«Ora bizulú xprimuaʼ cadindené naa la? gunaazeʼ bá yánnibe, rabeʼ nuteeguaʼ neza bi stibe ne ñuuteʼ laabe» (Paul).

«Ra lidxeʼ la? gastiʼ si maca cadxiicheʼ. Rulaanaʼyaʼ mueble ne dé runeʼ juguete... ne intiica cosa naazeʼ» (Marco).

Zándaca qué ridxiichinu modo ridxiichi ca binni riʼ. Peru nuu biaje raca nagana gucueezanu laca laanu. ¿Xiñee yaʼ? Pur pecadu bisaanané Adán laanu jma nga ruyúbinu gúninu ni cadi jneza (Rom. 5:12). Nuu binni, casi Paul ne Marco, raca nagana para laacaʼ gucueezacaʼ laacaʼ. Ne xcaadxi la? runi stipa guni controlar ca dxiibi stiʼ o ni ribee gana laa. Ne nuu tu laa raca nagana para laa gucueeza deseu de guni cometer pecadu sexual, xhudxi o cuba droga.

Ca ni qué rucueeza ni riníʼ ique, ca deseu stiʼ ne ca ni runi la? zanda guninacaʼ laca laacaʼ. ¿Xi zanda gúninu para cadi guizaacanu ndiʼ yaʼ? Caquiiñeʼ gánnanu gucueezanu laca laanu. Para ganda gúninu ni la? guicábinu chonna pregunta. Primé, ¿xii nga gucueeza tobi laca laa? Guiropa, ¿xiñee risaca gucueezanu laca laanu? Ne guionna, ¿xi caquiiñeʼ gúninu para gápanu «cualidad stiʼ espíritu» riʼ? (Gál. 5:22, 23). Despué zadúʼyanu xi caquiiñeʼ guni cada tobi de laanu pa nuu biaje raca nagana gucueezanu laca laanu.

Ti binni ni rucueeza laca laa la? cadi casi zeʼ runi xiixa. Sínuque rucueeza laa para cadi guiníʼ o guni xiixa ni qué riuulaʼdxiʼ Dios.

Pur ca ni biʼniʼ Jesús, bisihuinni xii nga gucueeza tobi laca laa. Biblia ná: «Ora guluudícabe laabe la? qué niguudibe laacaʼ. Ne ora bininácabe laabe la? qué ñuni amenazarbe laacaʼ, sínuque gúpabe confianza Juez ni runi juzgar jneza» (1 Ped. 2:23). Bisihuinni Xiiñiʼ Dios cualidad riʼ dxi cá lu yaga ne cayuni burla ca enemigu stiʼ laa (Mat. 27:39-44). Laaca bisihuínnibe ni dxi gucalaʼdxiʼ ca xaíque yuʼduʼ nusábacaʼ laabe pur ni guiniʼbe (Mat. 22:15-22). Ne guizáʼ galán ejemplu bisaanabe dxi gundisaʼ ti grupu de judíu guié para gundaacaʼ laabe. Lugar de nucaalube laacaʼ la? «bicaachilube ne bireebe ndaaniʼ templu que» (Juan 8:57-59).

¿Ñee zanda chinándanu ejemplu stiʼ Jesús la? Zanda pue, peru biaʼ nuu lu nanu. Sicaríʼ bicaa apóstol Pedro: «Cristu biʼniʼ sufrir pur laatu ne gudixhe ti ejemplu para chinándatu ni casi peʼ modo gudixhe ni» (1 Ped. 2:21). Neca imperfectu laanu, zanda chinándanu ejemplu stiʼ Jesús dede ra gándatiʼ. ¿Xiñee nabé risaca gúninu ni yaʼ?

Pa racaláʼdxinu gusiéchenu Jehová, caquiiñeʼ gucueezanu laca laanu. Neca maʼ stale iza de  rúninu ni nabe la? zanda gusaana de gaca xhamígunu laabe pa qué gucueezanu ni rininu ne ni rúninu.

Guidúʼyanu ejemplu stiʼ Moisés, tiempu bibánibe laabe nga hombre jma nadóʼ «lade guiráʼ ca hombre ni guyuu lu guidxilayú» (Núm. 12:3). Stale iza biʼniʼ huantarbe né stale paciencia queja stiʼ ca israelita. Peru ti dxi qué nucueezabe laca laabe ne bidxiichinebe laacaʼ purtiʼ biguetaʼ guca quejarcaʼ gastiʼ nisa. Naduxhuʼ gúdxibe laacaʼ: «¡Binni qué ruzuubaʼ diidxaʼ, lagucaadiaga! ¿Ñee de lu guié riʼ nga caquiiñeʼ cueedu nisa para laatu la?» (Núm. 20:2-11).

Qué nucueeza Moisés laca laa. Qué nusisácabe Jehová pur milagru ni biʼniʼ ora bidii nisa laacabe (Sal. 106:32, 33). Ngue runi, qué nudii Jehová lugar ñuube lu Tierra Prometida (Núm. 20:12). Ne nanna dxíchinu biaʼ dxi bibánibe guca arrepentirbe pur ni bíʼnibe que (Deut. 3:23-27).

¿Xi rizíʼdinu de ni bizaaca Moisés? Neca maʼ stale iza nápanu ndaaniʼ xquidxi Dios la? naquiiñeʼ guinínenu né respetu ca ni guchiichi laanu o tuuxa ni caquiiñeʼ uguu jnézacabe laa (Efes. 4:32; Col. 3:12). Dxandíʼ nga ora maʼ ziniisi binni maʼ huaxiéʼ paciencia rapa. Peru cadi guiaandaʼ laanu ni bizaaca Moisés. Qué racaláʼdxinu gusaana de gaca xhamígunu Jehová purtiʼ qué nucueezanu laca laanu. Peru ¿ximodo zanda guni cultivarnu cualidad risaca riʼ yaʼ?

Guinábanu espíritu santu ora guni orarnu. ¿Xiñee caquiiñeʼ guinábanu ni yaʼ? Purtiʼ ti cualidad stiʼ espíritu stiʼ Dios nga gucueeza tobi laca laa, ne rudiibe espíritu riʼ ca ni guinabaʼ ni laabe (Luc. 11:13). Riquiiñeʼ Jehová espíritu stiʼ para gacané laanu gusihuínninu cualidad riʼ (Filip. 4:13). Laaca zanda gacaneni laanu gápanu xcaadxi cualidad stiʼ espíritu, casi guendarannaxhii, ni jmaruʼ si zacané laanu gucueezanu laca laanu (1 Cor. 13:5).

Gucáʼnanu intiica cosa ni zanda gucaa laanu cadi gucueezanu laca laanu. Lade ca cosa riʼ nuu gucáʼnanu ca sitiu ni nuu lu Internet ne ca entretenimientu ni rucaa binni guni cosa malu (Efes. 5:3, 4). Ne naquiiñeʼ guixélenu de intiica cosa ni gucaa laanu gúninu cosa ni cadi jneza (Prov. 22:3; 1 Cor. 6:12). Guzéʼtenu ti ejemplu, ti binni ni raca nagana gucueeza  laa de guni cometer ti pecadu inmoral, zándaca cadi naquiiñeʼ guʼndaʼ o guuyaʼ película romántica.

Zándaca gaca nagana para laanu chinándanu ca conseju riʼ. Peru pa gúninu ni raca caber laanu, zudii Jehová stipa laanu para gucueezanu laca laanu (2 Ped. 1:5-8). Zacanebe laanu gucueezanu ni riníʼ íquenu, ni rininu ne ca ni rúninu. Casi Paul ne Marco, ni bizéʼtenu ra bizulú artículo riʼ, gunda bicueezacaʼ laca laacaʼ. Guzéʼtenu ni bizaaca ti hermanu nabé ridxiichi ora maʼ zigusá carru. Dede ridinde diidxanebe xcaadxi binni ni zigusá carru. ¿Xi bíʼnibe para bichaabe yaʼ? Laabe guniʼbe: «Guiráʼ dxi runeʼ orar né guiráʼ stipa stinneʼ. Bineʼ estudiar artículo ni caníʼ de gucueeza tobi laca laa ne biziideʼ textu ni zanda gacané naa de memoria. Neca maʼ stale iza de cudxieeluáʼ ni la? cada dxi riguixhe iqueʼ gucueeza laca naa ne huayacané ni naa. Ne ora chaaʼ paxaraa la? rireeʼ ante para cadi guidxiicheʼ neza».

Ziuu ora zaca nagana para laanu gucueezanu laca laanu. Ne ora guizaacanu ndiʼ la? zándaca guiníʼ íquenu maʼ qué runi merecernu gucaadiaga Dios ca oración stinu. Peru óraca nga jma caquiiñeʼ guni orarnu. Ne gúninu ni nagueenda. Guinábanu Jehová guni perdonar laanu, gacanebe laanu ne quixhe íquenu gucueezanu laca laanu para cadi guibiguetaʼ gucheʼnu (Sal. 51:9-11). Qué zucaanabe ca oración stinu pa guinábanu laabe guiabe laanu (Sal. 102:17). Apóstol Juan rusietenalaʼdxiʼ laanu «rusiá rini stiʼ Jesús», Xiiñiʼ Dios, «guiráʼ pecadu stinu» (1 Juan 1:7; 2:1; Sal. 86:5). Cadi guiaandaʼ laanu rinabaʼ Jehová laanu guni perdonarnu stale biaje. Pa gúninu ni la? zanda chuʼnu seguru zuni perdonarbe laanu (Mat. 18:21, 22; Col. 3:13).

Qué ñuulaʼdxiʼ Jehová ora biʼyaʼ qué nucueeza Moisés laca laa lu desiertu que. Peru biʼniʼ perdonar laabe. Ne Stiidxaʼ Dios ná nácabe ti hombre ni nabé gupa fe Dios ne zanda chinándanu ejemplu stiʼ (Deut. 34:10; Heb. 11:24-28). Neca qué niná Jehová ñuube lu Tierra Prometida, peru zudii lugar guibánibe lu Paraísu ni maʼ cadi candaa gueeda ne zudii lugar guibánibe para siempre. Laanu laaca zanda guicaanu ndaayaʼ ca pa gúninu stipa pur gucueezanu laca laanu (1 Cor. 9:25).