Guca Salomón rey stiʼ Israel cuarenta iza, xiiñibe nga Rehoboam (1 Rey. 11:42). Lu iza 997 ante de ca dxi stiʼ Cristu guti rey Salomón, ngue runi guyé Rehoboam ladu guiaʼ stiʼ Jerusalén para gaca rey (2 Crón. 10:1). ¿Ñee bidxíbibe purtiʼ maʼ laabe chigápabe responsabilidad ni gupa bixhózebe, ti hombre guizáʼ nuu xpiaaniʼ la? ¿Ñee bixuíʼlube nagueendaca naquiiñeʼ gusihuínnibe nácabe ti binni nuu xpiaaniʼ ni zanda guni chaahuiʼ xiixa guendanagana la?

Dxi guca Rehoboam rey, zándaca cadiʼdiʼ guidxi Israel ti tiempu nabé nagana. Gudiʼdiʼ si ti tiempu biseendaʼ guidxi que caadxi binni para gábicaʼ laabe xi ñuuláʼdxicaʼ ñúnibe. Sicaríʼ gúdxicaʼ laabe: «Bixhózeluʼ la? guizáʼ nanaa biʼniʼ ayubu stidu; peru pa lii gusisísiluʼ dxiiñaʼ bisaanané bixhózeluʼ laadu ne gusisísiluʼ ayubu stidu, zúnidu ni naluʼ» (2 Crón. 10:3, 4).

Zándaca qué nidxela Rehoboam xi ñuni. Pa ñúnibe guiráʼ ni canabaʼ guidxi que laabe la? qué nibani familia stibe né stale luju ne nin ca binni ni runiné laabe dxiiñaʼ. Peru pa qué gúnibe ni ná guidxi que la? zándaca gucaalucaʼ laabe. ¿Xi bíʼnibe yaʼ? Primé, guyebe ra nuu ca ancianu ni guca consejeru stiʼ Salomón ne gunabadiidxabe laacaʼ xi zanda gúnibe. Despué gunábabe conseju ca joven de biaʼca iza stibe, ca joven que gúdxicaʼ laabe guquiichinabe guidxi que ne bíʼnibe ni gúdxicaʼ laabe. Nga runi, gúdxibe guidxi que: «Nanaa ayubu stitu, peru naa zuneʼ ni jma nanaa. Bixhozeʼ gudiñe laatu ne chicote, peru naa zaguiñeʼ laatu né chicote ni napa guiibaʼ punta» (2 Crón. 10: 6-14).

¿Xi rizíʼdinu de ni bizaaca Rehoboam yaʼ? Rizíʼdinu ni jma jneza gúninu nga gucaʼdiáganu ca hermanu ni maʼ huaniisi ne ni napa jma experiencia que laanu. Cumu jma maʼ nápacabe experiencia la? zudiicabe conseju laanu ne zaguixhenácabe laanu de xiixa ni zándaca guizaacanu pur decisión ni guicaanu (Job 12:12).

Para gucueeza Rehoboam ca binni ni nuu gucaalú laa la? bitagulisaa ejércitu stiʼ, peru qué nudii Jiobá lugar ñúnibe ni cá íquebe que, ngue runi biseendaʼ Jiobá profeta Semaya ra nuube, ne gudxi laabe: «Cadi naquiiñeʼ quíbatu para tindenetu ca bíʼchitu de Israel. Laguibiguetaʼ ra lídxitu, purtiʼ naa bidieeʼ lugar guizaaca ndiʼ» (1 Rey. 12:21-24). *

¿Xi guni Rehoboam yanna yaʼ? Nanna pabiáʼ bichiichi ngue laabe yaʼ. ¿Xi niníʼ ique binni de ti rey ni guníʼ zaquiiñeʼ ti chicote ni napa guiibaʼ punta para guni castigar xquidxi, peru cudii lugar gucaalúcabe laa yaʼ? (Bichaaga ni né 2 Crónicas 13:7). Neca zaqué, laabe ne ejércitu stibe «bizuubacabe stiidxaʼ Jiobá, ne biguetacabe ra lídxicabe, cásica gudxi Jiobá laacabe».

¿Xi rizíʼdinu de ni bizaaca riʼ yaʼ? Ni jma jneza nga guzúʼbanu stiidxaʼ Dios neca chuʼ tu guni burla laanu. Pa guzúʼbanu stiidxaʼ Jiobá la? ziuuláʼdxibe ni rúninu ne zaguube ndaayaʼ laanu (Deut. 28:2).

Nga nga ni bizaaca Rehoboam. Bizuubabe diidxaʼ ne qué nidindenebe ca israelita ni cadi nuu lu reinu stibe. Lugar de nucaalube laacaʼ biʼniʼ chaahuibe caadxi guidxi ne bicuibe xcaadxi lu ca layú ra runi mandarbe casi Judá ne Benjamín (2 Crón. 11:5-12). Ne ni jma risaca nga bíʼnibe ni ná ca ley stiʼ Jiobá ti tiempu. Neca biʼniʼ adorar Jeroboán, rey ni biʼniʼ mandar ladu guiaʼ que stale dios falsu la? stale de ca binni ni nuu lu reinu stibe guyecaʼ Jerusalén para guni apoyarcaʼ Rehoboam ne guni adorarcaʼ Jiobá jneza (2 Crón. 11:16, 17). Cumu bizuubaʼ Rehoboam diidxaʼ la? gucané ni para chuʼ reinu stiʼ naguidxi.

Peru dxi maʼ zuhuaa dxiichiʼ reinu stiʼ Rehoboam, bíʼnibe xiixa ni guirutiʼ cabeza. Maʼ qué ninándabe ca ley stiʼ Jiobá ne biʼniʼ adorarbe xcaadxi dios ni cadi dxandíʼ. ¿Xiñee bíʼnibe ni yaʼ? ¿Ñee bíʼnibe ni purtiʼ de guidxi Amón jñaabe la? (1 Rey. 14:21). Qué gánnanu xi pur bíʼnibe ni, peru stale binni yenanda ni bíʼnibe que. Pur nga bidii Jiobá lugar guni ganar Sisaq, rey stiʼ Egipto caadxi guidxi stiʼ Judá neca Rehoboam biʼniʼ chaahuiʼ cani (1 Rey. 14:22-24; 2 Crón. 12:1-4).

Peru dxi maʼ chigucaalú Sisaq guidxi Jerusalén ra runi mandar Rehoboam la? biseendaʼ Jiobá Semaya ra nuu Rehoboam ne ra nuu ca príncipe stiʼ, para gabi laacabe ca diidxaʼ riʼ: «Maʼ bisaanatu naa, yanna naa laaca zusaanaʼ laatu lu náʼ Sisaq». ¿Xi biʼniʼ Rehoboam ora guluu jneza Jiobá laa yaʼ? Bicaadiágabe ni gudxi Jiobá laabe. Biblia ná: «Guca humillar ca príncipe stiʼ Israel ne rey que ne naca: “Jneza guiráʼ ni runi Jiobá”». Pur nga bilá Jiobá Rehoboam ne qué nudii lugar ninitilú Jerusalén (2 Crón. 12:5-7, 12).

Bizaaca si guiráʼ ndiʼ, biʼniʼ mandar ruʼ Rehoboam guiropaʼ tribu ni nuu ladu gueteʼ que. Ante gátibe gúcabe nachaʼhuiʼ ne ca xiiñibe ne bidiibe laacaʼ stale regalu, zándaca bíʼnibe ni para cadi gucaalucaʼ bíʼchicaʼ, Abías, purtiʼ laa chigaca rey despué de laabe (2 Crón. 11:21-23). Ra bíʼnibe ndiʼ la? bisihuínnibe nuu xpiaanibe jma que dxi gúcabe joven.

Neca biʼniʼ Rehoboam cosa galán, qué ñuulaʼdxiʼ Jiobá ni bíʼnibe. Biblia ná: «Bíʼnibe cosa malu». ¿Xiñee riete puru cosa malu bíʼnibe dxi biʼniʼ mandarbe yaʼ? Purtiʼ qué ñúnibe ni ná Jiobá de guidubi ladxidoʼbe (2 Crón. 12:14).

Galán guiníʼ íquenu ndiʼ: neca bizuubaʼ Rehoboam stiidxaʼ Dios ne biʼniʼ cosa galán pur xquidxi, qué ñaca xhamígube Jiobá ne qué nuzuubabe stiidxaʼ de guidubi ladxidoʼbe. Ngue runi bíʼnibe cosa malu ne biʼniʼ adorarbe dios falsu. ¿Gucuaa Rehoboam disciplina stiʼ Jiobá purtiʼ dxandíʼ guca arrepentir ne racalaʼdxiʼ guni ni ná Dios la? o bíʼnibe ni purtiʼ guyuu tu gudxi laabe gúnibe ni? (2 Crón. 11:3, 4; 12:6). Ra gudiʼdiʼ tiempu, biʼniʼ Rehoboam ni cadi jneza. ¡Gadxepeʼ gúcabe de bixhozebiidabe, rey David!  Dxandíʼ biʼniʼ David caadxi cosa ni cadi jneza, peru qué nusaanabe de ñánnaxhiibe Jiobá, biʼniʼ defenderbe adoración stiʼ Jiobá ne guca arrepentirbe de guidubi ladxidoʼbe (1 Rey. 14:8; Sal. 51:1, 17; 63:1).

Ni bizaaca Rehoboam rusiidiʼ ni laanu ti cosa nabé galán. Para chuulaʼdxiʼ Jiobá ni rúninu la? cadi caquiiñeʼ si gudiʼnu ni caquiiñeʼ familia stinu o gúninu stipa pur ugaandanu xiixa, ni jma risaca nga gúninu ni ná Jiobá primé lu xquendanabáninu.

Zanda gúninu ni ná Jiobá primé lu xquendanabáninu pa qué gusaana de gannaxhiinu laa. Guendarannaxhii stinu pur Jiobá zeeda gaca ni casi ti bele, pa qué racaláʼdxinu guizuíʼ ni la? caquiiñeʼ uguʼnu yaga luni, zácacaʼ nga naquiiñeʼ gúninu pa qué racaláʼdxinu gusaana de gannaxhiinu Jiobá, naquiiñeʼ guni estudiarnu Stiidxaʼ Dios, guiníʼ íquenu lu ni guidúʼndanu ne cadi gusaana de guni orarnu (Sal. 1:2; Rom. 12:12). Pa nadxiinu Jiobá qué zúninu cosa ni qué riuuláʼdxibe. Ne pa gucheʼnu la? zaca arrepentirnu de guidubi ladxidoʼno purtiʼ nadxiinu laabe. Qué zúninu ni biʼniʼ Rehoboam, purtiʼ laanu zuzúʼbanu stiidxaʼ Jiobá de guidubi ladxidoʼno (Jud. 20, 21).