ARTÍCULO DE ESTUDIU 44
CANCIÓN 33 Bilaa guiráʼ ni nualuʼ luguiáʼ Jiobá
Xi zanda gúninu ora gúnicabe laanu xiixa ni cadi jneza
«Cadi gudiiluʼ lugar guni ganar ni nadxabaʼ lii, sínuque biʼniʼ ganar ni nadxabaʼ pur ni nachaʼhuiʼ» (ROM. 12:21).
TEMA
Xi zanda gúniluʼ para cadi gudiiluʼ lugar guiroobaʼ guendanagana ni gápaluʼ.
1, 2. ¿Xi caadxi cosa ni cadi jneza zanda guizaacaluʼ?
BIZEETEʼ Jesús ejemplu stiʼ ti viuda ni qué nusaana de ñee nezalú ti juez para guinabaʼ gaca justicia pur laa. Zándaca biene ca discípulo que gunaa que, purtiʼ para tiempu que stale de ca binni que cadi jneza modo runi tratárcabe laacaʼ (Luc. 18:1-5). Tiempu riʼ laaca zanda guni sentirnu ni biʼniʼ sentir viuda que purtiʼ laaca huayúnicabe laanu cosa ni cadi jneza.
2 Qué ridxagayaanu guni tratárcabe laanu zacá, purtiʼ binni guidxilayú rúnicaʼ menu xcaadxi, riníʼ íquecaʼ jma risácacaʼ que stobi ne ruquichinacaʼ binni (Ecl. 5:8). Peru zándaca chuʼnu triste ora cadi jneza guni tratar ti hermanu o ti hermana laanu. Dxandíʼ, cadi nácacabe casi binni guidxilayú peru cumu binni ruchee laacabe la? zándaca ziuu biaje zúnicabe cosa ni guniná laanu. Peru zanda guizíʼdinu stale cosa de modo bidxiilú Jesús ca cosa ni cadi jneza biʼniʼ ca xhenemigu laa. Pa rúninu stipa gápanu paciencia ca enemigu stinu ora rúnicaʼ laanu xiixa ni cadi jneza, ¿cadi dxandíʼ jma naquiiñeʼ gusihuínninu paciencia ca hermanu stinu la? Yanna, ¿xi runi sentir Jehová ora ruuyaʼ cadi jneza runi tratar ti hermanu o sti binni laanu yaʼ? ¿Ñee rizaaláʼdxibe ni cazaacanu la?
3. ¿Ximodo nánnanu rizaalaʼdxiʼ Jehová modo runi tratárcabe ca xpinni?
3 Guizáʼ rizaalaʼdxiʼ Jehová laanu ne ruuyabe modo runi tratar xcaadxi laanu. «Purtiʼ nadxii Jehová gaca ni jneza» (Sal. 37:28). Guníʼ Jesús zuuyaʼ Dios «gaca justicia» pur ca xpinni nagueendaca ne ora peʼ caquiiñeʼ gácani (Luc. 18:7, 8). Maʼ cadi candaa zabeebe guiráʼ ni runiná laanu ne maʼ qué zudiibe lugar gaca ca cosa ni cadi jneza (Sal. 72:1, 2).
4. ¿Ximodo racané Jehová laanu?
4 Laga cabézanu gaca ni jneza lu guidxilayú riʼ, cusiidiʼ Jehová laanu xi zanda gúninu ora gúnicabe laanu xiixa ni cadi jneza (2 Ped. 3:13). Guzéʼtenu ti ejemplu, cayabibe laanu xi naquiiñeʼ gúninu para cadi gusiróʼbanu ti guendanagana. Laaca maʼ gudíxhebe ejemplu chinándanu, laani nga: ejemplu stiʼ xiiñibe. Ne lu Biblia zeeda stale conseju ni zacané laanu ora cadi jneza guni tratárcabe laanu.
GÁPANU CUIDADU NÉ NI RUNI SENTIRNU ORA GÚNICABE LAANU XIIXA NI CADI JNEZA
5. ¿Xiñee naquiiñeʼ gápanu cuidadu né ni runi sentirnu ora gúnicabe laanu xiixa ni cadi jneza?
5 Zándaca zacananu ne ziuʼnu xizaa ora gúnicabe laanu xiixa ni cadi jneza (Ecl. 7:7). Zacá peʼ biʼniʼ sentir Job ne Habacuc chupa xpinni Dios ni qué nixeleʼ de laa (Job 6:2, 3; Hab. 1:1-3). Gastiʼ naca guni sentirnu zacá, peru naquiiñeʼ gápanu cuidadu modo gudxiilunu ni para cadi gúninu xiixa ni cadi jneza.
6. ¿Xi rusiidiʼ ejemplu stiʼ Absalón laanu? (Biiyaʼ imagen ca).
6 Ora gúnicabe xiixa ni cadi jneza tuuxa ni nadxiinu o gúnicabe ni laanu la? zándaca primé ni ridiʼdiʼ ndaaniʼ íquenu nga guquíxenu ni laacaʼ. Peru lugar de gaca chaahuiʼ guendanagana ca jmaruʼ si riroobani. Guzéʼtenu ni bizaaca Absalón, tobi de ca xiiñiʼ rey David. Guizáʼ bidxiichibe ora gúnnabe ora gúnnabe bilaxoo bíʼchibe Amnón bizáʼnabe Tamar. Pur ni biʼniʼ Amnón, Ley stiʼ Moisés que ná naquiiñeʼ gátibe (Lev. 20:17). Neca nuu razón para guidxiichi Absalón, peru cadi jneza diʼ ni bíʼnibe ra biitibe Amnón (2 Sam. 13:20-23, 28, 29).
Ora gunna Absalón ni bizaaca Tamar bizanaʼ, qué ñanda nucueeza xiana stiʼ. (Biiyaʼ párrafo 6).
7. ¿Xi biʼniʼ sentir ti hombre ni bicaa Salmo ora biiyaʼ cazaaca cosa ni cadi jneza?
7 Ora ridúʼyanu gastiʼ rizaaca ca binni ni qué runi ni jneza, zándaca guiníʼ íquenu pa risaca nga gúninu ni jneza. Guiníʼ íquenu hombre ni bicaa Salmo que, laa biiyaʼ ximodo runiná ca binni malu ca binni ni runi ni jneza ne para laabe ruluíʼ nabani ca binni malu que galán. Sicaríʼ guníʼ hombre bicaa Salmo que: «Zacá nga ca binni malu gastiʼ cayaadxaʼ laacaʼ» (Sal. 73:12). Guizáʼ feu modo runi sentirbe pur guiráʼ ca cosa ni cadi jneza cazaaca dede guníʼ íquebe qué risaca gúnibe ni ná Jehová. Laabe guniʼbe: «Ora racalaʼdxeʼ guieneni, guizáʼ riguuni naa xizaa. . .» (Sal. 73:14, 16). Ne guniʼbe: «Bilá maʼ qué ñapa ñee stipa para nuzuhuaaʼ dxiicheʼ» (Sal. 73:2). Zacá ga nga bizaaca ti hermanu láʼ Alberto. a
8. ¿Xi biʼniʼ sentir ti hermanu ora bíʼnicabe laa xiixa ni cadi jneza?
8 Guníʼcabe gulaana Alberto bueltu stiʼ congregación, peru cadi dxandíʼ ni. ¿Xi bizaaca yaʼ? Bisaana de gácabe ancianu ne maʼ qué ñuni respetar ca hermanu ni nanna ni bizaaca que laabe. Laabe guniʼbe: «Guizáʼ bidaaʼ xiana, nisi cadxiicheʼ stubeʼ ne qué ridxelaʼ xi guneʼ». Cumu bidii Alberto lugar guniná ca ni cayuni sentir que ladxidóʼ la? bicaani laabe guixélebe de Jehová ne guyuube gaayuʼ iza inactivu. Rusiidiʼ ni bizaaca Alberto riʼ laanu ni zanda guizaacanu pa qué gucueezanu ni runi sentirnu ora gúnicabe laanu xiixa ni cadi jneza.
CHINÁNDANU EJEMPLU STIʼ JESÚS
9. ¿Xi ca cosa cadi jneza biʼniʼ huantar Jesús? (Biiyaʼ ca imagen ca).
9 Bisaana Jesús ti ejemplu nabé galán para chinándanu. Bíʼnicabe laabe stale cosa ni cadi jneza. Guzéʼtenu chupa chonna ejemplu, qué ñuni cré binnilídxibe pa laabe nga Mesías ne guníʼcabe cayaca íquebe. Guníʼ ca xaíque yuʼduʼ que runinebe ca demonio dxiiñaʼ. Ne biʼniʼ burla, bininá ne biiti ca soldadu stiʼ Roma laabe (Mar. 3:21, 22; 14:55; 15:16-20, 35-37). Peru guizáʼ biʼniʼ huantar Jesús guiráʼ ni bíʼnicabe laa ne qué nuquixe ni laacabe. ¿Xi rusiidiʼ ejemplu stibe laanu yaʼ?
Bisaana Jesús ti ejemplu galán ni zanda chinándanu ora cadi jneza guni tratar xcaadxi binni laanu. (Biiyaʼ párrafo 9 ne 10).
10. ¿Xi biʼniʼ Jesús ora bíʼnicabe laa cosa ni cadi jneza? (1 Pedro 2:21-23).
10 (Biindaʼ 1 Pedro 2:21-23). b Bisaana Jesús ejemplu jma galán para chinándanu ora gúnicabe laanu xiixa ni cadi jneza. Gúnnabe pora naquiiñeʼ guiniʼbe ne pora coʼ (Mat. 26:62-64). Guzéʼtenu chupa chonna ejemplu, ora guníʼcabe cosa ni cadi dxandíʼ de laabe gudixhe íquebe cadi guicábibe laacaʼ (Mat. 11:19). Ne ora gudixhe íquebe guicábibe ca enemigu stibe la? qué niguudibe laacaʼ ne qué ñuni amenazarbe laacaʼ. Gunda bicueeza Jesús laca laa purtiʼ gupa confianza «Juez ni runi juzgar jneza». Nánnabe ruuyaʼ Jehová guiráʼ ca cosa ni cadi jneza rúnicabe laabe ne nanna dxiichibe zuni chaahuiʼ Jehová ca guendanagana que.
11. ¿Pora nga naquiiñeʼ gucueezanu ni guininu? (Biiyaʼ ca imagen ca).
11 Ora gúnicabe laanu xiixa ni cadi jneza zanda chinándanu ejemplu stiʼ Jesús ra gucueezanu ruaanu ne cadi guicabi ruaanu laacabe. Pa ni bíʼnicabe laanu cadi tan naróʼbani la? galán cadi guyúbinu gúninu xiixa. O zándaca quixhe íquenu cadi guininu xiixa para cadi gusiróʼbanu guendanagana que (Ecl. 3:7; Sant. 1:19, 20). Peru zándaca caquiiñeʼ guininu xiixa ora guidúʼyanu cayacaná tuuxa pur xiixa ni cadi jneza ni bíʼnicabe laa ne ora caquiiñeʼ guininu ni runi crenu (Hech. 6:1, 2). Peru ora gúninu ni naquiiñeʼ gúninu stipa pur gúninu ni né stale respetu ne diidxaʼ nadóʼ (1 Ped. 3:15). c
Ora cadi jneza guni tratárcabe laanu, zanda chinándanu ejemplu stiʼ Jesús ra guiníʼ ique chaahuinu pora zanda guininu ne xi guininu. (Biiyaʼ párrafo 11 ne 12).
12. ¿Ximodo zanda gápanu confianza «Juez ni runi juzgar jneza»?
12 Laaca zanda chinándanu ejemplu stiʼ Jesús ra gápanu confianza «Juez ni runi juzgar jneza». ¿Ximodo yaʼ? Pa tuuxa guiníʼ xiixa ni cadi jneza de laanu o cadi jneza guni tratar laanu la? gápanu confianza nanna Jehová ni peʼ bizaaca. Zacané confianza ca laanu guni huantarnu ca cosa ni cadi jneza gúnicabe laanu purtiʼ nánnanu zedandá dxi zuni chaahuiʼ Jehová ni. Ora gusaananu guiráʼ ca cosa ca lu náʼ Jehová jma que zadaʼnu xiana ne qué zadxiichinu. Pa guidaʼnu xiana o guidxiichinu zanda gúninu xiixa ni guniná ca hermanu stinu, gusaana de chuʼnu nayecheʼ ne guixélenu de Jehová (Sal. 37:8).
13. ¿Xi zanda gacané laanu ora gúnicabe laanu xiixa ni cadi jneza?
13 Dxandíʼ, que zanda gúninu modo peʼ biʼniʼ Jesús. Purtiʼ zanda gúninu o guininu xiixa ne despué gaca arrepentirnu de laani (Sant. 3:2). Ne zándaca guizaacanu xiixa ni cadi jneza ni guniná xquendabiaaninu o ladxidoʼno ni zeeda gaca casi ti pesu o ti marca ni qué zaxiá biaʼ tiempu guibáninu. Pa nga nga ni cazaacaluʼ, cadi guiaandaʼ lii nanna Jehová xi guendanagana cadxaagaluluʼ. Ne laaca riene chaahuiʼ Jesús ni runi sentirluʼ purtiʼ laaca gudiʼdiʼ lu stale guendanagana (Heb. 4:15, 16). Maʼ bidii Jehová laanu ejemplu stiʼ Jesús ni zacané laanu ne laaca rudiibe laanu conseju ni zeeda lu Stiidxabe para gudxiilunu ca cosa ni cadi jneza guizaaca lu xquendanabáninu. Guidúʼyanu chupa versículo ni zeeda lu libru stiʼ Romanos.
«LAGUSAANA NI LU NÁʼ DIOS»
14. ¿Xi riníʼ diidxaʼ «lagusaana ni lu náʼ Dios»? (Romanos 12:19).
14 (Biindaʼ Romanos 12:19). Ora gudxi apóstol Pablo ca xpinni Cristu «lagusaana ni lu náʼ Dios», ¿xii nga caniʼbe raríʼ yaʼ? Ra gúʼndanu contextu stiʼ versículo riʼ, rudiʼnu cuenta caniʼni de xiana stiʼ Jehová. Rinándanu conseju riʼ ra gudiʼnu lugar Jehová peʼ guiníʼ pora ne padxí guni justicia. Ne nga peʼ nga ni biʼniʼ John ora cadi jneza modo biʼniʼ tratar ti hermanu laa. Laabe guniʼbe: «Gupa xidé bicueezaʼ laca naa para cadi guneʼ chaahueʼ ca cosa ca modo rabeʼ. Gucané Romanos 12:19 naa gacaʼ ti binni ni napa paciencia ne gapaʼ confianza Jehová».
15. ¿Xiñee jma galán cuézanu guni chaahuiʼ Jehová ca cosa ca?
15 Cuézanu guni chaahuiʼ Jehová ca cosa ca, nga nga ni jma galán. Pa gúninu zacá qué zápanu estrés ne maʼ qué zaníʼ íquenu laapenu guni chaahuinu guendanagana ca. Racalaʼdxiʼ Jehová gacané laanu. Casi ñaca niniʼbe: «Bisaana ca cosa ca lu nayaʼ, ne naa zuneʼ chaahueʼ cani». Cayuni prometer Jehová laanu, laa zuni chaahuiʼ ca cosa ca ne nánnanu jma peʼ jneza zúnibe ni que laanu. Pa gápanu confianza promesa riʼ jma fácil zaca para laanu cadi guidaʼnu xiana. Ne nga nga ni gucané John, hermanu ni bizéʼtenu lu párrafo gudídinu ca. Laabe guniʼbe: «Pa gusaanaʼ ca cosa ca lu náʼ Jehová, nannaʼ jma galán zuni chaahuibe ni que modo niníʼ iqueʼ ñuneʼ ni».
«BIʼNIʼ GANAR NI NADXABAʼ PUR NI NACHAʼHUIʼ»
16, 17. ¿Ximodo racané oración laanu guni ganarnu ni nadxabaʼ pur ni nachaʼhuiʼ? (Romanos 12:21).
16 (Biindaʼ Romanos 12:21). Apóstol Pablo guníʼ: «Biʼniʼ ganar ni nadxabaʼ pur ni nachaʼhuiʼ». Ne lu Sermón del Monte que guníʼ Jesús: «Peru naa cayabeʼ laatu gannaxhiitu ca enemigu stitu ne guni orartu pur ca ni canazananda laatu» (Mat. 5:44). Zándaca huaníʼ íquenu pabiáʼ yuubaʼ gupa xidé biʼniʼ huantar Jesús ora ca soldadu de guidxi Roma bicaacaʼ laabe lu yaga. Laaca biʼniʼ burlacabe ne bininácabe laabe. Guizáʼ naná yuubaʼ gudiʼdiʼ Jesús dede que randa riníʼ íquenu pabiáʼ naroʼbaʼ ni. ¡Guizáʼ feu guiráʼ ni bíʼnicabe Jesús!
17 Qué nusaana Jesús de ñannaxhii ne qué nixeleʼ de Jehová neca guizáʼ gucaná. Lugar de ninábabe Jehová ñuni castigar ca soldadu que, guniʼbe ca diidxaʼ riʼ: «Bixhozeʼ, biʼniʼ perdonar laacabe purtiʼ qué gánnacabe xi cayúnicabe» (Luc. 23:34). Guni orarnu pur ca binni ni runiná laanu zacaneni laanu cadi guidaʼnu xiana ne cadi gacananaláʼdxinu laacabe ne guchaʼnu ni runi sentirnu pur laacaʼ.
18. ¿Ximodo gucané guni orar Alberto ne John Jehová?
18 Gucané oración ca hermanu ni bizéʼtenu lu artículo riʼ gudxiilucaʼ ca cosa ni cadi jneza bíʼnicabe laacaʼ. Alberto guníʼ: «Bineʼ orar pur ca hermanu ni cadi jneza biʼniʼ tratarcaʼ naa. Stale biaje gunabaʼ Jehová gacané naa cadi guietenalaʼdxeʼ ni bizaaca que». ¡Yanna, maʼ nayecheʼ nuu Alberto purtiʼ maʼ cayuni ni ná Jehová sti biaje! Ne sicaríʼ guníʼ John: «Stale biaje bineʼ orar Jehová para gacané hermanu ni bininá naa que ne para gacané naa guneʼ perdonar laabe. Gucané Jehová naa cadi guidxiicheʼ niaʼ hermanu que ne cadi guneʼ juzgar laa. Ne laaca gucané ca oración ni bineʼ que naa gatadxí ladxiduáʼ ne xquendabiaaneʼ».
19. ¿Xi naquiiñeʼ gúninu laga nabáninu lu guidxilayú malu riʼ? (1 Pedro 3:8, 9).
19 Qué zanda gánnanu xi guiraruʼ cosa ni cadi jneza zudxíʼlunu ante guiluxe guidxilayú riʼ. Peru intiica si ni gudxiilunu, qué chuʼ dxi gusaana de guinábanu Jehová gacané laanu. Gúninu stipa chinándanu ejemplu stiʼ Jesús dxi bidxiilú ca cosa ni cadi jneza bíʼnicabe laa ne gúninu stipa cadi gusaana de chinándanu ca principiu ni zeeda lu Biblia. Pa gúninu ca ni maʼ bizéʼtenu riʼ la? zanda chuʼnu seguru zaguu Jehová ndaayaʼ laanu (biindaʼ 1 Pedro 3:8, 9).
CANCIÓN 38 Jiobá cayapa lii
a Maʼ bidxaa lá caadxi binni.
b Lu 1 Pedro capítulo 2 ne 3 guníʼ apóstol riʼ de ca guendanagana bidxagalú ca xpinni Cristu de primé siglu que purtiʼ naca xpixuaanacaʼ malu o purtiʼ cadi naca xheelacaʼ xpinni Cristu (1 Ped. 2:18-20; 3:1-6, 8, 9).
c Biiyaʼ videu ni láʼ Dxandíʼ peʼ zápanu paz pa gannaxhiinu ni zeeda lu jw.org.
