1. ¿Xiñee qué ruchaaga Jehová laanu né xcaadxi binni?

BIZÁʼ JEHOVÁ stale cosa. Gadxé tipu manihuiiniʼ, gadxé tipu yagahuiiniʼ ne dede gadxé modo bizaʼbe cada binni. Gastiʼ stobi casi laanu, nga runi qué ruchaaga Jehová laanu né xcaadxi. Ruuyaʼ Jehová ni nuu ndaaniʼ ladxidoʼno (1 Sam. 16:7). Laaca nánnabe xi zanda gúninu ne xi qué zanda gúninu ne modo biniisinu. Ne qué rinábabe laanu gúninu jma de biaʼ qué zanda gúninu. Naquiiñeʼ chinándanu ejemplu stibe ne guiníʼ íquenu modo riníʼ íquebe. Pa gúninu nga zaníʼ íquenu jneza ne qué zaníʼ íquenu jma risácanu o huaxiéʼ risácanu que xcaadxi (Rom. 12:3).

2. ¿Xiñee cadi jneza guchaaganu laanu né xcaadxi?

² Gastiʼ naca chinándanu ejemplu stiʼ ti hermanu ni nanna guni predicar (Heb. 13:7). Nga zacané laanu guni predicarnu jma jneza (Filip. 3:17). Galán nga guidúʼyanu ejemplu stiʼ tuuxa, peru cadi galán diʼ gúninu ni para si guchaaganu laanu ne laa. Purtiʼ pa gúninu ni zácanu binni ni napa envidia, zareʼnu gana ne zuni sentirnu qué risácanu. Casi bizíʼdinu lu artículo ni gudiʼdiʼ que, pa racaláʼdxinu tídinu lu ca hermanu de congregación la? zuxhéleni laanu de Jehová. Nga runi né diidxaʼ nadóʼ cayábibe laanu: «Cada tobi guʼyaʼ xi cayuni, zacá zapa razón para chuʼ nayecheʼ pur ni maʼ biʼniʼ, sin guchaaga laa né sti binni» (Gál. 6:4).

3. ¿Xi rúniluʼ lu xhiiñaʼ Jehová ni rusiecheʼ lii?

³ Racalaʼdxiʼ Jehová chuʼnu nayecheʼ pur guiráʼ ni maʼ bíninu  para guni adorarnu laa. Guzéʼtenu ti ejemplu, pa maʼ guyuunísanu, nápanu razón para guiéchenu purtiʼ maʼ bigaandanu meta riʼ. Biale de laanu chuʼnísanu purtiʼ nadxiinu Jehová. Guiníʼ íquenu xi guiráʼ huayúninu dede dxi guyuʼnísanu. Zándaca jma riuuláʼdxinu guidúʼndanu ne guni estudiarnu Biblia. Ne jma runi orarnu Dios de guidubi ladxidoʼno (Sal. 141:2). Zándaca maʼ qué raca nagana para laanu guni predicarnu ne iquiiñenu ca herramienta ni nápanu para guni predicarnu. Ne pa maʼ bichagananu ne nápanu xiiñinu, zándaca huayacané Jehová laanu gúninu dxiiñaʼ stinu jneza ndaaniʼ familia. Zanda chuʼnu nayecheʼ pur guiráʼ ni huayúninu para guni adorarnu Jehová jneza.

4. ¿Xi zadúʼyanu lu artículo riʼ?

⁴ Zanda gacanenu xcaadxi chuʼcaʼ nayecheʼ pur cayúnicaʼ xhiiñaʼ Jehová ne gacanenu laacaʼ cadi guchaagacaʼ laacaʼ né xcaadxi. Lu artículo riʼ, zadúʼyanu ximodo zanda gacané ca padre xiiñicaʼ, ximodo zanda gacanélisaa ca ni maʼ bichaganáʼ ne ximodo zanda gacané ca ancianu ne guiráʼ ca ni nuu ndaaniʼ congregación ca hermanu. Ne últimu la? zadúʼyanu caadxi conseju ni zeeda lu Biblia ni zacané laanu quixhe íquenu meta ni zanda ugaandanu.

5. Casi ná Efesios 6:4, ¿xi cadi naquiiñeʼ guni ca padre?

⁵ Cadi naquiiñeʼ guchaaga ca padre ca xiiñicaʼ né xcaadxi, ne cadi naquiiñeʼ guinábacaʼ gúnicabe xiixa ni qué zanda gúnicabe. Pa guni ca padre sicaríʼ la? zuchiichicaʼ ne zabeecaʼ gana ca xiiñicaʼ (biindaʼ Efesios 6:4). Sicaríʼ guníʼ ti hermana láʼ Sachiko *: «Gunabaʼ ca maestru stinneʼ naa cueeʼ calificación jma galán que ca xcompañeruaʼ. Cumu cadi Testigu ca maestru stinneʼ ne bixhozeʼ la? gunabaʼ jñaaʼ naa cueeʼ calificación galán ti zacá ganda guiníʼcabe galán de ca testigu stiʼ Jehová. Gucalaʼdxiʼ jñaa nibeeʼ puru diez lu examen, peru nagana gúcani para naa. Neca maʼ stale iza de binduuxeʼ scuela, nuu biaje riníʼ iqueʼ qué riuu diʼ Jehová nayecheʼ pur guiráʼ stipa ni cayuneʼ lu xhiiñaʼ».

6. ¿Xi zanda guiziidiʼ ca padre de ni ná Salmo 131:1, 2?

⁶ Zanda guiziidiʼ ca padre ti cosa nabé  risaca ni zeeda lu Salmo 131:1, 2 (biindaʼ ni). Rey David guníʼ: «Qué ruyubeʼ gapaʼ cosa naroʼbaʼ nin cosa ni qué zanda guneʼ». Pur guca David humilde ne gunna nuu cosa ni qué zanda guni, gucané ni laa ganda gatadxí ladxidóʼ ne chuʼ nayecheʼ. Ndiʼ rusiidiʼ ca padre naquiiñeʼ gácacaʼ humilde ne gánnacaʼ nuu cosa ni qué zanda gúnicaʼ ne cadi naquiiñeʼ guinábacabe xiiñicabe gúnicaʼ cosa ni qué zanda gúnicaʼ. Zanda gacané ca padre ca xiiñicaʼ gánnacaʼ xi zanda gúnicaʼ ne xi qué zanda gúnicaʼ, ne despué quíxhecaʼ meta ni zanda ugaandacabe. Ti hermana láʼ Marina guníʼ: «Qué ñuu dxi nuchaaga jñaaʼ naa né guionnaʼ bizanaʼ ne nin xcaadxi xcuidi. Bisiidibe naa gadxé gadxé gracia nga napa cada binni ne risácanu para Jehová. Nga runi, runeʼ stipa cadi guchaagaʼ naa né xcaadxi».

7, 8. ¿Ximodo zanda gusisaca ti hermanu xheelaʼ?

⁷ Naquiiñeʼ gusisaca ca hermanu ni maʼ bichaganáʼ xheelacaʼ (1 Ped. 3:7). Ndiʼ riníʼ, ni jma guisaca para laabe nga gúʼyabe xi caquiiñeʼ xheelabe ne guni tratarbe laa né stale respetu. ¿Ximodo zanda gúnitu ndiʼ yaʼ? Ra gusihuínnitu risácacabe para laatu, cadi guinábatu jma de ni biaʼ zanda gúnicabe, ne cadi guchaagatu laacabe né xcaadxi gunaa. ¿Xi zanda guizaaca pa guchaagatu xheelatu né xcaadxi gunaa yaʼ? Guidúʼyanu ni guníʼ ti hermana láʼ Rosa. Xheelabe, ni cadi naca Testigu, nabé ruchaaga laabe né xcaadxi gunaa. Cumu nabé naná ca diidxaʼ ni rabi xheelabe laabe la? runi sentirbe qué risácabe ne riníʼ íquebe guirutiʼ tu nadxii laabe. Rosa guníʼ: «Gatigá naquiiñeʼ gusietenaláʼdxicabe naa nadxii Jehová naa». Peru maʼ gadxé ca hermanu ni maʼ bichaganáʼ, laacaʼ rusisácacaʼ xheelacaʼ, purtiʼ nánnacaʼ zacá zápacaʼ xquendaxheelacaʼ ne amistad ni napanecaʼ Jehová. *

⁸ Laaca rusisaca ti hermanu xheelaʼ ora guiníʼ cosa galán de laabe ne guiníʼ nadxii laabe (Prov. 31:28). Nga peʼ nga ni biʼniʼ xheelaʼ Katerina, hermana ni bizéʼtenu lu artículo ni gudiʼdiʼ que, para gucané laabe guni sentirbe risácabe. Dxi nahuiiniʼ Katerina, nabé biʼniʼ jñaa menu laa ne xcaadxi biaje bichaaga laabe né xcaadxi dxaapahuiiniʼ dede né ca xhamígabe. Ngue runi bizulú Katerina bichaaga laa né xcaadxi, neca maʼ biziidiʼ de Jehová. Peru huayacané xheelabe laabe gudxiilube guendanagana riʼ ne guiníʼ íquebe laaca risácabe. Katerina guníʼ: «Nadxii xheelaʼ naa, runi felicitar naa pur ca cosa galán ni runeʼ ne runi orar pur naa. Laaca rusietenaláʼdxibe naa ca cualidad sicarú ni napa Jehová ne racanebe naa cadi guiníʼ iqueʼ cosa ni cadi jneza».

9, 10. ¿Ximodo gucané ca ancianu ti hermana ni bichaaga laa né xcaadxi binni?

⁹ ¿Ximodo zanda gacané ca ancianu ca hermanu ni ruchaaga laa né xcaadxi? Guidúʼyanu ni bizaaca ti hermana láʼ Hanuni, dxi nahuiinibe qué ñuni felicitárcabe laabe pur ca cosa galán ni bíʼnibe. Laabe guniʼbe: «Dxi nahuiineʼ gucaʼ ti binni natuíʼ ne guníʼ iqueʼ jma nanna xcaadxi xcuidi que naa. Dede ra reedasilú naa la? siempre ruchaagaʼ naa né xcaadxi binni». Neca maʼ testigu stiʼ Jehová Hanuni la? bichaagaruʼ laa né xcaadxi, ne nga bicaa laabe guni sentirbe huaxiéʼ risaca guiráʼ ni  rúnibe ndaaniʼ congregación. Peru yanna guizáʼ nayecheʼ rúnibe dxiiñaʼ casi precursora. ¿Xi gucané laabe guchaabe?

¹⁰ Hanuni guníʼ nabé gucané ca ancianu laa. Gúdxicaʼ laabe nabé risácabe ndaaniʼ congregación ne nácabe ti ejemplu galán para ca hermanu. Hanuni guníʼ: «Guyuu biaje, gunabaʼ ca ancianu naa cuaaʼ gana caadxi hermana ni caquiiñeʼ gacanécabe laa. Ngue bicaa naa guiníʼ iqueʼ risacaʼ ndaaniʼ congregación. Rietenalaʼdxeʼ bidii ca ancianu xquixe peʼ naa pur gucaniáʼ caadxi hermana joven ne biindanécabe naa 1 Tesalonicenses 1:2, 3. Yendá textu que ndaaniʼ ladxiduáʼ. Pur guca ca ancianu que nachaʼhui né naa, yanna maʼ rudieeʼ cuenta risacaʼ ndaaniʼ xquidxi Jehová».

11. ¿Ximodo zanda gacanenu ca ni cayacaná ladxidóʼ ni riete lu Isaías 57:15?

¹¹ (Biindaʼ Isaías 57:15). Rizaalaʼdxiʼ Jehová ca binni ni cayacaná ladxidóʼ. Cadi ca ancianu si, de guiranu nga zanda cuʼnu gana ca hermanu ni cayuni sentir zacá. Ti modo zanda gúninu ni nga ra guizaaláʼdxinu laacabe de guidubi ladxidoʼno. Riquiiñeʼ Jehová laanu para gusihuinni pabiáʼ nadxii ca dendxuʼ stiʼ (Prov. 19:17). Sti modo zanda gacanenu ca hermanu nga ra gácanu humilde ne cadi guni presumirnu ca cosa ni nánnanu gúninu. Cadi jneza gusisaca xcaadxi laanu purtiʼ qué racaláʼdxinu gápacabe envidia laanu. Ni racaláʼdxinu nga pur ni guininu ne ni gúninu gacaneni xcaadxi hermanu (1 Ped. 4:10, 11).

12. ¿Xiñee guyuulaʼdxiʼ binni humilde chuʼ gaxha de Jesús? (Biiyaʼ imagen ni zeeda lu portada).

¹² Zanda guizíʼdinu ximodo guni tratarnu xcaadxi ra guidúʼyanu modo biʼniʼ tratar Jesús ca discípulo stiʼ. Neca guca Jesús hombre jma risaca ni huabani lu Guidxilayú, gúcabe «ti binni nadóʼ ne dxandíʼ humilde» (Mat. 11:28-30). Qué ñuni presumir diʼ Jesús nuu xpiaaniʼ ne nanna guni stale cosa. Qué niquiiñebe diidxaʼ nagana ora bisiidibe ne biquiiñebe ejemplu ni runibiáʼ binni para chindabe ndaaniʼ ladxidoʼcaʼ (Luc. 10:21). Qué ñaca diʼ Jesús casi ca líder stiʼ ca religión ni naca orgulloso, sínuque gucanebe binni guni sentir nadxii Dios laacaʼ (Juan 6:37). Siempre biʼniʼ tratarbe binni né respetu.

13. ¿Xiñee nánnanu guca Jesús nachaʼhui ne biʼniʼ tratar ca discípulo stiʼ né guendarannaxhii?

¹³ Guca Jesús nachaʼhui ne biʼniʼ tratar ca discípulo stiʼ né guendarannaxhii. Gúnnabe xi zanda ne xi qué zanda guni cada discípulo stibe, ngue runi gadxé gadxé dxiiñaʼ bidiibe laacaʼ lu xhiiñaʼ Dios. Peru guyuu Jesús nayecheʼ pur dxiiñaʼ nadipaʼ ni biʼniʼ cada tobi de laacabe. Lu parábola de ca talentu que ridúʼyanu pabiáʼ biene Jesús ca discípulo stiʼ. Lu relatu que, guníʼ Jesús bisaanané ti hombre ca esclavu stiʼ dxiiñaʼ «biaʼ» ganda guni cada tobi de laacaʼ. De lade guiropaʼ esclavu ni biʼniʼ cumplir dxiiñaʼ gucuaa la? guyuu tobi ni biʼniʼ ganar jma que stobi, peru ngueca gudxi xpixuaanacabe laacabe: «¡Biaʼsi ni bíʼniluʼ, mozo chaʼhuiʼ ne ni runi jneza!» (Mat. 25:14-23).

14. ¿Ximodo zanda chinándanu ejemplu stiʼ Jesús ora guni tratarnu xcaadxi?

¹⁴ Laaca nachaʼhui Jesús ne runi tratar laanu né guendarannaxhii. Nánnabe xi cosa zanda gúninu ne xi qué zanda gúninu ne riéchebe ora rúninu biaʼ gándatiʼ lu xhiiñaʼ Dios. ¿Ximodo zanda chinándanu ejemplu stiʼ Jesús? Qué racaláʼdxinu gucaʼnu ti hermanu guiníʼ ique qué risaca  purtiʼ qué runi biaʼ runi xcaadxi hermanu, sínuque siempre guni felicitarnu ca hermanu pur stipa ni cayúnicaʼ pur gúnicaʼ xhiiñaʼ Jehová.

15, 16. ¿Xi guleendú ti hermana pur gudixhe ique meta ni zanda ugaanda?

¹⁵ Ribáninu nayecheʼ ora riguixhe íquenu ugaandanu xiixa meta lu xhiiñaʼ Jehová. Cadi quixhe íquenu ugaandanu meta stiʼ sti hermanu, sínuque guyúbinu ugaandanu meta ni zanda ugaandanu. Purtiʼ pa quixhe íquenu ugaandanu meta stiʼ stobi la? Zareʼnu gana (Luc. 14:28). Guidúʼyanu ni bizaaca ti precursora láʼ Midori.

¹⁶ Dxi nahuiiniʼ Midori, bisituí bixhózebe, ni cadi naca Testigu, lube ora bichaaga laabe né ca bizáʼnabe ne ca xcompañérube de scuela, laabe guniʼbe: «Bineʼ sentir qué risacaʼ». Gudiʼdiʼ si tiempu bisaana de guiníʼ íquebe maʼ qué risácabe. Sicaríʼ guníʼ Midori: «Ruundaʼ Biblia purtiʼ riguixhedxí ni ladxiduáʼ ne racané ni naa guneʼ sentir nadxii Jehová naa». Gudixhe íquebe gápabe meta ni zanda ugaandabe ne gunábabe Jehová gacané laabe ugaandabe ca ni. Ngue gucané laabe chuʼbe nayecheʼ pur ca cosa ni zanda gúnibe lu xhiiñaʼ Jehová.

17. ¿Ximodo zanda guchaʼnu modo riníʼ íquenu ne xi zabeendunu?

¹⁷ Zadiʼdiʼ tiempu para gusaana de guiníʼ íquenu ne guni sentirnu huaxiéʼ risácanu. Nga runi cudii Jehová laanu conseju riʼ: «Laguchaa modo riníʼ íquetu» (Efes. 4:23, 24). Para ganda gúninu ni la? naquiiñeʼ guni orarnu, guni estudiarnu Stiidxaʼ Dios ne guiníʼ íquenu ni cadúʼndanu. Cadi gusaana de gúninu ca cosa riʼ ne guinábanu Jehová gudii stipa laanu. Zacané  espíritu santu stiʼ Jehová laanu para maʼ cadi guchaaganu laanu xcaadxi. Zacané Jehová laanu para gudiʼnu cuenta pa cayácanu ti binni orgulloso o ni napa envidia ne zacanebe laanu para guchaʼnu.

18. ¿Ximodo riguixhedxí ca diidxaʼ ni cá lu 2 Crónicas 6:29, 30 ladxidoʼloʼ?

¹⁸ (Biindaʼ 2 Crónicas 6:29, 30). Nanna Jehová xi nuu ndaaniʼ ladxidoʼno. Laaca nanna Jehová cudxíʼlunu modo riníʼ ique binni guidxilayú ne nácanu binni ruchee. Ora ruuyaʼ Jehová cudxíʼlunu ca guendanagana riʼ la? jmaruʼ si rannaxhiibe laanu.

19. ¿Xi ejemplu riquiiñeʼ Jehová para gusihuinni nadxii laanu?

¹⁹ Nadxii Jehová laanu cásica nadxii ti gunaa baʼduhuiiniʼ stiʼ (Is. 49:15). Ti gunaa láʼ Rachel guníʼ: «Gule xiiñeʼ Stephanie ante guizaa beeu stiʼ. Primé biaje biiyaʼ laabe nabiúxebe ne qué gápabe stipa... Guyuube ti beeu ndaaniʼ incubadora, peru bidii doctor que lugar guicaaʼ laabe guiráʼ dxi. Ne pur ngue guizáʼ gunnaxhieeʼ xiiñeʼ. Yanna maʼ nápabe xhoopaʼ iza ne jma nabiúxebe que caadxi xcuidi de biaʼ xhízabe, peru nadxieeʼ laabe de guidubi ladxiduáʼ purtiʼ bidxiilube para guibánibe. Guizáʼ nayecheʼ huaguube naa». Ora ruuyaʼ Jehová guirá stipa ni rúninu pur guninu ni ná la? Laaca guizáʼ rannaxhiibe laanu. ¿Cadi dxandíʼ riguixhedxí nga ladxidoʼno la?

20. ¿Xiñee zanda chuʼnu nayecheʼ?

²⁰ Guizáʼ risácaluʼ ndaaniʼ xquidxi Jehová ne gástiruʼ stobi casi lii. Cadi bichiña Jehová laanu ra nuu purtiʼ si jma nánnanu que xcaadxi, sínuque biiyabe xi nuu ndaaniʼ ladxidoʼno, biiyabe nácanu ti binni nadóʼ ne humilde ne nuunu dispuestu gusiidibe laanu ne guchaʼnu (Sal. 25:9). Nanna dxíchinu riecheʼ Jehová ora rúninu biaʼ gándatiʼ lu xhiiñaʼ. Rusihuínninu nayá ladxidoʼno ora runi huantarnu ne qué rixélenu de Jehová (Luc. 8:15). Nga runi, cadi gusaana de gúninu biaʼ gándatiʼ lu xhiiñaʼ Dios. Pa guninu ni, ziuʼnu nayecheʼ pur ca cosa ni gúninu.