1, 2. ¿Xi gudxi ti ángel ca gunaa ni guyé ra baʼ stiʼ Jesús, ne xi instrucción bidii Jesús laacabe?

ZEDARÁ gueelaʼ 16 de nisán stiʼ iza 33. Caadxi gunaa ni runi ni ná Dios, guizáʼ nuucaʼ triste ne zecaʼ ra bigaachiʼ Señor Jesucristu raca chupa gubidxa. Zinécabe guixi ne aceite ni rindá naxhi para xhúbicabe ni cuerpu stiʼ Jesús. Peru ora yendácabe ra baʼ que, guizáʼ bidxagayaacabe purtiʼ guirutiʼ nuu ndaaniʼ ni. Ne óraque gudxi ti ángel stiʼ Dios laacabe maʼ biasa Jesús de lade gueʼtuʼ ne laaca guníʼ: «Maʼ zanírube lutu Galilea; raqué zuuyatu laabe» (Mat. 28:1-7; Luc. 23:56; 24:10).

² Ora ziree ca gunaa que de ra baʼ que la? bidxiñaʼ Jesús ra nuucabe ne ná rabi laacabe: «Laché, lagabi ca bicheʼ checaʼ Galilea; raqué zuuyacaʼ naa» (Mat. 28:10). Primé cosa ni biʼniʼ Jesús despué de biasa de lade gueʼtuʼ nga bitagulisaa ca discípulo stiʼ ne bíʼnibe ni para gudiibe laacaʼ caadxi instrucción nabé risaca.

3, 4. ¿Xiñee zanda guininu cadi para ca apóstol si nga mandatu bidii Jesús lu Mateo 28:19, 20? (Biiyaʼ dibuju ni zeeda lu portada).

³ (Biindaʼ Mateo 28:16-20). Lu reunión ni biʼniʼ Jesús que gúdxibe ca discípulo stibe xi dxiiñaʼ risaca caquiiñeʼ gúnicaʼ lu primé siglu, ne laaca dxiiñaʼ queca nga cayúninu tiempu riʼ. Sicaríʼ gúdxibe laacaʼ: «Laché ne lagacané binni de guiráʼ guidxi gaca discípulo stinneʼ. [...] Lagusiidiʼ laacaʼ gúnicaʼ guiráʼ ni maʼ bineʼ mandar laatu».

 ⁴ Racalaʼdxiʼ Jesús guni predicar guiráʼ ca discípulo stiʼ. Peru cadi para ca once apóstol si stibe nga mandatu riʼ. ¿Xiñee nánnanu ni yaʼ? Purtiʼ cadi ca apóstol que si nga nuu lu dani stiʼ Galilea ora bidii Jesús mandatu riʼ. Cadi guiaandaʼ laanu gudxi ángel que ca gunaa que zuuyacaʼ Jesús ndaaniʼ guidxi Galilea. Nga runi zándaca nuu ca gunaa riʼ dxi bidii Jesús mandatu riʼ. Laaca guníʼ apóstol Pablo bihuinni Jesús «nezalú jma de 500 hermanu ti lugar si» (1 Cor. 15:6). ¿Paraa yaʼ?

5. ¿Xi razón nápanu para guni crenu reunión ni riete lu 1 Corintios 15:6 laca laani nga reunión ni guca Galilea ni riete lu Mateo capítulo 28?

⁵ ¿Xi razón nápanu para guni crenu reunión ni riete lu 1 Corintios 15:6 laaca laani nga reunión ni guca Galilea ni riete lu Mateo capítulo 28? Primé, stale de ca discípulo que de Galilea laacaʼ. Nga runi, ti lugar jma galán para guidagulisaa ti grupu naroʼbaʼ de binni nga lu dani ni nuu Galilea ne cadi ra lidxi ti binni de Jerusalén. Guiropa, maca bidagulisaané Jesús ca once apóstol stiʼ ndaaniʼ ti yoo ni nuu Jerusalén despué de biasa lade gueʼtuʼ. Ne cadi ca apóstol si biʼniʼ mandar Jesús guni predicarcaʼ ne gacanecaʼ binni gaca discípulo. ¿Xiñee yaʼ? Purtiʼ pa ñaca zacá ni la? nidagulisaanebe laacaʼ Jerusalén ne qué ninábabe ca apóstol que, ca gunaa ni guyé ra baʼ que ne xcaadxi de ca discípulo stibe nidagulisaanecaʼ laabe Galilea (Luc. 24:33, 36).

6. ¿Ximodo nánnanu laaca para laanu ca diidxaʼ ni zeeda lu Mateo 28:20, ne ximodo cayaca cumplir ni tiempu riʼ?

⁶ ¿Xi sti razón nápanu para guni crenu cadi ca once apóstol si nga biʼniʼ mandar Jesús gacané binni gaca discípulo? Pur ca últimu diidxaʼ gudxi Jesús ca discípulo stiʼ: «Qué ziuu dxi guixeleʼ de laatu dede ora guiluxe guidxilayú riʼ» (Mat. 28:20). Né ca diidxaʼ guníʼ Jesús riʼ rihuinni dxichi yanna peʼ nga cayacanenu binni gaca discípulo. Guzéʼtenu ti ejemplu, guiráʼ iza, riuunisa biaʼ 300,000 discípulo stiʼ Jesús ne rácacaʼ testigu stiʼ Jehová.

7. ¿Xi zazíʼdinu lu artículo riʼ ne xiñee?

⁷ Stale de ca binni ni rudiʼnu estudiu riuunísacaʼ. Peru nuu tu laa riníʼ íqueruʼ pa zaca discípulo stiʼ Cristu. Riuuláʼdxicabe guiráʼ ni riziidicabe peru qué rúnicabe stipa para chuʼnísacabe. Nanna dxíchinu racalaʼdxiʼ ca hermanu gacanecaʼ ca estudiante sticaʼ gúnicaʼ ni caziidicaʼ ne gácacaʼ discípulo. Lu artículo riʼ zazíʼdinu xi naquiiñeʼ gúninu para chindá stiidxaʼ Dios ndaaniʼ ladxidóʼ ca estudiante stinu ne gaca progresarcaʼ. ¿Xiñee risaca guininu de tema riʼ yaʼ? Purtiʼ zándaca ziuu ora zadúʼyanu pa zusaana de gudiʼnu estudiu ti binni o coʼ.

8. ¿Xiñee zándaca gaca nagana para laanu gacanenu ca estudiante stinu chindá stiidxaʼ Dios ndaaniʼ ladxidoʼcaʼ?

⁸ Racalaʼdxiʼ Jehová guni binni ni nabe purtiʼ nadxiicaʼ laabe. Nga runi naquiiñeʼ guicá íquenu gacanenu ca estudiante stinu guiénecaʼ rizaalaʼdxiʼ Jehová cada tobi de laacaʼ ne guizáʼ nadxiibe laacaʼ. Racaláʼdxinu gúʼyacabe Jehová casi «Bixhoze ca huérfano ne ni rapa ca viuda» (Sal. 68:5). Ora gudii ca estudiante stinu cuenta pabiáʼ nadxii Dios laacaʼ zándaca gucaani laacaʼ gannaxhiicaʼ laabe jma. Peru nuu de ca estudiante stinu raca nagana para laacaʼ gúʼyacaʼ Jehová casi ti padre ni nadxii laacaʼ purtiʼ zándaca qué ñannaxhii bixhózecaʼ laacaʼ (2 Tim. 3:1, 3). Nga runi,  ora maʼ cudiʼnu estudiu guluinu laacabe ca cualidad galán stiʼ Dios. Gacanenu ca estudiante stinu guiénecaʼ racalaʼdxiʼ Dios guicaacaʼ guendanabani ni qué zaluxe ne nuu dispuestu gacané laacabe. ¿Xiruʼ zanda gúninu yaʼ?

9, 10. ¿Gunáʼ nga ca libru ni iquiiñenu para gudiʼnu estudiu, ne xiñee laasicani?

⁹ Iquiiñenu ca libru Xipeʼ ndiʼ cusiidiʼ Biblia ne Cadi guixélenu de Dios ni nadxii laanu. Guca ca libru riʼ para gacanécani laanu ti ora gusíʼdinu ca estudiante stinu chindá stiidxaʼ Dios ndaaniʼ ladxidoʼcaʼ. Guzéʼtenu ti ejemplu, lu capítulo 1 stiʼ libru Xipeʼ ndiʼ cusiidiʼ Biblia cacabi ca pregunta riʼ: ¿Ñee rizaalaʼdxiʼ Dios laanu la? o nácabe ti Dios guizáʼ malu?, ¿ximodo runi sentir Dios ora ruuyaʼ cayacananu? ne ¿ñee zanda gaca xhamíguluʼ Jehová la? Libru Cadi guixélenu de Dios ni nadxii laanu zacaneni estudiante ca guiene ne chinanda ca principiu zeeda lu Biblia ni zacané laa guibani galán ne gaca xhamigu Jehová jma. Neca maʼ huadiʼnu estudiu né ca libru  riʼ naquiiñeʼ gaca preparar chaahuinu ne guiníʼ íquenu xi caquiiñeʼ cada binni rudiʼnu estudiu.

¹⁰ Yanna guiníʼ íquenu nuu estudiante ca ganna jma de ti tema ni cadi zeeda lu kit de enseñanza. Zanda gábinu laabe gúʼndabe publicación ca stúbibe ne zaa cudiʼnu estudiu laabe ne tobi de ca libru ni maʼ bizéʼtenu.

11. ¿Pora nga jma jneza guzulú guni orarnenu ti binni ni rudiʼnu estudiu ne ximodo zanda guzulú guinínenu laabe de tema riʼ?

¹¹ Cada biaje guzulú gudiʼnu estudiu, gúninu oración. ¿Pora nga jma jneza guzulú guni orarnenu ti binni ni rudiʼnu estudiu yaʼ? Zanda gúninu ni nagueendaca, ti semana o chupa semana de cudiʼnu estudiu laabe. Naquiiñeʼ gacanenu estudiante stinu gudii cuenta caquiiñenu espíritu santu para ganda guiénenu Stiidxaʼ Dios. Nuu hermanu ruundané ca estudiante stiʼ Santiago 1:5 ni ná: «Pa cayaadxaʼ sabiduría tuuxa de laatu la? guinabaʼ ni Dios». De raca rinabadiidxaʼ hermanu ca laabe: «¿Ximodo zanda guinábanu sabiduría Dios yaʼ?». Zándaca guicabi estudiante ca laanu: «Ora guni orarnu».

12. ¿Ximodo zanda iquiiñenu Salmo 139:2-4 para gacanenu estudiante stinu guiziidiʼ guni orar?

¹² Gusíʼdinu estudiante stinu guni orar. Gábinu laabe racalaʼdxiʼ Jehová gucaadiaga ca oración ni guiree de ndaaniʼ ladxidoʼbe. Gusiénenu laabe zanda gábibe Jehová guiráʼ ni nuu ndaaniʼ ladxidoʼbe, ca ni runi sentirbe ne gábibe laa ca cosa ni qué zanabe gábibe sti binni. Purtiʼ nanna Jehová xi guiráʼ riníʼ íquenu (biindaʼ Salmo 139:2-4). Laaca zanda gábinu estudiante stinu guinabaʼ Dios gacané laa guchaa modo riníʼ ique ne gusaana ca costumbre ni cadi jneza napa. Guzéʼtenu ti ejemplu, guxuíʼlunu riuulaʼdxiʼ ti binni ni maʼ napa tiempu de cayuni estudiar Biblia saa ni qué riuulaʼdxiʼ Dios. Nánnabe cadi jneza ni, peru riuuláʼdxibe caadxi cosa ni raca lúcani. Gacanenu laabe para gábibe Jehová xi peʼ cayuni sentirbe ne guinábabe laa gacané laabe chuuláʼdxibe ca cosa ni riuulaʼdxiʼ (Sal. 97:10).

13. a) ¿Xiñee cadi naquiiñeʼ cuézanu tidiʼ stale tiempu para guni invitarnu estudiante stinu cheʼ reunión? b) ¿Xi zanda gúninu para guni sentir estudiante stinu galán ora cheʼ ra Yoo stiʼ Reinu?

¹³ Cadi cuézanu tidiʼ stale tiempu para guni invitarnu estudiante stinu cheʼ reunión. ¿Xiñee yaʼ? Purtiʼ zanda chindá ni gunadiágabe ne ni gúʼyabe lu ca reunión ndaaniʼ ladxidoʼbe ne gacané ni laabe guni progresarbe. Nga runi guluinu laabe videu ni láʼ Ximodo raca ca guendaridagulisaa stidu ne guni invitarnu laabe chebe reunión. Gábinu laabe zanda chicaanu laabe, pa zanda gúninu ni. Sti cosa ni zanda gúninu nga guni invitarnu xcaadxi publicador ora gudiʼnu estudiu tuuxa. Pa gúninu ni la? zunibiáʼ estudiante stinu ca hermanu de congregación ne zuni sentirbe jma galán ora chebe reunión.

14. ¿Xi zucaa estudiante stinu guni progresar?

¹⁴ Ni racaláʼdxinu nga gacanenu estudiante stinu guni progresar (Efes. 4:13). Ora racalaʼdxiʼ tuuxa guni estudiar la? zándaca gúnibe ni purtiʼ racaláʼdxibe cueendube ni galán. Peru ora guzulú gannaxhiibe Jehová jma la? zándaca zaníʼ íquebe xi zanda gúnibe para gacanebe xcaadxi binni, dede né ca hermanu ni nuu ndaaniʼ congregación (Mat. 22:37-39). Ne ora maʼ zanda la? guinínenu laabe xiñee risaca gudiʼnu donación para guiroobaʼ xhiiñaʼ Reinu.

15. ¿Xi zanda gúninu para gacanenu ti binni ni cayuni estudiar Biblia guicaa decisión jneza ora gapa guendanagana?

 ¹⁵ Gacanenu estudiante stinu gudxiilú ca guendanagana stiʼ. Guzéʼtenu ti ejemplu. Guxuíʼlunu cudiʼnu estudiu ti binni ni maʼ naca publicador peru caʼruʼ chúʼnisa, ne málasi gábibe laanu gudxi ti hermanu laabe xiixa ni bininá laabe. ¿Xi gúninu óraca yaʼ? Lugar de chuʼnu pur tobi de laacabe la? jma galán guidúʼndanenu laabe xi ná Biblia. Zanda gábinu laabe nuu chupa cosa ni zanda gúnibe: guni perdonarbe hermanu ca, peru pa qué ganda gusiaandabe ni biʼniʼ hermanu ca laabe la? jma galán guiníʼnebe laa né diidxaʼ nadóʼ para guni chaahuicabe guendanagana nápacabe (bichaaga ni né Mateo 18:15). Gacanenu estudiante ca para ganna xi gabi hermanu ca. Gusíʼdinu laabe iquiiñebe aplicación JW Library^®, folletu Ca tema ni huabee ca testigu stiʼ Jiobá ne sitiu jw.org^® para gánnabe ximodo guni chaahuibe xiixa guendanagana. Pa guiziidibe gudxiilube ca guendanagana riʼ ante chuʼnísabe la? zacané ni laabe chuʼbe tobi si né ca hermanu.

16. ¿Xi zabeendunu pa guni invitarnu xcaadxi publicador ora gudiʼnu estudiu?

¹⁶ Guni invitarnu sti hermanu ora chigúninu estudiu ne laaca guni invitarnu superintendente de circuito ora riganna congregación stinu. ¿Xiñee yaʼ? A parte de ca cosa ni maʼ bizéʼtenu lu párrafo 13 la? zándaca jma zacané xcaadxi publicador estudiante stinu lu xcaadxi cosa. Guxuíʼlunu cayuni estudiante stinu stipa para maʼ cadi cubaʼ gueza, peru qué huayanda gusaanabe ni. Pa zacá ni la? guni invitarnu ti Testigu ni maʼ bisaana viciu de cubaʼ gueza neca gúcani nagana para laa. Zándaca gudii hermanu riʼ caadxi conseju estudiante stinu. Ne pa qué runi sentirnu bien ora cudiʼnu estudiu né ti hermanu ni napa experiencia la? zanda gábinu laa guni conducir estudiu ca. Ni jma galán nga guizíʼdinu de ca hermanu ni napa experiencia. Cadi guiaandaʼ laanu ni jma racaláʼdxinu nga gacanenu estudiante stinu guni progresar.

17, 18. Ante quixhe íquenu pa zusaana de gudiʼnu estudiu ti binni, ¿xi caquiiñeʼ guiníʼ íquenu primeru?

¹⁷ Pa qué guni progresar estudiante stinu la? caquiiñeʼ guinabadiidxanu laca laanu pa caquiiñeruʼ gudiʼnu estudiu laabe. Ti cosa ni caquiiñeʼ guidúʼyanu nga capacidad stiʼ binni ca. Nuu tu laa raca nagana para laa guni progresar ne xcaadxi coʼ. Nga runi guinabadiidxanu laanu: «¿Ñee cayuni progresar estudiante stinneʼ biaʼ capacidad stiʼ la? ¿Ñee maʼ cayúnibe ni caziidibe la?» (Mat. 28:20). Neca chaahuiʼ chaahuiʼ cayuni progresar estudiante stinu la? caquiiñeʼ guidúʼyanu pa cuchaabe modo laabe.

¹⁸ Yanna, ¿xi gúninu pa guidúʼyanu huaxiéʼ  o qué lica rusisaca estudiante stinu ni rusiidiʼ Biblia yaʼ? Guiníʼ íquenu ni chiguzéʼtenu riʼ. Maʼ bidúʼndanenu estudiante stinu libru Xipeʼ ndiʼ cusiidiʼ Biblia ne zándaca maʼ bizulú cayuundabe libru Cadi guixélenu de Dios ni nadxii laanu peru qué huayebe nin ti reunión nin Conmemoración. Ne laaca runi cancelarbe estudiu ca pur intiica si cosa. Pa zacá cazaacanu la? jma galán guinínenu laabe de tema ca. *

19. ¿Xi zanda guinabadiidxanu tuuxa ni ruluíʼ qué rusisaca ni caziidiʼ de Biblia, ne xi caquiiñeʼ gánnanu?

¹⁹ Ora guzulú guinínenu estudiante stinu, zanda guinabadiidxanu laa: «¿Xi rucueeza lii para cadi gácaluʼ testigu stiʼ Jehová?». Pa gabi ti estudiante ni maʼ xadxí de cacaa estudiu laanu riuulaʼdxiʼ guiziidiʼ jma de Biblia peru qué ziuu dxi gaca Testigu, ¿ñee caquiiñeruʼ gudiʼnu estudiu laabe la? Ne zándaca gabi estudiante stinu laanu xiñee qué ganda guni progresar. Guzéʼtenu ti ejemplu, zándaca riníʼ íquebe qué zanda guni predicarbe de yoo pur yoo. Ne despué de gánnanu ximodo runi sentirbe, qué zaca nagana para laanu gacanenu laabe.

20. ¿Ximodo racané Hechos 13:48 laanu gánnanu pa caquiiñeruʼ gudiʼnu estudiu ti binni?

²⁰ Triste guininu ni, peru naca caadxi estudiante casi ca israelita ni bibani tiempu stiʼ Ezequiel. Gudxi Jehová profeta que ca diidxaʼ riʼ: «Biiyaʼ, para laacabe zeeda gácaluʼ casi tuuxa ni ruundaʼ galán, ni nanna guxhidxi ti instrumentu de cuerda, ni cayuundaʼ ti canción de amor. Zunadiágacabe stiidxaluʼ, peru guirutiʼ zuni ni nani» (Ezeq. 33:32). Zándaca gaca nagana para laanu gábinu ti binni maʼ qué zudiʼnu estudiu laa peru cadi guiaandaʼ laanu «maʼ huaxiéʼ tiempu riaana» (1 Cor. 7:29). Nga runi, lugar de gunítinu tiempu né binni ni qué runi progresar la? jma galán guyúbinu ca ni «nachaʼhuiʼ ladxidóʼ ni maʼ nuu para guicaa guendanabani ni qué zaluxe» (biindaʼ Hechos 13:48).

21. ¿Gunáʼ nga textu stiʼ iza 2020, ne xiñee biaʼsi peʼ ni?

²¹ Textu stiʼ iza 2020 zacané ni laanu quixhe íquenu gacanenu binni gaca discípulo, ne gúninu ni jma jneza. Zeeda caadxi diidxaʼ ni guníʼ Jesús lu textu riʼ dxi gúpabe ti reunión lu dani stiʼ Galilea, raqué guniʼbe: «Laché ne lagacané binni [...] gaca discípulo stinneʼ. Lacuunisa laacaʼ» (Mat. 28:19).