1. Casi ná Salmo 18:​46, ¿xi guníʼ David naca Jehová?

 NABÉ nagueenda cuchaa guiráʼ ni cayaca lu guidxilayú riʼ ne zándaca guizaaca xiixa ni guchaa guendanabani stinu. ¡Peru ratadxí ladxidoʼno gánnanu zanda guinábanu Jehová gacané laanu! Lu artículo ni gudídinu ca bizíʼdinu Jehová nga Dios ni nabani ne nuube listu para gacanebe laanu. Cada biaje gacanebe laanu, jmaruʼ si riuʼnu seguru «nabani Jehová», casi peʼ guníʼ David ni lu Salmo 18:46 (biindaʼ ni). Peru despué de guníʼ David ca diidxaʼ ca, guniʼbe Jehová nga Guié naroʼbaʼ stibe. ¿Xiñee bichaaga David Dios ni nabani né ti guié ni qué gapa guendanabani yaʼ?

2. ¿Xi zazíʼdinu lu artículo riʼ?

² Lu artículo riʼ zusiénenu xiñee naca Jehová casi ti guié ne xi rusiidini laanu. Laaca zazíʼdinu ximodo zanda gaca Jehová ti Guié naroʼbaʼ para laanu. Ne laaca zuzéʼtenu chupa chonna cosa ra zanda gusihuínninu ca cualidad stiʼ Jehová.

XIÑEE RINÍʼ BIBLIA NACA JEHOVÁ CASI TI GUIÉ

3. ¿Xiñee riníʼ Biblia naca Jehová casi ti guié? (Biiyaʼ imagen ni zeeda lu portada).

³ Ruzeeteʼ Biblia naca Jehová casi ti guié para gacaneni laanu guidúʼyanu caadxi de ca cualidad ni nápabe. Ora ridúʼndanu Biblia ridúʼyanu nabé bisisaca ca xpinni Jehová laa pur ca cualidad sicarú stiʼ ne bizeetecabe nácabe casi ti guié naroʼbaʼ. Primé textu ra riete naca Jehová «Guié» naroʼbaʼ nga lu Deuteronomio 32:4. Dxi biʼniʼ Ana ti oración, guniʼbe: «Gastiʼ stobi casi lii. Dios stidu, lii si nga nácaluʼ casi ti guié naroʼbaʼ» (1 Sam. 2:2). Habacuc guníʼ Jehová nga «Guié naroʼbaʼ» stiʼ (Hab. 1:12). Ne hombre ni bicaa Salmo 73 bisiene naca Jehová ti guié naroʼbaʼ stiʼ ladxidóʼ (Sal. 73:26). Ne Jehová peʼ guníʼ naca ti «Guié naroʼbaʼ» (Is. 44:8). Guidúʼyanu chonna cualidad ni rusihuinni nácabe casi ti guié naroʼbaʼ ne  guidúʼyanu ximodo zanda gácabe ti Guié naroʼbaʼ para laanu (Deut. 32:31).

4. ¿Xiñee zanda guininu Jehová nga ti lugar ra zanda guilanu? (Salmo 94:22).

⁴ Jehová nga ti lugar ra zanda guilanu. Ora cayaba nisaguié ne cundubi ti bi nadipaʼ, zanda chuʼ ti binni ndaaniʼ ti cueva para guilá o xaʼnaʼ ti guié naroʼbaʼ. Zaqueca nga laanu, ora guidxaagalunu caadxi guendanagana nadipaʼ lu guendanabani stinu, laaca zanda guyúbinu Jehová para guilanu ra nuu (biindaʼ Salmo 94:22). Rápabe laanu ne racanebe laanu para cadi guixélenu de laabe ne laaca maʼ biʼniʼ prometerbe laanu zedandá dxi zabeebe guiráʼ ni cayuniná laanu (Ezeq. 34:​25, 26).

5. ¿Xi zanda gúninu para gueeda gaca Jehová ti lugar ra zanda chuʼnu para cadi gacananu?

⁵ Zanda gueeda gaca Jehová ti lugar ra chuʼnu para cadi gacananu. ¿Ximodo yaʼ? Laani nga ora guni orarnu laabe. Ora runi orarnu, rudii Dios laanu «paz stiʼ», ne laani nga rápani ladxidoʼno ne xquendabiaaninu (Filip. 4:​6, 7). Guidúʼyanu ni bizaaca Artiom, ti hermanu stinu ni biseguyoocabe pur naca xpinni Jehová. Stale biaje gudindené ti hombre runi xhiiñaʼ gobiernu laabe ne nabé bisituí lube. Sicaríʼ guníʼ Artiom: «Cada biaje gacalaʼdxiʼ hombre que cuee diidxaʼ naa, guizáʼ ridxibeʼ. [ . . . ] Ngue runi siempre rinabaʼ Jehová quixhedxí ladxiduáʼ ne gudii naa guendabiaaniʼ. Qué lica nucheeniáʼ Jehová neca gudixhe hombre que jma trampa nezaluáʼ [ . . . ]. Gupa Jehová naa, casi ñaca ñuaaʼ deche ti barda de guié».

6. ¿Xiñee zanda gápanu confianza Jehová? (Isaías 26:​3, 4).

⁶ Zanda gápanu confianza Jehová. Cásica qué riniibi ti guié naroʼbaʼ o ti dani de ra nuu, zanda chuʼnu seguru siempre ziuu Jehová listu para gacané laanu, casi ñaca qué riniibibe de ra nuube. Zanda gápanu confianza laabe purtiʼ nácabe «Guié naroʼbaʼ» ni qué ziuu dxi guinitilú (biindaʼ Isaías 26:​3, 4). Cumu nabani Jehová para siempre la? nga runi zanda guni cumplirbe guiráʼ ni maʼ guniʼbe, zucaadiágabe ca oración stinu ne zacanebe laanu ora caquíʼñenu ni. Laaca nápanu confianza laabe purtiʼ qué rusaanabe ca xpínnibe (2 Sam. 22:26). Laaca qué ziuu dxi gusiaandabe ca cosa galán ni rúninu pur stobi ne zaguíxebe laanu (Heb. 6:10; 11:6).

7. ¿Xi ribeendunu ora rápanu confianza Jehová? (Biiyaʼ imagen ca).

⁷ Sti modo rusihuínninu naca Jehová ti Guié naroʼbaʼ para laanu nga ora rápanu confianza laabe. Ne nánnanu zabeendunu ni galán pa guzúʼbanu stiidxabe neca cadídinu lu guendanagana (Is. 48:​17, 18). Ne cada biaje guidúʼyanu ximodo racanebe laanu riroobaʼ confianza ni nápanu laabe. Ne zacá ziuʼnu listu ora guidxaagalunu intiica guendanagana naroʼbaʼ ni Jehová si zanda gacané laanu tídinu. Nuu biaje Jehová si zanda gacané laanu ora cadídinu lu ti guendanagana, ne ora ca nga rudiʼnu cuenta nuucaʼ Jehová listu para gacané laanu ne qué ziuu dxi gusaanabe laanu. Ti hermanu láʼ Vladímir guníʼ: «Tiempu  biseguyoocabe naa nga bineʼ sentir nuaaʼ jma gaxha de Dios. Raqué nga biziideʼ gapaʼ jma confianza Jehová purtiʼ stubeʼ nuaaʼ ne gastiʼ zanda guneʼ para gaca chaahuiʼ guendanagana stinneʼ que».

8. a) ¿Xiñee zanda guininu qué ruchaa Jehová? b) ¿Xiñee galán guidúʼyanu Jehová casi ti Guié naroʼbaʼ? (Salmo 62:​6, 7).

⁸ Qué ruchaa Jehová. Cásica qué zanda guiniibi ti guié naroʼbaʼ o guchaa ti dani de lugar, zacaca nga Jehová, qué ziuu dxi guchaabe. Qué ruchaa Jehová modo laa ne laaca qué ruchaabe ni maʼ naguixhe íquebe gúnibe (Mal. 3:6). Dxi bicheené Adán ne Eva Jehová, qué nuchaadibe ni naguixhe íquebe gúnibe para binni guidxilayú. Ne apóstol Pablo guníʼ naca Jehová ti Dios ni «qué ruchaa ni maʼ guníʼ» (2 Tim. 2:13). Ndiʼ riníʼ, intiica si guizaaca qué ziuu dxi guchaa Jehová modo naca nin ni maʼ gudixhe ique guníʼ ne laaca qué zuchaabe ca ley stibe. Ne ora gánnanu ndiʼ, zacaneni laanu gápanu confianza ora guidxaagalunu guendanagana ne gápanu confianza zuni cumplirbe guiráʼ ni maʼ biʼniʼ prometerbe (biindaʼ Salmo 62:​6, 7).

9. ¿Xi rusiidiʼ ni bizaaca Tatiana lii?

⁹ Stiʼ cosa ni zacané laanu guidúʼyanu Jehová casi ti guié ni zanda gápanu confianza nga guietenaláʼdxinu ca cualidad ni nápabe ne ni naguixhe íquebe gúnibe. Zanda gacané ndiʼ laanu para cadi guireʼnu gana ne cadi guchéʼnenu Jehová ora cadídinu lu guendanagana (Sal. 16:8). Nga nga ni bizaaca Tatiana, ti hermana ni biseguyoocabe laa ra lidxi pur naca xpinni Cristu, sicaríʼ guniʼbe: «Biʼniʼ obligárcabe naa chuaaʼ stubeʼ. [ . . . ] Nacubigá que, guizáʼ nagana gúcani para naa ne nuu tiru nabé riuaaʼ triste». Peru bizulú guníʼ ique hermana riʼ xi naguixhe ique Jehová guni para binni guidxilayú ne bidiibe cuenta guizáʼ risaca nga cadi guireebe gana ne gudxiilube guendanagana que. Ngue nga gucané laabe para gutadxí ladxidoʼbe ne bidiini laabe stipa para cadi gucheenebe Jehová. Sicaríʼ guniʼbe: «Sti cosa ni gucané naa cadi tan guiníʼ iqueʼ ni cazaacaʼ que nga guietenalaʼdxeʼ cadideʼ lu guendanagana que purtiʼ nadxieeʼ Jehová ne purtiʼ racalaʼdxeʼ guneʼ ni riuuláʼdxibe».

10. ¿Xi caquiiñeʼ gúninu dede yanna para guidúʼyanu Jehová casi Guié naroʼbaʼ stinu?

¹⁰ Maʼ cadi candaa zadxaagalunu stale guendanagana ne óraca nga jma caquiiñeʼ gusihuínninu nápanu confianza Jehová. Nga runi dede ca yanna nga caquiiñeʼ guni crenu siempre zudii Jehová laanu ni caquíʼñenu para guni huantarnu ca guendanagana ni guidxaagalunu ne cadi guchéʼnenu laabe. ¿Ximodo zanda gúninu ni yaʼ? Guidúʼndanu ca relatu zeeda lu Biblia ne ca experiencia stiʼ ca hermanu. Ne guiníʼ íquenu ximodo maʼ bisihuinni Jehová naca ti guié naroʼbaʼ para ca xpinni. Zanda gacané ndiʼ laanu para guidúʼyanu Jehová casi Guié naroʼbaʼ stinu.

 GUSIHUÍNNINU CA CUALIDAD STIʼ JEHOVÁ

11. ¿Xiñee galán nga gusihuínninu ca cualidad stiʼ Jehová? (Biiyaʼ cuadru ni láʼ « Ti meta ni zanda ugaanda ca hermanu joven»).

¹¹ Maʼ bidúʼyanu caadxi cualidad stiʼ Jehová ni rusihuinni nácabe casi ti guié. Yanna guidúʼyanu ximodo zanda gusihuínninu cani. Ora jma gúninu stipa gácanu casi laabe, jma zanda gacanenu ca hermanu ni nuu ndaaniʼ congregación. Guzéʼtenu ti ejemplu, gulee lá Jesús Simón, Cefas (ni raca traducir Pedro ne riniʼni «guié») (Juan 1:42). Zaqué nga casi ñaca niníʼ Jesús zaguixhedxí Pedro ladxidóʼ ca hermanu de congregación ne zacanebe laacaʼ iguidxi fe sticaʼ. Biblia laaca ruzeeteʼ naca ca ancianu casi bandáʼ stiʼ ti guié naroʼbaʼ ra zanda guilá ca hermanu de congregación (Is. 32:2). Guiranu nga zanda gusihuínninu ca cualidad ni napa Jehová ne gácanu casi ti guié naroʼbaʼ ni zanda gacané ca hermanu iguidxi fe sticaʼ (Efes. 5:1).

12. ¿Xi zanda gúninu para gácanu ti lugar ra zanda guilá ca hermanu stinu?

¹² Gácanu ti lugar ra zanda guilá ca hermanu stinu. Pa cadxagalú ca hermanu stinu ti guendanagana casi ti desastre natural o guerra, zanda guidxaagalunu laacabe ra lídxinu. Lu ca «últimu dxi» riʼ, mientra zidiʼdiʼ dxi jma nagana ziyaca xquendanabani binni. Nga runi jma zápanu oportunidad de gacanésaanu (2 Tim. 3:1). Sti modo ra zanda gácanu ti lugar ra zanda guilá ca hermanu stinu nga ra quixhedxinu ladxidóʼcabe ne guni sentírcabe dxandíʼ nadxiinu laacabe. Né stale cariñu zanda guidxaagalunu ca hermanu stinu ra yoo stiʼ Reinu ne zacá guni sentírcabe nadxiinu laacabe ne chúʼcabe nayecheʼ ndaaniʼ congregación. Nabáninu ndaaniʼ ti guidxilayú ra nabé runi tratárcabe binni mal ne maʼ gastiʼ guendarannaxhii. Nga runi ora gueeda ca hermanu ne ca hermana stinu ra reunión, racaláʼdxinu guni  sentírcabe nuucabe ndaaniʼ ti lugar seguru ne nuu tu nadxii laacabe.

13. ¿Ximodo zanda gaca ca ancianu ti lugar ra zanda guilá ca hermanu? (Biiyaʼ imagen ca).

¹³ Ca ancianu ca zanda gácacaʼ ti lugar ra zanda guilá ca hermanu ni cadiʼdiʼ lu guendanagana. Casi ora guizaaca xiixa desastre natural o xiixa emergencia, nagueendaca ruyúbicabe modo gacanécabe ca hermanu ne laaca riguucabe gana laacaʼ para chuʼcaʼ gaxha de Jehová. Pa nanna ca hermanu nabé nachaʼhuiʼ ti ancianu, riuu xlugar stobi ne nuu listu para gucaadiaga la? qué zaca nagana para laacaʼ guidxíñacaʼ laabe ne guinábacaʼ laabe gacanebe laacaʼ. Racané ca cualidad riʼ ca hermanu para guni sentircaʼ nadxiicabe laacaʼ ne qué raca nagana para laacaʼ chinándacaʼ xiixa conseju ni gudii ca ancianu laacaʼ de lu Biblia (1 Tes. 2:​7, 8, 11).

14. ¿Ximodo zanda gusihuínninu zanda gápacabe confianza laanu?

¹⁴ Gácanu ti binni ni zanda gápacabe confianza. Guiranu racaláʼdxinu ganna ca hermanu stinu zanda gápacaʼ confianza laanu, jmaruʼ si ora cadíʼdicaʼ lu guendanagana (Prov. 17:17). ¿Xi zanda gúninu para gápacabe confianza laanu yaʼ? Zanda gúninu stipa pur gusihuínninu ca cualidad stiʼ Jehová guiráʼ dxi. Casi, guni cumplirnu ni maʼ biʼniʼ prometernu ne gácanu puntual (Mat. 5:37). Laaca zanda gaca ofrecernu para gacanenu tuuxa ni caquiiñeʼ gacanécabe laa, ne pa gudiicabe laanu ti dxiiñaʼ, galán gúninu ni modo peʼ gunábacabe laanu gúninu ni.

15. ¿Xi ribeendú ca hermanu de congregación ora nápacaʼ confianza ca ancianu?

¹⁵ Galán ni ribeendú ca hermanu de congregación ora nápacaʼ confianza ca ancianu. Ora napa ca publicador confianza ancianu  de grupu sticaʼ ne riníʼnecaʼ laabe ora caquiiñecaʼ tu gacané laacaʼ runi sentircaʼ maʼ qué riuupecaʼ xizaa. Ora nuu ca ancianu ca listu para gacanecaʼ ca hermanu runi sentírcabe nadxii ca ancianu ca laacabe. Ora rudii ca ancianu conseju ca hermanu ni zeeda lu Biblia ne lu ca publicación ni rudii mozo ni nuu xpiaaniʼ lugar de ni riníʼ íquesicaʼ racané ni ca hermanu para gápacaʼ jma confianza laacabe. Laaca qué rábicabe xcaadxi ni gabi ti hermanu o ti hermana laacabe ne runi cumplírcabe ni maʼ guníʼcabe chigúnicabe.

16. Pa qué gusaana de gúninu ni jneza, ¿ximodo zanda gacaneni laanu ne gacaneni xcaadxi?

¹⁶ Cadi gusaanaluʼ de gúniluʼ ni jneza. Pa guzúʼbanu stiidxaʼ Jehová lu guiráʼ ni gabi laanu ne chinándanu ca principiu ni zeeda lu Biblia la? zácanu ti ejemplu galán para xcaadxi. Pa guni estudiarnu Biblia ne guquídxinu fe stinu, qué zusaananu Jehová ne siempre zinándanu ca ley stiʼ, zúninu ni jneza ne qué zinándanu modo riníʼ ique binni guidxilayú ne ca ni rusiidiʼ (Efes. 4:14; Sant. 1:​6-8). Racané fe ni nápanu Jehová ne ca promesa stiʼ laanu chuʼnu tranquilu ora gudiicabe laanu ti noticia ni cadi galán (Sal. 112:​7, 8). Ne laaca zanda gacanenu tuuxa ni zándaca cadiʼdiʼ lu guendanagana (1 Tes. 3:​2, 3).

17. ¿Xi runi ca ancianu ca para gacanecaʼ ca hermanu gaca fe sticaʼ naguidxi?

¹⁷ Ca ancianu ca naquiiñeʼ gapa xpiaʼcaʼ, guiníʼ íquecaʼ jneza, gácacaʼ binni riuu razón ne gácacaʼ ordenadu. Ora qué rixélecabe «de ni ná stiidxaʼ Dios» racanécabe congregación para gaca fe sticaʼ naguidxi (Tito 1:9; 1 Tim. 3:​1-3). Ora rudiicabe ti ejemplu galán ne rápacabe ca hermanu ca la? racaneni laacaʼ para cadi guiaadxacaʼ reunión, guni predicarcaʼ ne gápacaʼ estudiu personal sticaʼ. Ne ora ridxaagalú ca hermanu guendanagana ni runiná ne riguu laacaʼ triste, riguucabe ganna laacaʼ para cadi gusiaandacaʼ Jehová ne ca ni naguixhe íquebe gúnibe.

18. ¿Xiñee racaláʼdxinu gusisácanu Jehová ne guidxíñanu gaxha de laa? (Biiyaʼ cuadru ni láʼ « Ti modo zanda guidxíñanu Jehová»).

¹⁸ Despué de maʼ bidúʼyanu ca cualidad sicarú ni napa Jehová, runi sentirnu cásica biʼniʼ sentir David, laa guníʼ: «Guisaca Jehová Guié naroʼbaʼ stinneʼ» (Sal. 144:1). Jehová nga Dios ni siempre zanda gápanu confianza. Lu guidubi naca xquendanabáninu, dede né ora maʼ nagólanu, siempre zacanebe laanu chuʼnu gaxha de laabe. Nga runi zanda guininu né stale confianza: «Laabe nga Guié stinneʼ» (Sal. 92:​14, 15).