Ñee rudiʼnu lugar guinabadiidxaʼ Jiobá laanu la?

LU Biblia zeeda stale guendarinabadiidxaʼ ni rindá dede ndaaniʼ ladxidóʼ binni. Jiobá peʼ riquiiñeʼ cani para gusiidiʼ cani dxandíʼ risaca. Casi ora gúdxibe Caín cadi gaca nanalaʼdxiʼ que la? biquiiñebe caadxi guendarinabadiidxaʼ (Gén. 4:6, 7). Peru guyuu ora ti biaje si gunabadiidxabe ne ngue si bicaabe ti hombre guni xiixa. Dxi ca nga guniʼbe: «Tu guseendaʼ, ne tu cheʼ pur laanu yaʼ», oraqueca bicabi Isaías ni riguixhená que: «¡Raríʼ nuaaʼ! Biseendaʼ naa» (Isa. 6:8).

Jesús laaca jneza modo biquiiñeʼ ca guendarinabadiidxaʼ ca. Ne lu ca Evangeliu zeeda jma de chupa gayuaa ochenta biaje ra gunabadiidxaʼ Jesús. Neca guyuu biaje gunabadiidxabe xiixa para si gucueezabe ruaa cani cuyubi si paraa gucheebe que la? jma gunabadiidxabe binni para chindabe ladxidoʼcaʼ ne para gucaabe laacaʼ guiníʼ íquecaʼ ximodo nuucaʼ ne Dios (Mat. 22:41-46; Juan 14:9, 10). Sti binni ni gunna modo guinabadiidxaʼ nga apóstol Pablu, ne bíʼnibe zacá para gucuudxibe binni. Laabe bicaabe catorce carta ni zeeda lu Stiidxaʼ Dios ni gucuá lu diidxaʼ griegu (Rom. 10:13-15). Lu carta ni bicaabe ra nuu ca xpinni Cristu de Roma zeeda stale ra gunabadiidxabe. Zacá bicaabe ca binni ni biindaʼ ca carta stibe gánnacaʼ ne gusisácacaʼ pabiáʼ «nabé riene Dios, iruti ru nuu xpiaani biaʼ nuu xpiaani be, ne iruti ru riene biaʼ riene be» (Rom. 11:33).

Nuu caadxi de ca guendarinabadiidxaʼ ca rucaacani binni guicabi, ne nuu xcaadxi de laacani rucaacani binni guiníʼ ique chaahuiʼ. De ni guninu últimu ca jma zeeda cani lu ca Evangeliu. Guiníʼ íquenu ora gudxi Jesús ca discípulo stiʼ ca diidxaʼ riʼ: «Laguuya gá qué chi cá sti ca fariseu ne sti Herodes laatu. Ricá ni runi cabe casi riaazi levadura cuba pan» (Mar. 8:15; Mat. 16:12). Laacabe qué ñénecabe ni racalaʼdxiʼ Jesús gabi laacabe nga cadi gucaachicabe tu nácacabe ne cadi chinándacabe ni rusiidiʼ ca binni que, peru bizulúcabe gudinde diidxacabe purtiʼ bisiaandacabe pan. Ngue runi, gunabadiidxaʼ Jesús laacabe: «Xiñee na tu qué gapa tu pan. De yanna caʼru guiene tu ne caʼru ganna tu la? Ñee tan nadaʼgu xquenda biaani tu la? Ñee qué ruuya tu ne lú tu ne qué runa diaga tu ne diaga tu la? [...] De yanna caʼru guiene tu la?». Gunabadiidxaʼ Jesús laacabe ca nga para guiníʼ íquecabe ne para gucaa laacabe gúʼyacabe xi riníʼ cani guniʼbe que (Mar. 8:16-21).

«Bidii lugar guinabadiidxaʼ lii»

Para ganda uguu jneza Jiobá Job la? gunabadiidxabe laa stale cosa para guuyaʼ biaritiʼ laa cueʼ Dios ni bizáʼ guiráʼ xixé cosa ni nuu guibáʼ ne lu Guidxilayú (Job, capítulo 38 dede 41). Ñee guleza Jiobá nicabi Job laa la? Ruluíʼ si coʼ. Zándaca ora gunabadiidxaʼ Jiobá laabe «Paraa nuuluʼ ora bizayaʼ guidxilayú» que la? gudxi laabe zacá para gucaa laabe guiénebe ne chindá dede ndaaniʼ ladxidoʼbe. Deruʼ caadxi nga ni gunabadiidxaʼ Jiobá laabe maʼ qué ñápabe ni niniʼbe, nga runi maʼ ca diidxaʼ riʼ si guniʼbe: «Xii ndiʼ guicabeʼ lii pue. Maʼ bicaa nayaʼ ca ruaaʼ» (Job 38:4; 40:4). Rihuinni dxíchica bidiibe cuenta cadi jneza ngue modo guníʼ íquebe. Peru Jiobá qué nusiidiʼ si laabe cadi gudxíʼbabe laca laabe, sínuque laaca gucané laabe guchaabe modo caníʼ íquebe que. Paraa naquiiñeʼ guchaabe modo laabe yaʼ.

Neca guca Job «ti hombre ni qué gapa donda ne runi ni jneza» la? guniʼbe xiixa ni bisihuinni cadi jneza modo guníʼ íquebe. Ngue runi, gupa xidé guluu jneza Elihú Job purtiʼ «guníʼ jma jneza ni runi que Dios» (Job 1:8; 32:2; 33:8-12). Peru cani gunabadiidxaʼ Jiobá  laabe gucanécani laabe gánnabe xii nga ni jma jneza guiníʼ íquebe. Sicaríʼ gudxi Jiobá laabe dede lu ti bí nadipaʼ: «Tuu ndiʼ gadxé modo cusiene conseju stinneʼ sin ganna gastiʼ yaʼ. Rinabaʼ lii guxhiiluʼ ndaaniluʼ casi hombre [...] ne bidii lugar guinabadiidxaʼ lii, ne bicabi naa» (Job 38:1-3). Ne guiráʼ ni gunabadiidxaʼ Jiobá Job, biluíʼ laabe pabiáʼ nuu xpiaaniʼ ne pabiáʼ stale poder napa casi rihuínnini lu guiráʼ cosa sicarú ni bizáʼ. Zacá nga gunna chaahuiʼ Job jneza modo runi juzgar Jiobá ne guiráʼ cani runi. ¡Guizáʼ risaca nga ni bizaaca Job ca, purtiʼ Dios ni jma nandxopeʼ ca nga ni gunabadiidxaʼ laabe!

Ximodo rusihuínninu rudiʼnu lugar guinabadiidxaʼ Jiobá laanu

Yanna laanu yaʼ. Ñee zanda guizíʼdinu xiixa de ca guendarinabadiidxaʼ ni zeeda lu Stiidxaʼ Dios la? Zanda pue. Pa guiníʼ íquenu ca guendarinabadiidxaʼ ca la? zudii Jiobá laanu stale ndaayaʼ. Ca guendarinabadiidxaʼ ni zeeda lu Biblia rindácani ndaaniʼ ladxidóʼ binni, ne nga nga tobi de ca razón pur nandxóʼ ni. «Stiidxa Dios [...] nandxóʼ [...] [ne] ribee irá ni nuu ndaani ladxidóʼ no, ne ni cá lu xquenda biaani nu» (Heb. 4:12). Peru para gacaneni laanu la? naquiiñeʼ guiníʼ íquenu casi ñaca laanu nga canabadiidxacabe cani (Rom. 15:4). Guidúʼyanu caadxi de ca guendarinabadiidxaʼ ca.

«Ñee qué zuni Juez stiʼ guidubi guidxilayú riʼ ni jneza la?» (Gén. 18:25.) Nga nga ni gunabadiidxaʼ Abrahán Jiobá ora gunna chigusabanabe Sodoma ne Gomorra. Laabe guníʼ íquebe qué zanda diʼ guni Dios ni cadi jneza ne guuti cásica cani bichee ne zaqueca cani nachaʼhuiʼ. Nga runi, ne ca diidxaʼ guniʼbe ca bisihuínnibe nápabe fe zuni Dios ni jneza.

Nuu tu laa maʼ caguixhe ximodo chiguni Jiobá caadxi cosa, casi tupeʼ nga ca binni ni chiguilá lu Armagedón o tuu nga cani chiguiasa de lade gueʼtuʼ. Lugar de chuʼnu xizaa pur ca nga la? jma jneza guietenaláʼdxinu ni gunabadiidxaʼ Abrahán que. Cásica laabe, laanu laaca runi crenu de guidubi ladxidoʼno nachaʼhuiʼ Bixhózenu ni nuu guibáʼ ca, runi ni jneza ne rilaselaʼdxiʼ binni. Nga racané laanu cadi chuʼnu xizaa pur ca cosa ca ne para cadi icaayunenu cani ne gunítisinu tiempu ne stipa stinu lú cani.

«Neca ñuu tu xizaa ne nuyubi tu modo nibani tu xcaadxi, ñee ñanda nibani tu jma» la? (Mat. 6:27.) Nga nga ni guníʼ Jesús nezalú stale binni ne ca discípulo stiʼ. Zacá bisihuínnibe pabiáʼ nga risaca guni cré binni cayapa Jiobá laacaʼ casi bixhózecaʼ. Nagana nga guibani binni lu ca últimu dxi riʼ ndaaniʼ guidxilayú malu riʼ. Neca nuu stale cosa nga ni zucaa laanu chuʼnu xizaa la? qué zabeendunu gastiʼ pa guiníʼ íquenu  de laacani, purtiʼ qué zabáninu jma ne qué zabáninu jma galán.

Pa nuunu xizaa pur modo nuunu o pur modo nuu binnilídxinu la? guietenaláʼdxinu cani gunabadiidxaʼ Jesús ca zacanécani laanu guidúʼyanu ca cosa ca jneza. Zacá maʼ qué ziuʼnu xizaa ne maʼ qué ziuu ndaaniʼ íquenu ca cosa ni cadi jneza, ne maʼ qué zusidxágacani xquendabiaaninu ne ziuu ladxidoʼno galán. Cristu cayabi laanu Bixhózebe ni nuu guibáʼ, ni rudii ni gó ca maniʼ ripapa ca ne ruzuchaahuiʼ ca yagahuiiniʼ ca, nanna dxichi xi guiráʼ caquiiñenu (Mat. 6:26-34).

«Ñee zanda gutopa ti hombre gui ne guchani ladxidóʼ sin qué chaquiʼ xhaba la?» (Pro. 6:27.) Lade ca conseju ni rudii bixhoze binni, ni zeeda lu ca primé gaʼ capítulo stiʼ Proverbios, laaca cayeeteʼ xi zazaaca binni pa chuʼné ni cadi xheelaʼ (Pro. 6:29). Pa málasi gudiʼnu cuenta cacaa xcu xiixa cosa dxabaʼ ndaaniʼ ladxidoʼno o cuyúbinu modo chuulaʼdxiʼ tuuxa laanu para si quitenenu laa la? guendarinabadiidxaʼ ca naquiiñeʼ gápanu ni ndaaniʼ íquenu para quixhenani laanu. Ne laaca zacaneni laanu ora chuʼ xcaadxi cosa malu ni gucaa laanu gucheʼnu. Ne nanna dxíchinu nga nga ni riníʼ ca diidxaʼ ni cá lu conseju stiʼ Biblia riʼ: «Irá ni udxiiba binni, ngue ca cuee» (Gál. 6:7).

«Lii tu naca lu para udxiiba lu donda ique xpinni stobi.» (Rom. 14:4.) Lu carta ni bicaa Pablu ra nuu ca xpinni Cristu de Roma guniʼbe caadxi cosa ni bichiiñaʼ ca xpinni Cristu de primé siglu que. Casi nuu tu laa qué ñuni respetarcaʼ ni runi xcaadxi xpinni Cristu purtiʼ si nápacaʼ gadxé costumbre ne guniʼcaʼ mal de laacabe ne de ni bíʼnicabe. Ngue runi, ora gunabadiidxaʼ Pablu laacabe ni maʼ bizéʼtenu ca cayábibe laacaʼ naquiiñeʼ gannaxhiisaacaʼ ne gudiicaʼ lugar Jiobá nga guni juzgar laacaʼ.

Zacaca nga rizaaca yanna, ca xpinni Dios gadxé gadxé modo biniisicaʼ. Peru Jiobá racané chuʼnu tobi si. Ñee racanenu para chuʼnu zacá la? Pa maʼ biaʼnu guininu mal de ca xpinni Cristu pur ni cayúnicaʼ neca cadi guchiiñaʼ xquendabiaanicaʼ laacaʼ la? ni jma jneza gúninu nga guietenaláʼdxinu ca diidxaʼ ni guníʼ apóstol Pablu ca.

Ca guendarinabadiidxaʼ ni ruchiña laanu ra nuu Jiobá

Ca ejemplu ni maʼ bidúʼyanu ruluíʼcani laanu pabiáʼ racané ca guendarinabadiidxaʼ zeeda lu Biblia ca laanu. Casi maʼ bidúʼyanu ca, zanda gacané ca guendarinabadiidxaʼ ca laanu ora gápanu xiixa guendanagana pa guidúʼyanu xi cayeeteʼ ra zeedacani. Nánnanu ora guidúʼndanu Biblia zadxélanu stáleruʼ guendarinabadiidxaʼ. (Biiyaʼ cuadru ni zeeda lu yaza 14.)

Gudiʼnu lugar chindá ca guendarinabadiidxaʼ ni zeeda lu Biblia ca dede ndaaniʼ ladxidoʼno, purtiʼ zacá zucaʼnu xquendabiaaninu ne ladxidoʼno chinanda ca neza stiʼ Jiobá. Biluxe gunabadiidxaʼ si Dios Job que guníʼ: «Nannaʼ tu lii pur ni huayunadiaʼga, peru yanna maʼ cayuuyapeʼ guieluaʼ lii» (Job 42:5). Ximodo nga nabe biiyabe Jiobá yaʼ. Laabe biiyabe Jiobá purtiʼ beeda gaca casi ti binni para laabe. Gudiʼdiʼ gayuaa iza despué, laaca guníʼ discípulo Santiago ni na ca diidxaʼ ca: «Laidxiña gaxha de Dios, ne laa zadxiña gaxha de laatu» (Sant. 4:8). Pa jneza modo iquiiñenu Stiidxaʼ Dios, dede ne ca guendarinabadiidxaʼ ni zeeda luni la? zacané nga laanu guiniisinu jma lu stiidxa Dios ne zeʼ ora jma zanda guidúʼyanu Jiobá, Bixhózenu ni nuu guibáʼ.

[Cuadru ni zeeda lu yaza 14]

Ximodo zanda gacané ca guendarinabadiidxaʼ riʼ laanu guiníʼ íquenu modo riníʼ ique Jiobá yaʼ

▪ « Ñee jma nga riecheʼ Jiobá guzaaquicabe ofrenda para gusigáʼdecabe laa ne guuticabe maniʼ que guzuubacabe stiidxabe la?» (1 Sam. 15:22.)

▪ « Ni bizáʼ guielú binni, ñee qué zanda gúʼyabe la?» (Sal. 94:9.)

▪ « Ora ruyubi binni gusisácacabe laa la? ñee nga nga guisaca binni la?» (Pro. 25:27.)

▪ « Ñee nápaluʼ razón para guidxiichiluʼ la?» (Jon. 4:4.)

▪ « Paraa iquiiñe ni binni pa guni ganar idubi guidxilayú peru guniti xhialma» (Mat. 16:26).

▪ « Tu zanda guxheleʼ laanu de Cristu ni nadxii laanu» (Rom. 8:35, NM).

▪ « Xi nápaluʼ ni qué nudii Dios lii» (1 Cor. 4:7, NM).

▪ « Zanda xa guiuʼcha biaani guelacahui» (2 Cor. 6:14).

[Dibuju/foto ni zeeda lu yaza 15]

Xi biziidiʼ Job pur cani gunabadiidxaʼ Jiobá laa