NABÉ napa fe ca stipa. Neca Binidxabaʼ racalaʼdxiʼ guuti laanu en sentidu espiritual, fe ca racané ni gusuinu «ca flecha ni cá gui ni undaa binidxaba» laanu (Efes. 6:16). Laaca né fe ca zanda gudxiilunu ca guendanagana ni jma naroʼbaʼ ni zeeda gaca casi dani. Jesús gudxi ca discípulo stiʼ: «Pa ñapa tu fe, neca biaʼ ti biidxi mostaza la? ñanda ñabi tu dani ri iree de ra nuu, che sti ladu, ne ñe ni» (Mat. 17:20). Fe ca zanda guquidxi laanu en sentidu espiritual, galán guiníʼ íquenu lu ca pregunta riʼ: ¿Xii nga fe? ¿Ximodo naquiiñeʼ gaca ladxidoʼno para gusihuínninu ni? ¿Ximodo zanda gúninu ni jma naguidxi? Ne ¿tuu nga naquiiñeʼ gápanu fe? (Rom. 4:3).

Cadi purtiʼ si runi crenu cani dxandíʼ zeeda lu Biblia nga guininu nápanu fe, purtiʼ Biblia rusiidiʼ dede ca demonio runi crecaʼ nuu Dios ne ridxíbicaʼ (Sant. 2:19). Yanna, ¿xii nga fe yaʼ?

Biblia rusiene nuu chupa modo guiénenu diidxaʼ fe. Primé, nani «fe nga chuʼnu seguru de ca cosa ni cabézanu», nga riníʼ chuʼnu seguru zácani (Heb. 11:1a). Pa nápanu fe la? zuni crenu dxandíʼ nga guiráʼ ni riníʼ Jiobá ne zuni cumplirbe cani. Dios gudxi ca israelita ca diidxaʼ riʼ: «Pa laatu nuxhiatu pactu ni napaniáʼ ridxíʼ ne huaxhinni, ne maʼ qué ñuucani tiempu gudixheʼ cani, óraque pactu ni bineniáʼ David siervu stinneʼ, laaca nixiá ni» (Jer. 33:20, 21). ¿Ñee huayuu biaje gápanu duda qué zaree gubidxa ne pur nga maʼ qué chuʼ ridxíʼ ne huaxhinni la? Pa qué runi dudarnu de ca ley stiʼ naturaleza ni racané gudii Guidxilayú riʼ buelta lugar stiʼ ne gudii ni buelta gubidxa ¿ñee zuni dudarnu de Creador stinu, ni gudixhe ca ley ca, guni cumplir ni maʼ guníʼ la? Coʼ njaʼ (Is. 55:10, 11; Mat. 5:18).

Guiropa, fe nga cani «runi crenu dxandíʼ zaca neca qué rihuinni cani», ndiʼ riníʼ, neca qué ridúʼyanu xiixa cosa peru dxandíʼ nuu ni (Heb. 11:1b). Guidúʼyanu ti ejemplu. Guníʼ ique ninabadiidxaʼ ti baʼduhuiiniʼ lii, ximodo nánnaluʼ dxandíʼ nuu bi. Neca qué huayuu dxi gúʼyaluʼ ni peru qué zaca nagana para lii gusiéneluʼ ni laabe: casi ora guicaaluʼ bi, cani runi ni ne xcaadxi cosa. Ora maʼ biene baʼduhuiiniʼ riʼ lii pur ni gúdxiluʼ laa, zuni crebe nuu xcaadxi cosa neca qué gúʼyabe cani. Zacaca nga fe ca, rusihuínnini dxandíʼ zaca cani runi crenu neca qué ridúʼyanu cani (Rom. 1:20).

Para gápanu fe la? naquiiñeʼ gápanu prueba, primeru caquiiñeʼ guiziidiʼ chaahuinu cani dxandíʼ zeeda lu Biblia (1 Tim. 2:4). Peru cadi ngasi. Pablo bicaa rihuinni fe ca dede ndaaniʼ «ladxidóʼ cabe» (Rom. 10:10). Cadi guni crésinu cani dxandíʼ zeeda de Dios, sínuque caquiiñeʼ gusisácanu  cani. Zacá zanda gusihuínninu fe ca, nga riníʼ guibáninu modo ná Dios (Sant. 2:20). Tu qué rusisaca cani dxandíʼ zeeda de Dios la? neca nuu stale prueba ni guni convencer laabe, zándaca gucaanabe cani ne gúnibe ni ná íquebe dede gúnibe cosa malu (2 Ped. 3:3, 4; Jud. 18). Pur nga la? cadi guiráʼ binni biiyaʼ milagru stiʼ Jesús dxiqué gúpacaʼ fe (Núm. 14:11; Juan 12:37). Espíritu santu stiʼ Dios rudii ni fe cani nadxii si ni dxandíʼ ne nanalaʼdxiʼ guendarusiguii (Gál. 5:22; 2 Tes. 2:10, 11).

Tobi de ca siervu stiʼ Dios ni gupa ti fe naguidxi dxiqué nga rey David (Heb. 11:32, 33). Peru cadi guiráʼ diʼ familia stibe guca casi laabe. Casi bíʼchibe ni jma huaniisi, Eliab la? bisihuinni qué gapa fe ora gudindené laabe, purtiʼ gucaláʼdxibe ñánnabe xiñee cucaalú Goliat laacabe (1 Sam. 17:26-28). Guirutiʼ tu ralené fe ne qué runi heredarnu ni de bixhózenu ne jñaanu. Nga runi, gupa David fe pur amistad ni gupané Dios.

Lu Salmo 27, guníʼ David ximodo beeda gapa ti fe naguidxi (versículo 1). Guníʼ íquebe modo bibánibe dxiqué ne xi biʼniʼ Jiobá ca xhenemígube (versículo 2 ne 3). Guizáʼ bisisácabe tabernáculo stiʼ Jiobá (versículo 4) ne biʼniʼ adorárnebe xcaadxi israelita Dios raqué (versículo 6). Ne guníʼnebe Jiobá lu ti oración para gánnabe xi gúnibe (versículo 7 ne 8). Ne laaca gucaláʼdxibe nusiidiʼ Jiobá laabe sabe lu neza stiʼ (versículo 11). Ne cumu risaca fe ca para laabe la? dede guníʼ íquebe paraa ñuube pa qué ñápabe fe (versículo 13).

Zanda gápanu fe casi gupa David pa guiníʼ íquenu ne gúninu cani rieeteʼ lu Salmo 27. Cumu cani dxandíʼ zeeda lu Biblia racané cani laanu gápanu fe la? nga runi laga jma guidúʼndanu Biblia ne ca publicación ca jma fácil zaca para laanu gápanu fe, purtiʼ laani nga ti cualidad ni rudii espíritu santu (Sal. 1:2, 3). Ora guidúʼndanu naquiiñeʼ cueenu tiempu para guiníʼ íquenu de laani, purtiʼ zacá rusihuínninu cudiʼnu xquíxepeʼ Jiobá, ne jma ziuuláʼdxinu gusihuínninu fe stinu ra reunión ne ora guinínenu sti binni de esperanza ni nápanu (Heb. 10:23-25). Ora qué gusaana de guni orarnu laaca rusihuínninu fe ni nápanu (Luc. 18:1-8). Nga runi cadi gusaana de guni orarnu Jiobá, purtiʼ nuunu seguru rizaaláʼdxibe laanu (1 Tes. 5:17; 1 Ped. 5:7). Rucaa fe ca laanu gúninu ni jneza, ne ora gúninu ni riguidxi fe stinu (Sant. 2:22).

Gueelaʼ ante gati Jesús, gudxi ca discípulo stiʼ: «Laguni cre Dios, ne laca laguni cre  naa» (Juan 14:1). Nga runi caquiiñeʼ gápanu fe Jesús, cadi Jiobá si. ¿Ximodo yaʼ? Guidúʼyanu chonna modo zanda gúninu ni.

Primé, guidúʼyanu rescate ca casi ti regalu ni bidii Dios cada tobi de laanu. Apóstol Pablo guníʼ: «Nabane ni purti rune cre Xiiñi Dios ni nadxii naa ne bidii xpida pur naa» (Gál. 2:20). Ora nápanu fe Jesús, riuʼnu seguru para laanu nga rescate ca, pur laani runi perdonar Dios ca pecadu stinu, rudiini ti esperanza de guibáninu sin gátinu ne zacá bisihuinni Dios dxandíʼ nadxii laanu (Rom. 8:32, 38, 39; Efes. 1:7). Laani zacaneni laanu para gúninu ni jneza (2 Tes. 2:16, 17).

Guiropa, pur rescate stiʼ Jesús zanda guidxíñanu Jiobá ora guni orarnu laa né confianza, para guiá laanu ne gaca nachaʼhuiʼ né laanu órapeʼ caquiiñenu ni (Heb. 4:15, 16; 10:19-22). Oración ca jma racané ni laanu para gucueezanu laanu de gucheʼnu (Luc. 22:40).

Guionna, guzúʼbanu stiidxaʼ Jesús. Apóstol Juan bicaa: «Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiáʼ» (Juan 3:36). Racá ridúʼyanu guníʼ Juan gadxé nga gapa tobi fe ne gadxé nga cadi guzuubaʼ diidxaʼ. Nga runi, rusihuínninu nápanu fe Jesús ora ruzúʼbanu diidxaʼ. Ne ruzúʼbanu stiidxabe ora rinándanu ley stibe, o rúninu guiráʼ ni bisiidibe (Gál. 6:2). Laaca ruzúʼbanu stiidxabe ora rinándanu ni ná «mozo ni nuu xpiaani ne ni runi jneza» (Mat. 24:45). Pa gúninu ni cayuni mandar Jesús laanu la? zápanu stipa ni zacané laanu gudxiilunu ca guendanagana stinu (Mat. 7:24, 25).

Ti biaje, sicaríʼ gudxi ti hombre Jesús: «Rune cre, señor. Ucané naa gune cre jma» (Mar. 9:24). Hombre que gupa fe, peru gúcabe modestu ne gúnnabe caquiiñeʼ gápabe jma fe. Cásica laabe, laanu laaca ziuu ora zaquiiñenu jma fe. Ne yanna nga zanda guquídxinu ni jma. Casi maʼ bidúʼyanu ca, rúninu ni ora ridúʼndanu Stiidxaʼ Dios ne riníʼ íquenu de laani, ndiʼ zacané gudiʼnu xquíxepeʼ Jiobá. Laaca raca fe stinu naguidxi ora runi adorárnenu ca hermanu stinu, rinínenu xcaadxi de esperanza ni nápanu ne ora qué rusaana de guni orarnu. Pa guquídxinu fe ni nápanu Dios ne gúninu guiráʼ ndiʼ la? zacaanu ti ndaayaʼ naroʼbaʼ: qué zusaana de gannaxhiibe laanu (Jud. 20, 21).