1. ¿Xii nga racalaʼdxiʼ ca xpinni Cristu ni napa xiiñiʼ gánnacaʼ ante chúʼnisa xiiñicaʼ?

TI HERMANA láʼ Blossom Brandt guníʼ xi bizaaca dxi gucuaa decisión de chúʼnisa. Sicaríʼ guniʼbe: «Stale biaje gudxeʼ bixhozeʼ ne jñaaʼ maʼ napaʼ gana chuaanisaʼ, ne zaqué bineʼ ni chupa chonna beeu ne laacabe guniʼnécabe naa de laani stale biaje. Nuucabe chúʼcabe seguru pa dxandíʼ maʼ nannaʼ cadi guendariguite ngue decisión ni gucuaaʼ que. Peru bedandá dxi chuaanisaʼ, ti dxi ni jma risaca lu xquendanabaneʼ ne guca ni 31 de diciembre iza 1934». Tiempu riʼ, ca xpinni Cristu ni napa xiiñiʼ laaca racaláʼdxicaʼ gacanecaʼ laacabe guicaacabe decisión jneza. Ora gucueezacabe ca xiiñicabe de chúʼnisa zanda gucueezacabe laacaʼ de guiniisicaʼ en sentidu espiritual (Sant. 4:17). Peru ni racaláʼdxicabe nga chúʼcabe seguru pa dxandíʼ maʼ nuu ca xiiñicabe listu para gácacaʼ ti xpinni Cristu ante chuʼnísacaʼ.

2. a) ¿Xi huayuuyaʼ caadxi superintendente de circuito ndaaniʼ caadxi congregación? b) ¿Xi zadúʼyanu lu tema riʼ?

² Caadxi superintendente de circuito nuuca xizaa purtiʼ runibiaʼcaʼ  stale joven de biaʼ gande iza ni biniisi ndaaniʼ ti familia ni naca Testigu ne caʼruʼ chuʼnísacaʼ. Stale de ca joven riʼ, riecaʼ reunión, runi predicarcaʼ ne para laacaʼ nácacaʼ ti testigu stiʼ Jiobá. Peru nuu xi pur qué rudiicabe xquendanabánicabe Jiobá ne qué riuunísacabe. ¿Xiñee qué ricaacabe decisión riʼ yaʼ? Nuu biaje la? purtiʼ bixhózecabe ne jñaacabe rabi laacabe cuézacabe. ¿Xiñee rucueeza caadxi de ca xpinni Cristu xiiñicaʼ de guiniisicaʼ lu stiidxaʼ Dios ne chuʼnísacaʼ yaʼ? Lu tema riʼ, zadúʼyanu tapa cosa ni zanda gucaa laacabe chúʼcabe xizaa.

3. ¿Xi guluu xizaa jñaa ne bixhoze Blossom?

³ Guyuu jñaa ne bixhoze Blossom xizaa pa maʼ napa xiiñicaʼ iza para guiene xi riníʼ chúʼnisa binni ne xiñee risaca guni ni. ¿Ximodo zanda ganna cani napa xiiñiʼ pa maʼ nuu xiiñicaʼ listu para gudiicaʼ xquendanabánicaʼ Jiobá yaʼ?

4. ¿Ximodo racané mandatu ni zeeda lu Mateo 28:19, 20 cani napa xiiñiʼ?

⁴ (Biindaʼ Mateo 28:19, 20). Casi bidúʼyanu lu tema ni gudiʼdiʼ ca, qué ruzeeteʼ diʼ Biblia pándapeʼ iza caquiiñeʼ gapa ti binni para chúʼnisa. Neca zacá, caquiiñeʼ guiníʼ ique cani napa xiiñiʼ xi riníʼ gusiidicaʼ binni para gaca discípulo. Diidxaʼ griegu ni riete lu Mateo 28:19 ni raca traducir «lachiusiidi [binni gaca discípulo]» riníʼ ni gusiidiʼ tuuxa sti binni para gácabe discípulo stiʼ tuuxa. Ti discípulo stiʼ Jesús nga tuuxa ni riziidiʼ ne riene cani bisiidibe, ne cá ique chinanda cani caziidiʼ. Nga runi, naquiiñeʼ quixhe ique ca Testigu ni napa xiiñiʼ gusiidicaʼ laacabe dede ora nácacabe ti baʼduhuiiniʼ para gacanecaʼ laacabe chuʼnísacabe ne gácacabe discípulo stiʼ Jesús. Ti baʼduhuiiniʼ la? qué zanda guni cumplir ca requisitu ni naquiiñeʼ guni ti binni para chúʼnisa. Peru Biblia ná, dede ca xcuidi ca zanda guiénecaʼ ne gusisácacaʼ cani dxandíʼ rusiidiʼ Biblia.

5, 6. a) Pur ni ruzeeteʼ Biblia de Timoteo, ¿xi gucané laabe para guyuunísabe? b) Cani napa xiiñiʼ, ¿ximodo jma zanda gacanetu ca xiiñitu?

⁵ Gudixhe ique discípulo Timoteo guni ni ná Jiobá dxi naca ti joven. Apóstol Pablo guníʼ «dede dxi nahuiini» Timoteo binibiáʼ ni rusiidiʼ Stiidxaʼ Dios, dede dxi nácabe ti baʼduhuiiniʼ. Jñaabe ne jñaabidaabe judía laacaʼ, ne laacaʼ nga bisiidicaʼ laabe gannaxhiibe Stiidxaʼ Dios, purtiʼ bixhózebe qué ñuni ni ná Jiobá. Ne pur nga la? guca fe stibe naguidxi (2 Tim. 1:5; 3:14, 15). Dxi nápabe gande iza, mápeca runi cumplirbe ca requisitu para guicaabe privilegiu ndaaniʼ congregación (Hech. 16:1-3).

⁶ Gadxé gadxé nga cada xcuidi. Nuu de laacabe nahuiinirúcabe maʼ riénecabe ni rusiidiʼ Stiidxaʼ Dios, ricaacabe decisión jneza ne rinábacabe chuʼnísacabe. Peru nuu xcaadxi xcuidi cadi casi zeʼ riene ni rusiidiʼ Stiidxaʼ Dios ne pur nga rindaa para chúʼnisa. Nga runi, laguiene xiiñitu ne cadi gucaatu laacabe chuʼnísacabe, sínuque lagacané laacabe guiniisicabe lu Stiidxaʼ Dios biaʼ laacabe. Riecheʼ cani napa xiiñiʼ ora ricaa xiiñicaʼ decisión jneza ne rúnicaʼ ni ná ca diidxaʼ ni zeeda lu Proverbios 27:11 (biindaʼ ni). Nga runi, cadi guiaandaʼ lii meta stiluʼ nga gacaneluʼ xiiñiluʼ gaca discípulo stiʼ Cristu. Né guiráʼ ni guninu riʼ galán guinabadiidxaluʼ laca lii: «¿Ñee maʼ nanna xiiñeʼ cani caquiiñeʼ ganna de lu Stiidxaʼ Dios para gudii laa Jiobá ne chúʼnisa la?».

7. ¿Ñee caquiiñeʼ ganna binni guiráʼ ni rusiidiʼ Biblia para chúʼnisa la? Bisiene ni.

⁷ Nánnanu rusiidiʼ binni xiiñiʼ cani dxandíʼ rusiidiʼ Biblia purtiʼ racaláʼdxicaʼ gunibiáʼ chaahuicabe cani. Ne ni guiziidiʼ ca xiiñitu de lu stiidxaʼ Dios zacané ni laacabe gudiicabe xquendanabánicabe Jiobá. ¿Ñee riníʼ ndiʼ caquiiñepeʼ gánnabe guiráʼ ni rusiidiʼ Biblia ante gudiibe laabe Jiobá ne chuʼnísabe la? Coʼ. Purtiʼ guiráʼ binni ni chúʼnisa naquiiñeʼ guiziidiruʼ de stiidxaʼ Dios despué de maʼ guyuunisa (biindaʼ Colosenses 1:9, 10). Yanna, ¿pabiáʼ naquiiñeʼ ganna binni de lu Stiidxaʼ Dios para chúʼnisa yaʼ?

8, 9. ¿Xi rizíʼdinu de relatu ni caníʼ de Pablo ne hombre ni rapa ra cárcel que?

⁸ Para guicábinu pregunta riʼ, galán gánnanu xi biʼniʼ ti familia ni bibani lu primé siglu (Hech. 16:25-33). Lu iza 50 biʼniʼ apóstol Pablo guiropa biaje misional stiʼ guidxi Filipos. Gunaazecabe laabe ne xcompañérube Silas ne biseguyoocaʼ laacabe purtiʼ bigaanicaʼ donda íquecabe de xiixa ni cadi dxandíʼ. Gueelaʼ que, guca ti xu naroʼbaʼ ne biniibi dxacha ra deguyoocabe que ne bixeleʼ ca puertaʼ stini. Bidxibi hombre ni cayapa ra cárcel que, zácaxa maʼ biree cani deguyoo que, ngue runi gucalaʼdxiʼ ñuuti laa. Peru Pablo bicueeza laabe. Ne biʼniʼ predicar Pablo ne Silas laabe ne xfamíliabe. Guizáʼ bisisácacabe ni biziidicabe de Jesús, ngue runi nagueendaca guyuunísacabe. ¿Xi rusiidiʼ relatu riʼ laanu yaʼ?

⁹ Zándaca maʼ ti soldadu jubiladu hombre ni cayapa ra cárcel que, ne qué gánnabe xi rusiidiʼ Biblia. Nga runi, para gácabe ti xpinni Cristu la? caquiiñeʼ guiziidibe cani dxandíʼ rusiidiʼ Stiidxaʼ Dios, cani jma naquiiñeʼ guiziidiʼ binni de lu Biblia, guiénebe xi riníʼ gaca tuuxa ti xpinni Jiobá ne chuʼbe dispuestu guzuubabe stiidxaʼ Jesús ne chinándabe ni rusiidiʼ. Qué nindaa, biziidiʼ hombre riʼ cani jma naquiiñeʼ guiziidiʼ de lu Stiidxaʼ Dios ne bisisácabe cani dxandíʼ biziidibe que, ne bicaa ni laabe chuʼnísabe. Ne neca maʼ guyuunísabe qué nusaanabe de niziidibe. Yanna, ¿xi zanda guni cani napa xiiñiʼ pa gabi xiiñicabe laacabe maʼ napa gana chúʼnisa purtiʼ nadxii Jiobá ne racalaʼdxiʼ guzuubaʼ stiidxabe yaʼ? Zanda gábiluʼ laabe guiníʼnebe ca ancianu ni nuu ra congregación para gúʼyacaʼ pa maʼ runi cumplirbe ca requisitu para chuʼnísabe. * Cásica guiráʼ ca xpinni Cristu ni riuunisa, laabe laaca qué ziuu dxi gusaanabe de guiziidibe de Dios (Rom. 11:33, 34).

10, 11. a) ¿Xi riníʼ ique caadxi binni ni napa xiiñiʼ? b) ¿Xii nga ni jma naquiiñeʼ gusisaca cani napa xiiñiʼ?

¹⁰ Stale binni riníʼ ique ni jma galán guni xiiñiʼ nga guʼndaʼ ti carrera ne gapa ti dxiiñaʼ galán ante chúʼnisa. Ne riníʼ íquecabe zacá purtiʼ racaláʼdxicabe ni galán para xiiñicabe. Peru ¿ñee dxandipeʼ cayacanécabe ca xiiñicabe para guibánicaʼ nayecheʼ la? ¿Ñee nga nga ni rusiidiʼ Biblia la? ¿Xi racalaʼdxiʼ Jiobá gúninu ne xquendanabáninu yaʼ? (Biindaʼ Eclesiastés 12:1).

¹¹ Cadi guiaandaʼ laanu guiráʼ ni runi  ne ni riníʼ ique binni guidxilayú maʼ gadxé cani de ni riníʼ ique Jiobá ne ni racalaʼdxiʼ (Sant. 4:7, 8; 1 Juan 2:15-17; 5:19). ¿Xii nga jma zanda gapa ti xcuidi de Binidxabaʼ, de guidxilayú stiʼ ne de modo riníʼ ique binni guidxilayú yaʼ? Gaca xhamígube Dios. Peru pa jma guicá ique cani napa xiiñiʼ ca cosa material la? zándaca guiníʼ ique xiiñicaʼ jma risaca ca cosa ni nuu lu guidxilayú riʼ que gácacaʼ xhamigu Jiobá. Nanna dxiichinu nin ti Testigu qué racalaʼdxiʼ gucaa guidxilayú riʼ xiiñiʼ guicaa decisión ni cadi jneza. Ni dxandíʼ nga para guibáninu nayecheʼ la? naquiiñeʼ gúninu ni ná Jiobá primé lu xquendanabáninu (biindaʼ Salmo 1:2, 3).

12. ¿Xiñee nuu binni rabi xiiñiʼ cueza ti chuʼnisa?

¹² Ti gunaa Testigu gudxi xiiñiʼ cueza ti chúʼnisa. ¿Xiiñeʼ bíʼnibe ni yaʼ? Laca laabe bisiénebe ni: «Rituí luaʼ guinieeʼ ni, peru bicueezaʼ dxaapahuiiniʼ stinneʼ purtiʼ rabeʼ zándaca gueeda gaca expulsarbe». Cásica hermana riʼ, nuu binni riníʼ ique jma galán cueza xiiñicaʼ ti chúʼnisa dede ora maʼ huaniisi ne maʼ zanda guicaa decisión jneza (Gén. 8:21; Prov. 22:15). Zándaca riníʼ íquecabe qué zanda gaca expulsar xiiñicabe purtiʼ caʼruʼ chúʼnisa, peru caguítecabe laca laacabe. ¿Xiñee yaʼ? (Sant. 1:22).

13. Pa caʼruʼ chúʼnisa tuuxa, ¿ñee riníʼ nga qué zanabaʼ Jiobá cuenta laabe pur ni gúnibe la? Bisiene ni.

¹³ Nánnanu ni racalaʼdxiʼ binni nga gudii xiiñiʼ xquendanabani Jiobá ne chúʼnisa ora maʼ riníʼ ique casi riníʼ ique ti binni huaniisi. Peru cadi jneza guiníʼ íquecabe qué zanabaʼ Jiobá cuenta xiiñicabe purtiʼ si caʼruʼ chuʼnísacaʼ. Ni dxandíʼ nga dede ora maʼ rudii xiiñitu cuenta xii nga ni jneza ne ni cadi jneza la? maʼ zanabaʼ Dios cuenta laacabe pur ni gúnicabe (biindaʼ Santiago 4: 17). Nga runi, ti binni ni nanna gusiniisi xiiñiʼ, rudii ti ejemplu galán laacabe lugar de gucueeza laacabe para cadi chuʼnísacabe. Dede nahuiiniʼ ca xiiñicabe rusiidicabe laacaʼ gannaxhiicaʼ ca norma moral stiʼ Jiobá ne gúnicaʼ ni ná cani de guidubi ladxidoʼcaʼ (Luc. 6:40). Ni guiziidicabe riʼ, zapa ni laacabe purtiʼ zucaa ni laabe chinándabe ni ná ca norma riʼ (Is. 35:8).

14. ¿Ximodo zanda gacané ca ancianu de congregación cani napa xiiñiʼ?

¹⁴ Zanda gacané ca ancianu de congregación ca hermanu ni napa xiiñiʼ. ¿Ximodo yaʼ? Ra guiníʼcabe xi guiráʼ cosa galán ribeendú tuuxa ora quixhe ique ugaanda xiixa meta espiritual. Ti hermana rietenalaʼdxiʼ, dxi napa xhoopaʼ iza gulee hermanu Russell quince minutu para guniʼné laa de ca meta espiritual ni zanda ugaanda. Guca hermana riʼ precursora jma de setenta iza. Ndiʼ racané laanu gánnanu ora riguʼnu gana tuuxa zanda gacané ni laa lu xquendanabani (Prov. 25:11). Sti cosa ni zanda guni ca ancianu nga guinábacaʼ ca xpinni Cristu ne ca xiiñicaʼ gacanecaʼ gaca dxiiñaʼ ndaaniʼ Yoo stiʼ Reinu, ne zanda gudiicabe xiixa dxiiñaʼ ca xcuidi biaʼ iza nápacaʼ ne ni zanda gúnicaʼ.

15. ¿Ximodo zanda cuʼ xcaadxi hermanu gana ca joven?

¹⁵ ¿Ximodo zanda gacané xcaadxi hermanu yaʼ? Ra guizaaláʼdxicabe ca joven. Ti modo zanda gúnicabe ni nga ora gúʼyacabe ximodo caniisicaʼ lu Stiidxaʼ Dios. Casi pa bidii ti joven ti  comentariu galán ra reunión, pa gupa ti asignación ra reunión, pa biʼniʼ huantar xiixa guendanagana pur fe stiʼ o biʼniʼ predicar ra scuela la? guni felicitarnu laacabe de guidubi ladxidoʼno. Quixhe íquenu guinínenu ca joven ante o despué de cada reunión. Pa gúninu ndiʼ zacané ni ca joven guni sentircaʼ nácacaʼ parte de congregación stiʼ Dios (Sal. 35:18).

16, 17. a) ¿Xiñee risaca nga chúʼnisa ca xiiñitu? b) ¿Xi guendanayecheʼ zanda guni sentir ca xpinni Cristu ni napa xiiñiʼ? (Biiyaʼ foto ni zeeda ra ruzulú tema riʼ).

¹⁶ Ti dxiiñaʼ nabé risaca ni napa ca xpinni Cristu nga gusiniisicaʼ xiiñicaʼ, gulídxecaʼ ne gusiidicaʼ laacabe modo ná Jiobá (Efes. 6:4; Sal. 127:3). Dxiqué, ca xcuidi israelita dede dxi gálecaʼ maʼ nácacaʼ parte de ti guidxi ni guleechú Dios para laa. Peru ca xcuidi ni rale ndaaniʼ ti familia ni naca xpinni Cristu yanna la? maʼ coʼ. Cadi purtiʼ si nadxii jñaa ne bixhoze ti xcuidi Jiobá ne cani dxandíʼ rusiidiʼ Biblia nga guininu zacaca zuni xiiñicabe. Dede dxi gale xiiñiʼ ti xpinni Cristu, naquiiñeʼ quixhe íquecaʼ gacanecaʼ laabe gácabe discípulo stiʼ Cristu, gudiibe Dios xquendanabánibe ne chuʼnísabe. Nga nga ni jma risaca guni xiiñiʼ ti xpinni Cristu. ¿Xiñee yaʼ? Purtiʼ ra gudii ti binni laa Jiobá, chúʼnisa ne guzuuba stiidxabe zacané ni laa para guilá lu gran tribulación ni zeeda dxiña (Mat. 24:13).

¹⁷ Lu primé párrafo que guninu de ti hermana láʼ Blossom Brandt. Dxi gúdxibe jñaabe ne bixhózebe maʼ nápabe gana chuʼnísabe la? biiyaʼ chaahuicaʼ pa dxandíʼ maʼ riénebe pabiáʼ risaca ngue ni chigúnibe que. Ora bidiicaʼ cuenta maʼ riénebe xi chigúnibe la? gucanecaʼ laabe. Ti gueelaʼ ante chuʼnísabe biʼniʼ bixhózebe ti cosa guizáʼ galán. Blossom guníʼ: «Gúdxibe laadu guzuxíbidu ne bíʼnibe ti oración. Gúdxibe Jiobá guizáʼ nayecheʼ nuube purtiʼ maʼ gudixhe ique dxaapahuiiniʼ stibe gudii xquendanabani Jiobá». Gudiʼdiʼ si jma de sesenta iza, Blossom guníʼ: «Qué ziuu dxi gusiaandaʼ ni biʼniʼ bixhozeʼ gueelaʼ que». Racaláʼdxinu guiráʼ binni napa xiiñiʼ guni sentir guendanayecheʼ riʼ ora gúʼyacaʼ gudii xiiñicaʼ xquendanabánicaʼ Jiobá ne chuʼnísacaʼ.