Cumu nabé nu xpiaaniʼ Danièle la? nagueendaca bidiibe cuenta xi cayaca, bidxíñabe ne guniʼbe ra diagaʼ: «Maʼ cadi guiníʼneluʼ laacabe, maʼ nuucabe raríʼ». Ne oraqueca bizuhuaa carru stiʼ ca puliciá que frente de hotel que. Biaʼ chupa chonna minutu despué gunaazecabe laadu. Peru cumu gudxi Danièle naa dede ante xi cayaca la? gunda bidieeʼ caadxi documentu ti hermanu.

Laga zinécabe laadu ra estación de puliciá que, guníʼ iqueʼ: «¡Ti ndaayaʼ nga naca xheelaʼ ti gunaa nabé valiente ne espiritual!». Ndiʼ nga tobi de ca guendanagana ni gudídidu juntu. Peru napaʼ ganna gabeʼ laatu xiñee guyuudu ndaaniʼ caadxi guidxi ra runi prohibírcabe obra stinu.

Guleʼ lu iza 1930, ndaaniʼ guidxi Croix, ti guidxihuiiniʼ ni riaana ladu guiaʼ de Francia. Nabé católicu familia stinneʼ. Guiráʼ semana riuudu mixaʼ, ne stale modo racané bixhozeʼ ne jñaa ra yuʼduʼ. Peru dxi napaʼ biaʼ 14 iza, bizaaca xiixa ni bicaa naa gudieeʼ cuenta nabé hipócrita ca xaíque yuʼduʼ.

Despué de bicaalú ejércitu alemán guidxi Francia dxi cayaca Segunda Guerra Mundial, xa cura de yuʼduʼ ra riuudu que bizulú bidii sermón para guni apoyar régimen ni láʼ Vichy, ni runi apoyar ca nazi. Nabé feu ca sermón que. Ne cásica runi stale binni de Francia, laadu laaca nagaʼchiʼ rucaʼdiágadu ca noticia ni caníʼ de ca ejércitu ni maʼ bidaaguʼ ni riete lu estación de radiu BBC. Peru lu beeu septiembre de iza 1944 maʼ gadxé grupu biʼniʼ apoyar cura que ne bíʼnibe ti mixaʼ para gudiibe xquíxepeʼ Dios pur nuu ca ejércitu ni maʼ bidaaguʼ. ¡Guizáʼ bidxagayaaʼ ni guca que! Ne dede dxi que maʼ qué ñapaʼ fe ca xaíque yuʼduʼ.

Biluxe si guerra que gutiʼ bixhozeʼ, ne para tiempu que, maʼ bichaganáʼ Simone, bizanaʼ ni jma huaniisi ne nabézabe ndaaniʼ guidxi Bélgica. Ngue runi bineʼ sentir caquiiñeʼ gapaʼ jñaaʼ. Bineʼ dxiiñaʼ ra ti fábrica ra rúnicabe lari ne ruluíʼ zié ni naa galán raqué. Peru cumu guizáʼ católicu jefe stinneʼ ne ca xiiñiʼ la? nin qué nindaa gupaʼ guendanagana.

Lu iza 1953, beeda ganna Simone laadu, ne maʼ nácabe testigu stiʼ Jiobá. Ne biquiiñebe Biblia stibe para gusiénebe laadu cadi dxandíʼ ca doctrina ni caníʼ de infiernu, Trinidad ne ni caníʼ qué rati alma  stiʼ binni. Gudxeʼ laabe cadi católicu Biblia stibe, peru nin qué nindaa bidieeʼ cuenta dxandíʼ ni nabe que. Despué bidiibe naa stale revista La Atalaya, ne ruundaʼ cani guiráʼ huaxhinni. Ne ti tiempu despué bidieeʼ cuenta maʼ bidxelaʼ ni dxandíʼ. Peru cadxibeʼ guniteʼ dxiiñaʼ stinneʼ pa gaca Testigu.

Biindaruaaʼ Biblia ne revista La Atalaya stale beeu, peru despué guyaaʼ ra Yoo stiʼ Reinu. Guizáʼ guyuuladxeʼ ora biiyaʼ pabiáʼ nadxiisaa ca hermanu. Ti hermanu ni napa experiencia bidii estudiu naa xhoopaʼ beeu, ne guyuaanisaʼ lu beeu septiembre iza 1954. Nin qué nindaa guca jñaaʼ ne bizanaʼ ni jma nahuiiniʼ Testigu.

Guti jñaaʼ chupa semana ante gaca asamblea internacional ni guca lu iza 1958 ndaaniʼ guidxi Nueva York. Despué de asamblea que biguetaʼ ra lidxeʼ ne bidieeʼ cuenta maʼ qué gapaʼ stale responsabilidad, ngue runi bisaanaʼ xhiiñaʼ ne guca precursor. Ca dxi que binebiaʼyaʼ Danièle Delie, ti precursora ni runi xhiiñaʼ Dios né stale gana, ne ti tiempu despué gunabaʼ laabe guichaganabe naa. Bichaganadu lu beeu mayo lu iza 1959.

Bizulú Danièle xhiiñaʼ de tiempu completu ndaaniʼ ti guidxihuiiniʼ de Bretaña, riaana lugar que zitu de ra lídxibe. Naquiiñeʼ gaca tobi valiente para guni predicar ca lugar que, purtiʼ nabé católicu ca binni que, ne purtiʼ naquiiñeʼ gusabe bicicleta para chindabe guidxihuiiniʼ que. Guirópadu bidiʼdu cuenta caquiiñeʼ guni predicardu ne biénedu ora tiica si zanda gueeda fin (Mat. 25:13). Cumu guca Danièle ti gunaa ni nuu dispuesta guni sacrificiu la? gucané ni laadu para cadi gusaanadu dxiiñaʼ de tiempu completu.

Chupa chonna gubidxa despué de bichaganadu biʼniʼ asignárcabe laadu gácadu superintendente de circuito. Gupa xidé biaʼdu guibánidu ne huaxiéʼ si cosa. Primé congregación ni yegánnadu napa 14 publicador, ne cumu qué gapa ca hermanu que ti lugar ra guiaanadu la? gúsidu lu caadxi colchon ni gudíxhecabe lu plataforma ndaaniʼ Yoo stiʼ Reinu que. Nachoongahuiiniʼ cama que peru qué ñacaná déchedu.

Neca guizáʼ nuu xhiiñadu la? qué ñaca nagana para Danièle guiaa. Cada biaje gapaʼ reunión né ca ancianu la? riaanabe ndaaniʼ carruhuiiniʼ stidu que ne qué ñuu dxi ñaca quejarbe. Chupa iza si bínidu dxiiñaʼ de circuito, peru lu tiempu ca bizíʼdidu nabé risaca nga guni ca guendaxheelaʼ ca dxiiñaʼ juntu ne gácacaʼ sinceru (Ecl. 4:9).

Lu iza 1962 biʼniʼ invitárcabe laadu Brooklyn (Nueva York) para chuudu clase 37 de Scuela stiʼ Galaad, ne bindaa ni chii beeu. Nácadu ti gayuaa estudiante, peru cadi guiráʼ ca guendaxheelaʼ guyecaʼ juntu. 13 si guendaxheelaʼ guyé, ne laadu nga tobi de ca guendaxheelaʼ ca. ¡Guizáʼ galán privilegiu que! Dede yanna napaʼ recuerdu galán ni gudídidu né ca hermanu ni dxandíʼ naca casi ti pilar naguidxi ndaaniʼ organización stiʼ Dios pur fe sticaʼ, casi hermanu Frederick Franz, Ulysses Glass ne Alexander Macmillan.

Lu cursu que nabé biete pabiáʼ risaca gácadu observador. Caadxi sábadu, despué de clase que,  rinécabe laadu ndaaniʼ caadxi lugar galán ni nuu ndaaniʼ guidxi Nueva York. Ne ca lunes que rudiicabe laadu ti guiʼchiʼ para gucaʼdu xi guiráʼ bidúʼyadu lugar ra guyuudu que. Guizáʼ ridxaagadu ora riuudu ca lugar que, peru runi guía ni runi asignar Betel laadu caadxi pregunta para guietenaláʼdxidu ca cosa jma risaca. Tobi de ca sábadu que, guzadu ndaaniʼ guidxi que guidubi ti huadxí. Guyuudu ra ti observatorio, ti lugar ra bizíʼdidu xiñee gadxé nga ti meteoro ne ti meteorito. Ne laaca guyuudu ra museu de historia natural, raqué bisiénecabe laadu ximodo zanda gánnadu xiñee maʼ gadxé ti caimán de ti beʼñeʼ. Ora biguétadu Betel, gunabadiidxaʼ guía que laadu: «¿Ñee rietenaláʼdxitu xiñee maʼ gadxé ti meteoro ne ti meteorito la?». Guizáʼ maʼ bidxaga Danièle, ngue runi bicábibe: «Nannaʼ, jma naroʼbaʼ laya ca meteorito ca».

Dxi guca graduardu de scuela que la? guizáʼ bidxagayaadu ora bidúʼyadu biʼniʼ asignárcabe laadu chuudu sucursal stiʼ Francia, ra biʼniʼ servirdu jma de cincuenta y tres iza de cayuni servirdu. Lu iza 1976 biʼniʼ nombrárcabe naa gacaʼ coordinador stiʼ Comité de Sucursal. Ne laaca guyuu biaje biʼniʼ asignárcabe naa chigannaʼ guidxi ni nuu lu continente stiʼ África ne Oriente Medio ra runi prohibírcabe obra stinu. Ne zacá nga yendadu Gabón, guidxi ra guca ni bizeeteʼ ra bizulunu tema riʼ. Guyuu biaje bineʼ sentir qué zanda diʼ guneʼ cumplir né ca responsabilidad riʼ. Peru nabé gucané Danièle naa para bineʼ cumplir guiráʼ ca asignación stinneʼ.

Dede dxi yendadu Betel guizáʼ guyuuláʼdxidu gúnidu dxiiñaʼ raqué. Ante chuudu Scuela stiʼ Galaad la? biziidiʼ Danièle inglés lu gaayuʼ beeu si, ne ra gudiʼdiʼ tiempu gúcabe ti traductora ni runi dxiiñaʼ galán. Nabé nayecheʼ guyuʼdu pur dxiiñaʼ ni rúnidu Betel, ne ni jma rusiecheʼ laadu nga gúnidu dxiiñaʼ né ca hermanu de ra congregación. Naa ne Danièle ricaadu metru ni nuu ndaaniʼ guidxi París para chigúnidu estudiu. Rietenalaʼdxeʼ maʼ huaxhínnipeʼ ribiguétadu ne maʼ bidxágadu, peru guizáʼ nayecheʼ runi sentirdu purtiʼ gucánedu binni gunibiáʼ Jiobá. Peru ni málasi bicueeza ti guendahuará Danièle ne maʼ qué ñanda ñuni xhiiñaʼ Jiobá biaʼ racalaʼdxiʼ.

Lu iza 1993, gúdxicabe laadu napa Danièle cáncer de mama. Nadipaʼ tratamientu ni gucuaabe, purtiʼ biʼniʼ operárcabe laabe ne bidiicabe quimioterapia laabe. Quince iza despué gupa Danièle cáncer sti biaje, peru biaje riʼ jma nadipaʼ ni. Peru cumu nabé rusisácabe asignación stibe de traductora la? bíʼnibe stipa pur gúnibe dxiiñaʼ que ora runi sentirbe galán.

Guizáʼ bininá cáncer que Danièle, peru qué ñuu dxi niníʼ íquedu nusaanadu Betel. Nagana nga gapa ti binni ni cayuni servir Betel ti guendahuará, jmaruʼ si pa qué ganna xcaadxi pabiáʼ malu guendahuará stiluʼ (Prov. 14:13). Neca napa Danièle cáncer ne nápabe casi 80 iza nin qué ruluíʼ pa huarabe purtiʼ nácabe ti gunna nabé nayecheʼ ne ni maca cuxidxi. Ne lugar de guiabe laaca laabe pur guendahuará stibe la? rúnibe stipa pur gacanebe xcaadxi. Gúnnabe runi sentir tuuxa galán ora rucaadiágacabe ne riénecabe laa (Prov. 17:17). Qué ñuu dxi niníʼ íquebe nánnabe gudiibe conseju, sínuque runi sentirbe  zanda gacanebe xcaadxi hermana ni napa cáncer pur guiráʼ ni maʼ gudíʼdibe.

Laaca guyuu xcaadxi cosa ni bicueeza laadu. Ora maʼ qué ñanda ñuni Danièle dxiiñaʼ guidubi dxi la? bíʼnibe guiráʼ ni nuu lu nabe para gacanebe naa guneʼ xhiiñaʼ. Ni bíʼnibe riʼ gucané ni naa cadi gusaanaʼ de gacaʼ coordinador stiʼ Comité de Sucursal treinta y siete iza. Ne siempre rúnibe stipa para ganda guidoʼdo ra cuartu galaa dxi ne guiziiláʼdxidu ti ratu (Prov. 18:22).

Qué nusaana Danièle de ñaca ti gunaa positiva ne ni napa gana guibani. Nga runi, ra guionna biaje biguetaʼ cáncer que la? guizáʼ guyuʼdu triste. Rusirá quimioterapia ne radioterapia que stipa stiʼ Danièle dede apena rizabe. Ne raca nagana para laabe guiniʼbe. Guizáʼ racaná ladxiduáʼ ora ruuyaʼ laabe zaqué, jmaruʼ si ora guietenalaʼdxeʼ gúcabe ti traductora ni biʼniʼ xhiiñaʼ jneza.

Nuu biaje runi sentirdu rusidxaga guendanagana que laadu, peru qué nusaana de ñuni orardu Jiobá. Nanna dxiichidu qué zudii Jiobá lugar gacanadu jma de ni qué zanda guni huantardu (1 Cor. 10:13). Ne bínidu stipa pur gusisácadu guiráʼ ni rudii Jiobá para gapa laadu casi Stiidxabe, serviciu médico ni rudiicabe Betel ne ca hermanu stidu.

Ora maʼ qué guidxéladu xi tratamientu guicaadu la? rinábadu Jiobá gacané laadu. Ne guyuu biaje ruluíʼ maʼ qué zanda gúnidu gastiʼ, purtiʼ biaana Danièle inconciente stale biaje despué de guicaa quimioterapia. Ne doctor stibe, ni biʼniʼ tender laabe veintitrés iza la? qué ganna xiñee cayácabe ngue ne maʼ qué guidxela xi guni. Biʼniʼ sentirdu guirutiʼ zanda gacané laadu. Peru bidxéladu sti oncólogo ni guyuu dispuestu guni tender Danièle. Biʼniʼ sentirdu Jiobá ngue cayacané laadu.

Gupa xidé bizíʼdidu cadi tan chuʼdu xizaa pur ni gaca sti dxi. Casi maca guníʼ Jesús: «Lagucaa ique si de ni naquiiñe tu yanadxí» (Mat. 6:34). Gacu ti binni positivu ne siempre chuʼluʼ nayecheʼ laaca racané ni lii. Dxi napa Danièle chupa beeu de qué huadiicabe laa quimioterapia, dede cuxidxihuiinibe gúdxibe naa: «¡Qué huayuu dxi guneʼ sentir jma galán!» (Prov. 17:22). Ne neca cayuubabe la? riuuláʼdxibe gúʼndabe ca canción ni zeeda lu cancioneru stinu ne runi ensayarbe cani stale biaje.

Cumu nabé positiva Danièle la? gucané ni naa cadi gucueeza ca guendanagana que naa. Cincuenta y siete iza nga bibánidu juntu, ne biaʼ tiempu ca laabe nga gúpabe naa. ¡Qué ñuu dxi ninabe nusiidibe naa guchuuneʼ ti dxita! Ngue runi dxi guca huarabe la? gupa xidé biziideʼ quiibeʼ traste, quiibeʼ lari ne guneʼ guendaró. Maʼ gundaaʼ chupa chonna vasu, peru guizáʼ riecheʼ purtiʼ gunda gucaniáʼ laabe. *

Guizáʼ stale ni maʼ biziideʼ pur guiráʼ ni bidxaagaludu naa ne Danièle, pur guendahuará ne pur guendanayooxhoʼ. Tobi de ca ni maʼ biziideʼ nga naquiiñeʼ cuee binni tiempu para guni tender xheelaʼ ne guni tratar laabe né cariñu. Ya, naquiiñeʼ gaca aprovecharnu tiempu nuunu nazaaca para chuʼnenu familia stinu tobi si (Ecl. 9:9). Ne pa chuʼ xhaataluʼ xizaa pur ca problema stiluʼ la? zándaca gusaana de gusisácaluʼ ca ndaayaʼ ni maʼ bidii Jiobá lii (Prov. 15:15).

Ora guietenaladxeʼ guiráʼ iza biʼniʼ servirdu de tiempu completu, ruuyaʼ pabiáʼ maʼ guluu ndaayaʼ Jiobá laadu dede modo cadi cabézadu ni. Cásica guníʼ hombre ni bicaa Salmo 116 que, naa laaca rinieeʼ guizáʼ maʼ guluu Jiobá ndaayaʼ naa (Sal. 116:7).