1, 2. ¿Xi ejemplu racané laanu guiénenu ximodo runi sentir Jehová pur ca cosa ni cadi dxandíʼ huaníʼcabe de laa?

 GUNÍʼ ique guníʼ tuuxa ni nabé nadxiiluʼ mal de lii. Nánnaluʼ cadi dxandíʼ ni, peru nuu tu laa biʼniʼ cré ni, ne ni jma feu nga bizulú guníʼcabe de laani ne bireeche ni. ¿Ximodo ñuni sentirluʼ yaʼ? ¿Cadi dxandíʼ ñuuluʼ xizaa ne ñuuluʼ triste la? (Prov. 22:1).

² Racané ejemplu riʼ laanu guiénenu ximodo biʼniʼ sentir Jehová ora tobi de ca xiiñiʼ ni nuu guibáʼ guníʼ cosa ni cadi dxandíʼ de laabe ne biʼniʼ biidiʼ labe. Biʼniʼ cré Eva guendarusiguii que, ngue runi, laa ne Adán bidxiidéchecaʼ Jehová. Pur ni bizaaca riʼ, guiráʼ binni ruchee ne rati (Gén. 3:​1-6; Rom. 5:12). Nuu stale guendanagana lu Guidxilayú riʼ pur bisiguii Binidxabaʼ ndaaniʼ jardín de Edén que, rati binni, nuu guerra ne stale yuubaʼ. Nabé riuubaʼ ladxidóʼ Jehová pur guiráʼ ni rizaaca dede dxi bizulú cusiguii Binidxabaʼ. Peru cadi pur nga canaguidxiichi stubi Jehová ne daʼ xiana. Coʼ, lu Biblia riete dede yanna nácabe «ti Dios ni nayecheʼ» (1 Tim. 1:11).

3. ¿Xi privilegiu nápanu?

³ Nápanu ti privilegiu nabé naroʼbaʼ: guni defendernu lá Jehová. ¿Ximodo yaʼ? Ra gúninu ni ná ca diidxaʼ riʼ: «Lagusisaca lá Jehová» (Sal. 113:1). ¿Ximodo zanda gusisácanu lá Jehová yaʼ? Zanda gúninu ni ra gábinu binni guiráʼ cosa galán ni runi binni ni ziné lá nayá ca. ¿Ñee racaláʼdxiluʼ gúniluʼ ni la? Guidúʼyanu chonna razón nabé risaca ni zucaa laanu gusisácanu lá Dios de guidubi ladxidoʼno.

 RUSIÉCHENU JEHOVÁ

4. Biquiiñeʼ ti ejemplu para gusiéneluʼ xiñee riecheʼ Jehová ora rusisácanu laa (biiyaʼ imagen ca).

⁴ Jehová nga Bixhózenu ni nuu guibáʼ, ne nabé riuuláʼdxibe gusisácanu labe (Sal. 119:108). ¿Ñee riníʼ nga naca Dios ni jma napa poder casi binni ruchee, ni ruyubi gusisaca xcaadxi laa para si guni sentir galán la? Coʼ. Para guiénenu ni, guiníʼ íquenu ti dxaapahuiiniʼ ni ridxiña ra nuu bixhoze, riguiidxi dxiichiʼ ne rabi laabe: «Guizáʼ nadxieeʼ lii apá». Riecheʼ hombre riʼ ne zándaca dede ruunaʼ pur ni gudxi xiiñiʼ laa. ¿Xiñee yaʼ? ¿Ñee qué gánnabe nadxii xiiñibe laabe o caquiiñeʼ peʼ gabi xiiñibe ni laabe para guni sentirbe galán la? Coʼ xa. Ni riuuláʼdxibe nga gabi xiiñibe laabe nadxii laabe ne gudii xquixe peʼ laabe pur guiráʼ ni rúnibe pur laa. Ne nánnabe zacané ndiʼ xiiñibe chuʼ nayecheʼ ora guiniisi. Zaqueca nga Jehová, gastiʼ stobi casi laa ne nadxiinu laa. Guizáʼ riéchebe ora gúʼyabe rusisácanu laabe.

5. ¿Xi rusihuínninu ora rusisácanu Jehová?

⁵ Maʼ xadxí guníʼ Binidxabaʼ ti cosa ni cadi dxandíʼ ne laaca runiná ni laanu yanna. Riniʼbe nin ti binni qué zusisaca lá Dios ora tidiʼ lu xiixa guendanagana. Ne para laabe la? zudxiʼdéchenu Dios para gusaana de gacananu (Job 1:​9-11; 2:4). Peru Job, ti hombre fiel, bisihuinni cadi dxandíʼ ni guníʼ Binidxabaʼ. Yanna, ¿laanu yaʼ? ¿Ximodo zanda gúninu ni biʼniʼ Job? Rusihuínninu rusiguii Binidxabaʼ ora rusisácanu Jehová. Nápanu ti privilegiu guizáʼ naroʼbaʼ: guni defendernu lá Jehová ne gusiéchenu laa ra cadi gucheʼnu (Prov. 27:11).

6. ¿Ximodo zanda chinándanu ejemplu stiʼ rey David ne stiʼ ca levita? (Nehemías 9:5).

⁶ Ca ni dxandíʼ nadxii Dios la? rusisácacaʼ labe de guidubi ladxidoʼcaʼ. Sicaríʼ bicaa rey David: «De guidubi xhialmaʼ zusisacaʼ Jehová, ne guidubi nacaʼ zusisaca labe» (Sal. 103:1). Biene David ra gusisaca lá Jehová laaca cusisaca Jehová. Ora guininu de lá Jehová, casi xa ñaca nininu modo nácabe, ca cualidad stibe ne ca cosa galán ni maʼ bíʼnibe. Biyubi David modo gusisaca lá Bixhoze ne cadi gaca biidiʼ ni. Guniʼbe guidubi nácabe zúnibe ni, de guidubi ladxidoʼbe. Laaca biyubi ca levita modo gusisácacaʼ Jehová. Bidiicabe cuenta caquiiñeʼ gúnicabe xiixa para gusisácacabe lá Jehová ne cadi guiniʼsícabe ni (biindaʼ Nehemías 9:5). ¡Guníʼ ique pabiáʼ  nayecheʼ biʼniʼ sentir Jehová ora binadiaga cayuundacabe né stale gana ne de guidubi ladxidóʼcabe para laa!

7. ¿Ximodo zanda gusisácanu Jehová ora guni predicarnu ne lu ca cosa ni rúninu guiráʼ dxi?

⁷ Laanu laaca zanda gusisácanu Jehová ra guininu né stale cariñu de laabe. Ne ra gudiʼnu xquixe peʼ laabe pur guiráʼ ni cayúnibe pur laanu. Ora runi predicarnu, ni racaláʼdxinu nga guiale de ladxidóʼ binni gunibiáʼ Jehová ne gannaxhiicaʼ laabe cásica nadxiinu laabe (Sant. 4:8). Riuuláʼdxinu iquíʼñenu Biblia para gusíʼdinu laacaʼ de ca cualidad galán napa Jehová, casi guendarannaxhii, rúnibe ni jneza, pabiáʼ nuu xpiaanibe ne poder ni nápabe. Sti modo zanda gusisácanu lá Jehová ne gusiéchenu ladxidóʼ nga ra gúninu stipa chinándanu ejemplu stiʼ (Efes. 5:1). Ora rúninu ni, zándaca nuu tu rinabadiidxaʼ xiñee maʼ gadxé laanu de xcaadxi binni (Mat. 5:​14-16). Zándaca ra guidxaaganu laacabe chuʼ ti oportunidad para gusiénenu laacabe xiñee. Nga zucaa ca binni ni nayá ladxidóʼ guiziidicaʼ de Dios. Ora rusisácanu Jehová modo bizéʼtenu riʼ la? rusiéchenu ladxidoʼbe (1 Tim. 2:​3, 4).

RUSIÉCHENU JESÚS

8. ¿Xiñee zanda guininu nabé galán modo bisisaca Jesús lá Bixhoze?

⁸ Guirútiruʼ runibiáʼ chaahuiʼ Jehová, Bixhózenu, jma que Jesús (Mat. 11:27). Nabé nadxii Jesús Bixhoze ne maʼ bisiidibe laanu modo gusisácanu lá Jehová (Juan 14:31). Ora biʼniʼ orarbe Bixhózebe gueelaʼ ante gátibe, sicaríʼ guniʼbe de dxiiñaʼ ni bíʼnibe: «Maʼ bisiideʼ laacabe tu laluʼ» (Juan 17:26). ¿Ximodo bíʼnibe ni yaʼ?

9. ¿Xi ejemplu biquiiñeʼ Jesús para gusiene ximodo peʼ naca Jehová?

⁹ Qué ñabi si Jesús binni lá Dios nga Jehová. Maca nanna ca judíu que ni. Bisiénebe laacaʼ ximodo peʼ naca Jehová (Juan 1:​17, 18). Casi lu Escrituras Hebreas riete naca Jehová ti Dios ni riá ne riene binni (Éx. 34:​5-7). Bisihuinni Jesús zacá ni ora guníʼ de ejemplu stiʼ hijo pródigo. Ora ridúʼndanu de zíturuʼ maʼ biiyaʼ bixhózebe laabe, bixooñeʼ bidxaagalú laabe, gudiidxi ne biʼniʼ perdonar laabe de guidubi ladxidóʼ, riénenu pabiáʼ riá Jehová ne riene laanu (Luc. 15:​11-32). Rihuinni dxíchica gucané Jesús binni guiziidiʼ ximodo peʼ naca Jehová.

10. a) ¿Ximodo nánnanu biquiiñeʼ Jesús lá Bixhoze ne biyúbibe guni xcaadxi zaqueca? (Marcos 5:19; biiyaʼ imagen ca). b) ¿Xi racalaʼdxiʼ Jesús gúninu?

¹⁰ ¿Ñee biyubi Jesús iquiiñeʼ binni lá Bixhoze la? Bíʼnibe ni. Zándaca guyuu caadxi xaíque stiʼ religión ni bibani dxiqué guníʼ íquecaʼ qué zanda iquiiñeʼ binni lá Dios purtiʼ nabé risaca ni. Peru qué nudii Jesús lugar nucueeza costumbre que laa de nusisaca lá Bixhoze, purtiʼ cadi cá diʼ costumbre ca lu Stiidxaʼ Dios. Guiníʼ íquenu dxi bisianda Jesús ti hombre ni guyuu demonio lu cuerpu stiʼ, bizaaca ndiʼ lu región stiʼ ca geraseno. Guizáʼ bidxibi ca binni que dede gunábacaʼ Jesús guiree de raqué (Mar. 5:​16, 17). Peru cumu ni racalaʼdxiʼ Jesús ngue gunibiáʼ binni lá Jehová la? ngue runi ante chebe gúdxibe hombre que gabi binni Jehová ngue bisianda laa ne cadi Jesús (biindaʼ Marcos 5:19). a Ngueca nga ni  racalaʼdxiʼ Jesús, Rey stinu, gúninu, gusíʼdinu guiráʼ xixé binni lá Jehová (Mat. 24:14; 28:​19, 20). Ora rúninu ni, rusiéchenu laabe.

11. ¿Xi gudxi Jesús ca xpinni guinábacaʼ lu ca oración sticaʼ? Ne casi ná Ezequiel 36:​23, ¿xiñee nabé risaca ni?

¹¹ Nanna Jesús ni maʼ gudixhe ique Jehová nga gaca santificar lá, ni caninu nga guiá labe de guiráʼ cosa ni cadi dxandíʼ huaníʼcabe de laabe. Ngue runi bisiidiʼ Jesús ca ni zinanda laa guni orarcaʼ sicaríʼ: «Bixhózedu ni nuu guibáʼ, gaca santificar laluʼ» (Mat. 6:9). Nanna Jesús gástiruʼ sti cosa jma risaca que gaca santificar lá Dios (biindaʼ Ezequiel 36:23). Ne lu guiráʼ xixé cosa ni guyáʼ, guirútiruʼ runi santificar lá Jehová biaʼ huayuni Jesús ni. Neca zacá, ora gunaazecabe laabe, ¿xi donda bigaanicabe íquebe? Nácabe caniʼbe contra Dios, ni nácabe nga cayuni biidibe lá Bixhózebe. Para laabe la? gástiruʼ sti pecadu jma feu que nga. Maca nuube triste ante guinaazecabe laabe, purtiʼ nánnabe nga nga donda chiugaanicabe íquebe ne zuuticabe laabe pur laani. Ne zándaca pur nga guizáʼ «cayuubaʼ ladxidoʼbe» óraque (Luc. 22:​41-44).

12. ¿Xi biʼniʼ Jesús para biʼniʼ santificar lá Bixhoze?

¹² Guná Jesús guni huantar guninácabe laa, cuʼdícabe ne guiníʼcabe cosa ni cadi dxandíʼ de laa para guni santificar lá Bixhoze. Nánnabe bizuubabe diidxaʼ ne qué gápabe xi pur guituí lube (Heb. 12:2). Laaca nánnabe Binidxabaʼ ngue cutiidiʼ laabe lu ca guendanagana que (Luc. 22:​2-4; 23:​33, 34). Biyubi Binidxabaʼ modo nuxheleʼ Jesús de Jehová, peru qué ñanda ñúnibe ni. Bisihuinni Jesús rusiguii Binidxabaʼ ne napa Jehová xpinni ni qué zaxeleʼ de laa neca tídicaʼ lu guendanagana naroʼbaʼ.

13. ¿Xi caquiiñeʼ gúninu para gusiéchenu Rey stinu?

¹³ ¿Ñee racaláʼdxiluʼ gusiécheluʼ Jesucristu, Rey stiluʼ la? Pa zacá ni, cadi gusaana de gusisácaluʼ lá Jehová ne gucané xcaadxi gánnacaʼ ximodo peʼ nácabe. Zacá zinándaluʼ ejemplu stiʼ Jesús (1 Ped. 2:21). Ne cásica laabe, zusiécheluʼ ladxidóʼ Jehová ne zusihuínniluʼ guizáʼ rusiguii Binidxabaʼ, enemigu stibe.

 RACANENU BINNI GUILÁ

14, 15. ¿Xi rizaaca ora rusíʼdinu binni ni dxandíʼ de Jehová?

¹⁴ ¿Xiñee zanda guininu racanenu binni guilá ora rusisácanu lá Jehová? Purtiʼ maʼ biseeguʼ Binidxabaʼ, «dios stiʼ guidxilayú riʼ xquendabiaaniʼ ca ni qué runi cré» (2 Cor. 4:4). Ne pur nga stale binni runi cré ca guendarusiguii stibe ne riníʼ íquecaʼ cadi dxandíʼ nuu Dios, riniʼcaʼ zitu nuube de laanu, qué rizaaláʼdxibe laanu ne nácabe ti Dios malu ni runiná ca binni malu para siempre. Runi biidiʼ guiráʼ ndiʼ lá Jehová ne rucaa ni binni guni cré nácabe ti Dios malu ne qué zanda guidxíñacaʼ laabe. Peru ora runi predicarnu ne rininu ni dxandíʼ de Bixhózenu ni nuu guibáʼ la? qué raca xcuxtu Binidxabaʼ ne rusisácanu lá Jehová. ¿Xi ribeendunu yaʼ?

¹⁵ Nabé naroʼbaʼ poder napa guiráʼ ni dxandíʼ zeeda lu Biblia. Ora rusíʼdinu binni tuu nga Jehová ne ximodo laa, rizaaca stale cosa ni ridxagayaanu. Ra maʼ ziziidicabe cadi dxandíʼ guiráʼ ni ná Binidxabaʼ, rixeleʼ lúcabe ne ruzulú ruuyacabe Bixhózenu ni nuu guibáʼ cásica ridúʼyanu laa. Guizáʼ ridxagayaacabe ora guiníʼ íquecabe nápabe stale poder (Is. 40:26). Ne runi sentírcabe seguru purtiʼ nánnacabe jneza guiráʼ ni rúnibe (Deut. 32:4). Nabé ridxagayaacabe purtiʼ guizáʼ nuu xpiaanibe (Is. 55:9; Rom. 11:33). Ne ratadxí ladxidóʼcabe ra guiziidicabe laabe nga guendarannaxhii (1 Juan 4:8). Ora maʼ nuucabe gaxha de Jehová, riuucabe seguru zanda guibánicabe para siempre ne gueeda gácacabe xiiñibe. ¿Cadi dxandíʼ nabé riéchenu ora gacanenu binni guidxiña Bixhózenu ni nuu guibáʼ la? Ora rúninu ni nánnanu cayuninenu Dios dxiiñaʼ (1 Cor. 3:​5, 9).

16. ¿Xi zanda gueeda guizaaca ora guiziidiʼ tuuxa lá Dios? Bizeeteʼ ti ejemplu.

¹⁶ Ora maʼ canínenu tuuxa de Dios, zándaca primé cosa ni rusíʼdinu laabe nga lá Dios nga Jehová. Ne pa nachaʼhuiʼ ladxidóʼ binni ca la? ngasi zanda guchaa xquendanabánibe. Nga peʼ nga ni bizaaca  ti gunaa joven láʼ Alía b ni biniisi ndaaniʼ ti familia ni napa ti religión ni qué rusiidiʼ ni ná Biblia. Qué riuuláʼdxibe ni rusiidiʼ religión stibe ne qué runi sentirbe nuube gaxha de Dios. Peru bichaa xquendanabánibe ora biʼndané ca Testigu laabe Biblia. Guizáʼ bidxagayaabe ora gúnnabe bichaacabe láʼ Dios lu stale Biblia ne bicaacabe caadxi título casi Señor. Ra gúnnabe tu láʼ Dios, gucané ni laabe gúʼyabe laa casi xhamígube. Tantu cadxagayaabe guniʼbe: «¡Biaa! Napa xhamiguaʼ lá». Ne laaca bizeetebe: «Yanna maʼ nexhedxí ladxiduáʼ. Ti ndaayaʼ naroʼbaʼ nga napaʼ Dios casi xhamiguaʼ». Steve nga ti músicu, naca familia stibe de religión stiʼ ca judíu, ne nabé estrictu familia stibe. Cumu biiyabe qué runi ca binni ni nuu ndaaniʼ religión ca ni rusiidicaʼ la? ngue runi guníʼ íquebe qué zápabe nin ti religión. Peru ora gutiʼ ti familia stibe, gunabe gudii ti testigu stiʼ Jehová estudiu laabe. Guizáʼ biniibi ladxidoʼbe ora gúnnabe tu láʼ Dios. Laabe guniʼbe: «Qué huayuu dxi guiníʼ iqueʼ pa napa Dios lá». Ne laaca bizeetebe: «Ndiʼ nga primé biaje guuyaʼ Dios casi ti binni. Raqué nga bidieeʼ cuenta maʼ bidxelaʼ tuuxa ni zanda gaca xhamiguaʼ».

17. ¿Xiñee qué racaláʼdxiluʼ gusaanaluʼ de gusisácaluʼ lá Jehová? (Biiyaʼ imagen ca).

¹⁷ Ora runi predicarnu o rusíʼdinu binni, ¿ñee rábinu laacaʼ tu láʼ Dios ne ximodo laabe la? Pa gúninu zacá zusisácanu labe. Nga runi cadi gusaana de gusiidiluʼ xcaadxi ximodo naca Jehová ne zacá zusisácaluʼ labe. Ra gúniluʼ ni, zacaneluʼ binni guilá, zinándaluʼ ejemplu stiʼ Jesucristu, Rey stinu, ne ni jma risaca nga zusiécheluʼ ladxidóʼ Jehová, Bixhózenu ni nuu guibáʼ. Ne cásica hombre ni bicaa Salmo 145:​2, zaninu: «Qué ziuu dxi gusaanaʼ de gusisacaʼ laluʼ».