Cumu gratis rudii organización stinu publicación ni riree lu Biblia la? nuu tu riníʼ ique zanda guicaa ni ne gudxiibaʼ ni lu xiixa página de Internet o lu red social. Peru cadi jneza guni tuuxa zacá, purtiʼ cadi zinanda modo nexheʼ iquiiñeʼ ni o Términos y Condiciones de Uso * stiʼ sitiu de Internet stinu ne pur nga huayápanu guendanagana. Lu Términos y Condiciones de Uso riete qué gapa binni permisu para «gudxiibaʼ foto, publicación electrónica, marca ni napa cani, música, imagen, videu o intiica ni nuu lu sitiu de Internet riʼ lu sti sitiu de Internet (nin lu red social o lu intiica página ra rudxiibaʼ binni videu o xiixa información)». ¿Xiñee runi organización stinu ndiʼ yaʼ?

Guiráʼ información ni zeeda lu sitiu de Internet stinu napa cani derechos de autor. Ca apóstata ne xcaadxi binni ni rucaalú xquidxi Dios rudxiibacaʼ ca publicación stinu lu sitiu de Internet sticaʼ para chuʼ ca testigu stiʼ Jiobá ne xcaadxi binni lu ca página riʼ. Peru lu ca página stícabe nuu información ni cadi jneza ni zanda gucaa tuuxa guni dudar de ni runi cré (Sal. 26:4; Prov. 22:5). Xcaadxi binni huaquiiñeʼ información ni zeeda lu ca publicación stinu o logotipo stiʼ jw.org lu anunciu de publicidad, lu xiixa cosa para gutoo ne lu ca aplicación para celular ne tableta. Pur napa organización stinu derechos de autor ne marca ni napa cani nuu lu sitiu ca, nápacabe derechu para gucueezacabe tuuxa ni gacalaʼdxiʼ iquiiñeʼ cani sin permisu (Prov. 27:12). Pa nudii organización stinu permisu niquiiñeʼ tutiica binni o ti Testigu cani nuu lu sitiu de Internet stinu para gudxiibaʼ ni lu sti sitiu de Internet o iquiiñeʼ logotipo jw.org para gutoo  xiixa la? maʼ qué ñanda diʼ ñacané ca tribunal ca organización stinu para nucueeza cani rucaalú xquidxi Dios ne ca binni ni rutoo.

Ti peligru nga guni descargar tuuxa xiixa publicación lu gadxé página pa cadi lu jw.org. «Mozo ni nuu xpiaani» si nga maʼ bisaanané Jiobá responsabilidad de gudii alimentu espiritual ca xpinni (Mat. 24:45). «Mozo» riʼ rudii alimentu espiritual lu si ca página oficial de Internet ni nápanu, laacani nga jw.org, tv.dan124.com ne wol.dan124.com. Ne chonna si aplicación ni nápanu para celular ne tableta nga: JW Language^®, JW Library® ne JW Library Sign Language^®. Zanda gápanu confianza qué gapa ca aplicación ne ca página de Internet stinu anunciu de publicidad casi napa xcaadxi sitiu ni nuu lu guidxilayú stiʼ Binidxabaʼ. Pa guicaanu alimentu espiritual ni cadi zeeda lu página de Internet stinu la? zándaca maʼ gadxé ni cusiene cani o cadi jneza ni zeeda lu cani (Sal. 18:26; 19:8).

Pa chuʼ tu gudxiibaʼ xiixa publicación stinu lu xiixa sitiu de Internet ra zanda gucaa binni xiixa comentariu de laani la? rudii ni oportunidad ca apóstata ne ca binni ni riníʼ mal de xquidxi Dios para gucaacaʼ binni guni dudar de organización stiʼ Jiobá. Nuu hermanu maʼ biʼniʼ debatir né ca binni riʼ lu Internet ne pur nga jmaruʼ si maʼ biʼniʼ biidicaʼ láʼ Jiobá. Cadi jneza nga iquiiñenu ca foros de Internet para gusíʼdinu né diidxaʼ nadóʼ cani qué naʼ guicaa stiidxaʼ Dios (2 Tim. 2:23-25; 1 Tim. 6:3-5). Laaca maʼ bidxélacabe nuu binni riquiiñeʼ lá organización stinu ne lá ca hermanu ni nuu lu Grupu ni Zaniruʼ para gúnicaʼ cuenta lu ca red social ne lu xiixa sitiu de Internet. Nin tobi de ca hermanu ni nuu lu Grupu ni Zaniruʼ qué gápacaʼ ti página de Internet sticaʼ ne qué riuucaʼ lu red social ca.

Ora rábinu binni chuʼ lu sitiu jw.org, cayacanenu para gaca predicar «ca diidxaʼ nacubi ne galán» (Mat. 24:14). Ca herramienta ni nuu lu Internet ni riquiiñenu para guni predicarnu zeʼ dxi jma galán cani. Ne ni jma racaláʼdxinu nga cueendú binni ni galán de laacani. Nga runi, casi riete ra ná MODO IQUIIÑEʼ NI, zanda guséʼndanu intiica publicación digital o ti dirección ra nuu tuuxa para guni descargar xiixa de lu sitiu jw.org, lu ti correu. Ora rábinu binni chuʼ lu ca sitiu oficial stinu la? casi ñaca nuséʼndanu laacabe ra nuu «mozo ni nuu xpiaani», purtiʼ laacabe nga ni maʼ gulí Dios para gudii alimentu espiritual ca xpinni.