1. ¿Xi guníʼ Jesús de ca tesoro ni nuu guibáʼ?

¿ÑEE nuu tesoro ni qué rihuinni la? Nuu; ne ca tesoro ni qué rihuinni nga ca ni jma risaca. Lu Sermón del Monte guníʼ Jesús jma risaca ca tesoro ni nuu guibáʼ que ca cosa ni napa binni. Ne laaca guniʼbe: «Ra nuu tesoro stiluʼ, racaca nuu ladxidoʼloʼ» (Mat. 6:19-21). Rucaa ladxidoʼno laanu guyúbinu ca cosa ni zeeda gaca casi tesoro para laanu o ca ni nabé rusisácanu. Ne rutálenu «tesoro guibáʼ» ora ribáninu modo ná Dios ne riuuláʼdxibe ni rúninu. Cásica maca guníʼ Jesús, guirutiʼ ne gastiʼ zanda gunduuxeʼ o cuanaʼ ca tesoro riʼ.

2. a) ¿Xi cayabi Pablo laanu gúninu lu 2 Corintios 4:17, 18? b) ¿Xi zadúʼyanu lu artículo riʼ?

² Cayabi apóstol Pablo laanu «guiduyadxinu ca cosa ni qué rihuinni» (biindaʼ 2 Corintios 4:17, 18). Lade ca cosa o ca tesoro ni qué rihuinni zeeda ca ndaayaʼ ni chiguicaanu lu Guidxilayú cubi ni maʼ guníʼ Dios chigudii laanu. Lu artículo riʼ zadúʼyanu tapa tesoro ni qué rihuinni ni nápanu tiempu riʼ: zanda gaca xhamígunu Dios, oración, racané espíritu santu laanu ne cayacané Jehová, Jesús ne ca ángel laanu lu predicación. Laaca zadúʼyanu ximodo zanda gusihuínninu rudiʼnu xquixe peʼ pur ca regalu ni qué rihuinni riʼ.

3. ¿Gunáʼ nga tesoro ni qué rihuinni ni jma risaca, ne ximodo zanda gápanu ni?

³ Tesoro ni qué rihuinni ni jma risaca nga zanda gaca xhamígunu Jehová (Sal. 25:14). Peru ¿ximodo zanda gaca Dios xhamigu binni ruchee ne cadi gusaana de gaca santu yaʼ? Pur guendaguti stiʼ Jesús purtiʼ ribee ni «pecadu ndaaniʼ guidxilayú»  (Juan 1:29). Ne maca dede ante gati Jesús, nanna Jehová zaca Xiiñiʼ fiel ne zacá zulá binni guidxilayú. Nga runi, gunda guca xhamigu Dios ca binni ni bibani ante gati Cristu (Rom. 3:25).

4. Bizeeteʼ caadxi binni ni guca xhamigu Dios ante gueeda Jesús lu Guidxilayú riʼ.

⁴ Guzéʼtenu de caadxi binni ni guca xhamigu Dios ni bibani ante gueeda Jesús lu Guidxilayú riʼ. Abrahán nga ti hombre ni nabé gupa fe Dios. Neca maʼ gudiʼdiʼ jma de ti mil iza de gútibe la? guníʼ Jehová xhamigu laabe (Is. 41:8). Nin guendaguti qué zanda guxheleʼ Jehová de ca ni jma xhamigu. Ne dede yanna nuuruʼ Abrahán lu xquendabiaaniʼ Jehová (Luc. 20:37, 38). Sti binni ni guca xhamigu Jehová nga Job. Ti biaje dxi dagulisaa ca ángel guibáʼ la? bisihuinni Jehová napa confianza Job. Ne sicaríʼ guníʼ de laabe: «Nácabe ti hombre ni qué gapa donda ni runi ni jneza ne ridxibi Dios ne rucaanáʼ cosa malu» (Job 1:6-8). ¿Ne ximodo biiyaʼ Jehová Daniel, ti hombre ni biʼniʼ ni nabe biaʼ ochenta iza ndaaniʼ ti guidxi ra runi adorar binni xcaadxi dios? Dxi maʼ nagola Daniel, chonna biaje gudxi ca ángel que laabe nabé risácabe para Dios (Dan. 9:23; 10:11, 19). Nanna dxíchinu guizáʼ maʼ cabeza Jehová guedandá dxi gusibani ca xhamigu ni maʼ guti (Job 14:15).

5. ¿Xi caquiiñeʼ gúninu para gaca xhamígunu Jehová?

⁵ Tiempu riʼ, millón de binni ruchee nácacaʼ xhamigu Jehová. Lu guidubi Guidxilayú nuu stale hombre, gunaa ne xcuidi ni cusihuinni pur modo nabánicaʼ racaláʼdxicaʼ gácacaʼ xhamigu Dios. Biblia ná guizáʼ xhamigu Jehová ca binni ni runi ni jneza (Prov. 3:32). Zanda gácacabe xhamigu Jehová purtiʼ nápacabe fe guti Jesús pur laacabe. Pur guti Cristu pur laanu la? rudii Jehová laanu privilegiu gaca dedicarnu ne chuʼnísanu. Ora rúninu ca ni bizéʼtenu riʼ, riuʼnu tobi si né guiráʼ millón de xpinni Cristu ni maʼ guca dedicar ne maʼ guyuunisa ne maʼ nácacaʼ xhamigu binni ni jma risaca lu universu.

6. ¿Ximodo zanda gusihuínninu rudiʼnu xquixe peʼ pur zanda gaca xhamígunu Dios?

⁶ ¿Ximodo zanda gusihuínninu rudiʼnu xquixe peʼ pur zanda gaca xhamígunu Dios? Ra chinándanu ejemplu stiʼ Abrahán ne Job. Guiropaʼ hombre riʼ gúcacaʼ fiel Dios jma de ti gayuaa iza. Ne laanu laaca caquiiñeʼ gúninu ni bíʼnicabe, biaʼ tiica si iza zinenu de cayúninu ni ná Jehová lu guidxilayú malu riʼ. Laaca naquiiñeʼ chinándanu ejemplu stiʼ Daniel ne gusisácanu amistad nápanu né Jehová jma que xquendanabáninu (Dan. 6:7, 10, 16, 22). Zanda gacané Jehová laanu para guni huantarnu intiica prueba guidxaagalunu ne cadi gusaana de gácanu xhamígube (Filip. 4:13).

7. a) Casi ná Proverbios 15:8, ¿ximodo ruuyaʼ Jehová ca oración stinu? b) ¿Ximodo ricabi Jehová ca oración stinu?

⁷ Sti tesoro ni qué rihuinni nga oración. Ca binni ni nabé xhamígucaʼ riuuláʼdxicaʼ guiniʼcaʼ de ni riníʼ íquecaʼ ne ni runi sentircaʼ. Ngaca nga rizaaca ora raca xhamígunu Jehová. Riquiiñebe Stiidxabe para guiníʼnebe laanu ne luni rábibe laanu xi riníʼ íquebe ne xi runi sentirbe. Laanu zanda iquiiñenu oración para gábinu laabe ni riníʼ íquenu ne ni runi sentirnu purtiʼ riuuláʼdxibe gucaadiágabe ca oración stinu (biindaʼ Proverbios 15:8). Cumu nadxiibe laanu la? rucaadiágabe ne ricábibe ca oración stinu. Nuu biaje nagueenda ricábibe laanu. Peru nuu tiru la? caquiiñeʼ ruʼ guni orarnu. Modo tiica si, nanna dxíchinu  zacábibe laanu ora peʼ caquiiñenu ni ne de ti modo jma galán. Zándaca qué zacábibe laanu modo peʼ cabézanu gúnibe ni. Guzéʼtenu ti ejemplu, nuu biaje lugar de cueebe ca guendanagana nápanu, rudiibe laanu guendabiaaniʼ ne stipa ni caquiiñenu para guni huantarnu (1 Cor. 10:13).

8. ¿Ximodo zanda gusihuínninu rudiʼnu xquixe peʼ Dios pur randa runi orarnu laa?

⁸ ¿Ximodo zanda gusihuínninu rudiʼnu xquixe peʼ Dios pur randa runi orarnu laa? Ora rinándanu conseju stibe ra ná: «Cadi gusaana de guni orartu» (1 Tes. 5:17). Qué runi obligar Jehová laanu guni orarnu. Sínuque runi respetarbe ca decisión ni ricaanu. Nga runi, rusihuínninu rudiʼnu xquixe peʼ laabe ora runi orarnu laabe stale biaje lu ti dxi. Peru cadi guiaandaʼ laanu gudiʼnu xquixe peʼ ne gusisácanu laabe ora guni orarnu (Sal. 145:2, 3).

9. a) ¿Ximodo ruuyaʼ ti hermanu láʼ Chris privilegiu ni napa de guni orar? b) ¿Ximodo ruuyaluʼ privilegiu nápaluʼ de guni orarluʼ?

⁹ Mientra jma stale iza zinenu de cayúninu ni ná Jehová ne guidúʼyanu modo ricábibe ca oración stinu, jma naquiiñeʼ gusisácanu oración. Guidúʼyanu ni guníʼ Chris, ti hermanu ni maʼ ziné cuarenta y siete iza de cayuni servir de tiempu completu: «Riuuladxeʼ guiasaʼ tempranu ne guneʼ orar Jehová ti ratu. Guizáʼ galán runeʼ sentir guinieniaʼ laabe ora deruʼ peʼ caree ca primé xtuxhu gubidxa. Ora runeʼ ni, riale de naa gudieeʼ xquixe peʼ Jehová pur guiráʼ ca regalu stiʼ, ne pur privilegiu ni napaʼ de guneʼ orar laa. Ne huaxhinni, despué de guneʼ orar, de peʼ rudii gana naa gaseʼ purtiʼ nuudxí conciencia stinneʼ».

10. ¿Xiñee naquiiñeʼ gusisácanu espíritu santu stiʼ Dios?

¹⁰ Sti tesoro ni qué rihuinni ni caquiiñeʼ gusisácanu nga stipa stiʼ Dios. Gudxi Jesús laanu cadi gusaana de guinábanu espíritu santu (Luc. 11:9, 13). Riquiiñeʼ Jehová espíritu santu stiʼ para gacané laanu purtiʼ «jma nadipaʼ poder» stiʼ «que poder» stinu  (2 Cor. 4:7; Hech. 1:8). Zanda gacané espíritu santu laanu para guni huantarnu intiica prueba.

11. ¿Ximodo zanda gacané espíritu santu laanu?

¹¹ Racané espíritu santu laanu para guni cumplirnu né ca dxiiñaʼ ni gudiicabe laanu ndaaniʼ xquidxi Dios. Zanda gacané ni laanu iquiiñenu ca habilidad stinu jma jneza. Ne nánnanu cadi pur stipa si stinu nga randa ribeendunu ni galán ora rúninu ni ná Jehová, sínuque espíritu santu stiʼ Dios nga racané laanu.

12. Casi ná Salmo 139:23, 24, ¿xi zanda guinábanu lu ca oración stinu?

¹² Sti modo zanda gusihuínninu rusisácanu espíritu santu nga guinábanu Jehová gacané laanu gudiʼnu cuenta pa caníʼ íquenu xiixa ni cadi jneza o pa nápanu xiixa deseu malu ndaaniʼ ladxidoʼno (biindaʼ Salmo 139:23, 24). Ricabi Jehová ca oración stinu ora riquiiñeʼ espíritu santu stiʼ para guluíʼ laanu paraa caquiiñeʼ guchaʼnu. Ne pa nuu ra caquiiñeʼ guchaʼnu, guinábanu Jehová espíritu santu stiʼ para ganda gudxiilunu ca cosa ni cadi jneza riníʼ íquenu ne ca deseu malu nuu ndaaniʼ ladxidoʼno. Zacá zusihuínninu qué racaláʼdxinu gúninu cosa malu, ne pur laani maʼ cadi gacané Jehová laanu né espíritu stiʼ (Efes. 4:30).

13. ¿Ximodo zanda gusihuínninu rudiʼnu xquixe peʼ Jehová pur espíritu santu stiʼ?

¹³ Ora guiníʼ íquenu guiráʼ ni cayuni espíritu santu tiempu riʼ, jmaruʼ si zudiʼnu xquixe peʼ Jehová pur laani. Ante cheʼ Jesús guibáʼ, gúdxibe ca discípulo stibe ca diidxaʼ riʼ: «Peru zacaatu poder ora gueeda espíritu santu luguiatu. Ne zácatu testigu stinneʼ [...] dede ra jma zitu lu guidxilayú» (Hech. 1:8). Guendaridxagayaa modo cayaca cumplir ca diidxaʼ riʼ tiempu riʼ. Maʼ gucané espíritu santu jma de xhono millón arondaʼ binni nabeza gadxé gadxé lugar lu Guidxilayú para gácacaʼ xpinni Jehová. Ne nuunu ndaaniʼ ti paraísu espiritual, purtiʼ cayacané espíritu santu laanu para gusihuínninu «ca cualidad stiʼ espíritu», casi guendarannaxhii, guendanayecheʼ, guendariuudxi,  paciencia, guendaracané, guendanachaʼhuiʼ, fe, guendanadóʼ ne gucueeza tobi laca laa (Gál. 5:22, 23). Rihuinni dxichi ti regalu nabé risaca nga espíritu santu.

14. ¿Tu racané laanu ora maʼ cayuni predicarnu?

¹⁴ Nápanu sti tesoro ni qué rihuinni: guninenu Jehová, Jesús ne ca ángel dxiiñaʼ (2 Cor. 6:1). Racanécabe laanu cada biaje guyúbinu binni gaca discípulo stiʼ Cristu. Biʼniʼ Pablo ne xcaadxi binni ni biʼniʼ predicar xhiiñaʼ Dios, nga runi guníʼ: «Rúninedu Dios dxiiñaʼ» (1 Cor. 3:9). Ora runi predicarnu, laaca cayuninenu Jesús dxiiñaʼ. ¿Xiñee yaʼ? Purtiʼ despué de gúdxibe ca discípulo stibe «lagacané binni de guiráʼ guidxi gaca discípulo stinneʼ», laaca gúdxibe laacaʼ: «Qué ziuu dxi guixeleʼ de laatu» (Mat. 28:19, 20). Yanna, ¿xi zanda guininu de ca ángel ca yaʼ? Rudiʼnu xquixe peʼ laacabe purtiʼ racanécabe laanu ora caninu de ca «noticia galán ni qué ziuu dxi guinitilú para ca binni ni nabeza lu guidxilayú» (Apoc. 14:6),

15. ¿Xi relatu zeeda lu Biblia rusihuinni modo racané Jehová laanu lu predicación?

¹⁵ ¿Xi cabeendunu pur cayacanécabe laanu yaʼ? Ora rudxíʼbanu ca bidxi ni zeeda gaca mensaje stiʼ Reinu, riaba caadxi de laacani ndaaniʼ ladxidóʼ binni ni napa gana guiziidiʼ ne rachendúcani (Mat. 13:18, 23). ¿Tu racané para gachendú ca bidxi riʼ ne gudii cani yaʼ? Jesús guníʼ ca diidxaʼ riʼ: «Bixhozeʼ nga biseendaʼ naa, ne guirutiʼ zanda gueeda ra nuaaʼ pa cadi laabe cuídxibe laa» (Juan 6:44). Lu Biblia zeeda ti relatu ni caníʼ de laani. Ti biaje biʼniʼ predicar Pablo caadxi gunaa ni nuu fuera de guidxi Filipos. Guidúʼyanu xi ruzeeteʼ Biblia de tobi de ca gunaa nuu raqué ni láʼ Lidia: «Bixheleʼ ndaga Jehová ladxidoʼbe para ganda gucaadiaga chaahuibe ni caníʼ Pablo» (Hech. 16:13-15). Cásica biʼniʼ Jehová né Lidia, maʼ guridxi Jehová millón de binni ndaaniʼ xquidxi tiempu riʼ.

16. ¿Tu laa nga naquiiñeʼ guisaca ora ribeendunu ni galán lu predicación?

¹⁶ ¿Tu laa nga naquiiñeʼ guisaca ora ribeendunu ni galán lu predicación? Bicabi Pablo pregunta riʼ ora bicaa ca diidxaʼ riʼ ra nuu ca hermanu de Corinto: «Naa bidxiibaʼ, Apolos bizee, peru Dios bisiniisi ni, nga runi, nin ni rudxiibaʼ ne nin ni ruzee guirutiʼ naca, sínuque Dios nga naquiiñeʼ guisaca purtiʼ laa nga rusiniisi ni» (1 Cor. 3:6, 7). Cada biaje cueendunu ni galán ora guni predicarnu, naquiiñeʼ gusisácanu Jehová, cásica biʼniʼ apóstol Pablo.

17. ¿Ximodo zanda gusihuínninu rudiʼnu xquixe peʼ pur privilegiu ni nápanu de guninenu Jehová, Jesús ne ca ángel dxiiñaʼ?

¹⁷ ¿Ximodo zanda gusihuínninu rudiʼnu xquixe peʼ pur privilegiu ni nápanu de guninenu Jehová, Jesús ne ca ángel dxiiñaʼ? Ora rúninu biaʼ gándatiʼ pur guinínenu binni de ca noticia galán stiʼ Dios. Ne laaca zanda guni predicarnu de gadxé gadxé modo, «nezalú stale binni ne de yoo pur yoo» (Hech. 20:20). Stale hermanu riuuláʼdxicaʼ guni predicarcaʼ ratiica si nuucaʼ. Ora ruuyacabe tuuxa binni ni qué runibiáʼcabe, rugapadiúxicabe laacaʼ ne ruyúbicabe modo guiniʼnécabe laacaʼ. Pa gúʼyacabe napa binni ca gana gucaadiaga, ruzulú riniʼnécabe laa de Reinu stiʼ Dios.

18, 19. a) ¿Ximodo ruzeʼnu ca bidxi ni zeeda gaca stiidxaʼ Reinu? b) ¿Ximodo gucané Jehová ti hombre biʼniʼ estudiar Biblia ni láʼ Raphalalani?

¹⁸ Cumu rúninenu «Dios dxiiñaʼ», cadi naquiiñeʼ si gudxíʼbanu bidxi stiʼ Reinu, sínuque laaca naquiiñeʼ guzeʼnu cani. Ora riuulaʼdxiʼ ti binni mensaje ni zinenu,  rúninu stipa pur chuuláʼdxibe guiziidibe jma o ruyúbinu tuuxa chiganna laabe sti biaje para guzulú guni estudiar né laabe. Ora ridúʼyanu cayuni progresar ti binni para gaca ti discípulo stiʼ Cristu la? riéchenu ora ridúʼyanu cayacané Jehová laabe para guchaabe modo riníʼ íquebe ne ni runi sentirbe.

¹⁹ Guidúʼyanu ni bizaaca Raphalalani, ti curanderu de guidxi Sudáfrica. Riuuláʼdxibe guiráʼ ni caziidibe de lu Biblia. Peru guca ni nagana para laabe ora biindabe ni rusiidiʼ Biblia de ca binni ni nacaʼ randa riníʼnecaʼ ca ni maʼ guti (Deut. 18:10-12). Peru chaahuiʼ chaahuiʼ bidiibe lugar guchaa Dios modo riníʼ íquebe. Ne despué bisaana de gácabe curanderu, neca ngue nga dxiiñaʼ stibe. Maʼ napa Raphalalani 60 iza yanna, ne sicaríʼ guníʼ: «Guizáʼ rudieeʼ xquixe peʼ ca testigu stiʼ Jehová purtiʼ gucanecaʼ naa de stale modo, casi guidxelaʼ sti dxiiñaʼ. Peru jma rudieeʼ xquixe peʼ Jehová purtiʼ laa gucané naa guchaaʼ modo nabaneʼ, yanna maʼ randa runeʼ predicar, ne nacaʼ ti Testigu ni maʼ guyuunisa».

20. ¿Xi maʼ gudixhe íquenu gúninu?

²⁰ Lu artículo riʼ maʼ guninu de tapa tesoro ni qué rihuinni. Ni jma risaca lade guiráʼ cani nga zanda gaca xhamígunu Jehová. Ne pur nápanu privilegiu riʼ, zanda gápanu xcaadxi tesoro ni qué rihuinni: guinínenu Jehová lu oración, gacanebe laanu né espíritu santu stibe ne gacanécabe laanu dede guibáʼ para guni predicarnu. Maʼ gudixhe íquenu gusisácanu jma ca tesoro ni qué rihuinni riʼ. Ne qué ziuu dxi gusaana de gudiʼnu xquixe peʼ Jehová purtiʼ guizáʼ xhamigu laanu.