1, 2. ¿Ximodo zanda gacané Eclesiastés 11:6 laanu para guni predicarnu?

NDAANIʼ caadxi guidxi rucaadiaga binni ca noticia galán stiʼ Reinu. Laapeʼ ni nga ni caquiiñecabe. Peru ndaaniʼ xcaadxi guidxi qué riuulaʼdxiʼ binni guiníʼ de Dios o de Biblia. Modo tiica si naca binni neza ra runi predicarnu, racalaʼdxiʼ Jehová guni predicarnu dede ora guiluxe dxiiñaʼ riʼ.

² Ora guedandá dxi ni maʼ gudixhe Jehová, maʼ qué zaca predicar ne «oraqueruʼ nga gueeda fin» (Mat. 24:14, 36). Laga cabézanu guedandá dxi ca, ¿xi zanda gúninu para cadi gusaanadxinu nanu, casi ná Eclesiastés 11:6? (Biindaʼ ni). *

3. ¿Xi zadúʼyanu lu artículo riʼ?

³ Lu artículo ni gudiʼdiʼ ca bidúʼyanu tapa cosa ni zacané laanu gácanu ti buen «pescador de binni» (Mat. 4:19). Lu artículo riʼ zadúʼyanu chonna cosa ni zacané laanu para chuuláʼdxinu guni predicarnu neca guidxaagalunu intiica guendanagana. Laaca zazíʼdinu xiñee risaca guicá íquenu dxiiñaʼ stinu, gápanu paciencia ne gaca fe stinu naguidxi.

4. ¿Xiñee caquiiñeʼ guicá íquenu dxiiñaʼ ni maʼ bidii Jehová laanu?

⁴ Maca guníʼ Jesús xi zazaaca lu ca últimu dxi ne ximodo zaca binni. Laaca guniʼbe zanda gucaa ca cosa riʼ ca discípulo  stibe maʼ cadi guni predicarcaʼ. Nga runi, gúdxibe laacaʼ: «Lagataná» (Mat. 24:42). Tiempu bibani Noé guyuu stale cosa ni bicaa binni cadi gulabi ni ná Dios, ne tiempu riʼ laaca zanda guizaacanu ni bizaaca ca binni que (Mat. 24:37-39; 2 Ped. 2:5). Nga runi caquiiñeʼ guicá íquenu dxiiñaʼ ni maʼ bidii Jehová laanu.

5. Casi ná Hechos 1:6-8, ¿dede pa guidubi zaca predicar?

⁵ Tiempu riʼ, caquiiñeʼ quixhe íquenu guni predicarnu ca noticia galán stiʼ Reinu. Maca guníʼ Jesús zaroobaʼ dxiiñaʼ riʼ ne zácaruʼ ni stale iza despué de gátibe (Juan 14:12). Guti si Jesús, stale de ca discípulo stibe bibiguetaʼ bíʼnicaʼ dxiiñaʼ de pescador. Despué de biásabe de lade gueʼtuʼ, biquiiñebe poder stibe para guinaazecaʼ stale benda. Ne óraque gúdxibe laacaʼ ni jma risaca nga gácacaʼ pescador de binni (Juan 21:15-17). Ne ante guibiguétabe guibáʼ, gúdxibe ca discípulo stibe zaca predicar dede ca lugar jma zitu ni nuu lu Guidxilayú (biindaʼ Hechos 1:6-8). Caadxi iza despué, lu ti visión biluiʼbe apóstol Juan ni zazaaca «lu dxi stiʼ Señor». * Ndiʼ nga tobi de ca cosa ni biʼyaʼ Juan: cayacané ca ángel gaca predicar ca «noticia galán ni qué ziuu dxi guinitilú para [...] binni de guiráʼ nación, tribu, idioma ne guidxi» (Apoc. 1:10; 14:6). Rihuinni dxichi racalaʼdxiʼ Jehová gúninu dxiiñaʼ naroʼbaʼ riʼ dede ora guiluxe ni.

6. ¿Xi caquiiñeʼ gúninu para guicá íquenu guni predicarnu?

⁶ Ti cosa ni zacané laanu guicá íquenu guni predicarnu nga guiníʼ íquenu guiráʼ ni runi Jehová para gacané laanu. Guzéʼtenu ti ejemplu, rudiibe laanu stale guendaró espiritual: publicación ni raca imprimir ne ni nuu lu Internet,  grabación de audio ne videu, ne programa ni nuu lu JW Broadcasting. Guiníʼ íquenu ndiʼ: sitiu oficial de Internet stinu nuuni lu jma de ti mil idioma (Mat. 24:45-47). Neca nuudinde binni pur política, religión ne pur bueltu, ca jma de xhono millón de xpinni Dios ni nuu lu guidubi Guidxilayú nuunu tobi si casi ti familia. Guzéʼtenu ti ejemplu, viernes 19 de abril de 2019, lu guidubi Guidxilayú biiyaʼ ca testigu stiʼ Jehová ti videu ra guca analizar textu stiʼ dxi ca. Gueelaʼ que guca reunir 20,919,041 binni para guietenaláʼdxicaʼ guendaguti stiʼ Jesús. ¿Cadi dxandíʼ ti privilegiu nga guidúʼyanu gaca ndiʼ ca dxi stinu ne gácanu parte de laani la? Ora guiníʼ íquenu ca ni bizéʼtenu riʼ, rucaa ni laanu guicá íquenu guni predicarnu.

7. ¿Ximodo racané ejemplu stiʼ Jesús laanu guicá íquenu guni predicarnu?

⁷ Sti cosa ni zacané laanu guicá íquenu guni predicarnu nga ejemplu stiʼ Jesús. Qué nudiibe lugar nucueeza xiixa laabe para guni predicarbe (Juan 18:37). Qué ñábabe lu trampa stiʼ Binidxabaʼ ora gudxi laabe zudii laabe «guiráʼ guidxi nuu lu guidxilayú ne guiráʼ cosa risaca stícani» nin ora gucalaʼdxiʼ binni ñuni laabe rey (Mat. 4:8, 9; Juan 6:15). Laaca qué nuyúbibe gápabe stale cosa risaca ne qué nidxíbibe ora bicaalú binni laabe (Luc. 9:58; Juan 8:59). Ora tidiʼ fe stinu prueba, caquiiñeʼ guicá íquenu guni predicarnu casi guníʼ Pablo biʼniʼ Jesús, pa gúninu ni la? qué zareʼnu gana ne qué zadxáganu (Heb. 12:3).

8. ¿Ximodo nga ti binni ni napa paciencia, ne xiñee risaca ni tiempu riʼ?

⁸ Ti binni ni napa paciencia ribeza guchaa xiixa situación. Pa cabézanu guchaa xiixa cosa ni cayuniná laanu o guizaaca xiixa ni cabézanu maʼ xadxí, caquiiñeʼ gápanu paciencia. Profeta Habacuc guleza maʼ cadi chuʼ guendaridinde ndaaniʼ guidxi Judá (Hab. 1:2). Ca discípulo stiʼ Jesús guníʼ íquecaʼ zuuyaʼ «binni Reinu stiʼ Dios» ne zulá Jesús laacaʼ de lu náʼ ca romano (Luc. 19:11). Ne laanu cabézanu guedandá dxi cuee Dios cosa malu ne gueedanebe ti Guidxilayú cubi ra gaca ni jneza (2 Ped. 3:13). Peru caquiiñeʼ gápanu paciencia ne cuézanu dede ora maʼ gudixhe Jehová gúnini. Guidúʼyanu caadxi modo rusiidiʼ Jehová laanu gápanu paciencia.

9. ¿Xi prueba nápanu napa Jehová paciencia?

⁹ Zanda chinándanu ejemplu stiʼ Jehová purtiʼ laa napa paciencia. Bidiibe Noé stale tiempu para guzáʼ arca que ne gaca «predicador de justicia» (1 Ped. 3:20; 2 Ped. 2:5, nota). Bicaadiágabe Abrahán ora gunabaʼ laabe cadi gunitilube ca binni malu ni nabeza Sodoma ne Gomorra (Gén. 18:20-33). Stale iza gupa Jehová paciencia guidxi Israel (Neh. 9:30, 31). Ne tiempu riʼ laaca napa Jehová paciencia purtiʼ cudiibe binni tiempu para gaca arrepentircaʼ ne gácacaʼ xhamígube (Juan 6:44; 1 Tim. 2:3, 4; 2 Ped. 3:9). Ejemplu stiʼ Jehová rusiidiʼ laanu naquiiñeʼ gápanu paciencia ora runi predicarnu ne rusíʼdinu binni. Pur ti ejemplu ni zeeda lu Biblia cusiidiʼ Jehová laanu gápanu paciencia. Guidúʼyanu ejemplu ca.

10. ¿Xi rusiidiʼ ejemplu stiʼ campesinu ni riete lu Santiago 5:7, 8 laanu?

¹⁰ (Biindaʼ Santiago 5:7, 8). Ejemplu stiʼ ti campesinu rusiidiʼ laanu gápanu paciencia. Nuu yaga nagueenda riniisi,  peru stale jma rindaa para guiniisi, jmaruʼ si ca ni rudii cuananaxhi. Ndaaniʼ guidxi Israel de dxiqué, biaʼ xhoopaʼ beeu rindaa para guiasa cosecha: rudxiibaʼ ca campesinu que semiá sticaʼ despué de ca primé nisaguié ni riaba galaa de beeu octubre ne rindísacaʼ cosecha sticaʼ despué de ca últimu nisaguié ni riaba galaa de beeu abril (Mar. 4:28). Pa nácanu binni nuu xpiaaniʼ la? zápanu paciencia casi ejemplu stiʼ campesinu ni ruzeeteʼ Biblia. Peru zándaca gaca ni nagana para laanu.

11. Pa gápanu paciencia, ¿ximodo zacané ni laanu ora guni predicarnu?

¹¹ Cumu binni ruchee laanu la? pa ñanda si nagueendaca nidúʼyanu nibeendunu ni galán. Peru pa tuuxa napa ti layú ra riguu cosecha, caquiiñeʼ guni preparar layú ca primeru, gudxiibaʼ cosecha stiʼ, gusiá ni ne guzee ni. Zacaca nga naquiiñeʼ gúninu ora gacanenu binni gaca discípulo. Caquiiñeʼ cueenu tiempu para gacanenu estudiante stinu cadi guni menu stobi ne gannaxhii binni. Ora rucaanáʼ binni laanu la? caquiiñeʼ gápanu paciencia para cadi guireʼnu gana. Peru laaca caquiiñeʼ gápanu paciencia ora riuulaʼdxiʼ binni gucaadiaga laanu, purtiʼ qué zanda gucaʼnu ti estudiante guiroobaʼ fe stiʼ nagueenda. Guyuu ora dede né ca discípulo stiʼ Jesús guca nagana para laacaʼ guiénecaʼ xi nuube gusiidibe laacaʼ (Juan 14:9). Cadi guiaandaʼ laanu zanda gudxíʼbanu ne guzeʼnu, peru Dios nga rusiniisi ni (1 Cor. 3:6).

12. ¿Ximodo rusihuínninu nápanu paciencia ora runi predicarnu ca familia stinu?

¹² Zanda gaca nagana para laanu gápanu paciencia ora guni predicarnu ca familia stinu. Lu Eclesiastés 3:1, 7, zeeda ti principiu ni zanda gacané laanu, racá ná: «Nuu [...] tiempu para cadi guininu ne tiempu para guininu». Neca  zanda gucaʼnu binni guiziidiʼ jma de Dios pur conducta stinu la? siempre ruyúbinu guinínenu binni de Stiidxaʼ Dios (1 Ped. 3:1, 2). Runi predicarnu ne rusíʼdinu né stale gana, peru nápanu paciencia guiráʼ binni, dede né ca familia stinu.

13, 14. Bizeeteʼ caadxi ejemplu ni zanda gacané laanu gápanu paciencia.

¹³ Nuu stale ejemplu de dxiqué ne de tiempu riʼ ni rusihuinni zanda gápanu paciencia. Tobi de laacabe nga Habacuc, gucalaʼdxiʼ hombre riʼ niree cosa malu, ngue runi guniʼbe ca diidxaʼ riʼ: «Lu puestu de guardia stinneʼ ziaanaʼ» (Hab. 2:1). Apóstol Pablo guníʼ racalaʼdxiʼ gunduuxeʼ ministeriu stiʼ. Neca zacá, gúpabe paciencia ora bidiibe «testimonio completu de ca noticia galán» (Hech. 20:24).

¹⁴ Guzéʼtenu ejemplu stiʼ ti guendaxheelaʼ ni guca graduar de Escuela de Galaad ne yeguni servircaʼ ndaaniʼ ti guidxi ra huaxiéʼ Testigu nuu ne ra casi guiráʼ binni cadi cristianu laacaʼ. Huaxiéʼ binni bidxélacabe ni racalaʼdxiʼ guiziidiʼ de Biblia. Ne ca xcompañérucabe ni runi servir ndaaniʼ stiʼ guidxi gatigá rábicaʼ laacabe panda binni maʼ gucanecaʼ chuʼnisa. Neca huaxiéʼ ziroobaʼ dxiiñaʼ ra nuucabe que la? gúpacabe paciencia ne qué nusaana de ñuni predicárcabe. Despué de xhono iza de cayuni predicárcabe raqué, guca tobi de ca estudiante stícabe Testigu. ¿Xi rusiidiʼ ca ejemplu de dxiqué ne de tiempu riʼ laanu yaʼ? Rusiidiʼ ni laanu qué ñácacabe nachaabaʼ ne qué ñaanadxí nácabe, ne guluu ndaayaʼ Jehová laacabe pur paciencia stícabe. Nga runi, chinándanu «ejemplu stiʼ ca binni ni gucuaa promesa stiʼ Dios, purtiʼ gúpacaʼ fe ne paciencia» (Heb. 6:10-12).

15. ¿Xiñee raca fe stinu jma naguidxi ora runi predicarnu?

¹⁵ Cumu runi crenu mensaje ni runi predicarnu la? racaláʼdxinu gucaadiaga guiráʼ binni ni. Nápanu confianza ca promesa ni zeeda lu Stiidxaʼ Dios (Sal. 119:42; Is. 40:8). Maʼ bidúʼyanu maʼ guca cumplir caadxi de profecía ni zeeda lu Biblia ca dxi stinu riʼ. Laaca maʼ bidúʼyanu ximodo ruchaa xquendanabani binni ora rúnicaʼ ni rusiidiʼ Biblia laacaʼ. Guiráʼ ni bizéʼtenu riʼ rucaani laanu guni predicarnu ca noticia galán stiʼ Reinu de guiráʼ binni.

16. Casi ná Salmo 46:1-3, ¿xiñee zaca fe ni nápanu Jehová ne Jesús jma naguidxi pa qué gusaana de guni predicarnu?

¹⁶ Laaca nápanu fe Jehová, Dios stiʼ mensaje ni runi predicarnu, ne laaca nápanu fe Jesús, ni maʼ gulibe para gaca Rey lu Reinu stibe (Juan 14:1). Intiica guizaaca, ra nuu Jehová nga zanda guilanu ne rudii stipa laanu (biindaʼ Salmo 46:1-3). Laaca nuunu seguru Jesús nga cayuni dirigir predicación riʼ dede guibáʼ né poder ne autoridad ni maʼ bidii Jehová laa (Mat. 28:18-20).

17. Bizeeteʼ ti ejemplu ni rusihuinni xiñee cadi naquiiñeʼ gusaana de guni predicarnu.

¹⁷ Pur fe ni nápanu Dios, nanna dxíchinu zaguu Jehová ndaayaʼ stipa ni cayúninu, nuu biaje dede modo cadi cabézanu ni (Ecl. 11:6). Guzéʼtenu ti ejemplu, guiráʼ dxi, stale binni ridiʼdiʼ neza ra zuhuaa ca exhibidor ne ca mexaʼ de publicación stinu. ¿Ñee huabeendunu ni galán pur modo runi predicarnu riʼ la? ¡Huabeendunu pue! Nuestro Ministerio del Reino de noviembre de 2014 ruzeeteʼ ni bizaaca ti gunaa ni rié universidad. Gudixhe íquebe  gucaabe ti artículo ni caníʼ de ca testigu stiʼ Jehová. Qué nidxélabe nin ti Yoo stiʼ Reinu, peru málasi biiyabe ti mexaʼ de publicación ni nuu fuera de ra universidad ra runi estudiarbe, raqué bidxélabe información ni caquiiñebe para gucaabe artículo que. Ra gudiʼdiʼ tiempu guyuunísabe, ne yanna maʼ precursora regular laabe. Ejemplu casi ni bizéʼtenu riʼ racané ni laanu cadi gusaana de guni predicarnu, purtiʼ rusihuinni ni nuuruʼ binni ni racalaʼdxiʼ gucaadiaga mensaje stiʼ Reinu.

18. ¿Xiñee nuunu seguru zaluxe de gaca predicar Reinu stiʼ Jehová ora maʼ gudíxhebe ni?

¹⁸ Zanda chuʼnu seguru zaluxe dxiiñaʼ de gaca predicar ora maʼ gudixhe Jehová ni. Guiníʼ íquenu ni bizaaca ca dxi bibani Noé. Bisihuinni Jehová maʼ nanna pora chiguni xiixa. Ti gayuaa gande iza ante maca nánnabe padxí gaca Diluvio que. Caadxi iza despué gunábabe Noé guzáʼ ti arca. Biaʼ cuarenta o cincuenta iza gudiʼdiʼ para bizáʼ Noé arca que, guizáʼ bíʼnibe dxiiñaʼ. Neca qué nucaadiaga binni laabe, qué nusaana de ñuni predicarbe dede ora guníʼ Jehová maʼ zanda chuʼ ca maniʼ que ndaaniʼ arca que. Ne dxi gudixhe Jehová ni, biteeguʼ puertaʼ stiʼ arca que (Gén. 6:3; 7:1, 2, 16).

19. ¿Xi zabeendunu pa qué gusaanadxinu nanu?

¹⁹ Maʼ cadi candaa, zaníʼ Jehová maʼ qué zaca predicar, casi xa ñaca «zuteegube puertaʼ» stiʼ guidxilayú stiʼ Binidxabaʼ ne zedanebe ti Guidxilayú cubi ra gaca ni jneza. Laga cabézanu guedandá dxi ca la? chinándanu ejemplu stiʼ Noé, Habacuc ne xcaadxi xpinni Dios ni qué nusaanadxí náʼ. Guicá íquenu xhiiñanu, gápanu paciencia ne gápanu fe Jehová ne ca promesa stiʼ.