Gulézadu Tellancourt, ti guidxihuiiniʼ nuu ladu nordeste de Francia. Bixhozeʼ de Francia laa ne jñaaʼ de Italia. Dxi napaʼ xhono iza yebiʼdu Italia, ndaaniʼ ti barriu nabé pobre ra runi ca binni que dxiiñaʼ fuera de Roma. Nabé nagana modo bibánidu ra lidxeʼ; gatigá ridinde jñaaʼ ne bixhozeʼ purtiʼ gastiʼ bueltu.

Dxi maʼ bisaaʼ 15 iza, gudxi jñaaʼ naa guireeʼ ti gapaʼ xhamiguaʼ. Despué maʼ qué lica ñuaaʼ yoo ne qué nindaa bidxaagaʼ binni runi cosa malu. Ti dxi bidxiña ti hombre naa ruluíʼ nachaʼhuiʼ. Gucuaaʼ droga ni bidiibe naa, purtiʼ guníʼ iqueʼ maʼ huaniiseʼ. Nagueenda biabaʼ lu viciu de cubaʼ droga ne guyuaaniáʼ tutiica. Gulaxoocabe naa stale biaje. Maʼ qué nisaca guendanabani para naa; ngueca rudiini pa guibaneʼ o pa gateʼ. Bineʼ sentir stubeʼ nuaaʼ. Dxi napaʼ 16 iza, gucalaʼdxeʼ ñuuteʼ laca naa; güeeʼ ti botella whisky ne yechuaabieʼ ndaaniʼ ti nisa. Chonna gubidxa qué nudieeʼ cuenta.

De raqué maʼ bisisacaʼ xquendanabaneʼ, peru nabé nagueenda ridxiicheʼ ne rusiguieeʼ binni. Naapiaʼ ruyubeʼ tu náʼ chuaaniáʼ laa, ne ora chindayaʼ ra lidxi binni ca runeʼ drogar laa para cuanaʼ ca cosa risaca ni napa. Gudiizeʼ droga stiʼ caadxi mafia naroʼbaʼ ndaaniʼ guidxi Italia. Nabé gupaʼ guzananda puliciá naa. Neca guizáʼ feu modo nabaneʼ peru guníʼ iqueʼ nuu xi pur nuaaʼ lu Guidxilayú. Ngue runi bineʼ orar Dios ne gudxeʼ laa: «Canabaʼ lii ti iza si chuaaʼ nayecheʼ ne gatadxí ladxiduáʼ».

Dxi napaʼ 24 iza gudixheʼ iqueʼ chindezaʼ Inglaterra, purtiʼ maʼ guzananda caadxi narcotraficante ñuuti naa. Ante chaaʼ que, yegannaʼ jñaaʼ ne nabé bidxagayaaʼ ora biiyaʼ Annunziato Lugarà raqué cayuiʼné laabe diidxaʼ de Biblia. * Ni nannaʼ nga gubaanaʼ laabe, ngue runi dede bidxibeʼ ne gudxeʼ laabe xi cayúnibe raqué. Byuíʼnebe naa xi  guiráʼ maʼ bichaabe lu xquendanabánibe para beedagácabe ti testigu stiʼ Jiobá, ne gúdxibe naa gudieeʼ stiidxaʼ laabe zuyubeʼ ca testigu stiʼ Jiobá casi chindayaʼ Inglaterra. Neca bidieeʼ stiidxaʼ ni laabe, ora yendayaʼ raqué bineruáʼ cani runeʼ que.

Ti dxi biiyaʼ ti testigu stiʼ Jiobá cusaanané binni revista Torre stiʼ ni rapa ne ¡Despertad! ndaaniʼ ti calle stiʼ Londres ra nabé ridiʼdiʼ binni. Óraque bietenaladxeʼ de ni bidieeʼ stiidxaʼ ne gunabadiidxaʼ testigu que pa zanda guiziideʼ de Biblia.

Nabé bidxagayaaʼ ni biziideʼ. Casi lu 1 Juan 1:9 ra caníʼ de Dios sicaríʼ: «Peru pa uxhuba donda nu lú be nanna dxichi nu zuni be ni ma uníʼ be, zuxhá be stonda nu ne zusiá be ladxidóʼ no de irá ni nadxabaʼ, purti jneza ni runi be». Yendá ca diidxaʼ riʼ ndaaniʼ ladxiduáʼ. Bichaa cani xquendanabaneʼ, purtiʼ bineʼ sentir nabiidiʼ nuaaʼ nezalú Dios pur guiráʼ ni maʼ bineʼ. Bizuluáʼ guyaaʼ ca reunión raca ndaaniʼ Yoo stiʼ Reinu stiʼ ca Testigu stiʼ Jiobá, nabé galán bidxaagalúcabe naa raqué. Ora biiyaʼ pabiáʼ nadxiicabe ne modo ridxaagacabe —ti cosa ni maʼ xadxí de riniéʼ xcaandaʼ— guyuuladxeʼ gacaʼ de congregación que, gacaʼ de familia que.

Qué nudii dxiiñaʼ naa nusaanaʼ de nigubaʼ droga ne nuchaaʼ modo nabaneʼ que, ni bidii dxiiñaʼ naa nga guchaaʼ modo naa. Biiyaʼ naquiiñeʼ guneʼ respetar binni jma ne guizaaladxeʼ laacaʼ. Dede yanna cayuneruáʼ stipa pur guchaaʼ xcaadxi cosa de naa. Peru xquíxepeʼ Jiobá cayanda cayuneʼ ni. Lu iza 1997, xhoopaʼ beeu despué de bizuluáʼ biindaʼ Biblia, guyuaanisaʼ ne gucaʼ ti testigu stiʼ Jiobá.

Despué de guyuaanisaʼ, bichaganaʼyaʼ ti baʼdudxaapaʼ láʼ Barbara, ni laaca cadi tan xadxí de guca testigu stiʼ Jiobá. Ora biʼyaʼ tobi de cani guca xhamiguaʼ pabiáʼ maʼ bichaaʼ laaca bizulú biindaʼ Biblia. Yanna, laabe ne bizáʼnabe maʼ testigu stiʼ Jiobá laacabe ne zacaca biʼniʼ benda jñaabiidaʼ; maʼ napa jma de 80 iza dxi bizulú biindaʼ Biblia ne despué guyuunisa.

Yanna nacaʼ binnigola ndaaniʼ ti congregación, ne naa ne xheelaʼ riquiiñedu tiempu stidu para gucheechedu diidxaʼ ndaaniʼ guidxi Londres ra nuu ca binni ni riníʼ italianu. Nuu biaje racaʼ deprimir ora guietenaladxeʼ modo bibaneʼ dxiqué, peru nabé riguu Barbara gana naa. Yanna huaxa maʼ napaʼ guiráʼ ni guníʼ xcaandaʼ dxiqué: ti familia ni nuu tobi si ne ti Bixhozeʼ ni nadxii naa. Gunabaʼ Dios chuaaʼ nayecheʼ ne gatadxí ladxiduáʼ ti iza si, peru maʼ bidiibe naa jma que biaʼ gunabaʼ laabe.