Lu artículo que bizíʼdinu nuu ti cosa nabé risaca ni cudxiilú guiráʼ binni guidxilayú ne ca ángel, laani nga gaca santificar o guiá lá Jehová. Laaca nuu xhupa cosa luni, laani nga soberanía stiʼ Jehová, ni caninu nga modo runi mandarbe; ne pa qué zaxeleʼ binni de laabe.

Yanna, ¿xiñee cosa ni jma risaca nga ni caníʼ de lá Jehová ne modo gaca santificar ni yaʼ? Guidúʼyanu chonna razón.

Primé, ni bizaaca ndaaniʼ jardín de Edén dxi guníʼ Binidxabaʼ mal de lá Jehová o modo naca. Pur ni gunabadiidxaʼ Binidxabaʼ Eva que casi ñaca niniʼbe cadi naca Jehová ti Dios nachaʼhuiʼ ne qué rudii lugar guni binni stale cosa. Bichaabe guiráʼ ni guníʼ Jehová que ne ra bíʼnibe ni casi ñaca niniʼbe naca ti Dios ni rusiguii. Zacá nga biʼniʼ biidibe lá Jehová. Ne beeda gácabe «Diablu» ne raca significar ni tobi ni riníʼ diidxaʼ para guniná o calumniador. (Juan 8:44, nota). Ne cumu biʼniʼ cré Eva guiráʼ guendarusiguii stiʼ Binidxabaʼ la? maʼ qué nuzuubabe stiidxaʼ Dios ne bicaalube derechu ni napa de guni mandar (Gén. 3:1-6). Ca dxi riʼ cucaaluruʼ Binidxabaʼ lá Dios. Pur ca guendarusiguii stibe rucaabe binni gapa duda tu clase Dios nga Jehová. Ne zándaca binni ni guni cré laabe qué zanacaʼ guzuubacaʼ stiidxa Jehová. Para ca xpinni Jehová la? ti injusticia nga guiníʼcabe mal ne guni biidicabe lá nayá stiʼ Jehová. Ne pur ndiʼ nga nuu stale yuubaʼ o cosa malu lu guidxilayú riʼ.

Guiropa razón nga, para ganda chuʼ guiráʼ ni bizáʼ Jehová galán, maʼ gudixhe ique gusisaca ne gusiá lá. Ne ndiʼ nga ni jma risaca para laabe. Nga runi, guniʼbe: «Zuneʼ santificar laʼyaʼ» (Ezeq. 36:23). Ne lu oración modelu que guníʼ Jesús: «gaca santificar laluʼ». Ne zacá bisihuinni Jesús laani nga tobi de cosa nabé risaca ni naquiiñeʼ guinabaʼ ca xpinni Jehová ora guni orarcaʼ (Mat. 6:9). Ne stale biaje riete lu Biblia naquiiñeʼ guisaca lá Jehová. Guzéʼtenu caadxi ejemplu. «Lagusisaca lá Jehová purtiʼ runi merecerbe ni» (1 Crón. 16:29; Sal. 96:8). «Laguundaʼ para gusisácatu lá nandxóʼ stibe» (Sal. 66:2). «Ne qué ziuu dxi gusaana de gusisacaʼ laluʼ» (Sal. 86:12). Ne laaca dxi nuu Jesús ra templu stiʼ Jerusalén que gunábabe Bixhózebe: «Bisisaca laluʼ». Para bicabi Jehová laabe dede guibáʼ: «Maʼ bisisacaʼ ni, ne laaca zusisacaʼ ni sti biaje» (Juan 12:28). a

Guionna, ni maʼ gudixhe ique Jehová nga cadi guiaana de guisaca lá. Guiníʼ íquenu xi zazaaca ra guiluxe ti mil iza guni mandar Cristu, ra guiluxe últimu prueba. ¿Ñee zaníʼ ique binni ne ca ángel, pa caquiiñeʼ guiá o gaca santificar lá Jehová la? Para gánnanu ni la? guidúʼyanu chupa cosa ni nuu lu asuntu riʼ: pa qué zucheené binni Dios ne Dios nga napa derechu de guni mandar. ¿Ñee naquiiñeʼ gusihuínniruʼ binni maʼ qué zucheené  Dios la? Coʼ, purtiʼ maʼ binni sin donda laacaʼ ne maʼ gudíʼdicaʼ lu últimu prueba. Ne maʼ zanda guibánicaʼ sin qué chuʼ dxi gáticaʼ. Yanna, ¿xi zanda guininu de derechu ni napa Dios de guni mandar yaʼ? Maʼ guirutiʼ zaníʼ ique pa jneza runi mandar Dios. ¿Xiñee yaʼ? Purtiʼ para tiempu ca maʼ bihuinni Jehová si nga jma nanna guni mandar. Guiranu, binni ne zaqueca ca ángel ziéchenu purtiʼ zacá ni. Yanna, ¿ñee caquiiñeruʼ guiá lá Dios la? ¿O xi zazaaca né laani?

Maʼ biá lá Jehová ne gastiʼ ni zuni biidiʼ ni. Zadxagayaaruʼ binni ne ca ángel pabiáʼ risaca lá Jehová. ¿Xiñee yaʼ? Purtiʼ zuuyacabe qué zusaana de guni Jehová cosa nabé risaca ni qué huayuuyacabe. Cumu naca Jesús humilde zudxiguétabe autoridad ca Bixhózebe ne óraque nga maʼ «Dios si nga gaca gobernante stiʼ guiráʼ xixé ni nuu» (1 Cor. 15:28). Tidiʼ si nga guiráʼ ca ni guibani lu Guidxilayú zácacaʼ libre «cásica ca xiiñiʼ Dios» (Rom. 8:21). Zuni cumplir Jehová ni maʼ gudixhe ique guni. Chuʼ familia stibe ni nuu guibáʼ ne lu Guidxilayú riʼ tobi si (Efes. 1:10).

¿Xi zuni sentir familia stiʼ Jehová ora guizaaca guiráʼ ndiʼ yaʼ? Guiráʼ ca ni nuu guibáʼ ne lu Guidxilayú ziale de ndaaniʼ ladxidoʼcaʼ cadi gusaana de gusisácacaʼ lá sicarú stiʼ Jehová. Bicaa David pur espíritu santu: «Guisaca Jehová Dios […]. Guisaca lá nandxóʼ stibe para siempre» (Sal. 72:18, 19). Qué zusaana de guidxélanu razón para gusisácanu lá Jehová lu guidubi xquendanabáninu.

Lá Jehová runi representar ni guidubi nácabe. Nga runi, ora guiníʼ íquenu lá Dios nagueendaca reeda ndaaniʼ íquenu guendarannaxhii stibe (1 Juan 4:8). Qué ziaandaʼ laanu pur guendarannaxhii nga bizáʼ Jehová laanu, ne guendarannaxhii ca nga bicaa laabe gudiibe xpida Xiiñibe para gulabe laanu de lu náʼ guendaguti ne laaca laani nga bicaa laabe gusihuínnibe jneza modo runi mandarbe. Zadúʼyanu ximodo nadxii Jehová guiráʼ ni bizáʼ. Ne qué zusaana de guidxélanu razón para guidxíñanu bixhózenu ni nuu guibáʼ ne guidúʼndanu para gusisácanu lá nandxóʼ stibe (Sal. 73:28).