Xi guleendúcabe pur dxiiñaʼ bíʼnicabe Bulgaria

«Stale binni cabeza si ucaa diaga stiidxa Dios. Tu güi ni nga huaxiéʼ. Yanna lainaba lu Dios useenda stale tu guni dxiiña ca, ti laabe nga xpixuaana ni.» (MAT. 9:37, 38)

CASI guníʼ Jesús ca, zacapeʼ cahuinni ndaaniʼ guidxi Bulgaria, ti guidxi sicarú ni nuu Europa. Xiñee yaʼ. Purtiʼ nabé caquiiñeʼ tu chigucheeche diidxaʼ ra nuu 7,000,000 de binni lugar ni rábicabe Balcanes. Neca yanna nuu 1,700 ni rucheeche diidxaʼ ndaaniʼ guidxi ca, caquiiñeruʼ jma binni para ganda guiniʼnécabe ca binni ni nabeza ndaaniʼ guidxi ca. Nga runi, Grupu ni Zaniruʼ bidii permisu laacabe para guni invitárcabe guiráʼ cani rucheecheʼ diidxaʼ ni riníʼ diidxaʼ búlgara ni nabeza ndaaniʼ xcaadxi guidxi ni nuu Europa para gucanecaʼ lu dxiiñaʼ ni bíʼnicabe lu iza 2009. Ne dxiiñaʼ ca bíʼnicabe ni tiempu nandáʼ. Bindaa dxiiñaʼ que gadxe semana ne ra biluxe últimu semana que guca guendaridagulisaa de chonna gubidxa ni biree lá «¡Lagataná!», ne gúcani 14 dede 16 stiʼ agosto de iza que ndaaniʼ guidxi Sofía.

Bidxagayaacabe stale tu gucané

Ca xpinni Cristu ni cayuni dxiiñaʼ Betel ni nuu ndaaniʼ guidxi Sofía, gunabadiidxasaacaʼ panda de cani rucheecheʼ diidxaʼ ni nuu Alemania, España, Francia, Grecia, Italia ne Polonia zigacanecaʼ laacabe. Purtiʼ guiráʼ cani cheʼ, napa xidé quíxecaʼ guiráʼ gastu sticaʼ ne iquiiñecaʼ vacación sticaʼ para chigucheechecaʼ diidxaʼ. Gudiʼdiʼ chupa chonna semana ne chaahuidugá bidale ca guiʼchiʼ ra canábacabe chigucheechecabe diidxaʼ raqué dede bizaa cani 292. Ne guiráʼ cani rucheecheʼ diidxaʼ que zanda guseendacabe binni ndaaniʼ chonna guidxi: Kazanlak, Sandanski ne Silistra. Ne guiráʼ ca binnigola ni riganna ca neza binni ridagulisaa biʼniʼ invitarcaʼ cani rucheecheʼ diidxaʼ ne ca precursor ni nuu ndaaniʼ ca neza binni ridagulisaa de Bulgaria para chigacanecaʼ lu dxiiñaʼ ni chigaca que. Biaʼsi 382 xpinni Cristu yegucheechecaʼ diidxaʼ ne stale gana ca lugar ra huaxiéʼ huacheechecabe diidxaʼ.

Biseendacabe caadxi xpinni Cristu de ca neza binni ridagulisaa ni nuucaʼ neza que para chiyúbicaʼ lugar ra zanda guiaana cani chigueeda que. Biquixe binni laacabe cuartu ne gunábacabe caadxi cuartu ndaaniʼ ca hotel ra jma baratu. Despué laaca gucanécabe ca xpinni Cristu ni zigacané raqué para yesaanacabe laacaʼ ra chiguiaanacaʼ ne bidiicabe laacaʼ ni caquiiñecaʼ. Laaca biquixe binni laacabe ti lugar ra gúpacabe guendaridagulisaa stícabe, ne ca xpinni Cristu ni zeeda de sti guidxi biʼniʼ cani. Nabé nayecheʼ guyuucabe ora bíʼyacabe ca lugar ra gastiʼ nin ti Testigu bidagulisaa hasta 50 ni rucheeche diidxaʼ para gusisaca Jiobá.

Bihuinni napa ca xpinni Cristu ni zeeda de xcaadxi guidxi que gana gacanecaʼ. Gastiʼ nucueeza laacabe de ñúnicabe dxiiñaʼ que, neca nabé nandáʼ guca ca dxi que, dede yendani 40 °C. Chonna semana de bicheechecabe diidxaʼ que mápeca guniʼnécabe guiráʼ ca binni de Silistra, ti guidxi ni nuu guriá guiiguʼ Danubio ra nabeza jma de 50,000 binni. Ngue runi, cani rucheeche diidxaʼ que gudixhe íquecaʼ chigánnacaʼ xcaadxi lugar ni nuu gaxha de raqué dede yendácabe ti guidxihuiiniʼ ni láʼ Tutrakan, 55 kilómetru de Silistra. Stale biaje bizulú bicheechecabe diidxaʼ siadóʼ biaʼ a las nueve y media, ne biaanadxícabe ti  ratu para gudócabe ne despué bicheechecabe diidxaʼ hasta a las siete o jma huadxí. Zaqueca bizaaca ndaaniʼ ca guidxi Kazanlak ne Sandanski. Cumu ca xpinni Cristu ni yegucheeche diidxaʼ raqué bíʼnicaʼ ni ne stale gana la? nagueenda bilúxecabe bicheechecabe diidxaʼ ndaaniʼ ca guidxi que ne gupa xidé guyécabe xcaadxi guidxihuiiniʼ ni nuu gaxha de raqué.

Xi guleendúcabe yaʼ

Lu gadxe semana bicheechecabe diidxaʼ que, gucanécabe stale binni guiziidiʼ de Dios. Lu primé siglu que guníʼ binni maʼ bichá ca apóstol que ni cusiidicaʼ ndaaniʼ guidubi guidxi Jerusalén. Zaqueca ñanda niníʼ tutiica binni de ca Testigu ndaaniʼ ca guidxi ra guyécabe que (Hech. 5:28). Bisaananécabe binni 50,000 revista ne bizulú biindanécabe 482 binni. Ne 1 septiembre iza 2009 bizulú primé neza binni ridagulisaa ndaaniʼ guidxi Silistra ne maʼ nuu xcaadxi grupu ndaaniʼ guidxi Kazanlak ne Sandanski. Ne ni jma sicarú nga stale de ca binni ni deruʼ bicaadiaga ca diidxaʼ nacubi ne galán stiʼ Reinu maʼ caniisicaʼ lu stiidxaʼ Dios.

Primé semana bizulú careeche diidxaʼ que, ti precursora especial de España ni riníʼ diidxaʼ búlgaro, bidxaagabe Karina lu calle, ti gunaa rutoo periódicu ndaaniʼ guidxi Silistra. Nabé bicaadiaga Karina laabe ne guyé ti guendaridagulisaa, de raqué guná guʼndanécabe laa Biblia. Peru cumu xheelabe qué runi cré Dios la? gunábabe guʼndanécabe laabe ra parque. Laaca biindanécabe guiropaʼ xiiñidxaapabe, ne ni jma huaniisi que, Daniela, nabé bisisaca cani biziidiʼ que. Ti semana si biindabe libru Xipeʼ ndiʼ cusiidiʼ Biblia ne nagueendaca bisaana de iquiiñebe ca bidóʼ stibe, casi cusiidiʼ Biblia guni binni. Ne laaca guníʼnebe ca xhamígube de cani caziidibe que. Chonna si semana despué de guyebe primé guendaridagulisaa stibe, gúdxibe gunaa Testigu ni cusiidiʼ laabe: «Runeʼ sentir casi ora maʼ nacaʼ ti Testigu casi laatu. Xi caquiiñeʼ guneʼ para chigucheecheniáʼ laatu diidxaʼ». Dede yanna cadi cusaana Daniela de guiniisi lu stiidxaʼ Dios ne zaqueca jñaabe ne bendahuiinibe.

Orlin, ti xpinni Cristu ni riníʼ bulgaro ni beeda de Italia, biseendacabe laabe ndaaniʼ guidxi Kazanlak. Ti dxi ora zibiʼbe ra nabézabe, biiyabe chupa hombrehuiiniʼ zuba ra parque ne guninebe laacaʼ de Dios. Bisaananebe laacaʼ libru Xipeʼ ndiʼ cusiidiʼ Biblia ne biaanacabe gúʼyacabe sti dxi que. Sti dxi que guná Svetomir, tobi de ca hombrehuiiniʼ que, guʼndané Orlin laa Biblia. Sti dxi que laaca biindanebe laa, ne gudiʼdiʼ si gaʼ gubidxa mápeca biindané Orlin laabe xhono biaje. Laabe gúdxibe Orlin: «Chupa gubidxa ante guiníʼneluʼ naa ra parque que, gunabaʼ Dios racalaʼdxeʼ gunebiaʼyaʼ laa, ne pa gacanebe naa zuneʼ ni nabe lu  guidubi naca xquendanabaneʼ». Bibiguetaʼ si Orlin Italia, ca xpinni Cristu de raqué yegánnarucaʼ Svetomir, ne dede yanna caniisibe lu stiidxaʼ Dios.

Ca ndaayaʼ ni gucuaacabe pur bisaanacabe xcaadxi cosa

Xi guníʼ ca xpinni Cristu ni biquiiñecaʼ vacación sticaʼ ne gudíxecaʼ gastu sticaʼ para yegucheechecaʼ diidxaʼ Bulgaria yaʼ. Sicaríʼ bicaa ti binnigola ni riganna neza binni ridagulisaa de España: «Dxiiñaʼ que gucaneni cani rucheecheʼ diidxaʼ ni riníʼ diidxaʼ búlgaro ni nuu España chuʼcaʼ tobi si. Ni bíʼnicabe que gucaneni laacabe chúʼcabe nayecheʼ». Ti guendaxheelaʼ de Italia bicaa: «¡Beeu gudídidu raqué nga ca dxi jma sicarú huabánidu! [...] Dxiiñaʼ que gucaneni guchaʼduʼ modo laadu. Runi sentirdu casi ora maʼ gadxé laadu». Guendaxheelaʼ riʼ caníʼ ique chindézacaʼ Bulgaria para gacanecaʼ ca lugar ra jma caquiiñeʼ guireeche diidxaʼ. Carina, ti precursora regular de España ni caʼruʼ guichaganáʼ yegucheeche diidxaʼ ndaaniʼ guidxi Silistra. Biluxe si yegucheechecabe diidxaʼ Bulgaria bisaanabe xhiiñabe ne yendézabe Silistra para gacanebe ndaaniʼ neza binni ridagulisaa ni deruʼ bizulú raqué. Bitopalube bueltu biaʼ iquiiñebe ti iza chuʼbe Bulgaria. Ximodo runi sentirbe pur ni gudixhe íquebe gúnibe que yaʼ. Laabe guniʼbe: «Nayecheʼ nuaaʼ purtiʼ gucané Jiobá naa guendaʼ Bulgaria; ribezaʼ guindaa xadxí huiiniʼ raríʼ. Ruundaniáʼ gaayuʼ binni ne chonna de laacabe maʼ rié ca guendaridagulisaa ca».

Ti gunaa Testigu de Italia napa gana chigacané ndaaniʼ guidxi Bulgaria, peru huaxiéʼ tiempu nápabe ra cayúnibe dxiiñaʼ que, ne pur ngue qué zanda guinábabe vacación. Neca zaqué, qué nidxíbibe ora gunábabe gudiicabe laabe permisu ti beeu sin quíxecabe laabe, ne maca gudixhe íquebe gusaanabe dxiiñaʼ que pa qué gudiicabe laabe permisu. Qué guirá nidxagayaabe ora gudxi patrón stibe laabe: «Zudieeʼ lugar lii cheluʼ, peru guseendaluʼ ti postal stiʼ Bulgaria ra nuaaʼ». Gunaa Testigu riʼ bidii cuenta bicabi Jiobá ca oración stiʼ.

Stanislava, ti dxaapahuiiniʼ de Varna ni nuu ndaaniʼ guidxi Bulgaria gupa ti dxiiñaʼ ra gudíxecabe laa galán peru gupa xidé biʼniʼ dxiiñaʼ guidubi dxi. Laabe gunábabe permisu para chigucheechebe diidxaʼ ndaaniʼ guidxi Silistra. Ora yendabe raqué, biiyabe pabiáʼ nayecheʼ nuu ca precursor ni beeda de sti guidxi para gacané ndaaniʼ xquídxibe ne bicaa ni laabe gúʼnabe. Ngue runi guníʼ íquebe xi cayuninebe xquendanabánibe, ne ora bibiguétabe ralídxibe chupa semana despué bisaanabe xhiiñabe ne gúcabe precursora regular. Yanna nayecheʼ nuu Stanislava purtiʼ caquiiñeʼ stipa ni napa laga nahuiiniʼ para guni ni na Dios ni bizáʼ laa (Ecl. 12:1).

¡Nabé stale ndaayaʼ nga ricaa ca binni ni runi ni na Jiobá de guidubi ladxidóʼ! Ni jma jneza gúninu lu xquendanabáninu nga iquiiñenu tiempu ne stipa stinu para gúninu dxiiñaʼ ni nabé risaca riʼ: gucheechenu diidxaʼ ne gacanenu binni gaca xpinni Dios. Ñee zanda quixhe íqueluʼ gucheecheluʼ diidxaʼ jma ti gacaneluʼ guilá binni la? Zándaca ndaaniʼ xquídxiluʼ nuu ra caquiiñeʼ tu gucheeche diidxaʼ. Ñee huaníʼ íqueluʼ chindézaluʼ ca lugar ca para gacaneluʼ la? O zanda guiziidiluʼ sti diidxaʼ para gacaneluʼ ca binni ni racalaʼdxiʼ guiziidiʼ de Dios. Zanda chuʼluʼ seguru zaguu Jiobá ndaayaʼ lii pa gúniluʼ stipa pur guchaaluʼ modo nabániluʼ para gucheecheluʼ diidxaʼ jma (Pro. 10:22).

[Cuadro ne dibuju/foto ni zeeda lu yaza 32]

Ti dxi ni qué ziuu dxi guiaandaʼ

Stale de cani beeda de sti guidxi para gacanecaʼ guireecheʼ diidxaʼ, guyecaʼ guendaridagulisaa de chonna gubidxa ni guca ndaaniʼ guidxi Sofía ni biree lá «¡Lagataná!». Ca xpinni Cristu de guidxi que nabé biéchecaʼ purtiʼ binibiaʼcaʼ xcaadxi bíʼchicaʼ ne bizáʼnacaʼ ni beeda de xcaadxi guidxi de Europa. Ne nabé biéchecabe ora Geoffrey Jackson, tobi de cani nuu lu Grupu ni Zaniruʼ, guníʼ viernes que maʼ nuu Traducción del Nuevo Mundo de las Santas Escrituras lu diidxaʼ búlgaro. Nabé nayecheʼ guyuu ca 2,039 binni ni nuu raqué ne xadxí gudapanacaʼ para gusihuínnicaʼ cudiicaʼ xquíxepeʼ pur ni gucuaacaʼ que. Dede guyuu tu biinaʼ de tantu cayecheʼ. Nanna dxíchinu Biblia ca zacaneni ca binni de Bulgaria gunibiaʼcaʼ Jiobá purtiʼ jneza modo bitiixhicabe ca diidxaʼ ca luni ne biquiiñecabe diidxaʼ ni ganda guiene binni.

[Mapa ni zeeda lu yaza 30,31]

BULGARIA

Silistra

Kazanlak

Sandanski

SOFÍA

[Ca dibuju/foto ni zeeda lu yaza 31]

Lu gadxe semana bicheechecabe diidxaʼ que, gucanécabe stale binni guiziidiʼ de Dios