1-3. a) ¿Ximodo naquiiñeʼ guidúʼyanu cani dxandíʼ rusiidiʼ Biblia? Bizeeteʼ ti ejemplu (biiyaʼ ca dibuju ne foto ni zeeda ra ruzulú tema riʼ). b) ¿Gunáʼ nga ca pregunta ni zacábinu lu tema riʼ?

TIEMPU riʼ stale binni rizíʼ cosa ne despué rudxiguetaʼ cani. Según ca calculo ni huayaca ndaaniʼ caadxi guidxi 9% de ca cosa ni rizíʼ binni ndaaniʼ ca tienda ca rudxiguetaʼ cani. Ne jma de 30% de ca cosa ni rizíʼ binni lu Internet rudxiguetacaʼ ni. Zándaca rudxiguetaʼ binni ca cosa riʼ purtiʼ qué riuuláʼdxicaʼ ni o napa cani xiixa defectu. Nga runi rudxiguetácabe ca cosa riʼ ne rinábacaʼ gudxiguétacabe xpuéltucaʼ.

² Ndiʼ nga ni qué racaláʼdxinu gúninu né cani maʼ biziidiʼ de lu Biblia. Purtiʼ ora maʼ guzinu cani dxandíʼ rusiidiʼ Biblia la? maʼ qué racaláʼdxinu gutoʼno cani o gusaananu cani (1 Tim. 2:4; biindaʼ Proverbios 23:23). Casi bizíʼdinu lu tema ni gudiʼdiʼ que, gupa xidé guleenu stale tiempu para gunda bizíʼdinu ni dxandíʼ rusiidiʼ Biblia. Nuu tu laa la? zándaca bisaana xiixa dxiiñaʼ ra biʼniʼ ganar stale bueltu o bidxiilú guiráʼ ni biʼniʼ familia stiʼ laa o ca xhamigu. Ne xcaadxi la? bichaa modo riníʼ ique, ni runi ne zándaca bisaanacaʼ costumbre ne tradición ni cadi zeeda lu  Biblia. Intiica si cosa maʼ bisaananu la? jma huaxiéʼ cani que guiráʼ ndaayaʼ ni maʼ gucuaanu.

³ Guníʼ Jesús de ti comerciante ni rizíʼ perla chaʼhuiʼ para gusihuinni pabiáʼ risaca cani dxandíʼ rusiidiʼ Reinu stiʼ Dios. Ora bidxela hombre riʼ tobi de laacani la? nagueendaca «yeutoo irá ni napa para uzíʼ ni» (Mat. 13:45, 46). Zacaca nga ora rizíʼdinu cani dxandíʼ rusiidiʼ Reinu stiʼ Dios ne xcaadxi ni rusiidiʼ Biblia, guizáʼ rusisácanu cani dede nuunu dispuestu gúninu intiica sacrificiu para cadi gunítinu cani. Mientra jma gusisácanu cani la? qué lica zaníʼ íquenu gutoʼno cani. Triste guininu ni, peru stale xpinni Dios maʼ bisaana de gusisaca cani dxandíʼ rusiidiʼ Biblia dede nuu tu laa casi ñaca maʼ bitoo cani. Qué chuʼ dxi gúninu nga. Ni jma jneza gúninu nga chinándanu mandatu ni zeeda lu Biblia ra ná cadi gusaananu de sanu «lu ni dxandíʼ» rusiidiʼ Stiidxaʼ Dios (biindaʼ 3 Juan 2-4). Ndiʼ nga ni jma risaca gúninu lu xquendanabáninu. Lu tema riʼ zacábinu ca pregunta riʼ: ¿Xi bicaa caadxi de ca xpinni Dios gutoocaʼ cani dxandíʼ rusiidiʼ Stiidxaʼ Dios, ne ximodo huayúnicabe ni? ¿Xi zacané laanu cadi gutoʼno cani yaʼ? ¿Xi zacané laanu cadi lica gusaananu de sanu «lu ni dxandíʼ» rusiidiʼ Stiidxaʼ Dios?

4. ¿Xiñee bitoo stale de ca binni ni bibani lu primé siglu que cani dxandíʼ rusiidiʼ Stiidxaʼ Dios?

⁴ Guyuu stale tu biʼniʼ cré cani bisiidiʼ Jesús lu primé siglu, peru despué bisaanacaʼ de ninándacaʼ cani rusiidiʼ Stiidxaʼ Dios. Ti biaje bíʼnibe ti milagru para biyaanabe stale binni ni guzananda laabe. Despué de ngue la ? gudíʼdibe sti ladu nisadóʼ stiʼ Galilea ne laaca yenanda ca binni que laabe. Ne ora yendácabe raqué gudxi Jesús laacabe xiixa ni qué ñénecabe: «Gabe caʼ laatu, pa qué go to cuerpu sti Hombre Biseenda Dios ne qué gue tu rini sti la? qué zapa di tu enda nabani». Lugar de ninábacaʼ laabe nusiénebe laacaʼ ca diidxaʼ que la? laga guniʼcaʼ: «Nabé naná ca diidxa cusiidi be ca. Tuu ndi zanda icaa cani» yaʼ? Ngue runi, «stale de cani canazá né laabe que, ma qué ninanda ru ca laabe» (Juan 6:53-66).

5, 6. a) ¿Xiñee nuu tu laa maʼ bixeleʼ de cani dxandíʼ rusiidiʼ Stiidxaʼ Dios? b) Bisiene ximodo zanda guixeleʼ tuuxa de cani dxandíʼ rusiidiʼ Stiidxaʼ Dios.

⁵ Tiempu riʼ laaca stale tu laa maʼ bixeleʼ de cani dxandíʼ rusiidiʼ Stiidxaʼ Dios. Nuu tu laa maʼ bixeleʼ purtiʼ qué ñuulaʼdxiʼ xiixa ni bisiene xquidxi Dios o pur ni guníʼ o ni biʼniʼ tuuxa hermanu ni runibiáʼ. Ne xcaadxi la? guca ofender pur bidii tuuxa conseju laa o gupa xiixa problema né tuuxa hermanu. Zándaca nuu tu laa dede runi apoyar ni runi ca apóstata ne rucaalú cani runi crenu. Intiica si cosa bicaa laacabe gúnicabe ni, maʼ gucuaacabe decisión de guixélecabe de Jiobá ne de congregación stiʼ (Heb. 3:12-14). Jma jneza cadi nusaana de ñápacabe fe ne confianza Jesús cásica biʼniʼ apóstol Pedro. Purtiʼ dxi gunabadiidxaʼ Jesús ca apóstol stiʼ pa laaca zusaanacaʼ laabe la? nagueendaca bicabi Pedro ne ná: «Tu ru ra nuu ñuu du yaʼ, Señor. Lii siouʼ nga ruiʼ neu laadu ni rudii enda nabani ni qué zaluxe» (Juan 6:67-69).

⁶ Peru nuu xcaadxi la? chaahuiʼ chaahuiʼ maʼ bixhélecaʼ de cani dxandíʼ rusiidiʼ Stiidxaʼ Dios, zándaca sin gudiicaʼ cuenta. Biblia ná zeeda gácacabe casi ti barcu ni zixeleʼ de ruaa nisadóʼ chaahuidugá chaahuidugá (Heb. 2:1). Zándaca qué niníʼ íquecabe nixhelécabe, peru bidiicabe lugar guca debilitar amistad ni napanécabe Jiobá dede ra bisaana de gaca xhamígucabe laabe. ¿Xi  zanda gúninu para cadi guizaacanu ca cosa triste ni bizéʼtenu riʼ yaʼ?

7. ¿Xi zacané laanu cadi gutoʼno cani dxandíʼ rusiidiʼ Stiidxaʼ Dios?

⁷ Para cadi gusaana de sanu lu cani dxandíʼ rusiidiʼ Stiidxaʼ Dios la? naquiiñeʼ guni aceptarnu ne chinándanu guiráʼ ni rusiidiʼ Jiobá laanu. Naquiiñeʼ gúninu ni nabe primé lu xquendanabáninu ne chinándanu ni ná ca principiu zeeda lu Biblia. Ti biaje gudxi rey David ca diidxaʼ riʼ Jiobá: «Biluíʼ naa ni dxandíʼ» (Sal. 25:5). Ne guizáʼ nuube seguru ora guniʼbe ca diidxaʼ riʼ. Nga runi, pa nuunu dispuestu cadi gusaananu cani dxandíʼ rusiidiʼ Stiidxaʼ Dios la? qué lica zaníʼ íquenu xi guiráʼ binítinu para bizíʼdinu cani dxandíʼ rusiidiʼ Stiidxaʼ Dios o dede guiníʼ íquenu guyúbinu guibiguetaʼ guiráʼ ni binítinu. Ne ndiʼ nga ti cosa ni cadi lica naquiiñeʼ gúninu. Nanna dxiichinu qué zanda cuinu gunáʼ de cani rusiidiʼ Biblia zanda guizíʼdinu ne gunáʼ coʼ, purtiʼ naquiiñeʼ guizíʼdinu «irá ni dxandíʼ» (Juan 16:13). Lu tema gudídinu que bizíʼdinu gaayuʼ cosa ni zándaca bisaananu para bizíʼdinu cani dxandíʼ rusiidiʼ Biblia ne gúninu ni ná ni. Yanna guzéʼtenu xi zacané laanu para cadi guibiguetaʼ gúninu ca cosa ni maʼ bisaananu (Mat. 6:19).

8. ¿Ximodo zanda guixeleʼ tuuxa de cani dxandíʼ rusiidiʼ Stiidxaʼ Dios sin gudii cuenta? Bizeeteʼ ti ejemplu.

⁸ Tiempu. Para cadi guixélenu de cani dxandíʼ rusiidiʼ Stiidxaʼ Dios la? nabé risaca iquiiñenu tiempu stinu jneza. Purtiʼ pa qué chuʼnu cuidadu la? zándaca guzulú gunítinu stale tiempu lu entretenimientu, lu xiixa cosa ni riuuláʼdxinu gúninu, lu Internet o lu televisión. Neca cadi malu ca cosa ni bizéʼtenu riʼ la? zanda cuee cani stale tiempu stinu ni ñándaca niquiiñenu para estudiu personal stinu o gúninu xcaadxi cosa espiritual. Guzéʼtenu ni bizaaca ti hermana láʼ Emma. * Guizáʼ riuuláʼdxibe quíbabe caballu dede dxi nahuiinibe ne gatigá rúnibe ni. Peru bidiibe cuenta nabé jma stale tiempu riquiiñebe para quíbabe caballu, ngue runi gudixe íquebe gúnibe caadxi cambiu. Guizáʼ gucané historia stiʼ Cory Wells laabe, xa hermana ni biʼniʼ acrobacia lu caballu ra ti rodeo. * Yanna riʼ, jma riquiiñeʼ Emma tiempu stiʼ para chuʼ ra nuu ca xhamigu, familia stiʼ ne ra nuu ca hermanu. Runi sentir Emma nuu jma gaxha de Jiobá ne nuube nayecheʼ purtiʼ nánnabe caquiiñebe tiempu stibe jneza.

9. ¿Xiñee cadi naquiiñeʼ gannaxhiinu jma ca cosa material?

⁹ Cosa material. Pa qué racaláʼdxinu gusaana de sanu lu cani dxandíʼ rusiidiʼ Stiidxaʼ Dios la? naquiiñeʼ gánnanu xi cosa jma risaca naquiiñeʼ gúninu. Dxi bizulú bizíʼdinu de Jiobá la? maʼ qué nisacapeʼ ca cosa material ca para laanu ne jma gucuá íquenu ca cosa espiritual. Biale de laanu gúninu sacrificiu para cadi gusaananu de sanu lu cani dxandíʼ rusiidiʼ Stiidxaʼ Dios. Peru ra tiidiʼ tiempu zándaca guidúʼyanu nuu tu laa rizíʼ aparatu electrónicu o xcaadxi cosa material, ne zándaca guiníʼ íquenu laanu laaca zanda gápanu cani. Pa cadi nuunu nayecheʼ né ca cosa ni nápanu la? zándaca gucáʼnanu ca cosa espiritual para gápanu jma cosa material. Ndiʼ rusietenalaʼdxiʼ laanu ni bizaaca Demas. Pur gunnaxhiibe «ca cosa ni nuu ndaaniʼ guidxilayú» riʼ la? bisaanabe serviciu stibe ne maʼ qué ninebe apóstol Pablo lu ca asignación ni gúpacabe (2 Tim. 4:10, TNM). Qué ruzeeteʼ Biblia pa  bisaana Demas xhiiñaʼ Dios purtiʼ jma gunnaxhii ca cosa material, o pur maʼ qué niná ñuni sacrificiu casi runi Pablo para guni jma lu xhiiñaʼ Dios. Ni bizaaca Demas riʼ rusietenalaʼdxiʼ ni laanu cadi naquiiñeʼ guibiguetaʼ gannaxhiinu ca cosa material ni gúpanu dxiqué, purtiʼ zándaca guxheleʼ cani laanu de cani dxandíʼ rusiidiʼ Stiidxaʼ Dios.

10. Para sanu lu cani dxandíʼ rusiidiʼ Stiidxaʼ Dios, ¿xi cadi naquiiñeʼ gudiʼnu lugar gucaa xcaadxi laanu gúninu?

¹⁰ Amistad ni nápanu né ca xhamígunu ne familia stinu. Para sanu lu cani dxandíʼ rusiidiʼ Stiidxaʼ Dios la? cadi naquiiñeʼ gudiʼnu lugar gucaacabe laanu gúninu xiixa ni cadi jneza. Dxi binibiaʼnu ni dxandíʼ la? bichaa amistad ni nápanu né ca xhamígunu ne ca familia stinu ni cadi Testigu. Nuu tu laa biʼniʼ respetar ni runi crenu, peru xcaadxi qué lica ñuuláʼdxicaʼ ni (1 Ped. 4:4). Ne de guiranu rúninu stipa pur cadi chuʼdindenenu ca familia stinu ne guni tratarnu laacabe galán. Peru caquiiñeʼ chuʼnu cuidadu para cadi gúninu xiixa ni riuuláʼdxicabe ne zacá guchéʼnenu Jiobá. Nga runi, lu 1 Corintios 15:33 cayabi laanu gaca xhamígunu ca binni ni nadxii Jiobá.

11. ¿Xi zacané laanu para cadi gúninu ne guiníʼ íquenu cosa ni cadi jneza?

¹¹ Cadi gúninu ne guiníʼ íquenu cosa ni cadi jneza. Cani cayuni ni rusiidiʼ Stiidxaʼ Dios caquiiñeʼ gácacaʼ santu (Is. 35:8; biindaʼ 1 Pedro 1:14-16). Dxi bizíʼdinu ca norma ni jneza zeeda lu Biblia bichaʼnu modo laanu. Ne nuu tu laa bichaa stale cosa lu xquendanabani. Pur nga cadi lica naquiiñeʼ guibiguetaʼ gúninu ca cosa malu ni bíninu dxiqué. Peru ¿xi caquiiñeʼ gúninu para cadi guiníʼ íquenu lu ca cosa riʼ yaʼ? Caquiiñeʼ guiníʼ íquenu lu ni maʼ biʼniʼ Jiobá para gácanu binni santu, laabe bidiibe xquendanabani Xiiñibe, Jesucristu pur laanu (1 Ped. 1:18, 19). Nga runi, para ganda gácanu binni nayá nezalú Jiobá la? cadi naquiiñeʼ guiaandaʼ laanu pabiáʼ risaca ni bíʼnibe pur laanu dxi bidiibe xquendanabani Xiiñibe pur laanu.

12, 13. a) ¿Xiñee nabé risaca guidúʼyanu ca saa ca casi modo ruuyaʼ Jiobá cani? b) ¿Xi pregunta zacábinu lu tema riʼ?

¹² Costumbre ne tradición ni cadi zeeda lu Biblia. Zándaca guni invitar ca familia stinu, ca xhamígunu o ca compañeru de dxiiñaʼ stinu laanu chuunu ti saa. ¿Xi zacané laanu gucáʼnanu ca costumbre ne ca saa ni nanalaʼdxiʼ Jiobá yaʼ? Ni zacané laanu nga cadi guisiáʼndanu ximodo ruuyabe cani. Ne laaca caquiiñeʼ guni estudiarnu ca publicación stinu ra cá para biasastí ca saa ca. Nga runi, ora rietenaláʼdxinu xiñee qué runi participarnu lu ca saa ca la? riuʼnu seguru cayúninu ni riuulaʼdxiʼ Dios (Efes. 5:10). Pa gápanu confianza Jiobá ne Stiidxaʼ la? qué zadxíbinu xi guiníʼ binni (Prov. 29:25).

¹³ Cadi nuunu gusaananu de gúninu cani dxandíʼ rusiidiʼ Stiidxaʼ Dios biaʼ dxi guibáninu. ¿Xi zanda gúninu para cadi gusaana de gúninu ni ná cani dxandíʼ rusiidiʼ Stiidxaʼ Dios lu xquendanabáninu yaʼ? Guidúʼyanu chonna modo zanda gúninu ni.

14. Pa qué gusaananu de sinu cani dxandíʼ, ¿ximodo zacané nga laanu cadi guiníʼ íquenu gutoʼno ni yaʼ? b) ¿Xiñee nabé risaca guendanuuxpiaaniʼ, guendariene ne disciplina?

¹⁴ Primé, cadi gusaana de cueenu tiempu para guni estudiarnu cani dxandíʼ rusiidiʼ Stiidxaʼ Dios ne guni meditarnu lu cani. Mientra jma guni estudiarnu, jma zannaxhiinu cani dxandíʼ ne zucaa cani laanu cadi gutoʼno cani. Peru cadi naquiiñeʼ si guizíʼdinu cani dxandíʼ rusiidiʼ Stiidxaʼ Dios laaca caquiiñeʼ gúninu ni ná cani. Proverbios  23:23 ná pa maʼ guzinu ni dxandíʼ la? laaca naquiiñeʼ guyúbinu gápanu «guendanuuxpiaaniʼ, guendariene ne disciplina». Sinu guendanuuxpiaaniʼ riníʼ ni gúninu guiráʼ ni rizíʼdinu. Gápanu guendariene riníʼ ni guchaaganu guiráʼ cani rizíʼdinu ne ni maʼ nánnanu. Ne nuu biaje riguu jneza cani dxandíʼ rusiidiʼ Stiidxaʼ Dios laanu purtiʼ rabi cani laanu xi caquiiñeʼ guchaʼnu lu xquendanabáninu. Ora uguu jnézacabe laanu o guni disciplinárcabe laanu la? caquiiñeʼ guni aceptarnu ni, purtiʼ Biblia peʼ ná jma risaca ni qué plata (Prov. 8:10).

15. ¿Ximodo rapa cinturón ni zeeda gaca casi cani dxandíʼ rusiidiʼ Biblia laanu yaʼ?

¹⁵ Guiropa, cadi naquiiñeʼ gusaana de gúninu cani rusiidiʼ Stiidxaʼ Dios laanu guiráʼ dxi, casi ñaca nuxhiʼnu cinturón ndaaninu (Efes. 6:14). Dxiqué la? ruxhii ca soldadu que cinturón ndaanicaʼ para gapa ni laacaʼ. Peru caquiiñeʼ guxiidxiichicabe ni purtiʼ pa coʼ la? qué zapa ni laacabe. Cani dxandíʼ rusiidiʼ Biblia zeeda gaca ni casi ti cinturón en sentidu espiritual. Pa guxiidxiichinu ni la? zapa ni laanu de caadxi cosa ni cadi dxandíʼ ne zacané ni laanu guicaanu decisión jneza. Ne ora guidxaagalunu ti prueba o xiixa ni gucaa laanu gucheʼnu la? zucaa cani dxandíʼ rusiidiʼ Stiidxaʼ Dios laanu gúninu ni jneza. Qué ziuu dxi cheʼ ti soldadu lu guerra sin cinturón stiʼ, zácacaʼ laanu cadi naquiiñeʼ gusaananu cani dxandíʼ rusiidiʼ Stiidxaʼ Dios ni zeeda gaca casi ti cinturón ni maʼ bixhiʼnu ndaaninu. Lugar de nga guxiidxiichinu cinturón ca ndaaninu ne gúninu ni ná Stiidxaʼ Dios. Ne laaca biquiiñeʼ ca soldadu que cinturón riʼ para cuʼcaʼ espada sticaʼ, ne ndiʼ nga zacané laanu para cadi gusaananu de sanu lu ni dxandíʼ rusiidiʼ Stiidxaʼ Dios.

16. Ora rusíʼdinu binni cani dxandíʼ, ¿ximodo racané ni laanu cadi gusaananu de sanu lu cani dxandíʼ rusiidiʼ Stiidxaʼ Dios?

¹⁶ Guionna, gúninu stipa pur gusíʼdinu cani dxandíʼ rusiidiʼ Stiidxaʼ Dios binni. Cásica rinaaze dxiichiʼ ti soldadu espada stiʼ la? laanu laaca naquiiñeʼ guinaaze dxiichinu espada stinu ni zeeda gaca Stiidxaʼ Dios (Efes. 6:17). Guiranu zanda gúninu stipa para gácanu maestru ni nanna iquiiñeʼ Stiidxaʼ Dios jneza (2 Tim. 2:15). Pa iquiiñenu Biblia para gacanenu binni síʼ cani dxandí ne gusaanacaʼ ca cosa ni cadi jneza stiʼ guidxilayú riʼ la? jmaruʼ si ziaana cani maʼ bisiidiʼ Dios laanu lu xquendabiaaninu ne ndaaniʼ ladxidoʼno.

17. ¿Xiñee rusisácaluʼ cani dxandíʼ rusiidiʼ Stiidxaʼ Dios?

¹⁷ Cani dxandíʼ rusiidiʼ Stiidxaʼ Dios naca cani ti regalu nabé risaca ni maʼ bidii Bixhózenu ni nuu guibáʼ laanu. Pur laacani la? nápanu ti cosa ni jma risaca: amistad nápanu né Jiobá. Tiempu riʼ, deruʼ caadxi si nga ni maʼ bisiidiʼ Jiobá laanu, purtiʼ maʼ biʼniʼ prometerbe laanu zándaruʼ sinu cani dxandíʼ rusiidiʼ Stiidxabe para siempre. Nga runi, guidúʼyanu cani dxandíʼ rusiidiʼ Stiidxaʼ Dios casi ti perla ni jma risaca. Cadi gusaana de sinu cani ne qué chuʼ dxi gutoʼno cani. Pa gúninu ndiʼ la? zúninu casi biʼniʼ David ora gudxi Jiobá gacané laabe sabe lu cani dxandíʼ rusiidiʼ Stiidxaʼ Dios (Sal. 86:11).