¿Xi zanda guizíʼdinu de ca milagru ni biʼniʼ Jesús?

ZÁNDACA zadxagayaaluʼ ora gánnaluʼ qué riete diidxaʼ «milagru» lu ca Evangeliu ra cuzeeteʼ de xpida Jesús. Diidxaʼ riʼ raca traducir ni casi dý·na·mis, ni riníʼ «poder» (Lucas 8:46). Laaca zanda guiénenu ni casi «habilidad» o «xcaadxi cosa nandxóʼ» (Mateo 11:20; 25:15). Ti hombre ni nanna de lu Biblia guníʼ «ca milagru riʼ guca ca ni pur poder stiʼ Dios».

Laaca zanda gaca traducir diidxaʼ té-ras, casi señal o milagru (Juan 4:48; Hechos 2:19). Ora biʼyaʼ binni señal ne ca milagru biʼniʼ Jesús nabé bidxagayaacaʼ (Marcos 2:12; 4:41; 6:51; Lucas 9:43).

Lu diidxaʼ griegu biquiiñecabe diidxaʼ sē·méi·on, o «señal» ni zeeda de Dios para guiníʼcabe ca milagru ni biʼniʼ Jesús. Robert Deffinbaugh ti hombre ni nanna de Biblia guníʼ «ca milagru riʼ nga señal ni rusihuinni dxandíʼ zeeda Jesús de Dios».

¿Magia la? o poder ni zeeda de Dios?

Ca milagru ruzeeteʼ Biblia biʼniʼ Jesús cadi magia ca ni, sínuque zeeda ca ni de «poder stiʼ Dios», ne bihuinni zacá ni dxi gulee Jesús demonio luguiáʼ ti hombrehuiiniʼ (Lucas 9:37-43). ¿Rábiluʼ nagana guca para Dios ni jma napa poder guni nga pa lu Biblia ná «stale stipa nápabe la»? (Isaías 40:26) ¡Coʼ, qué ñaca ni nagana para laabe!

Neca lu ca Evangeliu riete biʼniʼ Jesús biaʼ 35 milagru, peru qué ganna chaahuinu pabiáʼ peʼ bíʼnibe. Lu Mateo 14:14, ná ora biʼyaʼ Jesús stale binni «biá laacabe ne bisianda ca ni huará», peru qué ruzeeteʼ ni panda peʼ binni huará bisiándabe.

Ca milagru biʼniʼ Jesús que bisihuinni ca ni nácabe Xiiñiʼ Dios, Mesías ni maca ca gueeda que. Biblia ruzeeteʼ Dios nga bidii poder Jesús para guni ca milagru que. Apóstol Pedro guníʼ Jesús nga «hombre biseendaʼ Dios ne biquiiñeʼ laabe para guni milagru, guni cosa ni guidxayaa binni ne bidii señal pur mediu de laabe, ne nánnatu dxandíʼ guca guiráʼ ndiʼ» (Hechos 2:22). Laaca guníʼ Pedro, «gulí Dios Jesús ne espíritu santu ne bidii poder laabe, guzabe lu guidxilayú ne bíʼnibe cosa galán ne bisiándabe ca ni cayuniná Binidxabaʼ laa, purtiʼ nuuné Dios laabe» (Hechos 10:37, 38).

Bisiidiʼ Jesús de Reinu stiʼ Dios ne biʼniʼ milagru. Lu Marcos 1:21-27 ruzeeteʼ casi ca guyuulaʼdxiʼ binni ca ni bisiidibe que laaca guyuuláʼdxicaʼ ca milagru ni bíʼnibe. Lu versículo 22 ruzeeteʼ nabé bidxagayaa binni pur modo rusiidibe ne lu versículo 27 ná nabé bidxagayaa binni ora bíʼyacaʼ guleebe ti demonio luguiáʼ ti hombrehuiiniʼ. Pur mensaje ni biʼniʼ predicar ne pur ca milagru ni biʼniʼ Jesús dxiqué bisihuinni ca ni laabe nga Mesías ni chigueeda que.

Qué niníʼ Jesús laa nga Mesías; sínuque bisihuínnibe ni pur ca ni bíʼnibe ne ca ni guniʼbe, zaqué bihuinni Dios nga bidii poder laabe para bíʼnibe ca milagru que. Dxi maʼ qué nusisácacabe laabe casi Mesías, guniʼbe: «Jma risaca testimonio ni rudieeʼ que stiʼ Juan, purtiʼ rusihuinni ca dxiiñaʼ ni bisaana Bixhozeʼ lu nayaʼ guneʼ, ca dxiiñaʼ ni runeʼ, Bixhozeʼ biseendaʼ naa» (Juan 5:36).

Dxandíʼ biʼniʼ Jesús milagru

¿Xi rusihuinni dxandíʼ guca ca milagru ni biʼniʼ Jesús? Guidúʼyanu caadxi prueba ni rusihuinni dxandíʼ bíʼnibe ca milagru ca.

Ora biʼniʼ Jesús ca milagru que, qué ñúnibe ca ni para si gusisaca binni laabe. Sínuque biyúbibe guisaca lá Dios pur ca milagru ni bíʼnibe. Ante gusiándabe ti hombre ni qué ruuyaʼ la? guniʼbe chigúnibe milagru ca «para guʼyaʼ binni xi zanda guni Dios» (Juan 9:1-3; 11:1-4).

Tiempu bibani Jesús guyuu stale binni ni biʼniʼ practicar magia, ne guyuu stale curanderu, peru qué niquiiñeʼ Jesús nin tobi de ca ndiʼ para bisianda binni. Guidúʼyanu ximodo bisiándabe chupa hombre ni qué ruuyaʼ: «Guizáʼ biá Jesús laacabe, gudaʼnaʼ guié lúcabe ne oraqueca biiyacabe, ne zinándacabe laa» (Mateo 20:29-34). Tiempu riʼ riquiiñeʼ binni ritual, ceremonia ne stale cosa para guluiʼcaʼ cayúnicaʼ milagru. Peru ni dxandíʼ la? gastiʼ diʼ prueba ni rusihuinni dxandíʼ rúnicabe ca ni, peru Jesús la? qué niquiiñedibe nin tobi de ca ni bizéʼtenu riʼ, sínuque ora bíʼnibe milagru la? bíʼnibe ni nezalú binni, ti gúʼyacaʼ dxandíʼ cayúnibe ca ni (Marcos 5:24-29; Lucas 7:11-15).

Guyuu biaje guníʼ Jesús caquiiñeʼ gapa binni fe para guianda, peru qué riníʼ diʼ nga qué zanda gúnibe milagru pa qué gapa binni fe. Dxi guyuu Jesús guidxi Capernaúm «beedanécabe stale binni nuu demonio lu xcuerpu ra nuu Jesús, peru né ti diidxaʼ si guiníʼ riree ca espíritu que. Laaca bisiándabe guiráʼ ca ni cayuni sufrir» (Mateo 8:16).

Qué ñuni Jesús ca milagru que para si guuyaʼ binni ni cayuni, sínuque bíʼnibe ca ni para gacanebe ca ni caquiiñeʼ ni (Marcos 10:46-52; Lucas 23:8). Laaca qué ñuni Jesús milagru para cueendú xiixa (Mateo 4:2-4; 10:8).

¿Ñee dxandíʼ ca relatu ni zeeda lu ca Evangeliu la?

Nánnanu dxandíʼ ca milagru biʼniʼ Jesús purtiʼ zeeda ca ni lu guidapaʼ Evangeliu. ¿Ñee zanda guni crenu ca relatu riʼ la? Zanda.

Casi maʼ bizéʼtenu, biʼniʼ Jesús milagru nezalú stale binni, ne stale de laacabe nabanirúcabe tiempu gucuá ca primé Evangeliu. Lu libru ni láʼ Los milagros y la resurrección riete nabé honradu guca ca hombre ni bicaa Biblia, racá ná: «Cadi jneza diʼ guininu cadi dxandíʼ guca ca milagru ca purtiʼ pa gúninu ni, casi ñaca cugaaninu donda ique ca hombre bicaa ca Evangeliu ca. Biʼniʼ ca hombre riʼ stipa gucaacaʼ guiráʼ ni guca ne zacá bisihuínnicabe honradu laacabe».

Ca judíu ni bicaalú ca xpinni Cristu qué niniʼcaʼ cadi dxandíʼ guca ca milagru ni zeeda lu ca Evangeliu. Sínuque ni guníʼcabe nga paraa gucuaa Jesús poder para biʼniʼ ca milagru que (Marcos 3:22-26). Ne despué ca ni bicaaluʼ Jesús laaca qué niniʼcaʼ cadi dxandíʼ bíʼnibe ca milagru que. Lugar de ngue la? cadi xadxí de guti Jesús stale binni bizeeteʼ de ca milagru ni bíʼnibe. Nga runi nápanu razón para guni crenu dxandíʼ guca ca milagru ni zeeda lu ca Evangeliu ca.

Hombre ni biʼniʼ milagru

Nápanu razón para guni crenu dxandíʼ guca ca milagru ni biʼniʼ Jesús purtiʼ riete ca ni lu ca Evangeliu ca, ne laaca riete gúcabe ti hombre ni biá xcaadxi ne ni bizaalaʼdxiʼ xi caquiiñeʼ binni.

Ti biaje bidxiña ti hombre napa lepra ra nuu Jesús ne ná rabi laabe: «“Nannaʼ zanda gusiándaluʼ naa pa gacaláʼdxiluʼ”. Guizáʼ biá Jesús laabe dede bisigaanáʼ, gudaʼnaʼ laabe ne gudxi laabe: “Racalaʼdxeʼ pue. Bianda”. Oraqueca zeʼ lepra que, ne biándabe» (Marcos 1:40-42). Pur ni biʼniʼ Jesús riʼ bisihuinni runi sentir ni runi sentir binni ne nga bicaa laabe gúnibe ca milagru que.

Ti dxi laga zeʼ Jesús ndaaniʼ guidxi Naín «biiyabe zireenécabe ti gueʼtuʼ, tobi lucha xiiñiʼ ti viuda [...] guizáʼ biabe laa ne gúdxibe laa: «Maʼ cadi gúʼnaluʼ». Ne óraque bisibánibe xiiñiʼ gunna que (Lucas 7:11-15).

Ni zanda guizíʼdinu de ca milagru ni biʼniʼ Jesús riʼ nga guizáʼ biabe binni ne biyúbibe modo gacanebe laacaʼ. Dxandíʼ guca ca milagru riʼ ne cadi cuentu si ca ni. Hebreos 13:8 ná: «Qué ziuu dxi guchaa Jesucristu. Cásica laabe neegueʼ, zaqueca laabe yannadxí ne para siempre». Tiempu riʼ maʼ nácabe Rey lu Reinu stiʼ Dios guibáʼ ne maʼ nuube listu para gúnibe milagru jma que biaʼ bíʼnibe dxi guyuube lu Guidxilayú. Ne maʼ cadi candaa zaquiiñebe poder ni bidii Dios laabe para gusiándabe ca binni ni guzuubaʼ diidxaʼ. Zanda gacané ca testigu stiʼ Jehová lii gánnaluʼ xi guiráʼ ndaayaʼ chiguicaa binni despué.

[Imagen]

Gunda biʼniʼ Jesús milagru pur «poder stiʼ Dios»

[Imagen]

Biá ne bizaalaʼdxiʼ Jesús binni