ARTÍCULO DE ESTUDIU 41
Ximodo zanda gacanenu ti estudiante para chúʼnisa (parte 1)
«Purtiʼ maʼ bihuinni zeeda gácatu casi ti carta stiʼ Cristu ni bicaʼdu casi xpinni Dios» (2 COR. 3:3).
CANCIÓN 78 Gusíʼdinu de Stiidxaʼ Dios
NI ZAZÍʼDINU *
Guizáʼ riecheʼ ca hermanu de ti congregación ora riuunisa ti binni ni cacaa estudiu purtiʼ maʼ nadxiicabe laa. (Biiyaʼ párrafo 1).
1. ¿Ximodo racané 2 Corintios 3:1-3 laanu gudiʼnu cuenta pabiáʼ risaca gacanenu ti estudiante chúʼnisa? (Biiyaʼ foto ni zeeda lu portada).
¿XIMODO runi sentirnu ora riuunisa ti binni ni ricaa estudiu ni nabeza lu territorio stiʼ congregación stinu? Guizáʼ riéchenu (Mat. 28:19). Ne pa laanu bidiʼnu estudiu binni ca la? jmaruʼ si riéchenu (1 Tes. 2:19, 20). Ca discípulo ni deruʼ guyuunisa zeeda gácacaʼ «casi ti carta» ni riníʼ bien de maestru stiʼ ne de congregación (biindaʼ 2 Corintios 3:1-3).
2. a) ¿Xi pregunta risaca caquiiñeʼ gúninu ne xiñee? b) ¿Ximodo gánnanu pa maʼ cudiʼnu estudiu ti binni? (Biiyaʼ nota ni zeeda ñee yaza).
2 Riéchenu stale purtiʼ raca tapa iza de cayaca informar 10,000,000 estudiu * cada beeu lu guidubi Guidxilayú. Ne biaʼ tiempu riʼ, riuunisa jma de 280,000 binni cada iza. Nuuruʼ xcaadxi millón de binni ni cacaa estudiu ni zanda gacanenu. ¿Ximodo zanda gacanenu laacabe chuʼnísacabe yaʼ? Napa Jehová paciencia binni ne cudiirube lugar gácacaʼ discípulo stiʼ Cristu. Maʼ huaxiéʼ tiempu nuu, nga runi racaláʼdxinu gúninu biaʼ gándatiʼ para gacanenu laacabe guni progresárcabe jma nagueenda ne chuʼnísacabe (1 Cor. 7:29a; 1 Ped. 4:7).
3. ¿Xi zadúʼyanu lu artículo riʼ?
3 Cumu nabé caquiiñeʼ gacanenu ca estudiante stinu chuʼnísacaʼ la? maʼ biʼniʼ Grupu ni Zániru ti encuesta ndaaniʼ ca sucursal ca. Lu artículo riʼ ne lu stobi ca, zadúʼyanu xi zanda guizíʼdinu de caadxi superintendente de circuito, misioneru ne precursor ni napa experiencia (Prov. 11:14; 15:22). * Ni guníʼcabe ca zanda gacané ni ca maestru ne ca estudiante para gánnacaʼ xi gúnicaʼ ti cueenducaʼ ni galán. Lu artículo riʼ zadúʼyanu gaayuʼ cosa ni caquiiñeʼ guni ca estudiante stinu para chuʼnísacaʼ ne ximodo zanda gacané maestru sticaʼ laacaʼ.
LAGUNI ESTUDIAR GUIRÁʼ SEMANA
Guinabadiidxanu estudiante stinu pa zanda cuínenu laa para guni estudiarnu Biblia. (Biiyaʼ párrafo 4 hasta 6).
4. ¿Xi caquiiñeʼ gánnanu de ora rudiʼnu estudiu ti binni ra puertaʼ lidxi?
4 Stale hermanu rudii estudiu binni ra puertaʼ lidxi. Neca galán gúninu ni para gacanenu binni chuulaʼdxiʼ guiziidiʼ jma la? zándaca cadi xadxí zanínenu laacabe ne cadi guiráʼ semana zuni estudiárcabe. Ne cumu racaláʼdxinu gacanérunu laacabe la? nuu tu laa rinabaʼ númeru de teléfono stiʼ estudiante stiʼ ne despué riniʼné laabe o ruseendaʼ ti mensaje ni caníʼ de Biblia ra nuube. * Zanda guni estudiárnenu laabe zacá peru qué zuni progresarbe. Naquiiñeʼ gudiʼnu cuenta zándaca qué zaca dedicárbe ne qué ziuunísabe pa qué cueebe tiempu ne gúnibe stipa para guiziidibe jma de Stiidxaʼ Dios.
5. ¿Xi bisiidiʼ Jesús lu libru stiʼ Lucas 14:27-33 ni zanda gacané laanu gacanenu ca estudiante stinu?
5 Ti biaje biquiiñeʼ Jesús chupa ejemplu para gusiidiʼ ni caquiiñeʼ guni ti binni para gaca discípulo stiʼ. Guniʼbe de ti binni ni napa gana gucuí ti torre ne de ti rey ni cheʼ lu guerra. Guniʼbe, ti hombre ni napa gana gucuí ti torre primeru zabí ne zuni calcular ca gastu stini ne zuuyaʼ pa zugaanda xpueltu para guiluxe ni, ne laaca guniʼbe naquiiñeʼ cuí rey ca primeru ne guiníʼ ique pa zanda guni ganar né ca soldadu stiʼ (biindaʼ Lucas 14:27-33). Nanna Jesús ngaca nga naquiiñeʼ guni tuuxa ni racalaʼdxiʼ gaca discípulo stiʼ, naquiiñeʼ guiníʼ ique chaahuiʼ xi guni para ugaanda ni. Para ganda guni estudiante stinu ni guníʼ Jesús la? caquiiñeʼ uguʼnu gana laa guni estudiar guiráʼ semana. ¿Ximodo zanda gúninu ni yaʼ?
6. ¿Xi zanda gúninu para ganda guni progresar estudiante stinu?
6 Primé cosa ni naquiiñeʼ gúninu nga gudiʼnu estudiu laabe jma xadxí ra puertaʼ lídxibe. Ti cosa ni zanda gúninu nga gusiénenu laabe jma de ti versículo de lu Biblia ora chigánnanu laabe. Ora maʼ biaa estudiante stinu guni estudiárnenu laa jma xadxí la? zanda guinabadiidxanu laabe pa nuu ti lugar ra zanda cuinu para guni estudiarnu. Pur ni gábibe laanu zudiʼnu cuenta pa cusisácabe estudiu ca. Ne ra tidiʼ tiempu zanda guinabadiidxanu laabe pa zanda guni estudiarbe chupa biaje ndaaniʼ semana, purtiʼ zacané ni laabe guni progresarbe jma nagueenda. Guidúʼyanu xiruʼ naquiiñeʼ guni estudiante stinu.
LAGACA PREPARAR PARA CADA ESTUDIU
Gaca prepararnu ante chigudiʼnu estudiu ne gusíʼdinu estudiante stinu ximodo zanda gúnini. (Biiyaʼ párrafo 7 hasta 9).
7. ¿Ximodo naquiiñeʼ gaca preparar ti hermanu para cada biaje chigudii estudiu?
7 Nabé risaca gaca preparar ti maestru para cada biaje chigudii estudiu. Primeru zanda guidúʼndanu información ca ne ca textu ni zeeda luni. Guyúbinu ca puntu principal stini. Guidúʼyanu xi ná título stiʼ información ca, ca subtítulo stini, ca pregunta zeeda luni, ca textu ra ná «biindaʼ», ca foto o dibuju ni nápani o guyúbinu videu ni zanda gacané laanu gusiénenu ni ná tema ca. Despué guiníʼ íquenu xi caquiiñeʼ estudiante stinu, guiníʼ íquenu ximodo zanda gusiénenu información ca laabe ti modo cadi gaca nagana para laabe guiénebe ni ne gúnibe ni caziidibe (Neh. 8:8; Prov. 15:28a).
8. Casi ná ca diidxaʼ ni guníʼ Pablo lu Colosenses 1:9, 10, ¿xi caquiiñeʼ gúninu para gacanenu ca estudiante stinu?
8 Sti modo zanda gaca prepararnu nga gábinu Jehová xi caquiiñeʼ estudiante stinu. Guinábanu laabe gacanebe laanu iquiiñenu Biblia para chindanu ndaaniʼ ladxidóʼ estudiante stinu (biindaʼ Colosenses 1:9, 10). Guiníʼ íquenu pa nuu xiixa cosa ni zanda gaca nagana para laabe guiénebe o guni crebe. Cadi guiaandaʼ laanu ni racaláʼdxinu nga gacanenu laabe chuʼnísabe.
9. ¿Xi zanda gúninu para gacanenu estudiante stinu ti gaca preparar ante gudiʼnu estudiu laa?
9 Pa qué gusaana de gudiʼnu estudiu ti binni la? zacaneni laabe gusisácabe ni maʼ biʼniʼ Jehová ne Jesús pur laabe, ne ziuuláʼdxibe guiziidibe jma (Mat. 5:3, 6). Para guiziidiʼ estudiante ca jma, naquiiñeʼ guicá íquebe ni caziidibe. Para ganda gúnibe ni, caquiiñeʼ gábinu laabe nabé risaca gaca prepararbe né lección ni chiguni estudiárnenu laabe ante chuunu ra nuube ne guiníʼ íquebe ximodo zanda gúnibe ni caziidibe. Zanda gaca prepararnenu laabe ti lección para guluinu laabe ximodo naquiiñeʼ gúnibe ni. * Gusíʼdinu laabe ximodo guidxélabe respuesta stiʼ ca pregunta ca ne gábinu laabe zanda guni marcarbe chupa chonna diidxaʼ para guietenaláʼdxibe ca respuesta ca. Despué guinábanu laabe guiniʼbe xi biénebe. Zacá zudiʼnu cuenta pa jneza biénebe información ca. Guidúʼyanu sti cosa ni caquiiñeʼ guni estudiante stinu.
GUCANÉ ESTUDIANTE STILUʼ GUINIʼNÉ JEHOVÁ GUIRÁʼ DXI
Gusíʼdinu estudiante stinu guiniʼné Jehová. (Biiyaʼ párrafo 10 ne 11).
10. ¿Xiñee risaca guʼndaʼ estudiante stinu Biblia guiráʼ dxi, ne xi naquiiñeʼ gúnibe para cueendube ni galán ora gúʼndabe ni?
10 Risaca guicaa estudiante ca estudiu guiráʼ semana, peru laaca risaca gúnibe xcaadxi cosa stúbibe. Naquiiñeʼ guiníʼnebe ne gucaadiágabe Jehová. Ti modo zanda gucaadiágabe Jehová nga gúʼndabe Biblia guiráʼ dxi (Jos. 1:8; Sal. 1:1-3). Gusíʼdinu laabe ximodo iquiiñebe programa ni láʼ Modo guiuundaʼ Biblia ni nuu lu jw.org ne zanda gaca imprimir ni. * Para cueendube ni galán ora gúʼndabe Biblia, guni animarnu laabe guiníʼ íquebe xi rusiidiʼ ni laabe de Jehová ne ximodo zanda gúnibe ni caziidibe ca lu xquendanabánibe (Hech. 17:11; Sant. 1:25).
11. ¿Ximodo zanda guiziidiʼ estudiante stinu guni orar, ne xiñee risaca gúnibe gatigá?
11 Guni animarnu estudiante stinu guni orar Jehová guiráʼ dxi. Guni orarnu ora guzulunu ne ora guilúxenu gudiʼnu estudiu, ne guininu lá estudiante stinu lu oración ca. Zacá zaziidibe guni orarbe de guidubi ladxidoʼbe ne guiníʼnebe Jehová lu lá Jesucristu (Mat. 6:9; Juan 15:16). Guiníʼ íquenu pabiáʼ zadxíñabe Jehová ora gucaadiágabe laa ra gúʼndabe Biblia guiráʼ dxi ne ora guiníʼnebe laa lu oración (Sant. 4:8). Ca costumbre galán riʼ zacané cani laabe gaca dedicarbe Jehová ne chuʼnísabe. Guidúʼyanu xiruʼ zanda gacané laabe.
GUCANÉ ESTUDIANTE STILUʼ GACA XHAMIGU JEHOVÁ
12. ¿Ximodo zanda gacanenu estudiante stinu gaca xhamigu Jehová?
12 Naquiiñeʼ chindá ni caziidiʼ estudiante ca ndaaniʼ ique, peru ni jma risaca nga chindá ni ndaaniʼ ladxidoʼbe. ¿Xiñee yaʼ? Purtiʼ ladxidóʼ binni —ra nuu ca deseu, ca emoción ne ca ni runi sentir— nga ni rucaa laa guni xiixa. Dxi bisiidiʼ Jesús binni la? bicaabe laacaʼ guiníʼ íquecaʼ. Peru stale binni guca xpínnibe purtiʼ yendabe ndaaniʼ ladxidoʼcaʼ (Luc. 24:15, 27, 32). Naquiiñeʼ guʼyaʼ estudiante ca Jehová casi ti Dios ni dxandíʼ nabani, casi tuuxa ni zanda gaca Bixhózebe, Xhamígube ne Dios stibe (Sal. 25:4, 5). Ora maʼ cudiʼnu estudiu laabe la? guluinu laabe ca cualidad sicarú stiʼ Dios (Éx. 34:5, 6; 1 Ped. 5:6, 7). Intiica tema cadúʼndanenu laabe, guluinu laabe ximodo peʼ nga Jehová. Gacanenu estudiante stinu gusisaca guendarannaxhii, guendanachaʼhuiʼ ne guendariáʼ stiʼ Jehová. Jesús guníʼ: «Ndiʼ nga primé mandamientu ne ni jma risaca. Gunnaxhii Jehová Dios stiluʼ» (Mat. 22:37, 38). Gúninu stipa para gacanenu estudiante stinu gannaxhii Dios de guidubi ladxidóʼ.
13. Biquiiñeʼ ti ejemplu para gusiéneluʼ ximodo zanda gacanenu estudiante stinu gudii cuenta ximodo peʼ nga Jehová.
13 Ora maʼ caníʼnenu estudiante stinu, gábinu laa xi runi sentirnu pur Jehová. Ndiʼ zanda gacané laabe gudiibe cuenta naquiiñeʼ gaca xhamígube Dios ne gannaxhiibe laa (Sal. 73:28). Guzéʼtenu ti ejemplu, guiníʼ íquenu cadúʼndanenu estudiante stinu ti publicación o ti textu ni cusiene de guendarannaxhii, guendanuuxpiaaniʼ, justicia ne poder stiʼ Jehová ni yendá ndaaniʼ ladxidoʼno. Zanda gábinu laabe ca cualidad riʼ nga caadxi de ca cosa ni rucaa laanu gannaxhiinu Bixhózenu ni nuu guibáʼ. Yanna guidúʼyanu sti cosa ni naquiiñeʼ guni estudiante stinu para chúʼnisa.
GUCANÉ ESTUDIANTE STILUʼ CHEʼ REUNIÓN
Guni animarnu estudiante stinu cheʼ reunión ne gúninu ni nagueenda. (Biiyaʼ párrafo 14 ne 15).
14. Casi ná Hebreos 10:24, 25, ¿xi zacané estudiante stinu guni progresar?
14 Guiranu racaláʼdxinu chúʼnisa ca estudiante stinu. Ti modo zanda gúninu ni nga guni invitarnu laacabe chécabe reunión. Ca maestru ni napa experiencia riniʼcaʼ jma nagueenda runi progresar ti estudiante ora qué rindaa para cheʼ reunión (Sal. 111:1). Nuu hermanu rusiene ca estudiante stiʼ zaziidicaʼ jma de Biblia pa checaʼ reunión. Guidúʼndanenu estudiante stinu Hebreos 10:24, 25 ne gusiénenu laabe pabiáʼ risaca nga chebe guiráʼ reunión (biindaʼ ni). Laaca zanda guluinu laabe videu ni láʼ Ximodo raca ca guendaridagulisaa stidu. * Gacanenu estudiante stinu guni stipa cheʼ reunión.
15. ¿Xi zanda gúninu para guni animarnu estudiante stinu cheʼ guiráʼ reunión?
15 ¿Xi zanda gúninu pa caʼruʼ cheʼ estudiante stinu nin ti reunión o riebe ora si randa yaʼ? Zanda güínenu laabe xiixa galán ni bizíʼdinu lu tobi de ca últimu reunión guyuunu. Jma galán gúninu ndiʼ que gábisinu laabe chebe reunión. Gudiʼnu laabe ti Torre stiʼ ni rapa o Xhiiñaʼ Dios ne modo nabáninu ni cayaca estudiar. Guluinu laabe xi chigaca estudiar lu sti reunión ni chigápanu ne guinabadiidxanu laabe xi tema de ca ni chigaca estudiar ca jma riuuláʼdxibe. Ziuuláʼdxibe ni gúʼyabe ne ni gunadiágabe lu primé reunión chebe purtiʼ cadi zacá nga rusiidiʼ xcaadxi religión ra zándaca guyebe (1 Cor. 14:24, 25). Zunibiaʼbe xcaadxi hermanu ni zanda chinándabe ejemplu stiʼ ne ni zanda gacané laabe chuʼnísabe.
16. a) ¿Xi zanda gúninu para gacanenu estudiante stinu chúʼnisa? b) ¿Xi zazíʼdinu lu sti artículo ca?
16 Yanna, ¿xi zanda gúninu para gacanenu estudiante stinu chúʼnisa? Para gacanenu laabe gúʼyabe nabé risaca guni estudiarbe, guni animarnu laabe guni estudiarbe guiráʼ semana ne gaca prepararbe ante gudiʼnu estudiu laabe. Gusíʼdinu laabe guiníʼnebe Jehová guiráʼ dxi ne gácabe xhamigu. Ne guni animarnu laabe chebe reunión. (Biiyaʼ recuadru ni láʼ « Ni naquiiñeʼ guni ti binni ni cacaa estudiu»). Lu sti artículo ca zazíʼdinu gaayuʼ cosa ni caquiiñeʼ guni ca maestru ni rudii estudiu para gacanecaʼ estudiante sticaʼ chuʼnísacaʼ.
CANCIÓN 76 Ziuuluʼ nayecheʼ ora gucheecheluʼ diidxaʼ
^ párrafo 5 Gusiidiluʼ ti binni riníʼ ni gacaneluʼ laa guiníʼ ique o guni xiixa cosa gadxé. Textu stiʼ iza 2020, Mateo 28:19, bisietenalaʼdxiʼ ni laanu pabiáʼ risaca gudiʼnu estudiu binni ne gusíʼdinu laacaʼ xi naquiiñeʼ gúnicaʼ para chuʼnísacaʼ ti gácacaʼ discípulo stiʼ Jesucristu. Lu artículo riʼ ne lu stobi ca zadúʼyanu ximodo zanda gúninu dxiiñaʼ riʼ jma galán.
^ párrafo 2 IDEA RISACA: Pa siempre rinínenu ti binni para gusíʼdinu laa ca ni rusiidiʼ Biblia ne riquiiñenu ti publicación o rinínenu laa de ni zeeda luni, maʼ cudiʼnu estudiu laa. Zanda guni informarnu laabe casi ti estudiu despué de maʼ biluinu laabe ximodo rudiʼnu estudiu ne maʼ yegánnanu laabe chupa biaje ne rábinu qué zusaana de guni estudiarbe.
^ párrafo 3 Guiropaʼ artículo ni chigaca estudiar riʼ, laaca riete sugerencia ni biree lu Xhiiñaʼ Reinu ni Rúninu julio de 2004 hasta mayo de 2005 lu tema ni láʼ «Gúʼndanenu binni modo ganda iniisi jma lu Stiidxaʼ Dios».
^ párrafo 4 Guiráʼ modo runi predicarnu, naquiiñeʼ guni cumplir ca publicador né ley de protección de datos ni nuu ndaaniʼ guidxi ca.
^ párrafo 9 Biluíʼ laabe videu de tapa minutu ni láʼ Bisiidiʼ estudiante stiluʼ gaca preparar. Nuu ni lu JW Library®, guyé ra ná MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.
^ párrafo 10 Guyé ra ná LIBRU NE REVISTA > LIBRU NE FOLLETU.
^ párrafo 14 Guyuu lu JW Library®, guyé ra ná MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
