʼtenu ti ejemplu, tiempu ruzulú votación zándaca ti xpinni Cristu gacalaʼdxiʼ guni apoyar ti partidu políticu o ti candidatu, dxandíʼ qué ziebe chiguni votarbe peru zándaca guiníʼ íquebe o ndaaniʼ ladxidoʼbe gacaláʼdxibe guni ganar tuuxa, peru para ganda  gácanu neutral naquiiñeʼ gápanu cuidadu né ni riníʼ íquenu ne ni runi sentirnu. (Juan 15:18, 19; 18:36).

18. Ora guidúʼyanu cadinde guiropaʼ rey riʼ, ¿xi qué zúninu? (Biiyaʼ ca imagen ca).

¹⁸ Zándaca ca ni qué runi cré ca profecía ni zeeda lu Biblia chuʼcaʼ xizaa ne guidxíbicaʼ ora gúʼyacaʼ cadinde «rey del sur» né «rey del norte» (Dan. 11:40). Pur guiráʼ bomba nuclear ni napa guiropaʼ rey riʼ ñanda nunitilucaʼ Guidxilayú riʼ. Peru laanu nánnanu qué zudii Jehová lugar guizaaca ndiʼ (Is. 45:18). Nga runi, qué riuunu xizaa ne qué ridxíbinu ora guidúʼyanu cadinde «rey del norte» ne «rey del sur» sínuque ruquidxi ni fe stinu purtiʼ ndiʼ rusihuinni maʼ cadi candaa para guinitilú guidxilayú malu riʼ.

19. ¿Xi naquiiñeʼ gánnanu de ca profecía ni zeeda lu Biblia?

¹⁹ Qué gánnanu ximodo chigaca cumplir caadxi profecía ni zeeda lu Biblia. Nin profeta Daniel qué ñene chaahuiʼ xi riníʼ ni bicaa (Dan. 12:8, 9). Peru cadi purtiʼ si qué riénenu ximodo chigaca cumplir xiixa profecía riníʼ nga qué zaca cumplir ni. Nanna dxíchinu zabi Jehová laanu ni caquiiñeʼ gánnanu ora peʼ caquiiñeʼ si gánnanu ni cásica bíʼnibe ni dxiqué (Amós 3:7).

20. ¿Xi profecía maʼ cadi candaa zaca cumplir ne xi cadi naquiiñeʼ gusaana de gúninu?

²⁰ Maʼ cadi candaa zaníʼ ca guidxi ca «¡Maʼ nuu paz ne seguridad!» (1 Tes. 5:3). Ora guizaaca ndiʼ zucaalú ne zunitilú ca gobiernu ca religión ni qué rusiidiʼ ni dxandíʼ (Apoc. 17:16, 17). Despué zucaalúcabe xquidxi Dios (Ezeq. 38:18, 19). Ne óraque nga maʼ guzulú Armagedón (Apoc. 16:14, 16). Nanna dxíchinu maʼ cadi candaa zazaaca guiráʼ ndiʼ. Peru laga cabézanu guizaaca ndiʼ cadi gusaana de gusihuínninu rudiʼnu xquixe peʼ Bixhózenu ni nuu guibáʼ. Ne cadi gusaana de guidúʼyanu ximodo cayaca cumplir ca profecía ni zeeda lu Biblia ne gacanenu xcaadxi gúnicaʼ zacá.