JESÚS biʼniʼ profetizar zandisaʼ ca xpinni ti cosecha naroʼbaʼ dxi mayaca guinitilú guidxilayú (Mat. 9:37; 24:14). Ne cayaca cumplir ca diidxaʼ guníʼ Jesús riʼ ti lugar stiʼ Transcarpatia (Ucrania). Ndaaniʼ chonna guidxihuiiniʼ ni nuu gaxha de raqué, nuu 50 congregación ne jma de 5,400 publicador. * Ne pa ugábanu panda binni nabeza ndaaniʼ guionnaʼ guidxihuiiniʼ riʼ la? tobi de cada tapa binni ni nabeza raqué naca testigu stiʼ Jiobá.

¿Ximodo ca binni ni nabeza lu territorio riʼ yaʼ? Ti hermanu ni láʼ Vasile guníʼ: «Ca familia nabezaʼ raríʼ nuucaʼ tobi si, runi respetarcaʼ Biblia, riuuláʼdxicaʼ gaca ni jneza ne rúnicaʼ stipa pur gacanésaacaʼ». Laaca guniʼbe: «Cadi guiráʼ diʼ biaje riuucabe de acuerdu né ni runi credu, peru ora ridúʼndanedu laacabe ti textu de lu Biblia guizáʼ rucaadiágacabe laadu».

Guizáʼ stale publicador nuu ndaaniʼ ca guidxihuiiniʼ riʼ, nga runi ridxaagalú ca hermanu stinu caadxi guendanagana, guzéʼtenu tobi de laani. Nuu ti congregación ni napa 134 publicador ne 50 si yoo nuu lu territorio stícabe para guni predicárcabe. ¿Xi rúnicabe ora ridxaagalúcabe guendanagana riʼ yaʼ?

Stale hermanu runi stipa pur chigacané ti lugar ra caquiiñeʼ jma publicador. Ti hermanu ni napa 90 iza ni láʼ Ionash guníʼ: «Lu territorio stidu chupa si yoo raca caber cada publicador guni predicar. Yanna riʼ, runeʼ predicar ndaaniʼ guidxihuiiniʼ stidu riʼ, peru ante gacaʼ huaraʼyaʼ, laaca yegacaniáʼ ti territorio ni nuu 160 kilómetru de raríʼ para guneʼ predicar ra riníʼcabe diidxaʼ húngaro». Ca publicador ni rigacané ca lugar ra nuu jma necesidad, rúnicaʼ stale sacrificiu para chigacanecaʼ ca lugar riʼ. Laaca bizeetebe: «Para ugaandaʼ tren la? riasaʼ a las cuatro de la mañana, ne runeʼ predicar hasta las seis de la tarde, purtiʼ óraque nga ribiguetaʼ tren que. Chupa o chonna biaje lu ti semana rigacaniáʼ lugar que». ¿Ximodo runi sentir hermanu Ionash pur yegacané sti lugar yaʼ? Sicaríʼ guniʼbe: «Guizáʼ guyuuladxeʼ chiguneʼ predicar raqué. Gucaniáʼ ti familia ni nabeza zitu de guidxihuiiniʼ que guiziidiʼ ni dxandíʼ».

Cadi guiráʼ hermanu ni nuu ndaaniʼ ca congregación de ca guidxihuiiniʼ riʼ zanda chigacanecaʼ sti lugar. Peru guiracaʼ, dede né ca hermanu ni maʼ huaniisi rúnicaʼ stipa pur guni predicarcaʼ ca binni ni nuu lu territorio sticaʼ. Pur dxiiñaʼ nadipaʼ ni rúnicabe, ndaaniʼ guionnaʼ guidxihuiiniʼ riʼ, guyé stale binni dxi guca Conmemoración lu iza 2017, casi doble de publicador ni nuu ndaaniʼ cada congregación, casi ñaca ñé biaʼ galaa de ca binni ni nabezaʼ ndaaniʼ ca guidxihuiiniʼ riʼ. Nga runi, ra tiica guni servirnu, nuuruʼ stale ni gúninu lu «xhiiña Señor» (1 Cor. 15:58).