Zándaca tuuxa ni qué ñuundaʼ chaahuiʼ relatu riʼ guiníʼ ique pregunta ni bizéʼtenu riʼ. Peru ni dxandíʼ nga guyuu chupa binni ni biree lá Mefibóset; ne pa guiduʼndaʼ chaahuinu relatu riʼ la? zanda guizíʼdinu ti cosa nabé risaca.

Gupa Saúl, rey stiʼ guidxi Israel, gadxe xiiñiʼ hombre ne chupa baʼdudxaapaʼ. Primé xiiñibe nga Jonatán. Despué, gupanebe concubina stibe ni láʼ Rizpá, sti xiiñibe ni láʼ Mefibóset. Ne Jonatán gupa ti xiiñiʼ ni biree lá Mefibóset. Nga runi, cásica xiiñiʼ Saúl ne nietu stiʼ biree lacaʼ Mefibóset.

Yanna, ¿xiñee bidii David lugar guuticabe caadxi hombre yaʼ? Purtiʼ málasi bizulú rey Saúl gucananalaʼdxiʼ ca gabaonita ni nabeza lade ca israelita ne gucalaʼdxiʼ nunduuxeʼ laacabe, ne zándaca biitibe stale de laacaʼ. Cadi jneza ngue ni bíʼnibe, purtiʼ ca dxi bibani Josué, biʼniʼ ca jefe stiʼ ca israelita que ti pactu né ca gabaonita ne guniʼcaʼ qué zúnicaʼ gastiʼ laacabe (Jos. 9:3-27).

Caʼruʼ guixiá pactu ca tiempu bibani Saúl. Peru lugar de ninándabe ni la? gucaláʼdxibe nunduuxebe ca gabaonita. Ngue runi, guuniʼ donda ique Saúl ne familia stiʼ ra guti stale gabaonita (2 Sam. 21:1). Ne dxi maʼ guca David rey, gudxi ca gabaonita ni bilá que laabe xi bizaacacaʼ. Gunabadiidxaʼ David laacabe ximodo quixe ni biʼniʼ Saúl laacabe ti zacá uguu ndaayaʼ Jehová layú que. Qué ninábacabe bueltu, sínuque gunábacabe gatiʼ gadxe xiiñiʼ Saúl hombre, purtiʼ gucalaʼdxiʼ nunduuxeʼ laacabe (Núm. 35:30, 31). Ngue runi biʼniʼ David ni gunábacabe laa (2 Sam. 21:2-6).

Para tiempu que, maʼ guti Saúl ne Jonatán lu guerra. Peru nabániruʼ xiiñiʼ Jonatán ni láʼ Mefibóset. Nachiitaʼ ñeebe purtiʼ dxi nahuiinibe gúpabe ti accidente. Ne sin laabe guyuube dxi biiti bixhozebiidabe ca gabaonita. Biʼniʼ David ti pactu né Jonatán, ne rugaanda ni ca xiiñibe, dede né Mefibóset (1 Sam. 18:1; 20:42). Sicaríʼ ná relatu que biʼniʼ David: «Biá rey que Mefibóset, xiiñiʼ Jonatán, xiiñiʼ Saúl, pur juramentu biʼniʼ David né Jonatán […] nezalú Jehová» (2 Sam. 21:7).

Neca zaqué, biʼniʼ cumplir David ni gunabaʼ ca gabaonita que laa. Bidiibe laacaʼ chupa xiiñiʼ Saúl, tobi de laacabe nga Mefibóset, ne gaayuʼ nietu stiʼ Saúl (2 Sam. 21:8, 9). Zaqué nga bixhiá David maldición ni guyuu lu layú que pur guti ca gabaonita.

Rusiidiʼ relatu riʼ laanu ti cosa nabé risaca. Pa ñaca qué ñuni participar guiropaʼ xiiñiʼ Saúl ne ca gaayuʼ nietu stiʼ ra guti ca gabaonita, qué nudii Jehová lugar ñáticabe. Purtiʼ Ley stiʼ Dios que ná cadi naquiiñeʼ gatiʼ xiiñiʼ binni pur ni guni bixhoze ne jñaa. Ne laaca ruzeeteʼ ley que: «Cada binni naquiiñeʼ gatiʼ pur pecadu ni biʼniʼ» (Deut. 24:16). Ndiʼ racané laanu guiénenu laaca biʼniʼ participar guiropaʼ xiiñiʼ Saúl ne gaayuʼ nietu stiʼ ra gutiʼ ca gabaonita. Nga runi, gudíxecabe pur pecadu ni bíʼnicabe.

Yanna, ¿xi rizíʼdinu de relatu riʼ yaʼ? Guirutiʼ zanda guiníʼ biʼniʼ ti cosa malu purtiʼ si gúdxicabe laa gúnini, sínuque naquiiñeʼ gaca responsable pur ca cosa ni biʼniʼ. Sicaríʼ ná ti proverbio: «Bisiá neza stiluʼ, ne gastiʼ qué zazaacaluʼ lu ca neza stiluʼ. Cadi guireechuluʼ ladu derechu ne nin ladu bigaʼ. Bixeleʼ de ca cosa malu» (Prov. 4:24-27; Efes. 5:15).