1. ¿Xiñee naca ca testigu stiʼ Jiobá ti guidxi nayecheʼ? (Biiyaʼ foto ni zeeda ra ruzulú tema riʼ).

NACA ca testigu stiʼ Jiobá ti guidxi nayecheʼ. Ne rihuinni zacá ni pur modo ruíʼcabe diidxaʼ ne pur modo ruxídxicabe ora rápacabe reunión, asamblea o ora rúnicabe xiixa para chúʼcabe nayecheʼ. ¿Xiñee nabánicabe nayecheʼ yaʼ? Purtiʼ runibiáʼcabe, runi servírcabe ne rinándacabe ejemplu stiʼ Jiobá, «ti Dios ni nayecheʼ» (1 Tim. 1:11; Sal. 16:11). Ra nuu Jiobá nga cadá guendanayecheʼ, nga runi racaláʼdxibe guibáninu nayecheʼ ne rudiibe laanu stale razón para gácanu ni (Deut. 12:7; Ecl. 3:12, 13).

2, 3. a) ¿Xi riníʼ chuʼ ti binni nayecheʼ? b) ¿Gunáʼ nga ca cosa ni zanda gusirá guendanayecheʼ stinu?

² Laanu yaʼ, ¿ñee nabáninu nayecheʼ la? ¿Xi zanda gúninu para chuʼnu jma nayecheʼ yaʼ? Chuʼ ti binni nayecheʼ riníʼ ni guni sentir galán o guiechené ca cosa ni napa. Biblia ná para guibáninu nayecheʼ caquiiñeʼ gaca xhamígunu Jiobá. Peru zándaca gaca nagana para laanu guibáninu nayecheʼ ndaaniʼ guidxilayú ra nabézanu riʼ. ¿Xiñee yaʼ?

 ³ Nuu stale cosa ni zanda gusirá guendanayecheʼ ni nápanu. Caadxi de laacani nga gunítinu dxiiñaʼ stinu, gaca divorciarnu, gaca expulsar o gatiʼ ti familia stinu. Xcaadxi cosa ni zanda gucueeza para cadi chuʼnu nayecheʼ nga ca problema ni nápanu né familia stinu, guni burla ca compañeru ni runinenu dxiiñaʼ o cani rinenu scuela laanu, sanándacabe laanu pur runi adorarnu Dios o guseguyoocabe laanu. Laaca ngaca zanda guizaaca pa nápanu ti guendahuará ni maʼ qué rianda o nápanu depresión. Peru cadi guiaandaʼ laanu naca Jesucristu ti binni nayecheʼ, nácabe gobernante ne racaláʼdxibe quixhedxibe ladxidóʼ binni ne gacanebe laacaʼ guibánicaʼ nayecheʼ (1 Tim. 6:15; Mat. 11:28-30). Lu discursu ni bidiibe lu ti dani bizeetebe caadxi cosa ni zacané laanu para chuʼnu nayecheʼ neca gápanu guendanagana ni guniná laanu ndaaniʼ guidxilayú ra cayuni mandar Binidxabaʼ.

4, 5. ¿Xi naquiiñeʼ gúninu pa racaláʼdxinu guibáninu nayecheʼ neca guidxaagalunu intiica guendanagana?

⁴ Guníʼ Jesús xii nga ni jma risaca gúninu. Laabe guniʼbe: «Dichoso nga cani nanna caquiiñeʼ Dios, purtiʼ sticaʼ Reinu ni nuu guibáʼ» (Mat. 5:3, TNM). Pa rudiʼnu cuenta caquiiñenu Dios la? zúninu stipa pur gunibiaʼnu laa ne zudiʼnu lugar gacanebe laanu. Para ganda gúninu ni la? naquiiñeʼ guni estudiarnu Biblia, guzúʼbanu stiidxabe ne gúninu ni ná Reinu primé lu xquendanabáninu. Pa gúninu ni bizéʼtenu riʼ la? zabáninu nayecheʼ ne zápanu confianza zuni cumplir Dios ni maʼ biʼniʼ prometer laanu. Ne laga cabézanu né guendanayecheʼ gaca cumplir ni cá lu Stiidxaʼ Dios, esperanza ni nápanu riʼ zudii ni stipa laanu para guni huantarnu ca guendanagana nápanu (Tito 2:13).

⁵ Pa racaláʼdxinu guibáninu nayecheʼ neca guidxaagalunu intiica guendanagana la? caquiiñeʼ gaca xhamígunu Jiobá. Apóstol Pablo bicaa: «Laguieche irá dxi purti xpinni Señor [Jiobá] laatu. Ne sti tiru rabe laatu, laguiecheʼ» (Filip. 4:4). Para ganda gaca xhamígunu Jiobá, caquiiñenu guendabiaaniʼ ni zeeda de Dios. Stiidxaʼ Dios ná: «Nayecheʼ nga hombre ni maʼ bidxela guendanuuxpiaaniʼ, ne hombre ni guyubi guendariene». Ne laaca ruzeeteʼ ni zeeda gaca guendanuuxpiaaniʼ ca «casi ti yaga ni rudii guendanabani cani napa ni, ne ca binni ni qué rundaa ni ribánicaʼ nayecheʼ» (Prov. 3:13, 18).

6. ¿Xi caquiiñeʼ gúninu para cadi gusaana de chuʼnu nayecheʼ?

⁶ Para cadi gusaana de chuʼnu nayecheʼ caquiiñeʼ gúninu cani rizíʼdinu lu Biblia. Ne Jesús peʼ bizeeteʼ xiñee risaca ni ora guníʼ: «Pa nanna tu ca nga ne guni tu cani la? dichoso de laatu» (Juan 13:17; biindaʼ Santiago 1:25). Ne ndipeʼ nga ni caquiiñeʼ gúninu para ganda gácanu ti binni espiritual ne cadi gusaana de chuʼnu nayecheʼ. Peru ¿ximodo zanda chuʼnu nayecheʼ pa nuu stale cosa ni ribee gana laanu yaʼ? Guidúʼyanu xiruʼ guníʼ Jesús dxi bidii ti discursu lu ti dani.

7. ¿Xiñee zanda guibani ca binni ni nuu triste nayecheʼ yaʼ?

⁷ «Dichoso ni nuu triste yanna, purti zaguixhe dxí Dios ladxidó caʼ» (Mat. 5:4). Zándaca chuʼ tu guinabadiidxaʼ: «¿Xiñee zanda guibani ca binni ni nuu triste nayecheʼ yaʼ?». Cadi caníʼ diʼ Jesús de ca binni ni riuu triste pur intiica si cosa, purtiʼ dede ca binni malu ca riuucaʼ triste pur  ca guendanagana ni nuu lu ca últimu dxi riʼ (2 Tim. 3:1). Peru neca riuucabe triste pur ca guendanagana stícabe la? qué rucaa ni laacabe guyúbicabe Jiobá ne pur nga qué ribánicabe nayecheʼ. Raríʼ caníʼ Jesús de ca binni ni nanna caquiiñeʼ de Jiobá. Ca binni riʼ riuubaʼ ladxidoʼcaʼ purtiʼ ruuyacaʼ nuu stale binni ni qué naʼ guni ni ná Dios. Laaca nánnacabe binni ruchee laacabe ne pur pecadu nga ridxaagalú binni stale guendanagana lu Guidxilayú riʼ. Ruuyaʼ Jiobá ca binni riʼ purtiʼ nacháʼhuicaʼ, riquiiñebe Biblia para quixhedxibe ladxidoʼcaʼ, racanebe laacaʼ chuʼcaʼ nayecheʼ ne gápacaʼ esperanza de guibánicaʼ sin chuʼ dxi gáticaʼ (biindaʼ Ezequiel 5:11; 9:4).

8. Ora nadóʼ ti binni, ¿xiñee racané ni laa chuʼ nayecheʼ?

⁸ «Dichoso ni nadóʼ purti zudii Dios laaca guidxilayú» (Mat. 5:5). Ora nadóʼ ti binni, ¿xiñee racané ni laa chuʼ nayecheʼ? Stale binni guca naduxhuʼ, gudinde o dede biʼniʼ cosa ni cadi jneza dxiqué, peru dxi biziidiʼ chaahuicabe ni rusiidiʼ Biblia la? bichaacabe ne yanna maʼ gadxé laacabe. Yanna maʼ nácacaʼ binni ni nadxii stobi, ni riáʼ binni, nachaʼhuiʼ, humilde, nadóʼ ne ni napa paciencia (Col. 3:9-12). Ne ca binni riʼ ridxaagacaʼ guiráʼ clase binni ne nabánicaʼ nayecheʼ. Ne sti cosa ni jma risaca nga cayuni prometer Stiidxaʼ Dios zacaa ca binni riʼ Guidxilayú (Sal. 37:8-10, 29).

9. a) ¿Xiñee zanda guininu zacaa ca binni «nadóʼ» Guidxilayú yaʼ? b) ¿Xiñee zanda guibani ca binni ni «racalaʼdxiʼ gaca justicia» nayecheʼ yaʼ?

⁹ ¿Xiñee zanda guininu zacaa ca binni «nadóʼ» Guidxilayú yaʼ? Ca discípulo stiʼ Jesús ni naca ungidu zacaacaʼ Guidxilayú ora gácacaʼ sacerdote ne ora guzulú guni mandarcaʼ casi rey (Apoc. 20:6). Ne ca millón de binni ni napa esperanza guibani lu Guidxilayú riʼ zácacaʼ perfectu, zápacaʼ guendariuudxi ne zabánicaʼ nayecheʼ. Sicaríʼ guníʼ Jesús de guiropaʼ grupu riʼ: «Dichoso nga cani racalaʼdxiʼ gaca justicia» (Mat. 5:6, TNM). Dxi guicaa ca binni riʼ guidxilayú cubi ca la? zaca ni racaláʼdxicaʼ purtiʼ maʼ qué ziuu cosa malu luni (2 Ped. 3:13). Dxi cuee Dios guiráʼ ca cosa malu nuu ndaaniʼ guidxilayú riʼ, guiráʼ ca binni nachaʼhuiʼ zabánicaʼ nayecheʼ ne maʼ qué ziuu diʼ dxi gacanacaʼ pur guiráʼ guendaquéiquiiñeʼ ni nuu ndaaniʼ guidxilayú yanna riʼ (Sal. 37:17).

10. ¿Ximodo nga ti binni ni riáʼ?

¹⁰ «Dichoso ni riá stobi, purti laca ziá Dios laa» (Mat. 5:7). Ti verbo hebreu ni nuu relacionadu né diidxaʼ riáʼ riníʼ ni «guni sentir o gusihuinni tuuxa cariñu pur ti binni ne guni ni de guidubi ladxidóʼ» ne laaca zanda guiníʼ ni «guiáʼ tuuxa sti binni». Ne ti verbo griegu ni nuu relacionadu né diidxaʼ riáʼ laaca riníʼ ni guianu xcaadxi binni. Peru Biblia ná cadi ti sentimientu de lastima si nga guianu tuuxa sínuque naquiiñeʼ gúninu xiixa para gacanenu laa.

11. ¿Xi rizíʼdinu de parábola stiʼ samaritanu que?

¹¹ (Biindaʼ Lucas 10:30-37). Parábola stiʼ samaritanu nachaʼhuiʼ ni riete lu Biblia rusiidiʼ ni laanu xi naquiiñeʼ guni ti binni para gusihuinni riáʼ. Ora biʼyaʼ samaritanu que hombre ni gudíñecabe que la? biabe laa ne gucanebe laa. Despué de guníʼ Jesús parábola que la? guniʼbe zacaca nga naquiiñeʼ gúninu. Nga runi, guinabadiidxanu laca laanu: «¿Ñee runeʼ casi biʼniʼ samaritanu que la? ¿Ñee riaʼyaʼ binni la? Ora ruuyaʼ cayacaná tuuxa, ¿ñee riaʼyaʼ laabe la? ¿Ñee zanda guneʼ xiixa para gacaniáʼ laabe la? ¿Ñee racaniáʼ ca hermanu ni maʼ huaniisi, ca hermana viuda ne ca joven ni cadi Testigu bixhoze ne jñaa la?  ¿Ñee ruyubeʼ gacaniáʼ ca hermanu ni nuu deprimidu la?» (1 Tes. 5:14; Sant. 1:27).

12. ¿Xiñee ribani binni nayecheʼ ora riáʼ?

¹² ¿Xiñee ribani binni nayecheʼ ora riáʼ? Ora rúninu xiixa pur xcaadxi la? rudiʼnu cuenta «jma nayeche ni rudii que ni rica». Laaca nánnanu ora guianu stobi rusiéchenu ladxidóʼ Jiobá (Hech. 20:35; biindaʼ Hebreos 13:16). Ne rey David guníʼ xi ribeendú ti binni ni riáʼ: «Zapa Jiobá laabe ne qué zudii lugar gátibe. Ziuube nayecheʼ lu guidxilayú» (Sal. 41:1, 2). Pa guianu xcaadxi la? laaca ziáʼ Jiobá laanu ne qué ziuu dxi gusaana de chuʼnu nayecheʼ (Sant. 2:13).

13, 14. ¿Xiñee nabani ca binni ni nayá ladxidóʼ nayecheʼ?

¹³ Jesús guníʼ: «Dichoso ni nayá ladxidóʼ purti zuuya Dios» (Mat. 5:8). Para gaca ladxidoʼno nayá la? ca deseu stinu ne cani riníʼ íquenu laaca naquiiñeʼ gaca cani nayá. Nabé risaca gúninu cani bizéʼtenu riʼ para chuulaʼdxiʼ Jiobá modo runi adorarnu laa (biindaʼ 2 Corintios 4:2; 1 Tim. 1:5).

¹⁴ Ribani ca binni ni nayá ladxidóʼ nayecheʼ purtiʼ riuulaʼdxiʼ Jiobá ni rúnicaʼ, ne Jiobá pe guníʼ: «Dichoso cani guia ladxidóʼ casi ñaca niguiibi xhaba» (Apoc. 22:14). ¿Xi riníʼ quíʼbicabe xhábacabe yaʼ? Para ca ungidu la? riníʼ ni ruuyaʼ Jiobá laacabe casi binni nayá ne zudii laacabe guendanabani sin chuʼ dxi gáticabe ne zabánicabe nayecheʼ guibáʼ. Ne para cani napa esperanza guibani ndaaniʼ Guidxilayú riʼ la? riníʼ ni ruuyaʼ Dios laacabe casi xhamigu purtiʼ nácacabe binni ni runi ni jneza. Biblia ná maʼ «udiibi ca xhaba caʼ ne bisiquichi né ca ni rini sti Dendxu huiiniʼ» (Apoc. 7:9, 13, 14).

15, 16. ¿Ximodo ruuyaʼ ca binni ni nayá ladxidóʼ Dios yaʼ?

¹⁵ Biblia ná nin ti binni qué zanda guuyaʼ Dios ne guibani (Éx. 33:20). Yanna, ¿xiñee guníʼ Jesús «zuuya» ca binni ni nayá ladxidóʼ Dios yaʼ? Diidxaʼ «guʼyaʼ» ni biquiiñecabe lu diidxaʼ griegu zanda guiníʼ ni «guxuiʼlú, guʼyaʼ ne gunibiáʼ». Ca binni ni randa ruuyaʼ Dios nga cani maʼ runibiáʼ chaʼhuiʼ laabe ne rusisaca ca cualidad stibe (Efes. 1:18). Rusihuinni Jesús ca cualidad ni napa Dios. Nga runi guniʼbe: «Ni ma biiya naa la? ma biiya Bixhozeʼ» (Juan 14:7-9).

¹⁶ Pa maʼ runibiaʼnu ca cualidad stiʼ Dios, ¿xiruʼ zanda gúninu para guidúʼyanu laabe yaʼ? Zanda guidúʼyanu xi guiráʼ rúnibe para gacanebe laanu (Job 42:5). Laaca zanda guidúʼyanu laabe ora guiníʼ íquenu ca ndaayaʼ ni nápabe para cani runi stipa pur gaca ti binni nayá ne leal. Ne ca ungidu la? ruuyapecaʼ Jiobá ora riásacaʼ de lade gueʼtuʼ ne riecaʼ guibáʼ (1 Juan 3:2).

17. Ca binni ni riguixhedxí guendaridinde, ¿xiñee ribánicaʼ nayecheʼ?

¹⁷ Jesús laaca guníʼ: «Dichoso ni riguixhe dxí enda ridínde», o cani ruyubi chuʼ paz (Mat. 5:9). Ne nuu stale razón para chuʼ ca binni riʼ nayecheʼ, purtiʼ discípulo Santiago bicaa: «Zaree ndu xhiiña cani runi pur chuʼ binni tobi si, purti cayuni ca jneza ne laca cayacané ca ca xcaadxi guni jneza» (Sant. 3:18). Pa nápanu xiixa guendanagana né tuuxa hermanu ra congregación o ti familia stinu la? zanda guinábanu Jiobá gacané laanu para ganda guni chaahuinu guendanagana ca. Laabe zudiibe laanu espíritu santu stibe ne zacanebe laanu gusihuínninu ca cualidad ni naquiiñeʼ gapa ti xpinni Cristu ne zacá zabáninu nayecheʼ. Jesús bizeeteʼ pabiáʼ risaca gácanu ti binni ni siempre ruyubi chuʼ guendariuudxi ora guníʼ: «Pa zisaanaluʼ ofrenda stiluʼ lu altar ne raqué guietenaláʼdxiluʼ cadxiichiné bíʼchiluʼ lii la? bisaanagá ofrenda stiluʼ raqué, frente de altar que ne yeyubi bíʼchiluʼ. Primeru biʼniʼ chaahuiʼ guendanagana napanebe lii, oracaruʼ bibiguetaʼ bidii ofrenda stiluʼ» (Mat. 5:23, 24, TNM).

18, 19. ¿Xiñee ribani ca xpinni Dios nayecheʼ neca canazanándacabe laacaʼ?

¹⁸ «Dichoso laatu ora rulaa binni diidxa laatu, ne riladxi ca laatu ne ribee ca falsu luguiá tu purti xpinne laatu». ¿Xiñee guníʼ Jesús ca diidxaʼ riʼ yaʼ? Laca laabe bicábibe: «Laguiecheʼ neca cazaaca tu irá nga, purti nabé sicarú ni chi gudii Dios laatu ibáʼ, ne nanna ca tu zacaca biʼni cabe ca profeta sti Dios chiqué» (Mat. 5:11, 12). Dxi gudíñecabe ca apóstol ne gúdxicabe laacaʼ gusaanacaʼ de guni predicarcaʼ la? «biree ca [...] de ra nuu ca justicia que, ziyeche ca». Qué ñuulaʼdxiʼ ca apóstol que ni bíʼnicabe laacaʼ, peru biéchecaʼ «purti bidii Dios lugar usituí binni lú ca purti xpinni Jesús laacaʼ» (Hech. 5:41).

¹⁹ Ca dxi nabáninu riʼ, ca xpinni Dios laaca runi huantarnu né stale guendanayecheʼ ca yuubaʼ ni ridxaagalunu purtiʼ nácanu xpinni Cristu (biindaʼ Santiago 1:2-4). Laanu laaca qué riuuláʼdxinu guninácabe laanu, peru pa gácanu leal ora guidxaagalunu guendanagana la? zacané Jiobá laanu guni huantarnu. Guzéʼtenu ti ejemplu. Lu beeu agosto iza 1944, biseendaʼ ca autoridad hermanu Henryk Dornik ne biʼchiʼ lu ti campu de concentración. Cani guzananda laacabe que guniʼcaʼ: «Nagana para gucaʼdu laacabe gúnicabe ni nadu. Ruluíʼ riuuláʼdxipecabe guninadu laacabe». Peru hermanu Dornik guníʼ: «Qué ñuuladxeʼ ni bíʼnicabe naa, peru ni rusiecheʼ naa nga guietenalaʼdxeʼ cayuneʼ huantar guiráʼ ni cazaacaʼ que purtiʼ racalaʼdxeʼ gacaʼ leal Jiobá». Ne laaca guniʼbe: «Ni gucané naa nga qué nusaanaʼ de ñuneʼ orar Dios, ne gucané ni naa guneʼ sentir nuaaʼ gaxha de Jiobá. ¡Laabe gucanebe naa órapeʼ jma caquiiñeʼ ni!».

20. ¿Xiñee ribáninu nayecheʼ ora rúninu ni ná «Dios ni nayecheʼ»?

²⁰ Ora riuuladxiʼ Jiobá, «Dios ni nayecheʼ» ni rúninu la? ribáninu nayecheʼ neca canazanándacabe laanu pur runi adorarnu Dios, neca gucaalú familia stinu laanu, neca nápanu xiixa guendahuará o maʼ huaniisinu (1 Tim. 1:11, TNM). Laaca runi sentirnu nayecheʼ purtiʼ Jiobá, Dios ni qué rusiguii zuni cumplir guiráʼ ni maʼ biʼniʼ prometer (Tito 1:2). Ne ora maʼ gúnibe ni la? dede nin qué zietenaláʼdxinu ca guendanagana ni nápanu yanna purtiʼ guizáʼ sicarú ca ndaayaʼ ni chigudiibe laanu. Qué zanda guxuíʼlunu xi guiráʼ chigudii Jiobá laanu ndaaniʼ Paraísu. Peru zápanu guendariuudxi ne óraca huaxa zabáninu jma nayecheʼ (Sal. 37:11).