Lu ca artículo ni maʼ gudiʼdiʼ ca, bizíʼdinu mayaca gunitilú Dios guiráʼ ca cosa malu ne ca guendanagana nuu lu Guidxilayú riʼ. Peru ¿ximodo nánnanu dxandíʼ zúnibe ni yaʼ? Purtiʼ lu Stiidxaʼ Dios, Biblia, ná:

«Zidiʼdiʼ guidxilayú» (1 JUAN 2:17).

Peru laaca nanna dxíchinu dxandíʼ zalá binni dxi ca, purtiʼ nga nga ni ruzeeteʼ sti ndaa de textu riʼ:

«Ni runi ni ná Dios la? qué ziuu dxi gatiʼ».

Nga runi, para ganda guilanu dxi ca, caquiiñeʼ guzúʼbanu stiidxaʼ Dios. Peru para guzúʼbanu stiidxabe, primeru caquiiñeʼ gunibiaʼnu laabe.

Jesús guníʼ: «Zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ» (Juan 17:3). Para ganda guilanu dxi guinitilú ca cosa malu nuu ndaaniʼ Guidxilayú riʼ ne guibáninu para siempre caquiiñeʼ gunibiaʼnu Dios. Nga riníʼ cadi caquiiñeʼ si guininu dxandíʼ nuube o gánnanu caadxi cosa de laabe, sínuque caquiiñeʼ gaca xhamígunu laabe. Para ganda gaca xhamígunu tuuxa caquiiñeʼ tidiʼ tiempu, zacaca nga rizaaca né Dios. Guidúʼyanu xi rusiidiʼ Biblia ni zacané laanu para cadi gusaana de gaca xhamígunu Dios.

Para ganda guibáninu caquiiñeʼ guidoʼno guiráʼ dxi, peru Jesús guníʼ: «Cadi de pan si nga guibani binni, sínuque de guiráʼ diidxaʼ ni guiree de ruaa Jehová» (Mateo 4:4).

Lu Biblia zanda guidxélanu guiráʼ ni cayabi Jehová laanu gúninu. Pa guidúʼndanu libru nabé sicarú riʼ, zazíʼdinu xi biʼniʼ Dios dxiqué, xi cayuni yanna ne xi chiguni despué.

¿Xi zanda gúninu pa racaláʼdxinu guzúʼbanu stiidxaʼ Dios peru raca nagana para laanu gusaana de gúninu ca cosa ni qué riuuláʼdxibe? Ni zacané laanu nga gunibiáʼ chaahuinu laabe.

Guidúʼyanu ni bizaaca ti gunaa láʼ Sakura. b Biʼniʼ practicarbe pecadu sexual, peru ora bizulú cayuni estudiarbe Biblia biziidibe xi runi mandar Dios binni guni, lu 1 Corintios 6:18 ná: «¡Laguxooñeʼ de pecadu sexual!». Gunabaʼ Sakura Dios gacané laa ne zaqué gunda bichaa modo nabani. Peru cayúnirube stipa para cadi guiábabe luni sti biaje. Laa guníʼ: «Ora riníʼ iqueʼ ni cadi jneza, runeʼ orar Jehová de guidubi ladxiduáʼ, purtiʼ nanna naa siaʼ qué zanda gudxieeluáʼ ni. Ne ora runeʼ orar Jehová racaneni naa chuaaʼ jma gaxha de laa». Cásica Sakura, stale binni cayunibiáʼ Dios ne cudiibe stipa laacaʼ para guchaacaʼ modo nabánicaʼ ne guibánicaʼ modo riuuláʼdxibe (Filipenses 4:13).

Ra jma gunibiaʼnu Dios, jma zunibiaʼbe laanu ne zuuyabe laanu casi xhamígube (Gálatas 4:9; Salmo 25:14). Pa gúninu ni bizéʼtenu riʼ, zanda guilanu ora guinitilú ca cosa malu nuu ndaaniʼ Guidxilayú riʼ ne zanda guibáninu ndaaniʼ ti guidxilayú cubi ni cayuni prometer Dios. Peru ¿ximodo zaca guidxilayú ca yaʼ? Lu sti artículo ca zánnanu ni.