¿Padxí nga gueeda fin? Ni guníʼ Jesús
Casi maʼ bizíʼdinu, ora riníʼ Biblia zeeda fin, cadi caniʼni zanitilú Guidxilayú ra nabáninu riʼ o ca binni nuu ndaaniʼ ni, sínuque ca cosa malu nuu ndaaniʼ Guidxilayú riʼ ne guiráʼ ca ni runi apoyar ni. Peru ¿ñee ruzeeteʼ Biblia padxí peʼ nga guinitilú guiráʼ ca cosa malu riʼ la?
GUNÍʼ IQUE CA DIIDXAʼ NI GUNÍʼ JESÚS RIʼ:
«Lagataná, purtiʼ qué gánnatu padxí ne pora gaca ni» (MATEO 25:13).
«Laguuyadxí, lagataná, purtiʼ qué gánnatu padxí gaca ca cosa riʼ» (MARCOS 13:33).
Guirutiʼ ganna padxí peʼ nga chiguinitilú guidxilayú riʼ. Peru maʼ gudixhe Dios «padxí ne pora» guinitilú ni (Mateo 24:36). Peru ¿ñee zanda gánnanu pa maʼ gaxha nuu dxi ca la? Zanda. Gudxi Jesús ca discípulo stiʼ zuuyacaʼ caadxi cosa ni zusihuinni mayaca guinitilú guiráʼ ca cosa malu nuu ndaaniʼ Guidxilayú riʼ.
CAADXI SEÑAL
Zazaaca caadxi cosa ni zusihuinni mayaca guinitilú ca cosa malu nuu ndaaniʼ Guidxilayú. Jesús guníʼ: «Zadinde ti guidxi ne sti guidxi ne zucaalú ti reinu sti reinu, ziuu hambre ne zaca xu roʼ ti lugar ne sti lugar» (Mateo 24:3, 7). Ne laaca guniʼbe ziuu «guiráʼ clase guendahuará ti lugar ne sti lugar» (Lucas 21:11). ¿Ñee maʼ cayaca cumplir profecía ni guníʼ Jesús riʼ la?
Stale binni cayacaná pur ca guerra ni cayaca, pur hambre, ca xu roʼ ne ca guendahuará ni nuu tiempu riʼ. Guzéʼtenu ti ejemplu, lu iza 2004 guca ti xu roʼ lu océano Índico ne pur nga guca ti tsunami ne guti biaʼ 225,000 binni. Lu chonna iza guti jma de 6.9 millón binni pur pandemia COVID-19 lu guidubi Guidxilayú. Ndiʼ nga caadxi de ca cosa ni guníʼ Jesús ni zusihuinni mayaca guiluxe guidxilayú riʼ.
«CA ÚLTIMU DXI»
Biblia ná ante guinitilú guidxilayú riʼ, zabáninu lu ti tiempu ni zunibiáʼcabe casi «ca últimu dxi» (2 Pedro 3:3, 4). Casi ná 2 Timoteo 3:1-5, lu ca últimu dxi riʼ maʼ qué zuni binni ni jneza (biiyaʼ recuadru ni láʼ « Ante gueeda fin»). Tiempu riʼ, stale binni ruyubi puru si para laa, runi cosa malu, rannaxhii bueltu ne runinacaʼ binni. Ndiʼ rusihuinni mayaca gueeda fin.
¿Pabiáʼ tiempu zandaa ca últimu dxi riʼ yaʼ? Biblia ná qué zandaani stale. Ne óraca zunitilú Dios «ca ni cunitilú guidxilayú» (Apocalipsis 11:15-18; 12:12).
MAYACA GUIBÁNINU NDAANIʼ TI PARAÍSU
Maʼ gudixhe Dios padxí ne pora gunitilú guiráʼ ca cosa malu nuu ndaaniʼ Guidxilayú (Mateo 24:36). Peru «qué racaláʼdxibe guinitilú» nin ti binni (2 Pedro 3:9). Nga runi cudiibe lugar gunibiaʼnu laabe ne guzúʼbanu stiidxabe. ¿Xiñee yaʼ? Purtiʼ racaláʼdxibe guilanu ora guinitilú guidxilayú malu riʼ ne guibáninu ndaaniʼ ti Guidxilayú cubi, dxi gaca ni ti paraísu.
Maʼ gudixhe Dios gaca predicar lu guidubi Guidxilayú para ganna binni xi naquiiñeʼ guni ti guibani ndaaniʼ ti Guidxilayú cubi ra chiguni mandar Reinu stiʼ Dios. Laaca guníʼ Jesús zaca predicar ca noticia galán stiʼ Reinu lu «guidubi guidxilayú» (Mateo 24:14). Runi predicar ca testigu sti’ Jehová stale mil millón de hora ne rusiidica’ binni xi esperanza galán ruzeete’ Biblia nuu para laanu. Guníʼ Jesús zaca predicar lu guidubi Guidxilayú ante guinitilú ni.
Ma cadi candaa zanitilú ca gobiernu nuu lu Guidxilayú riʼ. Ne ni jma galán nga zanda guilanu ora guinitilú ca ni ne zabáninu ndaaniʼ ti paraísu casi maca biʼniʼ prometer Dios. Lu sti artículo ca zazíʼdinu xiruʼ zanda gúninu para guibáninu ndaaniʼ Guidxilayú cubi ca.
Ra gánnanu xi chiguizaaca lu «ca últimu dxi», racané ni laanu iguidxi esperanza stinu.
Laaca zándaca ziuuláʼdxiluʼ ca ndiʼ
TORRE STIʼ NI RAPA
¿Padxí guni mandar Reinu stiʼ Dios binni guidxilayú?
Caadxi discípulo stiʼ Jesús gunabadiidxacaʼ laabe padxí guni mandar Reinu stiʼ Dios. ¿Xi bicábibe laacaʼ yaʼ?
CANI RINABADIIDXAʼ BINNI DE BIBLIA
¿Xi rusihuinni ma’ nabáninu «lu ca últimu dxi»?
Maca bizeete’ Biblia juntu zazaaca caadxi cosa ne laacani nga señal sti’ ca últimu dxi.
