NAPA Diana jma de 80 iza. Gupa xheelabe ti guendahuará láʼ Alzheimer ne ca últimu iza bibani xheelabe la? guleza ti lugar ra riaana ca binnigola. Laaca guti chupa xiiñiʼ hermana riʼ ne gúpabe cáncer de mama. Neca gudíʼdibe guiráʼ ndiʼ la? ora ruuyaʼ ca hermanu de ra congregación riebe reunión ne runi predicarbe, riníʼcabe nácabe ti gunaa nabé nayecheʼ.

Guca John superintendente de circuito jma de cuarenta y tres iza. Guizáʼ riuuláʼdxibe asignación riʼ, peru bisaanabe ni purtiʼ yegápabe ti xfamíliabe ni huará. Ora ruuyaʼ ca hermanu ni runibiáʼ laabe ra asamblea la? riniʼcaʼ caʼruʼ guchaabe. Nácarube ti binni nayecheʼ.

¿Xi runi Diana ne John para cadi gusaanacaʼ de guibánicaʼ nayecheʼ yaʼ? ¿Xiñee zanda chuʼ ti binni ni napa stale guendanagana nayecheʼ, ne xiñee zanda chuʼ ti binni ni gusaana ti asignación ni riuulaʼdxiʼ nayecheʼ? Biblia ná: «Ziecheʼ binni ni runi ni jneza pur Jiobá» (Sal. 64:10). Para guiénenu ni ná textu riʼ la? guidúʼyanu xi racané laanu guibáninu nayecheʼ ne xi coʼ.

Nuu caadxi cosa ni rusiecheʼ binni, casi guichaganáʼ, gapa ti xiiñiʼ o guicaa ti asignación ndaaniʼ organización stiʼ Dios. Ne cadi malu guni sentir tuuxa zacá, purtiʼ naca cani regalu stiʼ Jiobá. Laabe guniʼbe guichaganáʼ binni, bizaʼbe hombre ne gunaa para gápacaʼ xiiñicaʼ ne laabe nga rudiibe laanu ca dxiiñaʼ ni nápanu ndaaniʼ organización stiʼ Dios (Gén. 2:18, 22; Sal. 127:3; 1 Tim. 3:1).

Peru cadi fácil chuʼnu nayecheʼ guiráʼ ora. Zándaca ni málasi gati xheelaʼ binni, o gucheené xheelaʼ binni laa (Ezeq. 24:18; Os. 3:1). Ne zándaca maʼ qué guzuubaʼ xiiñiʼ binni stiidxaʼ bixhoze ne stiidxaʼ Dios o dede gaca expulsarcaʼ. Guzéʼtenu ti ejemplu, qué ñuni ca xiiñiʼ profeta Samuel ni riuulaʼdxiʼ Jiobá; ne rey David biʼniʼ cometer ti pecadu naroʼbaʼ ne pur ngue gupa familia stiʼ stale guendanagana (1 Sam. 8:1-3; 2 Sam. 12:11). Ca guendanagana riʼ zanda guniná ni binni ne gapa yuubaʼ.

 Ne laaca zanda guniti tuuxa ca asignación stiʼ pur ti guendahuará, pa gapa xiixa obligación familiar o pa chuʼ xiixa cambiu ndaaniʼ organización stiʼ Dios. Ne stale hermanu ni maʼ bisaana asignación stiʼ riníʼ nabé ribanaʼ pabiáʼ nayecheʼ guyuu lu asignación stiʼ.

Ni dxandíʼ nga zanda chuʼ binni nayecheʼ ti ratu si. Peru ejemplu stiʼ Samuel, David ne xcaadxi binni riete lu Biblia rusihuinni ni zándaruʼ chuʼ tuuxa nayecheʼ neca guchaa xiixa lu xquendanabani o guidxaagalú xiixa guendanagana.

Gunna Jesús ximodo nga guibani binni nayecheʼ. Guizáʼ galán guca xquendanabánibe biaʼ dxi bibánibe guibáʼ. Nga runi guiráʼ ora guyuube nayecheʼ nezalú Jiobá (Prov. 8:30). Peru dxi beedabe ndaaniʼ guidxilayú riʼ bidxaagalube caadxi guendanagana nabé nadipaʼ. Neca zacá, nabé nayecheʼ bíʼnibe xhiiñaʼ Bixhózebe (Juan 4:34). ¿Xi gucané laabe guni huantarbe yuubaʼ gudíʼdibe ante gátibe yaʼ? Biblia ná: «Biʼniʼ huantar [Jesús] guiráʼ yuubaʼ gudiʼdiʼ dxi gucuá lu yaga, [...] purtiʼ nanna ziuu nayecheʼ despué» (Heb. 12:2, TNM). Guidúʼyanu xi chupa cosa guníʼ Jesús de ximodo nga guibani binni nayecheʼ.

Ti biaje nabé nayecheʼ biguetaʼ 70 discípulo stiʼ Jesús purtiʼ yeguni predicarcaʼ ne bíʼnicaʼ caadxi milagru, guleecabe demonio lu cuerpu stiʼ binni. Peru sicaríʼ gudxi Jesús laacabe: «Cadi guiéchetu purtiʼ ruzuubaʼ ca espíritu ca stiidxatu, sínuque laguiecheʼ purtiʼ maʼ cá latu guibáʼ» (Luc. 10:1-9, 17, 20, TNM). Neca riuʼnu nayecheʼ pur runi servirnu Jiobá jma risaca nga gápanu aprobación stibe, ne ndiʼ nga ni dxandipeʼ runi laanu nayecheʼ.

Ne ti biaje dxi cusiidiʼ Jesús ti grupu de binni la? gudxi ti gunaa judía laabe guizáʼ dichosa jñaabe purtiʼ nácabe ti maestru ni nanna gusiidiʼ. Peru gudxi Jesús laabe: «Jma dichoso cani ucaa diaga stiidxa Dios ne guni ni na ni» (Luc. 11:27, 28). Riecheʼ binni ora runi xiiñiʼ ni ná Jiobá ne runi sentir orgulloso. Peru pa guzuuba bixhoze ne jñaa binni stiidxaʼ Jiobá ne gapa ti relación galán né laabe la? jma nayecheʼ zabánicaʼ.

 Nga runi, para guibáninu nayecheʼ la? caquiiñeʼ chuulaʼdxiʼ Jiobá ni rúninu. Zándaca qué riuʼnu nayecheʼ ora nápanu xiixa guendanagana, peru laaca qué rusaana de chuʼnu nayecheʼ. Nga runi, ora runi huantarnu ca guendanagana ne rúninu ni ná Jiobá jmaruʼ si nayecheʼ riuʼnu (Rom. 5:3-5). Ne cadi guiaandaʼ laanu, rudii Jiobá espíritu stiʼ cani napa confianza laa, ne tobi de ca cualidad ni rudii espíritu ca nga guendanayecheʼ (Gál. 5:22). Nga runi Salmo 64:10 ná: «Ziecheʼ binni ni runi ni jneza pur Jiobá».

Pur guiráʼ ni bizéʼtenu riʼ nánnanu xiñee qué nusaana Diana ne John de ñuucaʼ nayecheʼ neca gúpacaʼ guendanagana. Diana guníʼ: «Maʼ biyubeʼ Jiobá para guilaʼyaʼ, cásica ruyubi ti xcuidihuiiniʼ bixhoze para guilá». Ne laaca guniʼbe: «Runeʼ sentir huayacané Jiobá naa para cadi gusaanaʼ de guneʼ predicar sin gusaanaʼ de chuaaʼ nayecheʼ». ¿Xi zanda guininu de John yaʼ? Laabe nabe lu iza 1998 biʼniʼ nombrárcabe laabe gácabe profesor stiʼ Escuela de Entrenamiento Ministerial ne nga nabé bisiecheʼ ni laabe. Ne pur guiráʼ ni biziidibe lu scuela que la? qué nusaanabe xhiiñaʼ Jiobá ne guyuube nayecheʼ neca despué bisaanabe asignación ni gúpabe de superintendente de circuito. Ne guniʼbe qué ñaca nagana para laabe ne xheelabe cambiu riʼ, purtiʼ siempre guyuucabe dispuestu gúnicabe guiráʼ ni guinabaʼ Jiobá laacabe, ne qué raca arrepentírcabe pur ni bíʼnicabe riʼ.

Stale xpinni Cristu maʼ guníʼ dxandíʼ ca diidxaʼ ni zeeda lu Salmo 64. Guidúʼyanu ejemplu stiʼ ti guendaxheelaʼ ni biʼniʼ servir jma de treinta iza ndaaniʼ Betel de Estados Unidos ne gucuaa ti asignación para chiguni servircaʼ de precursor especial. Laacaʼ guniʼcaʼ: «Ora gunítiluʼ xiixa ni nabé rusisácaluʼ la? normal nga chuʼluʼ triste. Peru qué ziuuluʼ zacá biaʼ dxi guibániluʼ». Casi bireecabe de Betel bizulú biʼniʼ predicárcabe né ca hermanu ni nuu ndaaniʼ congregación ra guca asignárcabe. Ne laaca guníʼcabe: «Runi orardu Jiobá ne rinábadu laa ni caquiiñedu. Ora ridúʼyadu ximodo ricabi Jiobá ca oración stidu la? guizáʼ riuʼdu gana ne riuʼdu nayecheʼ. Ne ti tiempu despué de yendadu ra congregación que, guca caadxi hermanu precursor. Ne gúpadu chupa estudiu ni biʼniʼ progresar».

Cadi siempre zanda chuʼnu nayecheʼ, purtiʼ ziuu ora zuni sentirnu triste. Peru riguixhedxí Jiobá ladxidoʼno né ca diidxaʼ ni zeeda lu Salmo 64:10. Neca gaca desanimarnu, zanda gápanu confianza «ziecheʼ binni ni runi ni jneza pur Jiobá». Nga runi, intiica guizaacanu, zabáninu nayecheʼ pa gúninu ni ná Jiobá. Ne cabézanu guedandá dxi gaca cumplir promesa de chuʼ «ti guibáʼ cubi ne ti guidxilayú cubi». Óraque zaca ca xpinni Dios perfectu ne zabánicaʼ nayecheʼ para siempre pur guiráʼ ni chiguni Jiobá (Is. 65:17, 18).

Guxuíʼlunu pabiáʼ galán ora gaca cumplir guiráʼ ni maʼ guníʼ Jiobá, maʼ qué zaca huaranu ne cada dxi guibáninu daʼnu gana. Intiica recuerdu o xiixa ni bininá laanu en sentidu emocional maʼ qué lica zietenaláʼdxinu cani. Jiobá cayuni prometer laanu maʼ guirutiʼ tu zietenalaʼdxiʼ ca cosa ni guyuu dxiqué. Ora gusibani Dios binni de lade gueʼtuʼ la? zadúʼyanu ca familia stinu ni maʼ guti. Millón de binni ziecheʼ stale, cásica biecheʼ jñaa ne bixhoze dxaapahuiiniʼ de 12 iza ni bisibani Jesús de lade gueʼtuʼ (Mar. 5:42). Ne puru si binni runi ni jneza nga zabani ndaaniʼ Guidxilayú riʼ ne ziéchecaʼ pur Jiobá para siempre.