1, 2. Casi ná 1 Timoteo 6:20, ¿xi caquiiñeʼ guni Timoteo?

ORA napa tuuxa ti cosa nabé risaca la? nuu biaje rudii ni sti binni para gapa ni. Guzéʼtenu ti ejemplu, zándaca uguube bueltu stibe ndaaniʼ bancu para guiaapaʼ ni ne zacá cadi gunítibe ni o cuánacabe ni. Nga runi nánnanu xii nga gusigápanu tuuxa ti cosa nabé risaca.

² (Biindaʼ 1 Timoteo 6:20). Bisietenalaʼdxiʼ Pablo Timoteo maʼ gucuaa xiixa nabé risaca: maʼ biziidiʼ xi chiguni Dios pur binni. Laaca bidii Jehová Timoteo privilegiu de guni predicar stiidxaʼ ne gusiidiʼ binni (2 Tim. 4:2, 5). Gudxi Pablo laabe naquiiñeʼ gápabe privilegiu ni gucuaabe. Laaca maʼ bidii Jehová laanu caadxi cosa nabé risaca. ¿Xi laacani yaʼ? ¿Ne xiñee caquiiñeʼ gápanu tesoro ca yaʼ?

3, 4. Bizeeteʼ caadxi razón ni rusihuinni guizáʼ risaca ca ni dxandíʼ ni zeeda lu Biblia.

³ Cumu nachaʼhui Jehová la? cusiidibe laanu ca ni dxandíʼ ni zeeda lu Biblia, Stiidxabe. Risácacani purtiʼ rusiidicani laanu ximodo gaca xhamígunu Jehová ne ximodo zanda guibáninu nayecheʼ. Ora ricaanu ca ni dxandíʼ rusiidiʼ Biblia ne rúninu ni nácani la? maʼ qué rácanu esclavu stiʼ ca cosa ni cadi dxandíʼ ni rusiidiʼ ca religión falsu ne maʼ qué runi cometernu pecadu sexual (1 Cor. 6:9-11).

⁴ Ca ni dxandíʼ ni zeeda lu Stiidxaʼ Dios laaca risácacani purtiʼ ca binni si humilde ne ca «ni maʼ nuu para guicaa guendanabani ni qué zaluxe» nga ca ni ruluíʼ Jehová ni (Hech. 13:48). Tiempu riʼ, rudii ca binni riʼ lugar gusiidiʼ  mozo ni nuu xpiaaniʼ laacaʼ ni zeeda lu Biblia (Mat. 11:25; 24:45). Laasinu qué ñanda diʼ nizíʼdinu ca ni rusiidiʼ Biblia. Ne gástiruʼ sti cosa jma risaca que guiénenu cani (Prov. 3:13, 15).

5. ¿Xi privilegiu maʼ bidii Jehová laanu?

⁵ Laaca maʼ bidii Jehová laanu privilegiu de gusíʼdinu xcaadxi binni ni dxandíʼ de laabe ne ca ni chigúnibe (Mat. 24:14). Guizáʼ risaca mensaje riʼ purtiʼ racané ni binni gaca parte de familia stiʼ Jehová ne pur laani zanda guicaacaʼ guendanabani ni qué zaluxe (1 Tim. 4:16). Pa rúninu stale o huaxiéʼ lu xhiiñaʼ Reinu, cayuni apoyarnu dxiiñaʼ ni jma risaca nuu tiempu riʼ (1 Tim. 2:3, 4). ¡Ti privilegiu naroʼbaʼ nga guninenu Dios dxiiñaʼ! (1 Cor. 3:9).

6. ¿Xi bizaaca caadxi xpinni Cristu?

⁶ Tiempu bibani Timoteo, qué nusisaca caadxi xpinni Cristu privilegiu de guninecaʼ Dios dxiiñaʼ. Guzéʼtenu ti ejemplu, gunnaxhii Demas ca cosa ni nuu ndaaniʼ guidxilayú ne pur nga bicaanabe privilegiu de guninebe Pablo xhiiñaʼ Dios (2 Tim. 4:10). Bisaana Figelo ne Hermógenes de guni predicar purtiʼ zándaca bidxíbicaʼ sananda binni laacaʼ cásica guzanándacabe Pablo (2 Tim. 1:15). Guca Himeneo, Alejandro ne Fileto apóstata ne bixhélecaʼ de xquidxi Dios (1 Tim. 1:19, 20; 2 Tim. 2:16-18). Gunnaxhii ca binni riʼ Jehová ti tiempu, peru maʼ qué nusisácacabe ca cosa ni dxandíʼ risaca.

7. ¿Xi trampa riquiiñeʼ Binidxabaʼ para gusaba laanu?

⁷ ¿Xi trampa riquiiñeʼ Binidxabaʼ para maʼ cadi gusisácanu tesoro ni maʼ bidii Jehová laanu? Guidúʼyanu caadxi de laacani. Riquiiñebe entretenimientu ne ca ni ridiʼdiʼ lu televisión para gucaabe laanu guiníʼ íquenu ne gúninu cosa ni zucaa laanu gusaana de gannaxhiinu Jehová chaahuiʼ chaahuiʼ ne maʼ cadi chinándanu ca ley stiʼ. Laaca riquiiñebe presión de grupu ne sanándacabe laanu para guidxíbinu ne gusaana de guni predicarnu. Ne laaca nuube quítebe laanu para gucaʼdiáganu ca apóstata ca ni «ná nuu xpiaaniʼ» ne guixélenu de xquidxi Dios (1 Tim. 6:20, 21).

8. ¿Xi rizíʼdinu de ni bizaaca Daniel?

⁸ Pa qué gápanu cuidadu la? chaahuiʼ chaahuiʼ zándaca gusaana de gannaxhiinu Jehová. Guzéʼtenu ni bizaaca Daniel, * guizáʼ riuuláʼdxibe quítebe  videojuego. Sicaríʼ guniʼbe: «Bizuluáʼ gudxiteʼ videojuego dxi napaʼ chii iza. Dxi bizuluáʼ la? gudxiteʼ juegu ni qué gapa cosa malu. Peru chaahuiʼ chaahuiʼ maʼ gudxiteʼ juegu ni napa violencia ne ra riree demonio». Dede yendá ti tiempu gudxítebe ca videojuego que quince hora guiráʼ dxi. Daniel guníʼ: «Nannaʼ cadi jneza ca videojuego que ne cuxheleʼ cani naa de Jehová. Peru biguidxi ladxiduáʼ ne guníʼ iqueʼ cadi naquiiñeʼ guneʼ ni ná Biblia». Ni bizaaca Daniel rusiidiʼ ni laanu zanda guxheleʼ ca entretenimientu ca laanu de Jehová. Ne pa guizaacanu ndiʼ, zanda gunítinu ca cosa risaca ni maʼ bidii Jehová laanu.

9. Casi ná 1 Timoteo 1:18, 19, ¿xi bichaaga Pablo Timoteo?

⁹ (Biindaʼ 1 Timoteo 1:18, 19). Bichaaga Pablo Timoteo «casi ti soldadu» ne gúdxibe laa cadi gusaana de «tinde». Peru cadi caníʼ diʼ Pablo de ti guerra ra cadinde binni. Yanna, ¿xiñee zeeda gaca ca xpinni Cristu casi ti soldadu ni rié lu guerra yaʼ? ¿Xi cualidad caquiiñeʼ gapa ca soldadu stiʼ Cristu? Ilustración ni biquiiñeʼ Pablo riʼ rusiidiʼ ni laanu gaayuʼ cosa ni zacané laanu guinaazeʼ dxíchinu ni dxandíʼ. Guidúʼyanu xi laacani.

10. ¿Xii nga caquiiñeʼ gúninu para guibáninu «modo ná Dios», ne xiñee risaca ni?

¹⁰ Guibáninu «modo ná Dios». Ti buen soldadu leal laa. Rudxiilú né guiráʼ stipa stiʼ para guni proteger tuuxa ni nadxii o ni rusisaca. Guluu Pablo gana Timoteo guibani modo ná Dios, ndiʼ riníʼ gannaxhiibe Dios ne gácabe leal (1 Tim. 4:7). Laga jma gannaxhiinu ne gácanu leal Jehová, jma zanaazeʼ dxiichinu ca ni dxandíʼ rusiidibe (1 Tim. 4:8-10; 6:6).

11. ¿Xiñee cadi naquiiñeʼ guireʼnu gana?

¹¹ Cadi guireʼnu gana. Pa racalaʼdxiʼ ti soldadu guni cumplir né dxiiñaʼ stiʼ la? cadi naquiiñeʼ guiree gana. Guca Timoteo ti buen soldadu stiʼ Cristu purtiʼ yenándabe conseju stiʼ Pablo ora gudxi laabe gucaanabe deseu malu, gápabe cualidad ni riuulaʼdxiʼ Dios ne guidxaagabe ca hermanu (2 Tim. 2:22). Ne para ganda gúnibe ni la? cadi naquiiñeʼ guireebe gana. Laanu laaca ngaca nga naquiiñeʼ gúninu pa racaláʼdxinu gudxíʼlunu ca deseu malu stinu (Rom. 7:21-25). Laaca cadi naquiiñeʼ guireʼnu gana pa racaláʼdxinu guchaʼnu modo laanu ne guibáninu modo ná Dios (Efes. 4:22, 24). Ne pa maʼ bidxáganu despué de bibiguétanu de dxiiñaʼ, zándaca caquiiñeʼ gúninu stipa para chuunu reunión (Heb. 10:24, 25).

12. ¿Xi zacané laanu gusíʼdinu jma jneza?

¹² Pa racalaʼdxiʼ ti soldadu ganna iquiiñeʼ arma stiʼ la? caquiiñeʼ guni practicar stale biaje. Zacaca nga laanu ca xpinni Cristu, laaca naquiiñeʼ guizíʼdinu iquiiñenu Stiidxaʼ Dios (2 Tim. 2:15). Ora riuunu reunión rizíʼdinu caadxi modo zanda gúninu ni. Peru pa racaláʼdxinu gacanenu binni gudii cuenta pabiáʼ risaca ca ni dxandíʼ rusiidiʼ Biblia la? naquiiñeʼ gápanu ti programa personal para guni estudiarnu Biblia. Caquiiñeʼ guidúʼndanu Stiidxaʼ Dios para iguidxi fe stinu. Peru cadi naquiiñeʼ guidúʼndasinu ni. Caquiiñeʼ guni meditarnu ni ná ca versículo stini ne guni investigarnu xi maʼ bisiene ca publicación stinu de laani para guiénenu ni ne ganda gusiénenu ni binni (1 Tim. 4:13-15). Zacá ziuʼnu listu para iquiiñenu  Biblia ne gusíʼdinu xcaadxi. Peru cadi naquiiñeʼ guiduʼndanésinu laacabe ti textu. Racaláʼdxinu guiénecabe ni ne gúʼyacabe ximodo zacané ni laacabe. Nga runi, pa guidúʼndanu Biblia guiráʼ dxi, zusíʼdinu jma jneza (2 Tim. 3:16, 17).

13. Casi ná Hebreos 5:14, ¿xiñee risaca iquiiñenu xquendabiaaninu jneza?

¹³ Iquiiñenu xquendabiaaninu jneza. Ti soldadu naquiiñeʼ ganna ora zeeda ti peligru ne naquiiñeʼ guni xiixa para cadi gacaná. Laanu laaca naquiiñeʼ gánnanu pora nga zedadxiña xiixa ni guniná laanu ne gúninu xiixa para cadi gacananu (biindaʼ Hebreos 5:14; Prov. 22:3). Guzéʼtenu ti ejemplu, naquiiñeʼ cuinu ca entretenimientu stinu. Stale de ca programa ni ridiʼdiʼ lu televisión ne lu ca película ca nabé rihuinni pecadu sexual lúcani. Laanu ca xpinni Cristu, rucáʼnanu entretenimientu riʼ purtiʼ zándaca chaahuiʼ chaahuiʼ gusirá ni guendarannaxhii ni nápanu Jehová. Nánnanu nanalaʼdxiʼ Dios guni practicar binni pecadu sexual ne ca binni ni runi practicar cani racanacaʼ ne runinacaʼ xcaadxi (Efes. 5:5, 6).

14. Ra biquiiñeʼ Daniel xquendabiaaniʼ jneza, ¿ximodo gucané ni laa?

¹⁴ Daniel, hombrehuiiniʼ ni bizéʼtenu lu párrafo 8, bizulú bidii cuenta cadi jneza quiteʼ videojuego ni napa violencia ne demonio. Biyúbibe información lu Watchtower Library para gusaanabe viciu que. ¿Xi bizaaca yaʼ? Maʼ qué niguítebe ca videojuego ni runiná laabe, biʼniʼ cancelarbe ni ne maʼ qué nidxaagabe xcaadxi binni riguite videojuego. Sicaríʼ guniʼbe: «Lugar de quiteʼ videojuego la? bineʼ xcaadxi cosa ne bidxaagaʼ ca hermanu de congregación». Tiempu riʼ maʼ precursor ne ancianu Daniel.

15. ¿Xiñee ti peligru nga ni riníʼ ca apóstata?

¹⁵ Cásica biʼniʼ Timoteo, laanu laaca naquiiñeʼ gudiʼnu cuenta ti peligru nga guiráʼ ni riníʼ ca apóstata (1 Tim. 4:1, 7; 2 Tim. 2:16). Guzéʼtenu ti ejemplu, zándaca guiníʼcabe cosa ni cadi dxandíʼ de ca hermanu o gucaacabe laanu guni dudarnu de xquidxi Jehová. Zanda gusirá ca guendarusiguii riʼ fe stinu. Cadi guni crenu ca guendarusiguii ca, purtiʼ zeeda cani de ca «hombre ni qué riníʼ ique  jneza, ca ni maʼ qué ganna xii nga ni dxandíʼ», ca ni cuyubi tinde ne gutinde diidxaʼ (1 Tim. 6:4, 5). Racaláʼdxicaʼ guni crenu laacaʼ ne cadi gápanu confianza ca hermanu stinu.

16. ¿Xi naquiiñeʼ gúninu para cadi guiréʼchunu?

¹⁶ Cadi guiréʼchunu. Casi ti «buen soldadu stiʼ Cristu Jesús», caquiiñeʼ guicá ique Timoteo guni cumplir ministeriu stiʼ ne cadi gudii lugar cueechú ca cosa material ne xcaadxi cosa laa (2 Tim. 2:3, 4). Cásica bíʼnibe, laanu laaca cadi naquiiñeʼ chuuláʼdxinu gápanu stale cosa material ni zanda cueechú laanu. Zanda gusirá «poder stiʼ bidxichi» guendarannaxhii ni nápanu Jehová, maʼ cadi gusisácanu Stiidxabe ne maʼ cadi guinínenu binni de laani (Mat. 13:22). Caquiiñeʼ guibáninu né ni caquiiñesinu ne iquiiñenu tiempu ne stipa stinu para guyúbinu Reinu stiʼ Dios primé lu xquendanabáninu (Mat. 6:22-25, 33).

17, 18. ¿Xi caquiiñeʼ gúninu para cadi gusaana de gaca xhamígunu Jehová?

¹⁷ Chuʼnu listu para gúninu xiixa nagueendaca. Naquiiñeʼ guiníʼ ique ti soldadu dede ante xi guni ora gucaalúcabe laa. Pa racaláʼdxinu gápanu ca cosa ni maʼ bidii Jehová laanu la? caquiiñeʼ gúninu xiixa nagueendaca ora guidúʼyanu zedadxiña ti peligru. Yanna, ¿xi zacané laanu chuʼnu listu yaʼ? Guiníʼ íquenu dede ante xi gúninu.

¹⁸ Guzéʼtenu ti ejemplu, ora raca xiixa eventu, stale biaje ante guzuluni rábicabe binni pa ladu guiree pa gaca xiixa cosa. ¿Xiñee yaʼ? Purtiʼ pa málasi gaca xiixa, zánnacabe pa ladu guireecabe nagueendaca. Zacaca nga laanu, naquiiñeʼ gánnanu xi gúninu pa málasi guiree xiixa información stiʼ ca apóstata o xiixa cosa inmoral o ni napa violencia ora caquiiñenu Internet, cadúʼyanu ti película o ti programa lu televisión. Pa nuunu listu, zúninu xiixa nagueendaca para cadi gusaana de gaca xhamígunu Jehová ne chuʼnu nayá nezalube (Sal. 101:3; 1 Tim. 4:12).

19. ¿Xi ndaayaʼ zacaanu pa gápanu ca cosa risaca ni maʼ bidii Jehová laanu?

¹⁹ Laanu ca xpinni Cristu, caquiiñeʼ gápanu ca cosa galán ni maʼ bidii Jehová laanu: ca ni dxandíʼ ni zeeda lu Biblia ne privilegiu de gusíʼdinu ni xcaadxi binni. Pa gúninu ni la? Qué zuchiiñaʼ conciencia stinu laanu, zabáninu galán ne ziuʼnu nayecheʼ ora gacanenu binni gunibiáʼ Jehová. Zanda gacanebe laanu para gápanu ca cosa risaca ni maʼ bidiibe laanu (1 Tim. 6:12, 19).