¿XI RÚNINU ora nápanu gana gánnanu hora? Zándaca ridúʼyanu lu reló ni cá nanu o reló ni cá guriá yoo. Yanna pa guinabadiidxaʼ tuuxa laanu pora ndiʼ, ¿ximodo guicábinu yaʼ? Nuu stale modo zanda gúninu ni.

Guzéʼtenu ti ejemplu, bixuiʼlú maʼ gudiʼdiʼ ti hora né cuarenta y cinco minutu despué de galaa dxi. Zanda guininu maʼ la una né cuarenta y cinco minutu, cuarto para las dos, quince minutu para las dos. Ne pa nabézanu ti lugar ra riníʼcabe ca hora ca pur númeru sticaʼ, zándaca guininu maʼ las 13:45 ndiʼ.

Ora ridúʼndanu Biblia zándaca huanabadiidxanu: «¿Ximodo guluubiáʼ binni tiempu dxiqué yaʼ?». Laacabe laaca gúpacabe modo para gánnacabe hora. Lu ca Escrituras Hebreas biquiiñecabe diidxaʼ siadóʼ, galaa dxi, huadxí ne huaxhinni (Gén. 8:11; 19:27; 43:16; Juec. 19: 9). Peru nuu biaje riquiiñeʼ Biblia caadxi diidxaʼ gadxé para guzeeteʼ pora peʼ bizaaca xiixa.

Tiempu gucuá Biblia nabé guyuu binni ni rapa ne jmaruʼ si huaxhinni, binibiáʼcabe laacaʼ casi centinela o vigia. Gayuaa iza ante gale Jesús guluubiáʼ ca israelita que tiempu pur chonna vigilia ni rapa ti velador huaxhinni (Sal. 63:6). Guzéʼtenu ti ejemplu, lu Jueces 7:19 riete de ti vigilia ni raca galaa gueelaʼ. Ca dxi stiʼ Jesús, bizulú biquiiñeʼ ca judíu que modo riguubiáʼ ca griegu ne ca romanu hora, purtiʼ laacaʼ bíʼnicaʼ ni tapa vigilia.

Ca vigilia riʼ riete cani caadxi biaje lu ca Evangeliu. Guzéʼtenu ti ejemplu, lu guidapa vigilia o «ra maʼ zirá gueelaʼ» nga guzá Jesús lu nisadóʼ para chindá ruaa canuá ra nuu ca discípulo stiʼ (Mat. 14:25, TNM). Ne ti biaje guníʼ Jesús: «Pa ñaca ñanna xpixuaanaʼ ti yoo pora chichuu gubaanaʼ ra lidxi huaxhinni la? ñataná ne qué nudii lugar ñuu gubaanaʼ ra lidxi» (Mat. 24:43, TNM).

Jesús guníʼ de guidapaʼ vigilia stiʼ ti binni ni rapa huaxhinni ora gúdxibe ca discípulo stibe: «Lagataná, purtiʼ qué gánnatu pora gueeda xpixuaanaʼ yoo que, pa gueedabe huadxí o galaa gueelaʼ o nacándaruʼ o siadóʼ guieʼruʼ» (Mar. 13:35, TNM). Primé vigilia nga «huadxí» ne ruzulú ni despué de guiaaziʼ gubidxa ne riluxe ni biaʼ las nueve de la noche. Guiropa vigilia nga «galaa gueelaʼ» ne ruzulú ni biaʼ las nueve de la noche ne riluxe ni biaʼ las doce de la noche. Guionna vigilia nga «nacándaruʼ» o ora ruundaʼ gallu, ne ruzulú ni biaʼ galaa gueelaʼ ne riluxe ni biaʼ las tres de la mañana. Zándaca biaʼ hora ca nga biindaʼ gallu gueelaʼ gunaazecabe Jesús (Mar. 14:72). Ne guidapa vigilia nga «siadóʼ guieʼruʼ» ne ruzulú ni biaʼ las tres de la mañana ne riluxe ni dede ora riree gubidxa.

Nga runi, neca qué niquiiñecabe reló dxi gucuá Biblia la? gunda guluubiáʼ binni tiempu.