1. ¿Xi conseju bidii apóstol Pedro ca xpinni Cristu ungidu ni bibani dxiqué ne xiñee ruluíʼ nagana chinándanu ni?

BIDII apóstol Pedro ti conseju ca xpinni Cristu ungidu ni bibani lu primé siglu. Sicaríʼ gúdxibe laacaʼ: «Cásica Santo ni guniʼné laatu, lagaca binni santo lu guiráʼ ni gúnitu, purtiʼ cá lu Stiidxaʼ Dios: “Naquiiñeʼ gácatu binni santo, purtiʼ santo naa”» (1 Ped. 1:15, 16). ¿Ximodo racané conseju riʼ laanu yaʼ? Racané conseju riʼ ca xpinni Cristu ni chiguibani lu Guidxilayú ne ca ni cheʼ guibáʼ. Rusiidiʼ ni laanu zanda gácanu binni santo cásica Jehová neca nácanu binni ruchee. Apóstol Pedro la? guyuu ora bicheebe peru neca zacá, bíʼnibe stipa para gácabe ti binni santo. Nga rusiidiʼ laanu laca zanda gácanu ti binni santo.

2. ¿Gunáʼ nga ca pregunta ni zacábinu lu artículo riʼ?

² Lu artículo riʼ zacábinu ca pregunta riʼ: ¿xi riníʼ gaca tuuxa ti binni santo?, ¿ximodo rusiidiʼ Biblia laanu naca Jehová ti Dios santo?, ¿ximodo zanda gácanu ti binni santo lu guiráʼ ni gúninu? ne ¿xiñee caquiiñeʼ gácanu ti binni santo para gácanu xhamigu Jehová?

3. ¿Xi riníʼ ique stale binni ora runadiágacaʼ tuuxa ni naca santo, peru ximodo zanda gánnanu xi riníʼ ni?

³ Nuu lugar ora gunadiaga binni naca tuuxa santo, riníʼ íquecaʼ tuuxa ni qué ruxidxi, ni nuu triste ne ni nacu  lari ziuulaʼ. Peru cadi nga diʼ nga riníʼ gaca tuuxa santo. Biblia ná naca Jehová santo ne ti Dios nayecheʼ (1 Tim. 1:11). Ca xpinni Jehová nácacaʼ ti guidxi nabé nayecheʼ (Sal. 144:15). Dxi guyuu Jesús lu Guidxilayú guníʼ cadi jneza runi ca binni ni racu lari ziuulaʼ para si guʼyaʼ binni laacaʼ (Mat. 6:1; Mar. 12:38). Laanu, ca xpinni Cristu, nánnanu xi riníʼ diidxaʼ santo pur ni rusiidiʼ Biblia. Laaca nánnanu naca Jehová ti Dios santo, nadxii laanu ne qué ziuu dxi guinabaʼ laanu gúninu xiixa ni qué zanda gúninu. Nga runi, pa canabaʼ Jehová laanu gácanu ti binni santo la? nánnabe zanda gácanu ni. Ne para gácanu ti binni santo lu guiráʼ ni gúninu la? caquiiñeʼ gánnanu xi riníʼ ni.

4. ¿Xi riníʼ diidxaʼ santo?

⁴ ¿Xi riníʼ diidxaʼ santo? Lu Biblia, riníʼ ni gaca tuuxa nayá lu ca ni runi, lu ni riníʼ ique ne guibani modo riuulaʼdxiʼ Dios. Ndiʼ riníʼ zácanu ti binni santo pa gúninu ne guiníʼ íquenu cosa ni jneza, guni adorarnu Dios modo riuulaʼdxiʼ ne gaca xhamígunu laa. Ne ridxagayaanu purtiʼ neca nácanu binni ruchee, zanda gaca xhamígunu Jehová ti Dios ni naca santo.

5. ¿Xi rusiidiʼ ca ángel ca laanu de Jehová?

⁵ Naca Jehová santo lu guiráʼ ni runi. Zacá guníʼ caadxi serafín, laacabe nga caadxi ángel ni nuu gaxha de trono stiʼ Jehová. Laacaʼ gúnicaʼ: «Santo, santo, santo nga Jehová stiʼ ca ejércitu» (Is. 6:3). Cumu laaca naca ca ángel riʼ santo la? nga runi nácacabe xhamigu Jehová. Ne ora reeda ti ángel lu Guidxilayú raca lugar ra ruseendaʼ Dios laabe ca santo. Ne nga peʼ nga ni bizaaca ora bidxiña Moisés gaxha de ti yagahuiiniʼ ni naze bele (Éx. 3:2-5; Jos. 5:15).

6, 7. a) Casi ná Éxodo 15:1, 11, ¿ximodo bisihuinni Moisés naca Jehová ti Dios santo? b) ¿Xi bisietenalaʼdxiʼ ca israelita naca Jehová ti Dios santo? (Biiyaʼ dibuju ni zeeda lu portada).

⁶ Despué de gudiʼdiné Moisés ca israelita ndaaniʼ nisadóʼ Xiñáʼ guniʼbe naca Jehová ti Dios santo (biindaʼ Éxodo 15:1, 11). Ne maʼ gadxé Jehová de ca dios stiʼ ca egipciu ne ca cananeu, purtiʼ ca binni de Egipto qué ñácacaʼ binni santo pur ca cosa ni bíʼnicaʼ ne ca binni de Canaán bizaaquicaʼ xiiñicaʼ ne biʼniʼ prácticarcaʼ inmoralidad sexual ora biʼniʼ adorarcaʼ Dios sticaʼ (Lev. 18:3, 4, 21-24; Deut. 18:9, 10). Ne cumu maʼ gadxé Jehová de ca dios falsu que la? qué rinábabe laanu gúninu xiixa ni cadi jneza. Nácabe ti Dios santo. Nánnanu zacá ni pur ca diidxaʼ ni gucuá lu placa de oro ni gucuá lucuá sumo sacerdote que. Sicaríʼ nani: «Stiʼ Jehová guiráʼ ni naca santo» (Éx. 28:36-38).

⁷ Tutiica binni guʼyaʼ placa que la? rudii cuenta gastiʼ sti dios santo cásica naca Jehová. ¿Ximodo ránnacabe naca Jehová ti Dios santo pa qué ruuyacabe placa ni cá lucuá sumo sacerdote que yaʼ? Ránnacabe ni ora riuundaʼ Ley que nezalú ca israelita, hombre, gunaa ne xcuidi (Deut. 31:9-12). Pa ñuʼnu lade ca binni que la? ñunadiáganu ca diidxaʼ riʼ: «Naa nga Jehová Dios stitu, [...] ne laatu naquiiñeʼ gácatu santo purtiʼ naa nacaʼ santo», ne «naquiiñeʼ gácatu santo purtiʼ naa, Jehová, nacaʼ santo» (Lev. 11:44, 45; 20:7, 26).

8. ¿Xi rusiidiʼ ca diidxaʼ ni zeeda lu Levítico 19:2 ne 1 Pedro 1:14-16 laanu?

⁸ Guiníʼ íquenu caadxi diidxaʼ ni gudxi  Moisés guidxi Israel ni zeeda lu Levítico 19:2. Sicaríʼ gudxi Jehová laabe: «Guniʼné guidxi Israel ne gudxi laacaʼ: “Naquiiñeʼ gácatu santo purtiʼ naa Jehová Dios stitu nacaʼ santo”». Zándaca laaca ca diidxaʼ riʼ nga biquiiñeʼ apóstol Pedro ora gudxi ca xcaadxi xpinni Cristu: «Lagaca binni santo» (biindaʼ 1 Pedro 1:14-16). Neca maʼ cadi zinándanu Ley ni gucuaa Moisés, peru ni bicaa apóstol Pedro ca rusiidiʼ ni laanu naca Jehová ti Dios santo, ne ca ni nadxii laabe naquiiñeʼ gúnicaʼ stipa gácacaʼ santo. Ca diidxaʼ riʼ para guiranu ni, para ca ni cabeza cheʼ guibáʼ ne ca ni chiguibani ndaaniʼ Guidxilayú ora gácani ti paraísu (1 Ped. 1:4; 2 Ped. 3:13).

9. ¿Xiñee galán guidúʼndanu ni zeeda lu capítulo 19 stiʼ Levítico?

⁹ Pa racaláʼdxinu gusiéchenu Jehová la? naquiiñeʼ gácanu binni santo. Ne para nga la? rudii Jehová laanu caadxi conseju ni ridxélanu lu Levítico capítulo 19. Ti especialista lu diidxaʼ hebreu ni láʼ Marcus Kalisch bicaa: «Zándaca capítulo riʼ nga tobi de ca ni jma zeedané conseju ni zanda gacané laanu gácanu santo, laani nga tobi de ni jma risaca de Levítico o zándaca lu guidubi naca Pentateuco». Guidúʼyanu caadxi versículo ni zeeda lu capítulo riʼ, ni zacané laanu lu xquendanabáninu. Ante guidúʼndanu ca lección ni zeeda lu capítulo riʼ la? naquiiñeʼ gánnanu ruzuluné capítulo 19 ca diidxaʼ riʼ «Lagaca binni santo».

10, 11. ¿Xi ti modo zanda gácanu santo riete lu Levítico 19:3, ne ximodo zanda chinándanu mandatu riʼ?

¹⁰ Gudxi si Jehová ca israelita naquiiñeʼ gácacaʼ binni santo, bizeetebe: «Cada tobi de laatu naquiiñeʼ guni respetar jñaa ne bixhoze [...]. Naa nga Jehová Dios stitu» (Lev. 19:2, 3).

¹¹ Naquiiñeʼ gúninu ni ná mandatu ni zeeda lu Biblia ra ná guni respetarnu bixhózenu ne jñaanu. Ti biaje sicaríʼ gunabadiidxaʼ ti hombre Jesús: «¿Xi guendanachaʼhuiʼ naquiiñeʼ guneʼ para guicaaʼ guendanabani ni que zaluxe?». Lade ca cosa ni gudxi Jesús laabe naquiiñeʼ gúnibe  laaca bizeeteʼ naquiiñeʼ guni respetarbe bixhózebe ne jñaabe (Mat. 19:16-19). Guníʼ Jesús cadi jneza runi ca fariseu ne ca escriba purtiʼ qué rúnicaʼ ni ná mandamientu riʼ. Sicaríʼ gúdxibe laacaʼ: «Maʼ bicaanatu stiidxaʼ Dios» (Mat. 15:3-6). Bicaanácabe «stiidxaʼ Dios» purtiʼ qué nulábicabe mandamientu gaayuʼ ne ni ná Levítico 19:3 (Éx. 20:12). Ne cadi naquiiñeʼ guiaandaʼ laanu mandatu ni zeeda lu Levítico 19:3 ra ná naquiiñeʼ guni respetartu bixhózetu ne jñaatu, ne dxaagani ca diidxaʼ ni zeeda ante ra ná: «Naquiiñeʼ gácatu santo, purtiʼ naa Jehová Dios stitu, nacaʼ santo».

12. ¿Xi zanda guinabadiidxanu para guidúʼyanu pa zinándanu ni ná mandatu ni zeeda lu Levítico 19:3?

¹² Cada xpinni Cristu naquiiñeʼ guiníʼ ique: «¿Ñee runeʼ respetar jñaaʼ ne bixhozeʼ casi ná mandatu ni zeeda lu Biblia la?». Pa cadi cayúninu ni, galán quixhe íquenu gúninu ni. Zándaca pa dxiqué qué ñúninu ni, peru yanna naquiiñeʼ gúninu stipa pur gacanenu bixhózenu ne jñaanu. Zanda gúninu ni ra cueenu tiempu para laacabe, gudiʼnu ni caquiiñecabe ne gacanenu laacabe chúʼcabe gaxha de Jehová. Pa gúninu ca ndiʼ la? zinándanu ni ná mandatu ni zeeda lu Levítico 19:3.

13. a) ¿Xi sti conseju zeeda lu Levítico 19:3? b) ¿Ximodo zanda chinándanu ejemplu stiʼ Jesús ni zeeda lu libru stiʼ Lucas 4:16-18?

¹³ Levítico 19:3 ruzeeteʼ sti cosa ni zanda gúninu para gácanu binni santo. Ley que ná naquiiñeʼ guni respetar ca israelita dxi sábadu. Laanu, ca xpinni Cristu, maʼ cadi zinándanu Ley que, peru zanda guizíʼdinu stale cosa de ni biʼniʼ ca israelita dxi sábadu ne ca ndaayaʼ ni gucuaacaʼ pur yenándacaʼ ni. Dxi sábadu que biziilaʼdxiʼ ca israelita que de ca dxiiñaʼ sticaʼ para guni adorarcaʼ Jehová si. * Ngue runi, guyé Jesús ndaaniʼ sinagoga dxi que para guʼndaʼ Stiidxaʼ Dios (Éx. 31:12-15; biindaʼ Lucas 4:16-18). Mandatu ni zeeda lu Levítico 19:3 ra ná naquiiñeʼ guni respetar ca israelita dxi sábadu naquiiñeʼ gucaani laanu cueenu tiempu de lade guiráʼ cosa ni rúninu guiráʼ dxi para gúninu xhiiñaʼ Jehová. Pa gúninu ndiʼ jma zaca xhamígunu Jehová ne zacané ndiʼ laanu para gácanu ti binni santo.

14. ¿Xi ti cosa risaca riete lu guidubi capítulo 19 stiʼ libru de Levítico?

¹⁴ Lu capítulo 19 stiʼ libru stiʼ Levítico stale biaje riete ti cosa ni zacané laanu gácanu binni santo. Ra maʼ ziluxe versículo 4 ca ná: «Naa nga Jehová Dios stitu». Biaʼ 16 biaje riete ca diidxaʼ riʼ ne xcaadxi casi laani lu capítulo 19 de Levítico. Ndiʼ rusietenalaʼdxiʼ ni laanu primé de ca Chii Mandamientu ni bidii Dios ca israelita, ni ná: «Naa nga Jehová Dios stiluʼ [...]. Cadi naquiiñeʼ gápaluʼ xcaadxi dios aparte de naa» (Éx. 20:2, 3). Guiráʼ xpinni Cristu ni racalaʼdxiʼ gaca binni santo cadi naquiiñeʼ gudii lugar chuʼ xiixa ni guxheleʼ laa de Jehová ne cumu nácanu testigu stiʼ Jehová la? cadi naquiiñeʼ gúninu xiixa ni guni biidiʼ nombre stibe (Lev. 19:12; Is. 57:15).

15. Levítico capítulo 19 ni caníʼ de ca sacrificiu, ¿xi naquiiñeʼ gucaani laanu gúninu?

¹⁵ Bisihuinni ca israelita que Jehová nga Dios sticaʼ ra yenándacaʼ ca ley stibe. Levítico 18:4 ná: «Lachinanda ca ley  stinneʼ, ne laguni ca cosa ni maʼ gudixheʼ gúnitu ne lachinanda ca ni. Naa nga Jehová Dios stitu». Lu capítulo 19 riete caadxi de ca cosa ni gudixhe Jehová guni ca israelita. Casi lu versículo 5 hasta 8, 21 ne 22 riete ximodo gudiicabe sacrificiu de maniʼ. Naquiiñeʼ gúnicabe ni jneza para cadi gaca biidiʼ sacrificiu que nezalú Jehová. Ra guidúʼndanu ca versículo riʼ, naquiiñeʼ gucaani laanu gusisácanu Jehová modo riuulaʼdxiʼ, casi ñaca nudiʼnu ti sacrificiu laa, casi riete ni lu Hebreos 13:15.

16. ¿Xi conseju zeeda lu Levítico 19 rusietenalaʼdxiʼ laanu maʼ gadxé laanu de xcaadxi binni?

¹⁶ Para gácanu binni santo, naquiiñeʼ gácanu gadxé de ca binni ni qué runi ni ná Jehová. Peru zándaca gácani nagana purtiʼ ridxaaganu binni ni qué runi ni ná Jehová ra dxiiñaʼ, ra scuela ne familia stinu ni cadi Testigu, zándaca gucaacabe laanu gúninu xiixa ni qué riuulaʼdxiʼ Jehová. ¿Xi zacané laanu para gánnanu xi gúninu ora guizaaca ndiʼ yaʼ? Ni zanda gacané laanu nga chinándanu conseju ni zeeda lu Levítico 19:19, sicaríʼ nani: «Cadi gácutu lari ni guca de chupa tipu hilu». Gucané ley riʼ para guihuinni maʼ gadxé guidxi Israel de xcaadxi guidxi. Tiempu riʼ, cadi malu gácunu lari ni gucané gadxé gadxé material casi algodón ne poliéster. Ni cadi jneza nga uguʼchanu ni runi crenu né cosa ni qué riuulaʼdxiʼ Jehová neca ca ni runi ni nácacaʼ compañeru de scuela, de dxiiñaʼ o familia stinu. Nadxiinu familia stinu ne ca binni ni ridxaaganu, peru naquiiñeʼ guihuinni maʼ gadxé laanu purtiʼ nácanu xpinni Jehová. Cadi guiaandaʼ laanu para gácanu binni santo caquiiñeʼ guixélenu de ca cosa ni cadi jneza ni runi binni (2 Cor. 6:14-16; 1 Ped. 4:3, 4).

17, 18. ¿Xi rusiidiʼ Levítico 19:23-25 laanu?

¹⁷ Ca diidxaʼ «Naa nga Jehová Dios stitu» bisietenalaʼdxiʼ ni ca israelita ni jma risaca nga gaca xhamígucaʼ Jehová. Guidúʼyanu ti modo zanda gúnicabe ni casi riete lu Levítico 19:23-25 (biindaʼ ni). Guidúʼyanu ximodo yenanda ca israelita ca diidxaʼ riʼ despué de guyuucaʼ lu Tierra Prometida. Pa tuuxa gudxiibaʼ ti yaga rudii cuananaxhi la? cadi naquiiñeʼ gobe de cuananaxhi stini chonna iza. Ra guidapa iza que maʼ zanda chinebe ca cuananaxhi ni gudiini ra santuariu stiʼ Dios ne ra guizaa gaayuʼ iza que la? maʼ zanda gó dueñu que ca cuananaxhi ni gudii yaga que. Ley riʼ bisietenalaʼdxiʼ ni ca israelita ni  jma guisaca para laacabe nga guni adorárcabe Jehová primé ne despué nga guyúbicabe ca cosa ni caquiiñecabe. Pa gúnicabe zaqué la? qué zusiaadxaʼ Jehová laacabe gastiʼ. Ne laaca gunabaʼ Jehová laacabe gudiicabe de ni nápacabe ne chisaanacabe ni ra santuariu lugar ra biʼniʼ adorárcabe Dios.

¹⁸ Ley ni zeeda lu Levítico 19:23-25 rusietenalaʼdxiʼ ni laanu ca diidxaʼ guníʼ Jesús lu Sermón del Monte, sicaríʼ guniʼbe: «Cadi chuʼtu xizaa [...] xi goto o xi guetu». Ne laaca guniʼbe: «Nanna Bixhózetu ni nuu guibáʼ caquiiñetu guiráʼ cosa riʼ». Zudii Dios laanu ni caquiiñenu casi rudiibe ni ca manihuiiniʼ ni ripapa (Mat. 6:25, 26, 32). Nápanu confianza zapa Jehová laanu. Laaca racanenu ca hermanu stinu ne rúninu ni de guidubi ladxidoʼno ne racanenu para ca gastu ni raca ndaaniʼ congregación. Ruuyaʼ Jehová ora rudiʼnu de ni nápanu, ne laa zaguixe ni laanu (Mat. 6:2-4). Pa gúninu zacá la? zusihuínninu maʼ biénenu ni ná Levítico 19:23-25.

19. Despué de maʼ biénenu caadxi versículo stiʼ Levítico, ¿ximodo maʼ gucané ni lii?

¹⁹ Despué de biénenu caadxi versículo ni zeeda lu capítulo 19 stiʼ libru de Levítico maʼ bizíʼdinu caadxi cosa ni zanda gúninu para gácanu binni santo cásica naca Jehová. Rinándanu ejemplu stiʼ Jehová, ra gúninu stipa gácanu binni santo lu guiráʼ ni gúninu (1 Ped. 1:15). Stale binni ni qué runi ni ná Jehová ora ruuyacaʼ modo nácanu, rucaani laacaʼ gusisácacaʼ Jehová (1 Ped. 2:12). Nuuruʼ xcaadxi cosa ni zanda guizíʼdinu lu capítulo 19 stiʼ libru stiʼ Levítico. Lu sti artículo ca zadúʼyanu xcaadxi versículo ni zacané laanu gácanu binni santo casi guníʼ apóstol Pedro.