1, 2. a) ¿Xi huayuni caadxi gobiernu ca xpinni Jehová, ne xi runi ca hermanu stinu? b) ¿Xiñee zanda chuʼnu nayecheʼ neca sanándacabe laanu? (Laaca zanda guiniʼluʼ ni zeeda lu ca foto ni rihuinni lu portada).

 TIEMPU riʼ, ndaaniʼ jma de 30 guidxi ne territorio nuu prohibidu dxiiñaʼ stinu. Ndaaniʼ caadxi de ca lugar ca maʼ biseguyoo ca autoridad ca hermanu ne ca hermana stinu. ¿Xiñee yaʼ? Para Jehová la? caʼruʼ gúnicabe cosa malu. Ni rúnicabe nga ruundacabe ne runi estudiárcabe Biblia, riniʼnécabe xcaadxi de ni runi crécabe ne ridagulisaanécabe ca hermanu stícabe. Laaca qué riuucabe lu política. Peru neca nabé feu modo rizananda gobiernu ca xpinni Dios, qué rucheenecaʼ laabe b ne rusihuínnicaʼ ni jma risaca para laacaʼ nga guni adorarcaʼ Jehová, ne pur nga nabánicaʼ nayecheʼ.

² Zándaca huayuuyaluʼ foto stiʼ caadxi de ca hermanu riʼ ne rihuinni lúcabe nayecheʼ nuucabe. Nuucabe nayecheʼ purtiʼ nánnacabe riechené Jehová laacabe purtiʼ cadi cucheenécabe laa (1 Crón. 29:17a). Jesús guníʼ: «Dichoso ca ni rizananda binni laacaʼ pur rúnicaʼ ni jneza [...]. Laguiecheʼ ne laguichesa de guendanayecheʼ, purtiʼ naroʼbaʼ premiu nuu para laatu» (Mat. 5:10-12).

3. Casi ná Hechos 4:19, 20, ¿xi biʼniʼ ca apóstol ora guzanándacabe laacaʼ ne xiñee?

³ Cadiʼdiʼ ca hermanu stinu lu ti guendanagana cásica  gudiʼdiʼ ca apóstol lu primé siglu dxi guzananda binni laacaʼ pur cayuni predicarcaʼ de Jesús. Stale biaje biʼniʼ mandar ca juez stiʼ tribunal stiʼ ca judíu que laacabe gusaana de guiníʼcabe de lu lá Jesús (Hech. 4:18; 5:27, 28, 40). ¿Xi biʼniʼ ca apóstol que yaʼ? (Biindaʼ Hechos 4:19, 20). Nánnacabe ti binni ni jma napa autoridad nga biʼniʼ mandar laacabe guni predicárcabe guidxi que ne guiníʼcabe de Cristu (Hech. 10:42). Ngue runi né stale guendanadxibalú guníʼ Pedro ne Juan, laacaʼ ne xcaadxi apóstol, qué zuzuubacaʼ stiidxacabe, sínuque zuzuubacaʼ stiidxaʼ Dios. Ne gúdxicaʼ laacabe qué zusaana de guiniʼcaʼ de Jesús. Casi xa ñábicabe ca juez que: «¿Xiñee caniʼtu zacá? ¿Ñee natu jma nápatu autoridad que Dios la?».

4. Casi riete lu Hechos 5:27-29, ¿xi ejemplu galán bisaana ca apóstol para ca xpinni Cristu, ne ximodo zanda chinándanu ni?

⁴ Guizáʼ galán ejemplu bisaana ca apóstol que para ca xpinni Cristu, purtiʼ dede yanna rinándanu ni ná ca diidxaʼ riʼ: «Jma naquiiñeʼ guzúʼbadu stiidxaʼ Dios casi gobernante que guzúʼbadu stiidxaʼ hombre» (biindaʼ Hechos 5:27-29). Despué de gudíñecabe ca apóstol que purtiʼ cadi cucheenecaʼ Dios, bireecaʼ nezalú tribunal stiʼ ca judíu «ziyéchecaʼ purtiʼ cudii Dios lugar laacaʼ guni sufrircaʼ pur lá Jesús», ne qué nusaana de ñuni predicarcaʼ (Hech. 5:40-42).

5. ¿Gunáʼ nga ca pregunta ni chiguicábinu?

⁵ Ni biʼniʼ ca apóstol que rucaani laanu guiníʼ íquenu ca pregunta riʼ. Ra bizuubaʼ ca apóstol que stiidxaʼ Dios lugar de stiidxaʼ hombre, ¿ximodo qué nucheenécabe mandatu ni ná «guzuubaʼ guiráʼ binni stiidxaʼ ca autoridad»? (Rom. 13:1). Ne ¿ximodo nga chinándanu «ni ná ca gobiernu ne ca xaíque guidxi», casi guníʼ apóstol Pablo, ne cadi guchéʼnenu Dios, gobernante stinu ni jma risaca? (Tito 3:1).

6. a) ¿Tuu nga «ca autoridad» ni riete lu Romanos 13:1, ne xi naquiiñeʼ gúninu? b) ¿Xi nánnanu de ca gobernante stiʼ guidxilayú riʼ?

⁶ (Biindaʼ Romanos 13:1). Diidxaʼ «ca autoridad» ni zeeda lu versículo riʼ, caniʼni  de ca gobernante ni napa poder luguiáʼ xcaadxi binni. Laanu, ca xpinni Cristu, ruzúʼbanu stiidxaʼ ca gobernante. Racanécabe chuʼ guendariuudxi ne ruuyacabe guni binni ni ná ley, ne nuu biaje racanécabe xquidxi Jehová (Apoc. 12:16). Nga runi rinábacabe laanu gudiʼnu impuestu, guidxíbinu laacabe ne guni respetarnu laacabe (Rom. 13:7). Peru napa ca gobiernu autoridad purtiʼ Jehová rudii ni laacaʼ. Bisihuinni Jesús zacá ni dxi caniʼné gobernador romano Poncio Pilato laa. Ora gudxi Pilato laabe napa autoridad para guuti laabe o para gundaa laabe, bicabi Jesús: «Qué ñápaluʼ nin ti autoridad luguiaʼyaʼ pa ñaca qué nudii Dios ni lii» (Juan 19:11). Cásica Pilato, ca gobernante ne ca políticu ni nuu tiempu riʼ maca nuu pabiáʼ si autoridad nápacaʼ.

7. ¿Pora nga qué zuzúʼbanu stiidxaʼ ca gobernante, ne xi naquiiñeʼ gánnacabe?

⁷ Laanu, ca xpinni Cristu, ruzúʼbanu stiidxaʼ ca gobernante pa cadi cucheené ley stícabe ca ley stiʼ Jehová. Peru qué zuzúʼbanu stiidxacabe ora guinábacabe laanu gúninu xiixa ni qué riuuladxiʼ Dios o gucueezacabe laanu para cadi gúninu xiixa ni racalaʼdxiʼ Dios gúninu. Guzéʼtenu ti ejemplu, zándaca guinábacabe ca joven Testigu chuʼcaʼ lu ejércitu stiʼ xquídxicaʼ. c O zanda gucueezacabe laanu para maʼ cadi guni predicarnu ne cadi guidagulisaanu o guinábacabe laanu maʼ cadi iquiiñenu Biblia ne ca publicación stinu. Ora qué riquiiñeʼ ca gobernante ca autoridad sticaʼ jneza, casi ora rizanándacaʼ ca xpinni Cristu, zabidxi Dios cuenta laacabe. ¡Cayuuyaʼ Jehová ni cayúnicabe! (Ecl. 5:8).

8. ¿Xiñee maʼ gadxé Jehová de «ca autoridad» ni nuu?

⁸ «Ca autoridad» ca zanda gacanecaʼ binni ne zanda guni mandarcaʼ xcaadxi. Peru qué riníʼ diʼ nga perfectu laacabe, ne cadi laacabe nga autoridad ni jma risaca lu Guidxilayú. Peru nuu tobi ni naca perfectu ne guirutiʼ ruʼ jma napa autoridad que laa, laabe nga Jehová Dios. Tapa biaje riete lu Biblia Jehová nga Supremo o ni jma risaca (Dan. 7:18, 22, 25, 27).

9. ¿Xi biʼyaʼ profeta Daniel lu caadxi visión?

⁹ Lu ca visión ni biʼyaʼ profeta Daniel rihuinni gástiruʼ sti gobernante ni jma napa autoridad que Jehová. Primeru biiyabe tapa bestia naroʼbaʼ ni zeeda gaca ca potencia mundial ni guyuu dxiqué: Babilonia, Medopersia, Grecia ne Roma. Laaca biiyabe potencia mundial ni cayuni mandar tiempu riʼ: Reino Unido ne Estados Unidos (Dan. 7:1-3, 17). Despué, biiyaʼ Daniel zuba Jehová lu trono stiʼ ni nuu guibáʼ (Dan. 7:9, 10). Ni biʼyaʼ profeta riʼ despué caguixhená ni ca gobernante ni nuu yanna.

10. Casi ná Daniel 7:13, 14, 27, ¿tuu nga rudii Jehová autoridad lu Guidxilayú, ne xi rusiidiʼ ni laanu de laabe?

¹⁰ (Biindaʼ Daniel 7:13, 14, 27). Biiyaʼ Daniel raxha Jehová autoridad ca gobernante ne rudiibe ni ca ni ruuyabe zanda guicaani ne ni napa jma poder que ca gobernante. ¿Tu laacabe yaʼ? Jesucristu, ni naca «tuuxa casi xiiñiʼ hombre», ne 144,000, «ca santo stiʼ ni jma risaca», laacabe nga chiguni gobernárcabe ne qué ziuu dxi guinitilú gobiernu stícabe (Dan. 7:18). Nánnanu Jehová nga ni jma risaca, ne laasi zanda guni ni bizéʼtenu riʼ.

11. ¿Xiruʼ guníʼ Daniel ni rusihuinni jma risaca Jehová que guiráʼ gobernante?

 ¹¹ Ni biʼyaʼ Daniel lu visión que rusihuinni xiixa ni maca guniʼbe ante. Profeta que guníʼ Dios ni nuu guibáʼ rindisaʼ rey ne rucuí rey. Ne laaca guniʼbe: «Dios ni nuu jma luguiáʼ lu guidubi naca guidxilayú nga Gobernante stiʼ guiráʼ binni, ne rudiibe gobiernu ca tutiica gacaláʼdxibe» (Dan. 2:19-21; 4:17). ¿Ñee huandisaʼ Jehová tuuxa rey ne maʼ bicuibe stobi la? Huayúnibe ni pue.

12. Bizeeteʼ ximodo gundisaʼ Jehová caadxi rey dxiqué. (Biiyaʼ dibuju).

¹² Maʼ bisihuinni Jehová nuu jma luguiáʼ de «ca autoridad». Guzéʼtenu chonna ejemplu. Gupa faraón xquidxi Jehová de esclavu Egipto ne stale biaje qué ninabe nudiibe lugar laacaʼ nireecaʼ de raqué. Peru gulee Dios xquidxi de raqué ne biiti faraón ndaaniʼ nisadóʼ Xiñáʼ (Éx. 14:26-28; Sal. 136:15). Biʼniʼ Belsasar, rey de Babilonia, ti saa ne bicaalube Señor stiʼ guibáʼ ne bisisácabe ca dios de oro ne de plata stibe lugar de nusisácabe Jehová (Dan. 5:22, 23). Peru bisituí Dios lú hombre ni rudxiibaʼ laca laa riʼ. Gueelaʼ que ca biiticabe laabe, ne ca medo ne ca persa gucuaacaʼ reinu stibe (Dan. 5:28, 30, 31). Rey Herodes Agripa I, de guidxi Palestina, biitibe apóstol Santiago ne despué biseguyoobe apóstol Pedro, para guutibe laa. Peru qué nudii Dios lugar ñuni Herodes ni cá ique guni. «Oraqueca biʼniʼ huará ti ángel stiʼ Jehová laabe» ne gútibe (Hech. 12:1-5, 21-23).

13. Bizeeteʼ ximodo binitilú Jehová grupu de gobernante ni bicaalú laabe.

¹³ Laaca maʼ bisihuinni Jehová jma napa poder que ca gobernante ni rieeguʼ para gucaalucaʼ laabe. Gudíndebe pur ca israelita ne gucanebe laacaʼ guinitilú 31 rey cananeu ni bieeguʼ para gucaalú laacaʼ. Ne laaca gucanebe ca israelita guni ganarcaʼ stale layú stiʼ Tierra Prometida (Jos. 11:4-6, 20; 12:1, 7, 24). Laaca gucanebe ca israelita gunitilucaʼ rey Ben-Hadad ne 32 rey siriu ni yegucaalú guidxi Israel (1 Rey. 20:1, 26-29).

14, 15. a) ¿Xi guníʼ rey Nabucodonosor ne Darío de modo runi mandar Jehová? b) ¿Xi guníʼ ti hombre ni bicaa salmo de Jehová ne de xquidxi?

¹⁴ Stale biaje maʼ bisihuinni Jehová laa  nga ni jma risaca. Guzéʼtenu yanna ni bizaaca stiʼ rey de Babilonia ni láʼ Nabucodonosor. Bichabe naróʼ stibe pur stipa stibe, autoridad ni nápabe ne gloria stibe, ne qué ñácabe humilde ne niniʼbe Jehová si nga naquiiñeʼ guisaca, ngue runi biʼniʼ Jehová cheʼ xpiaanibe. Despué de biguetaʼ xpiaaniʼ Nabucodonosor, bisisaca Dios ni nuu jma luguiáʼ lu guidubi naca Guidxilayú ne gúnnabe qué zusaana Jehová de guni mandar. Ne guniʼbe guirutiʼ zanda gucueeza Dios para cadi guni ni cá ique guni (Dan. 4:30, 33-35). Despué de qué nucheené Daniel Jehová ne bilá laabe de ndaaniʼ bizé ra nuu lión, ndiʼ nga ni biʼniʼ mandar rey Darío: «Guiráʼ ca binni ni nabeza lu reinu stinneʼ: naquiiñeʼ guidxíbicaʼ Dios stiʼ Daniel. Purtiʼ laabe nga Dios ni nabani ne ni qué zanitilú. Qué ziuu dxi guinitilú Reinu stibe ne qué zusaana de guni mandarbe» (Dan. 6:7-10, 19-22, 26, 27).

¹⁵ Sicaríʼ guníʼ ti hombre ni bicaa salmo: «Maʼ biʼniʼ Jehová xiixa para cadi guiree ca cosa malu ni cá ique ca nación ca gúnicaʼ; maʼ bixhiabe ni cá ique ca guidxi ca». Ne laaca bicaabe: «Nayecheʼ nuu guidxi ni napa Jehová casi Dios stiʼ, guidxi ni maʼ gulí para gaca herencia stiʼ» (Sal. 33:10, 12). ¡Guizáʼ racané ca diidxaʼ riʼ laanu para cadi guchéʼnenu Jehová!

16. ¿Xidé naquiiñeʼ chuʼnu seguru, ne xiñee? (Biiyaʼ dibuju).

¹⁶ Maʼ bidúʼyanu xi biʼniʼ Jehová dxiqué. Yanna, ¿xi zuni Jehová maʼ cadi candaa yaʼ? Zulabe ca xpínnibe ni guzuubaʼ stiidxabe lu tiempu «ziuu stale yuubaʼ» (Mat. 24:21; Dan. 12:1). Zúnibe ni dxi gucaalú ti grupu de guidxi roʼ, o Gog de Magog, ca xpinni Jehová. Ne pa 193 guidxi ni nuu lu Naciones Unidas nga grupu riʼ la? qué zanda guni ganárcabe Jehová, ni jma risaca ne ca ejércitu stiʼ. Cayuni prometer Jehová laanu:  «Dxandíʼ peʼ zusihuinneʼ guendanandxóʼ stinneʼ, zusisacaʼ naa ne zuluéʼ naa nezalú stale guidxi; ne napa xidé gánnacabe naa nga Jehová» (Ezeq. 38:14-16, 23; Sal. 46:10).

17. ¿Xi zazaaca ca rey stiʼ guidxilayú ne xi zazaaca ca ni canazá sin donda nezalú Jehová?

¹⁷ Ra gucaalú Gog xquidxi Dios zuzulú Armagedón, ne racá nga gunitilú Jehová «ca rey nuu lu guidubi guidxilayú» (Apoc. 16:14, 16; 19:19-21). Peru «ca ni runi jneza ca nga zabánicaʼ lu Guidxilayú riʼ, ne ca ni qué gapa donda nga ziaanacaʼ luni» (Prov. 2:21).

18. ¿Xi maʼ gudixhe ique stale xpinni Cristu guni, ne xiñee? (Daniel 3:28).

¹⁸ Biaʼ dxi huabani binni, stale xpinni Cristu huayuucaʼ dispuestu guseguyoocabe laacaʼ o dede guuticabe laacaʼ pur nadxiicaʼ Jehová, Rey ni jma nandxóʼ sticaʼ. Maʼ gudixhe íquecabe cadi gucheenécabe Dios cásica guionnaʼ hebreu ni bilá Dios para cadi ñáticaʼ ndaaniʼ ti horno de bele (biindaʼ Daniel 3:28).

19. ¿Xi zuuyaʼ Jehová ora guni juzgar ca xpinni, ne xi naquiiñeʼ gúninu yanna?

¹⁹ Gunna David pabiáʼ risaca nga cadi guchéʼnenu Dios. Sicaríʼ bicaabe: «Zaguixhe Jehová sentencia stiʼ ca guidxi ca. Biʼniʼ juzgar naa, Jehová, según ca cosa jneza huayuneʼ, según ca cosa ni bineʼ para cadi gucheeniaʼ lii» (Sal. 7:8). Laaca guniʼbe: «Pa qué gucheeniáʼ lii ne guneʼ ni jneza zulá ni naa» (Sal. 25:21). Modo jma galán zanda guibáninu nga cadi guchéʼnenu Jehová intiica si guizaaca. Zacá zuni sentirnu casi biʼniʼ sentir salmista que ora bicaa: «Nayecheʼ nga canazá ca binni ni qué ruchee, ca ni canazá casi ná ca ley stiʼ Jehová» (Sal. 119:1).