1. ¿Xi zacané laanu ora guni sentirnu stúbinu o nuunu xizaa pur ca guendanagana nápanu? (Salmo 118:5-7).

¿ÑEE huayuni sentirnu stúbinu ne riníʼ íquenu guirutiʼ zanda gacané laanu la? Cadi laasinu huayuni sentirnu zacá. Laaca zacaca biʼniʼ sentir caadxi xpinni Jehová de dxiqué (1 Rey. 19:14). Ora guni sentirnu casi bizéʼtenu riʼ, guietenaláʼdxinu promesa stiʼ Jehová: «Qué zusaanaʼ lii ne qué ziaanadxieeʼ de gacaniaʼ lii». Nga runi zanda guininu né stale confianza «Jehová nga racané naa. Qué zadxibeʼ diaʼ» (Heb. 13:5, 6). Bicaa apóstol Pablo ca diidxaʼ riʼ para ca xpinni Cristu ni bibani lu iza 61. Ni guniʼbe ca rusihuínnini ngaca biʼniʼ sentir hombre ni bicaa Salmo 118:5-7 (biindaʼ ni).

2. ¿Xi zadúʼyanu lu artículo riʼ ne xiñee?

² Cásica hombre ni bicaa salmo, laaca gunna dxichi Pablo nuu Jehová para gacané laa. Guzéʼtenu ti ejemplu, jma de chupa iza ante gucaabe carta para ca cristianu hebreu, biʼniʼ viajarbe lu barcu ne bidxaagalúcabe ti tormenta naroʼbaʼ (Hech. 27:4, 15, 20). Lu viaje riʼ ne lu xcaadxi iza que gucané Jehová laabe de gadxé gadxé modo. Lu artículo riʼ zadúʼyanu chonna modo gucané Jehová laabe ra biquiiñeʼ Jesús ne ca ángel, ca binni ni napa autoridad ne ca hermanu. Ora guidúʼndanu ni  bizaaca Pablo, zápanu jma confianza laaca zacané Jehová laanu ora guinábanu ni laa.

3. ¿Xi zándaca gunabadiidxaʼ Pablo ne xiñee?

³ Biaʼ lu iza 56. Guxubiyú caadxi binni Pablo ne yenecaʼ laabe fuera de guidxi Jerusalén para guuticaʼ laabe. Sti dxi que yenécabe laabe fuera de Sanedrín ne bilá ñuuti ca enemigu stibe laabe (Hech. 21:30-32; 22:30; 23:6-10). Óraque, zándaca gunabadiidxaʼ Pablo: «¿Pabiáʼ ruʼ tiempu guneʼ huantar ni cadideʼ riʼ yaʼ?». Rihuinni dxichi caquiiñebe tu gacané laabe.

4. ¿Ximodo gucané Jehová Pablo ra biquiiñeʼ Jesús?

⁴ ¿Tu gucané Pablo? Gueelaʼ gunaazecabe Pablo guyé Señor, Jesús, ra nuube ne gudxi laabe: «¡Gupa valor! Purtiʼ cásica maʼ bidiiluʼ testimonio completu de naa Jerusalén, zaqueca zudiiluʼ testimonio Roma» (Hech. 23:11). Ca diidxaʼ que nga ni caquiiñebe. Biʼniʼ felicitar Jesús Pablo pur testimonio ni bidii Jerusalén ne biʼniʼ prometer laabe ziebe Roma para gudiibe testimonio. Despué de gudxi Jesús laabe ca diidxaʼ que zándaca biʼniʼ sentirbe cásica runi sentir ti xcuidihuiiniʼ ni nuu ndaaniʼ náʼ bixhoze.

5. ¿Ximodo gucané Jehová Pablo ra biquiiñeʼ ti ángel? (Biiyaʼ dibuju ni zeeda lu portada).

⁵ ¿Xi xcaadxi guendanagana bidxaagalú Pablo? Chupa iza despué de ni bizaacabe Jerusalén zebe Italia lu ti barcu. Málasi bizulú ti tormenta nabé nadipaʼ ne guníʼ ique cani zeʼ lu barcu que záticaʼ raqué. Peru Pablo qué nidxibi. ¿Xiñee coʼ yaʼ? Sicaríʼ gúdxibe ca binni ni zeʼ ndaaniʼ barcu que: «Nuchiʼ bizuhuaa ti ángel stiʼ Dios cueeʼ, Dios ni runeʼ adorar ne runeʼ xhiiñaʼ, ná rabi naa: “Cadi guidxíbiluʼ Pablo. Napa xidé guzuhuaaluʼ nezalú César, ne nannuʼ xi la? zulá Dios lii ne zulá ca ni zineluʼ”». Biquiiñeʼ Jehová ti ángel para gusietenalaʼdxiʼ laabe promesa ni biʼniʼ Jesús laabe. Ne zaqué gúcani, yendá Pablo Roma (Hech. 27:20-25; 28:16).

6. ¿Xi promesa stiʼ Jesús riguu gana laanu ne xiñee?

⁶ ¿Tu racané laanu? Cásica Pablo, laaca racané Jesús laanu. Guzéʼtenu ti ejemplu, biʼniʼ Jesús promesa riʼ ca xpinni: «Qué ziuu dxi guixeleʼ de laatu dede ora guiluxe guidxilayú riʼ» (Mat. 28:20). ¿Xiñee riguixhedxí ca diidxaʼ riʼ ladxidoʼno yaʼ? Purtiʼ guiranu  ridxaagalunu guendanagana. Casi ora rati ti familia stinu, zándaca tidiʼ iza ne nanaruʼ nuu ladxidoʼno. Nuu tu laa cadiʼdiʼ ra nagana purtiʼ maʼ nagola. Ne xcaadxi cayacaná purtiʼ nápacaʼ depresión. Neca zacá nápanu stipa para gudxíʼlunu ca guendanagana nápanu purtiʼ «qué ziuu dxi» gusaana Jesús laanu stúbinu dede ca dxi jma nagana tídinu (Mat. 11:28-30).

7. Casi ná Apocalipsis 14:6, ¿ximodo racané Jehová laanu?

⁷ Biblia ná riquiiñeʼ Jehová ca ángel para gacanecaʼ laanu (Heb. 1:7, 14). Guzéʼtenu ti ejemplu, racané ne runi guiar ca ángel laanu ora runi predicarnu ca noticia galán ra nuu «guiráʼ nación, tribu, idioma ne guidxi» (Mat. 24:13, 14; biindaʼ Apocalipsis 14:6).

8. ¿Ximodo gucané Jehová Pablo ra biquiiñeʼ ti comandante militar?

⁸ ¿Tu gucané Pablo? Casi maca bidúʼyanu, gudxi Jesús Pablo zie Roma. Peru biyubi caadxi judíu de Jerusalén ximodo guuticaʼ laabe. Dxi gunna comandante militar romano Claudio Lisias racaláʼdxicabe guuticabe Pablo, gucané laabe. Nagueendaca biseendabe Pablo Cesarea, ne biseendabe caadxi soldadu para gapa laa neza cheʼ purtiʼ zuni viajar biaʼ ti gayuaa gaayuʼ kilómetru. Raqué biʼniʼ mandar gobernador Félix «guieguyoo Pablo ndaaniʼ palaciu stiʼ Herodes» ne gápacabe laa. Zaqué bilá Pablo de ca binni ni racalaʼdxiʼ guuti laa (Hech. 23:12-35).

9. ¿Ximodo gucané gobernador Festo Pablo?

⁹ Lu iza 58, nuuruʼ Pablo ndaaniʼ cárcel Cesarea. Ne maʼ Festo gobernador lugar stiʼ Félix. Gunabaʼ ca judíu Festo chinecaʼ Pablo Jerusalén para guni juzgarcaʼ laabe raqué, peru qué niná hombre riʼ. Zándaca bidii gobernador que cuenta maca guníʼ stiidxaʼ ca judíu «quíxhecaʼ ti trampa ne guuticaʼ» Pablo (Hech. 24:27-25:5).

10. ¿Xi biʼniʼ Festo ora gunabaʼ Pablo laa cheʼ nezalú César?

¹⁰ Ti tiempu despué, guca juzgar Pablo Cesarea. Cumu racalaʼdxiʼ Festo guiaana bien ne ca judíu que la? gunabadiidxabe Pablo: «¿Racaláʼdxiluʼ cheluʼ Jerusalén ne gaca juzgarluʼ nezaluáʼ pur ca cosa ni cugaanicabe luguialuʼ la?». Nanna Pablo pa cheʼ Jerusalén zuuticabe laa raqué. Laaca nánnabe xi naquiiñeʼ gúnibe para cadi guuticabe laabe ti chebe Roma ne guni predicarbe raqué. Ngue runi guniʼbe: «¡Canabaʼ chaaʼ nezalú César!». Despué de guniʼné Festo ca xpinni gudxi laabe: «Cumu canábaluʼ cheluʼ nezalú César la? zieluʼ nezalú César». Ra biseendaʼ Festo Pablo Roma maʼ qué ñuuti ca enemigu stiʼ laa (Hech. 25:6-12).

11. ¿Xi zándaca guníʼ ique Pablo ni guluu gana laa?

¹¹ Dxi mayaca guiree barcu para cheʼ Pablo Italia. Zándaca guníʼ íquebe ca diidxaʼ ni guníʼ profeta Isaías xi zazaaca ca ni rucaalú Jehová: «¡Laquixe ique xi gúnitu, peru qué zaree ni biaʼsi! ¡Laguiníʼ ni gápatu gana, qué zaca ni, purtiʼ nuuné Dios laadu!» (Is. 8:10). Gunna Pablo zacané Jehová laa, ngue gucané laabe para ca prueba ni zadxaagalube.

12. a) ¿Ximodo biʼniʼ tratar Julio Pablo? b) ¿Xi bidii Pablo cuenta pur modo biʼniʼ tratar Julio laa?

¹² Despué guyé Pablo Italia. Cumu  prisioneru laabe la? cayapa ti oficial stiʼ ejércitu romano láʼ Julio laabe. Zanda guni tratar hombre riʼ laabe galán o guniná laabe. ¿Xi biʼniʼ Julio yaʼ? Sti dxi que, ora yendácabe «guca Julio nachaʼhuiʼ né Pablo ne bidii lugar chebe ra nuu ca xhamígube para gacanecaʼ laabe». Ti tiempu despué, bilá Julio Pablo ora gucalaʼdxiʼ ca soldadu que ñuuticaʼ ca presu que, bicueeza Julio laacaʼ purtiʼ racalaʼdxiʼ «gulá Pablo». Zándaca bidii Pablo cuenta cayacané Jehová laa pur modo biʼniʼ tratar Julio laa (Hech. 27:1-3, 42-44).

13. ¿Ximodo zanda iquiiñeʼ Jehová ca binni ni napa ti puestu risaca?

¹³ ¿Tu racané laanu? Para guni Jehová ni racalaʼdxiʼ, zanda iquiiñebe espíritu santu stibe para gucaabe ti binni ni napa ti puestu risaca guni ni nabe. Rey Salomón bicaa: «Ladxidóʼ ti rey zeeda gaca casi nisa ni cuxooñeʼ ndaaniʼ náʼ Jehová. Zanda guseendabe ni ratiica gacaláʼdxibe» (Prov. 21:1). ¿Xi riníʼ ca diidxaʼ riʼ yaʼ? Zanda guni binni ti canal para cueechú nisa stiʼ ti guiiguʼ ti cheni ladu gacaláʼdxicaʼ. Zacaca zanda iquiiñeʼ Jehová espíritu santu stiʼ para guchaa modo riníʼ ique ca gobernante ca ne gúnicaʼ ni racaláʼdxibe. Nga runi ricaa ca gobernante riʼ decisión ni gacané xquidxi Dios (bichaaga ni né Esdras 7:21, 25, 26).

14. Casi ná Hechos 12:5, ¿tu pur zanda guni orarnu?

¹⁴ ¿Xi zanda gúninu? Zanda guni orarnu «pur ca rey ne pur guiráʼ ca ni napa ti puestu risaca» ora chiguicaacaʼ decisión ni zanda gacané o guniná xquidxi Dios (1 Tim. 2:1, 2, nota; Neh. 1:11). Cásica biʼniʼ ca xpinni Cristu ni bibani lu primé siglu, laanu laaca runi orarnu de guidubi ladxidoʼno pur ca hermanu stinu ni deguyoo (biindaʼ Hechos 12:5; Heb. 13:3). Dede zanda guinábanu Jehová guchaa modo riníʼ ique ca guardia ni cayapa ca hermanu stinu ti gácacaʼ nachaʼhuiʼ né laacabe cásica «guca Julio nachaʼhuiʼ né Pablo» (Hech. 27:3).

15, 16. ¿Ximodo biquiiñeʼ Jehová Aristarco ne Lucas para gacanecaʼ Pablo?

¹⁵ ¿Tu gucané Pablo? Dxi guyé Pablo Roma, stale biaje biquiiñeʼ Jehová ca  hermanu para gacané laabe. Guzéʼtenu caadxi ejemplu.

¹⁶ Aristarco ne Lucas, xhamigu Pablo, yenecaʼ laabe Roma. * Guluucabe xquendanabánicabe ra naxoo pur Pablo neca qué riete lu Biblia pa laaca gudxi Jesús laacabe zindácabe Roma. Ora ruʼ nuucabe lu ti tormenta nga gúnnacabe zalácabe. Nga runi dxi gudxiʼbaʼ Aristarco ne Lucas lu ti barcu para checaʼ Cesarea, nanna dxíchinu biʼniʼ orar Pablo de guidubi ladxidóʼ para gudii xquixe peʼ Jehová pur biquiiñeʼ guiropaʼ hermanu nadxibalú riʼ para gacanecaʼ laabe (Hech. 27:1, 2, 20-25).

17. ¿Ximodo gucané Jehová Pablo ra biquiiñeʼ ca hermanu?

¹⁷ Lu ca viaje ni biʼniʼ Pablo gucané ca hermanu laabe stale biaje. Guzéʼtenu ti ejemplu, ndaaniʼ guidxi Sidón bidii Julio lugar «chebe ra nuu ca xhamígube para gacanecaʼ laabe». Ti tiempu despué, ndaaniʼ guidxi Puteoli biiyaʼ Pablo ne ca xcompañeru caadxi hermanu ne gunabaʼ ca hermanu riʼ laacabe guiaanacabe raqué gadxe gubidxa. Laga cayuni tender ca xpinni Cristu que ca binni ni zeʼ de viaje, nanna dxíchinu guluu ca experiencia stiʼ Pablo gana laacabe ne biéchecabe (bichaaga ni né Hechos 15:2, 3). Despué de guluu Pablo ne ca xcompañeru gana ca hermanu riʼ la? bireecaʼ zecaʼ (Hech. 27:3; 28:13, 14).

18. ¿Xiñee bidii Pablo xquixe peʼ Dios ne biecheʼ?

¹⁸ Dxi zeʼ Pablo Roma, nanna dxíchinu bietenaláʼdxibe ca diidxaʼ ni bicaabe ra nuu ca hermanu riʼ raca chonna iza ora guniʼbe: «Maʼ raca stale iza racalaʼdxeʼ chaaʼ ra nuutu» (Rom. 15:23). Peru qué niníʼ íquebe pa nindabe raqué casi ti prisioneru. Nanna dxíchinu guizáʼ biéchebe ora bíʼyabe ca hermanu de Roma cabézacaʼ laabe ruaa neza  para ugapadiúxicaʼ laabe. «Ora biʼyaʼ Pablo laacabe, bidii xquixe peʼ Dios ne biecheʼ» (Hech. 28:15). ¿Xiñee bidiibe xquixe peʼ Dios ora bíʼyabe nuu ca hermanu stibe raqué yaʼ? Purtiʼ bidiibe cuenta caquiiñeʼ Jehová ca hermanu que para gacané laabe.

19. Casi ná 1 Pedro 4:10, ¿ximodo zanda iquiiñeʼ Jehová laanu para gacanenu ca hermanu stinu ni cadiʼdiʼ ra nagana?

¹⁹ ¿Xi zanda gúninu? Ñee runibiaʼnu tuuxa hermanu ni napa ti guendahuará, cadiʼdiʼ ra nagana o guti ti familia stiʼ la? Pa gánnanu cadiʼdiʼ tuuxa ra nagana guinábanu Jehová gacané laanu para gábinu laabe caadxi diidxaʼ galán o gúninu xiixa pur laabe. Pa gúninu ni, zaguʼnu gana laabe (biindaʼ 1 Pedro 4:10). * Pa gacanenu ti hermanu stinu ni cadiʼdiʼ ra nagana zanda guibiguetaʼ gápabe confianza promesa stiʼ Jehová ni ná: «Qué zusaanaʼ lii ne qué ziaanadxieeʼ de gacaniaʼ lii». Pa gúninu ni, ziuʼnu nayecheʼ.

20. ¿Xiñee zanda guininu né stale confianza «Jehová nga racané naa»?

²⁰ Cásica Pablo ne ca xhamigu, laanu laaca naquiiñeʼ gudxíʼlunu ca guendanagana guidxaagalunu. Peru qué ridxíbinu purtiʼ nánnanu nuu Jehová para gacané laanu. Ne para gúnibe ni, zanda iquiiñebe Jesús ne ca ángel. Laaca zanda iquiiñebe ca binni ni napa ti puestu risaca pa nga nga ni racaláʼdxibe. Ne laaca nánnanu riquiiñebe espíritu santu stibe para gucaabe laanu gacanenu ca hermanu stinu. Nga runi, cásica biʼniʼ Pablo, laaca zanda guininu né stale confianza «Jehová nga racané naa. Qué zadxibeʼ diaʼ. ¿Xi zanda guni binni naa yaʼ?» (Heb. 13:6).