1. ¿Xi ejemplu galán bisaana Jesús para ca discípulo stiʼ, ne xi bíʼnicaʼ? (Biiyaʼ imagen ni zeeda lu portada).

DXI guyuu Jesús ndaaniʼ Guidxilayú riʼ, biʼniʼ xhiiñaʼ Dios né stale guendanayecheʼ ne laaca ngaca racaláʼdxibe guni ca discípulo stibe (Juan 4:35, 36). Biaʼ dxi guyuu Jesús lade ca discípulo, biʼniʼ predicarcaʼ né stale gana (Luc. 10:1, 5-11, 17). Peru dxi gunaaze ne biiti binni maestru sticaʼ, bisaana de guni predicarcaʼ (Juan 16:32). Biasa si Jesús de lade gueʼtuʼ, guluu gana ca discípulo stiʼ quixhe íquecaʼ guni predicarcaʼ. Ne dxi maʼ nuube guibáʼ, biʼniʼ predicar ca discípulo stibe né stale gana dede guníʼ ca xhenemígucaʼ: «Maʼ nanna guidubi guidxi Jerusalén ni cusiiditu» (Hech. 5:28).

2. ¿Ximodo huaguu Jehová ndaayaʼ predicación?

² Gucané Jesús ca xpinni Cristu de primé siglu para guni predicarcaʼ ne cumu guluu Jehová ndaayaʼ dxiiñaʼ ni bíʼnicabe, ngue runi guca stale binni discípulo. Guzéʼtenu ti ejemplu, lu Pentecostés stiʼ iza 33 guyuunisa biaʼ 3,000 binni (Hech. 2:41). Ne ra zidiʼdiʼ tiempu, zidale ca discípulo (Hech. 6:7). Ne laaca guníʼ Jesús lu ca últimu dxi riʼ zucaadiaga stale binni ca noticia galán ne zácacaʼ discípulo (Juan 14:12; Hech. 1:8).

3, 4. a) ¿Xiñee raca nagana para caadxi hermanu guni predicar? b) ¿Xi zadúʼyanu lu artículo riʼ?

³ Guiranu rúninu stipa gúninu xhiiñaʼ Dios né guendanayecheʼ.  Ndaaniʼ caadxi guidxi stale binni racalaʼdxiʼ guni estudiar Biblia, dede nuu de ca binni ca naquiiñeʼ cuézacaʼ para chiganna ti Testigu laacaʼ. Peru ndaaniʼ xcaadxi guidxi nabé nagana rácani para ca publicador, purtiʼ huaxiéʼ ridxélacabe binni ra lidxi, ne ca ni ridxélacabe la? qué rinacaʼ guiziidicaʼ de Biblia.

⁴ Pa nabézanu ti lugar ra nabé nagana gaca predicar, ca cosa ni chiguzéʼtenu lu artículo riʼ zanda gacanécani laanu. Zadúʼyanu xi huayuni caadxi hermanu para guiníʼnecaʼ jma binni ne xiñee naquiiñeʼ gúninu xhiiñaʼ Dios né guendanayecheʼ neca qué naʼ binni gucaadiaga laanu.

5. ¿Xi guendanagana cadxaagalú stale Testigu?

⁵ Raca nagana para stale Testigu guni predicar purtiʼ qué ridxélacaʼ binni ra lidxi. Nuu binni nabeza ndaaniʼ edificiu o colonia ra nuu stale seguridad. Ne nápacaʼ tu cayapa entrada stiʼ ca lugar riʼ, nga runi cadi casi zeʼ tuuxa ziuu ndaaniʼ colonia o edificiu ca. Ne nuu hermanu runi predicar de yoo pur yoo, peru qué ridxélacaʼ binni. Laaca nuu publicador runi predicar ndaaniʼ ca guidxihuiiniʼ o ca lugar ni nuu zitu ra huaxiéʼ nabeza binni. Zándaca nuu publicador runi viajar zitu para guni predicar tuuxa binni peru ora rindacaʼ ra yoo ca guirutiʼ guinni. Pa cadídinu ca guendanagana ni bizéʼtenu riʼ, ¿xi zanda gúninu para cadi guireʼnu gana ne guni predicarnu jma binni yaʼ?

6. ¿Xiñee zeeda gaca predicación casi dxiiñaʼ ni runi ti pescador?

⁶ Bichaaga Jesús predicación né dxiiñaʼ ni runi ti pescador (Mar. 1:17). Ti pescador nuu biaje qué rinaaze nin ti benda, peru qué riree gana, ruchaa de hora, de lugar ne modo runi guuzeʼ. Laanu laaca zanda gúninu zacaca ora gúninu xhiiñaʼ Dios. Guzéʼtenu caadxi cosa ni zacané laanu.

7. ¿Xi zanda guizaaca pa guchaʼnu hora runi predicarnu?

⁷ Guchaʼnu de hora. Pa guchaʼnu de hora, zándaca jma zadxélanu binni ra lidxi para guni predicarnu laacaʼ. Purtiʼ neca riécabe dxiiñaʼ nuu ti hora maʼ nuucabe ra lídxicabe. Stale hermanu runi predicar huadxí o huaxhinni purtiʼ óraca jma ridxélacaʼ binni. Ne zándaca óraca maʼ caziilaʼdxiʼ binni ne zanda guinínenu laacaʼ. O zanda gúninu ni runi ti ancianu láʼ David. Despué de maʼ biʼniʼ predicarbe né compañeru stibe lu ti territorio, ribiguetaʼ ruxhidxi nácabe ca puertaʼ ra guirutiʼ qué niree. Sicaríʼ guniʼbe: «Guizáʼ ridxagayaaʼ panda binni riree ora ruxhidxinadu ra puertaʼ sticaʼ sti biaje». *

8. ¿Ximodo zanda chinándanu ni ná Eclesiastés 11:6 ora gúninu xhiiñaʼ Dios?

⁸ Textu stiʼ artículo riʼ rusietenaláʼdxini laanu cadi naquiiñeʼ guireʼnu gana (biindaʼ Eclesiastés 11:6). David, hermanu ni bizéʼtenu lu párrafo gudiʼdiʼ que, qué niree gana. Siempre ribiguetaʼ ruxhidxinabe ca yoo ra guirutiʼ niree, peru málasi ti dxi biree ti hombre ni bicaadiaga laabe ne sicaríʼ gudxi laabe: «Maʼ raca biaʼ xhono iza de nabezaʼ raríʼ ne ndiʼ nga primé biaje guinieniáʼ ti testigu stiʼ Jehová ra puertaʼ lidxeʼ». Sicaríʼ bisiene David: «Ora rúniluʼ stipa guidxélaluʼ binni, stale de laacabe rucaadiágacabe mensaje ni zineluʼ».

9. ¿Xi runi caadxi hermanu para guiníʼnecaʼ binni ni qué guinni ra lidxi?

 ⁹ Guchaʼnu lugar ra runi predicarnu. Nuu publicador ruchaa de lugar ra runi predicar para ganda guiniʼné binni ni qué guinni ra lidxi. Guzéʼtenu ti ejemplu, ca lugar ra nuu stale edificiu naroʼbaʼ, ra qué randa raca predicar de yoo pur yoo, huabeendú ca hermanu stale cosa galán purtiʼ runi predicarcaʼ binni zidiʼdiʼ ndaaniʼ calle ne laaca runi predicarcaʼ né exhibidor. Pur runi predicar ca hermanu ca sicaríʼ, randa riniʼnécabe ca binni ni qué ridxélacabe ra lidxi. Stale publicador maʼ bidii cuenta jma rucaadiaga binni ne riaanané publicación ra parque, ra luguiaa ne ca lugar ra nuu negocio. Ti superintendente de circuito de Bolivia ni láʼ Floiran, guníʼ: «Runi predicardu ra luguiaa ne ra nuu ca tienda biaʼ la una ne las tres de la tarde, ora maʼ cadi nuu xhiiñaʼ ca binni ni cutoo. Óraca rucaadiaga binni laadu dede ruzuludu rudiʼdu estudiu laacaʼ».

10. ¿Xi xcaadxi cosa zanda gúninu para guni predicarnu binni?

¹⁰ Guchaʼnu modo runi predicarnu. Zándaca maʼ chupa chonna biaje huayúbinu ti binni ra lidxi ne zándaca gadxé gadxé hora huayuunu, peru qué ridxélanu laa. ¿Xi xcaadxi cosa zanda gúninu yaʼ? Ti hermana láʼ Katarína guníʼ: «Runeʼ carta para ca binni ni qué ridxelaʼ ra lidxi ne rucaaʼ ni ñabeʼ laacaʼ pa ñuuyaʼ laacaʼ». ¿Xi rizíʼdinu yaʼ? Ni zanda guizíʼdinu nga naquiiñeʼ guyúbinu xcaadxi modo guni predicarnu ti binni ni nuu lu territorio stinu.

11. ¿Xiñee qué riná caadxi binni gucaadiaga mensaje stinu?

¹¹ Nuu binni qué riná gucaadiaga mensaje stinu. Riníʼ íquecaʼ cadi caquiiñeʼ guiziidicaʼ de Dios ninca de lu Biblia. Zándaca qué runi crecaʼ Dios pur guiráʼ ca yuubaʼ ni nuu lu Guidxilayú ne qué rinacaʼ gánnacaʼ gastiʼ de lu Biblia purtiʼ ruuyacaʼ qué runi ca líder stiʼ ca religión ni rusiidicaʼ. Ne xcaadxi binni jma cá íquecaʼ dxiiñaʼ sticaʼ, familia sticaʼ o ca guendanagana ni nápacaʼ ne qué rudiicaʼ cuenta pa zanda gacané Biblia laacaʼ. ¿Xi zanda gúninu para cadi gusaana de chuʼnu nayecheʼ neca qué gucaadiaga binni mensaje stinu yaʼ?

12. ¿Ximodo zanda chinándanu ni ná Filipenses 2:4 ora guni predicarnu?

¹² Guizaaláʼdxinu binni. Stale binni ni qué niná nucaadiaga laanu dxiqué, yanna maʼ rucaadiágacaʼ purtiʼ guyuu tu bizaalaʼdxiʼ laacaʼ ora biʼniʼ predicárcabe laacaʼ (biindaʼ Filipenses 2:4). Guzéʼtenu ti ejemplu, sicaríʼ guníʼ David, hermanu ni maca bizéʼtenu que: «Pa gabi tuuxa laadu qué riuulaʼdxiʼ ganna gastiʼ de Biblia la? riguʼchaahuidu Biblia ne ca publicación ne ruyúbidu gánnadu xiñee riníʼ íquebe zacá». Rudii binni cuenta ora rizaaláʼdxinu laa. Zándaca qué zietenaláʼdxibe ni gábinu laabe, peru ni jma zietenaláʼdxibe nga modo biʼniʼ tratarnu laabe. Neca qué gudii binni ca lugar guininu la? pur modo guni tratarnu laa ne pur ca gestu gúninu, zanda gusihuínninu dxandíʼ rizaaláʼdxinu laa.

13. ¿Xi zanda gúninu para gucaadiaga binni laanu?

¹³ Ti cosa ni zanda gúninu para guizaaláʼdxinu binni nga, guinínenu laacabe de ni caquiiñecabe. Guzéʼtenu ti ejemplu, pa guidúʼyanu napa binni ca xiiñiʼ la? zándaca ziuuláʼdxibe gánnabe xi conseju rudii Biblia para ca binni ni cusiniisi xiiñiʼ o ximodo zanda guibánicaʼ nayecheʼ né familia sticaʼ. Ne pa guidúʼyanu napa binni ca stale candadu ra lidxi la? zanda gábinu laabe zabee Dios ca cosa malu ca ne maʼ qué ziuu xiixa ni guchibi binni. Nga runi, cada biaje gucaadiaga binni laanu la? gúninu stipa guiénebe ximodo zanda gacané Biblia laabe. Katarína, hermana ni bizéʼtenu lu párrafo chii que, guníʼ: «Riníʼ iqueʼ ximodo huayacané Biblia naa». Né ca diidxaʼ riʼ rusihuinni hermana ca dxandíʼ runi cré ni rusiidiʼ Biblia, ne rudii binni cuenta de laani.

14. Casi ná Proverbios 27:17, ¿xi zabeendunu pa chinenu sti hermanu o hermana ora chiguni predicarnu?

 ¹⁴ Gudiʼnu lugar gacané xcaadxi laanu. Lu primé siglu bisiidiʼ Pablo Timoteo modo runi predicar ne modo rusiidiʼ, ne laaca guluu Pablo gana laabe gúnibe zaqueca (1 Cor. 4:17). Cásica Timoteo, laanu laaca zanda guizíʼdinu stale de ca hermanu ni napa experiencia (biindaʼ Proverbios 27:17). Guidúʼyanu ni bizaaca ti precursor ni láʼ Shawn, biʼniʼ servirbe ti guidxihuiiniʼ, raqué nuu stale binni ni napa religión stiʼ. ¿Xi gucané hermanu riʼ para cadi guiree gana yaʼ? Sicaríʼ guniʼbe: «Ora ganda la? runeʼ stipa chiniaʼ sti compañeru. Cumu zitu riaana ca yoo que la? ruidu diidxaʼ ximodo zanda guni predicardu jma jneza. Sti cosa ni rúnidu nga rinidu xidé guninedu ti binni biʼniʼ predicardu, ne riníʼ íquedu xi zanda guicábidu sti biaje pa gábicabe laadu laaca ngueca».

15. ¿Xiñee risaca guni orarnu Jehová ante chiguni predicarnu?

¹⁵ Guinábanu gacané Jehová laanu. Cada biaje guni predicarnu, guni orarnu Jehová para gacané laanu, purtiʼ pa qué gacané espíritu santu stibe laanu la? qué zanda gúninu gastiʼ (Sal. 127:1; Luc. 11:13). Ora guinábanu Jehová xiixa la? gábinu laa xi peʼ caquiiñenu. Guzéʼtenu ti ejemplu, guinábanu laabe gacanebe laanu guidxélanu binni ni dxandíʼ racalaʼdxiʼ guiziidiʼ de Biblia. Despué, guni predicarnu biaʼ tiica binni guidxélanu.

16. ¿Xiñee risaca guni estudiarnu stúbinu?

¹⁶ Cueenu tiempu para guni estudiarnu stúbinu. Stiidxaʼ Dios ná: «Ganna chaahuitu xi racalaʼdxiʼ Dios gúnitu, ni nachaʼhuiʼ, ni chuulaʼdxiʼ ne ni jneza» (Rom. 12:2). Ra jma ganna chaahuinu ni rusiidiʼ Biblia de Dios, maʼ qué zadxíbinu guni predicarnu binni. Katarína guníʼ: «Bidieeʼ cuenta caquiiñeʼ guiziideʼ jma de Biblia ti iguidxi fe stinneʼ. Ngue runi biyubeʼ gannaʼ dxandíʼ nuu ti Dios ni bizáʼ laanu, dxandíʼ Biblia nga Stiidxaʼ Dios ne napa Dios ti organización ni cayuni ni ná tiempu riʼ». Ra biʼniʼ estudiar Katarína stubi gucané ni laa gaca fe stiʼ naguidxi ne jma chuulaʼdxiʼ guni predicar.

17. ¿Xiñee qué niree Jesús gana dxi biʼniʼ predicar?

¹⁷ Qué niree Jesús gana ne biʼniʼ predicar neca qué niná binni nucaadiaga laa. ¿Xiñee yaʼ? Purtiʼ nánnabe caquiiñeʼ gunibiáʼ binni ni dxandíʼ ne racaláʼdxibe gacanebe laacaʼ. Laaca gúnnabe ziuu binni qué zanagá gucaadiaga mensaje stiʼ Reinu, peru ra tidiʼ tiempu maʼ zanacaʼ guiziidicaʼ. Ne nga peʼ nga ni bizaaca familia stibe. Lu chonna iza arondaʼ biʼniʼ predicar Jesús, nin tobi de ca bíʼchibe ne ca bizáʼnabe qué ñácacaʼ discípulo stibe (Juan 7:5). Peru despué de biásabe de lade gueʼtuʼ, gúcacaʼ xpínnibe (Hech. 1:14).

18. ¿Xiñee qué rusaana de guni predicarnu?

¹⁸ Qué gánnanu tu laa zaca xpinni Jehová. Nuu binni naquiiñeʼ tidiʼ tiempu para guiziidicaʼ ni dxandíʼ. Dede ca binni ni qué rucaadiaga laanu ruuyacaʼ ximodo laanu ne xi rúninu ne zándaca ra tidiʼ tiempu «gusisácacabe Dios» (1 Ped. 2:12).

19. Casi ná 1 Corintios 3:6, 7, ¿xi cadi naquiiñeʼ guiaandaʼ laanu?

¹⁹ Neca laanu racanenu binni casi ñaca nudxiibaʼ ne nuzeʼnu ti yagahuiiniʼ, cadi naquiiñeʼ guiaandaʼ laanu Dios «nga rusiniisi ni» (biindaʼ 1 Corintios 3: 6, 7). Sicaríʼ guníʼ ti hermanu de Etiopía: «Jma de gande iza, naasiaʼ testigu stiʼ Jehová nabeza lu ti territorio ra huaxiéʼ raca predicar. Peru yanna maʼ nuu 14 publicador lugar riʼ. Maʼ guyuunisa 13 binni, ládecabe nuu xheelaʼ ne chonna xiiñidu. Ne rié biaʼ 32 binni reunión». Guizáʼ riecheʼ hermanu riʼ purtiʼ qué nusaana de ñuni predicar, sínuque guleza guchiña Jehová binni ndaaniʼ organización stiʼ (Juan 6:44).

20. ¿Ximodo nga zeeda gácanu casi ti grupu de rescatista?

²⁰ Nabé risaca xquendanabani guiráʼ binni para Jehová. Maʼ bidiibe laanu privilegiu de guninenu Jesús dxiiñaʼ ra gacanenu binni de gadxé gadxé lugar guidxiña ndaaniʼ xquidxi Jehová ante gunitilube guidxilayú stiʼ Binidxabaʼ (Ageo 2:7). Ora runi predicarnu, zeeda gácanu casi ca binni ni rié rindee binni ni biaana ndaaniʼ yoo ni bixiá pur ti xú. Neca caadxi si rescatista guidxela binni ni nabani, risaca dxiiñaʼ ni runi guirácabe. Zacaca nga zeeda gaca ora runi predicarnu, qué gánnanu panda binni zanda gulanu de lu guidxilayú stiʼ Binidxabaʼ riʼ, peru zanda iquiiñeʼ Jehová tutiica de laanu para gacanenu laacabe. Ti hermanu nabeza Bolivia guníʼ: «Stale hermanu nga racané ora riziidiʼ ti binni de Jehová ne riuunisa». Nga runi, gúninu stipa chuʼnu nayecheʼ ora gúninu xhiiñaʼ Dios. Pa gúninu ni, zaguu Jehová ndaayaʼ laanu ne qué zusaana de chuʼnu nayecheʼ ora guni predicarnu.