Cadi guyadxinu cani maʼ bisaananu
Cadi guyadxinu cani maʼ bisaananu
«Ni quixhe ná lu aradu ne udxigueta lú atrá la? qué zaquiiñe para guni dxiiñaʼ [...] lade ca xpinni Dios.» (LUC. 9:62)
XI NICÁBILUʼ
Xiñee naquiiñeʼ guietenaláʼdxinu ni bizaaca xheelaʼ Lot.
Xi chonna cosa cadi naquiiñeʼ guietenaláʼdxinu.
Ximodo rusihuínninu ziuunu biaʼ zeʼ xquidxi Jiobá.
1. Ximodo gudixhená Jesús binni dxiqué, ne xi nuube niniʼbe né ca diidxaʼ que.
«LAGUIETENALAʼDXI xi uca xheela Lot.» (Luc 17:32.) Raca biaʼ chupa mil iza gudixhená Jesús binni né ca diidxaʼ ca, peru yanna nga jma naquiiñeʼ chinándanu conseju ca. Xi nuube niniʼbe né ca diidxaʼ que yaʼ. Ca judíu que nanna dxíchicaʼ xi bizaaca xheelaʼ Lot. Ora ziree gunaa que né binnilidxi de Sodoma qué nuzuubaʼ diidxaʼ ne bidxiguetalú atrá, ngue runi guca ti pilar de zidi (biindaʼ Génesis 19:17, 26).
2. Xiñee bidxiguetalú xheelaʼ Lot atrá, ne xi bizaaca pur qué nuzuubabe diidxaʼ.
2 Xiñee bidxiguetalú gunaa que atrá yaʼ. Zándaca purtiʼ racaláʼdxisibe gúʼyabe ximodo canitilú guidxi que. O zándaca qué gápabe fe o purtiʼ cayabe ca cosa ni bisaanabe ndaaniʼ guidxi que (Luc. 17:31). Qué gánnanu xi bicaa laabe gudxiguetalube, peru nánnanu gútibe purtiʼ qué nuzuubabe diidxaʼ. ¡Guníʼ ique si lii! Gútibe dxi ca guti ca binni qué iquiiñeʼ de Sodoma ne Gomorra. Ngue runi guníʼ Jesús ca diidxaʼ riʼ: «Laguietenalaʼdxi xi uca xheela Lot».
3. Ximodo bisihuinni Jesús cadi naquiiñeʼ gudxiguetalunu atrá.
3 Laanu, ca xpinni Cristu, caquiiñeʼ chuʼnu cuidadu para cadi gudxiguetalunu atrá. Zacá bisiene Jesús ni dxi gudxi ti hombre laa riuulaʼdxiʼ gaca discípulo stiʼ, peru primeru rapa gana chitidxi ca binnilidxi maʼ cheʼ. Sicaríʼ bicábibe laa: «Ni quixhe ná lu aradu ne udxigueta lú atrá la? qué zaquiiñe para guni dxiiñaʼ. Zaqueca ni gueda nanda naa ne ibigueta atrá la? qué zaquiiñe lade ca xpinni Dios» (Luc. 9:62). Ñee naná ca diidxaʼ biquiiñeʼ Jesús ora bicabi laabe la? Coʼ. Jesús bidii cuenta caquiiñeʼ hombre que ti pretextu para cadi chinanda laabe, ngue runi bichaagabe laa né ti binni ni cucaa surcu ne «udxigueta lú atrá». Tobi hombre ni runi dxiiñaʼ lu layú nanna qué zanda diʼ gudxiguetaʼ lú atrá o gundaa aradu stiʼ laga cucaa surcu, pacaa maʼ qué zuni xhiiñaʼ jneza.
4. Xi jma naquiiñeʼ quixhe íquenu gúninu.
4 Nabé risaca nga cadi guiníʼ íquenu cani maʼ bisaananu, sínuque jma naquiiñeʼ quixhe íquenu lú cani chigúninu. Nayaguieʼ modo cusiene Stiidxaʼ Dios ni ra na: «Cadi gusaana de guuyadxiluʼ ni nuu nezaluluʼ, biiyadxí guiráʼ ni nuu nezaluluʼ» (Pro. 4:25, La Palabra de Dios para Todos).
5. Xi razón nápanu para cadi guyadxinu ca cosa ni maʼ bisaananu.
5 Nuu ti razón nabé risaca para cadi guyadxí ca xpinni Cristu ca cosa ni maʼ bisaanacaʼ. Xi laani yaʼ. Purtiʼ maʼ nabáninu lu ca últimu dxi (2 Tim. 3:1). Ca dxi stinu riʼ, cadi chupa si guidxi chigunitilú Dios, sínuque chigunitilube guiráʼ xixé binni ni runi cosa malu. Xi caquiiñeʼ gúninu para cadi guizaacanu ni bizaaca xheelaʼ Lot yaʼ. Primeru caquiiñeʼ gánnanu xii nga ca cosa ni zándaca gucaa laanu gudxiguetalunu atrá (2 Cor. 2:11). Nga runi, guzéʼtenu chonna de laacani ne guidúʼyanu ximodo zanda gápanu laanu para cadi guyadxinu cani.
CADI GUIBÁNANU MODO BIBÁNINU DXIQUÉ
6. Ximodo nga zanda quite xquendabiaaninu laanu.
6 Tobi de ca cosa ni naquiiñeʼ chuʼnu cuidadu nga cadi guiníʼ íquenu jma galán modo bibáninu dxiqué. Zándaca quite xquendabiaaninu laanu pa guiníʼ íquenu nabé galán ca cosa ni gúpanu o cani bíninu dxiqué, ne guiníʼ íquenu cadi tan naroʼbaʼ ca guendanagana bidxaagalunu dxiqué, neca cadi dxandíʼ cani. Pa guiníʼ íquenu zacá, zándaca guibánanu modo bibáninu dxiqué. Peru Biblia caguixhená laanu né ca diidxaʼ riʼ: «Cadi guiniʼluʼ: “Xiñee jma galán guca ca dxi gudiʼdiʼ ca que yanna pue”. Purtiʼ zusihuínniluʼ cadi nuu xpiaaniluʼ pa guinabadiidxaluʼ zacá» (Ecl. 7:10). Yanna, xiñee cadi jneza guibánanu modo bibáninu dxiqué yaʼ.
7-9. 1) Xi bizaaca ca israelita dxi guyuucaʼ Egipto. 2) Xi razón gúpacabe para chúʼcabe nayecheʼ. 3) Xiñee gudicheruaa ca israelita.
7 Guiníʼ íquenu ni bizaaca ca israelita ni bibani ca dxi stiʼ Moisés. Dxi yendézacabe Egipto galán modo bidxaagalú ca binni que laacabe, peru guti si José «guluucabe hombre ni gucaa laacaʼ gúnicaʼ dxiiñaʼ naná jma de biaʼ ni cayúnicaʼ» (Éxo. 1:11). Ne despué biseendaʼ guuti faraón guiráʼ ca hombrehuiiniʼ ni deruʼ gule para cadi guidale ca israelita (Éxo. 1:15, 16, 22). Cumu nabé naná ra cadíʼdicabe la? ngue runi, gudxi Jiobá Moisés: «Maʼ biiyaʼ pabiáʼ naná ni cadiʼdiʼ xquidxeʼ Egipto, ne maʼ binadiagaʼ ridxi stícabe pur cani cucaa laacabe gúnicabe dxiiñaʼ, purtiʼ nannaʼ dxicheʼ xi guendananá cadíʼdicabe» (Éxo. 3:7).
8 ¡Guizáʼ biéchecabe ora bireecabe de esclavu! Biiyacabe modo biquiiñeʼ Jiobá poder stiʼ ra biseendaʼ chii plaga luguiáʼ faraón, rey ni bidxiibaʼ laca laa que, né ca xpinni. Sicaríʼ na Biblia: «Gudxi ca xiiñiʼ Israel: “Naa nga Jiobá, ne dxandipeʼ zabee laatu de guiráʼ ni nuguáʼ ca egipciu laatu ne maʼ qué zácaditu esclavu sticaʼ, ne dxandipeʼ zulaʼyaʼ laatu ora gusigaanayaʼ ne ora gusabanayaʼ guidxi ca» (Éxodo 6:6). Despué, cadi gudxi si ca binni de Egipto que laacabe guireecabe de xquídxicaʼ, sínuque gunábacaʼ laacabe guireecabe ne dede bidiicaʼ laacabe stale oro ne plata. Ngue runi, Biblia ruzeeteʼ guxha ca israelita guiráʼ ni napa ca binni que (Éxo. 12:33-36). Ne laaca biiyacabe modo guti faraón ne ca soldadu stiʼ ndaaniʼ nisadóʼ Xiñáʼ (Éxo. 14:30, 31). Nanna dxíchinu biguidxi fe stícabe ora bíʼyacabe ngue.
9 Nga runi, raca nagana para laanu guni crenu xiñee qué liica nindaa de bilá ca israelita pur ca milagru biʼniʼ Dios, bizulú gudicheruaacaʼ ora guniʼcaʼ puru si maná cayocaʼ. Cumu cadi nuucabe nayecheʼ né ni cudii Jiobá laacabe la? bidxiichicabe dede guníʼcabe: «¡Nabé rietenaláʼdxidu ca benda ni gudoʼdo Egipto sin niguíxedu, ca pepinu ne ca xandié ne ca cebolla ne aju que! Peru yanna cayatizidu. Ne nisi maná riʼ nga ridúʼyadu» (Núm. 11:5, 6). Pur ni guníʼcabe bisihuínnicabe casi ora ñácacabe binni lú cheepaʼ purtiʼ nuucabe guibiguétacabe ra guyuucabe casi esclavu (Núm. 14:2-4). Cumu jma bicaa íquecabe cani bisaanacabe Egipto la? bidxiichiné Jiobá laacabe (Núm. 11:10).
10. Xi rizíʼdinu de ni bizaaca ca israelita que.
10 Xi rusiidiʼ relatu riʼ laanu yaʼ. Ora guidxaagalunu xiixa guendanagana, cadi nisi maʼ cayetenaláʼdxinu guiráʼ ni gúpanu dxiqué, dede guininu jma galán bibáninu ante gunibiaʼnu Dios. Ya, gastiʼ naca guietenaláʼdxinu cani bíninu dxiqué para guizíʼdinu de laacani ne guiníʼ íquenu de ca cosa sicarú bíninu. Peru cadi jneza guiníʼ íquenu nisi laacani, pacaa maʼ qué ziuʼnu nayecheʼ pur modo nabáninu yanna ne dede uquiinde laanu guicá íquenu gápanu cani gúpanu dxiqué (biindaʼ 2 Pedro 2:20-22).
CADI GUINÍʼ ÍQUELUʼ CANI MAʼ QUÉ ÑANDA ÑUʼNUʼ
11. Xi riníʼ ique caadxi xpinni Cristu de ca cosa ni bisaanacaʼ.
11 Triste guininu ni, peru nuu xpinni Cristu riuubaʼ ladxidóʼ ora guiníʼ ique bisaana de guni xiixa ni ñacané laa nibani galán. Zándaca qué ninácabe ñécabe scuela roʼ, ñápacabe ti dxiiñaʼ risaca o ñápacabe stale bidxiichi. Nuu tu laa bisaana dxiiñaʼ ra biʼniʼ ganar stale bidxiichi, bisaana de gaca tuuxa binni risaca, maʼ qué niná ñuundaʼ o bisaana de niguite xiixa juegu. Peru cumu ruuyacabe candaa para gueeda dxi stiʼ Jiobá la? zándaca guiníʼ íquecabe: «Xi ñapaʼ yanna pa ñaca qué nusaanaʼ cani gupaʼ dxiqué yaʼ».
12. Ximodo biʼyaʼ Pablu guiráʼ cani bisaana.
12 Apóstol Pablu bisaana stale cosa ora guca xpinni Cristu (Fili. 3:4-6). Ñee guyuu ora biuubaʼ ladxidoʼbe pur ca cosa ni bisaanabe la? Laabe guniʼbe: «Irá nga bisaca para naa chiqué peru qué lica pe rizaaladxe cani, purti ni risaca para naa yanna la? nga Cristu. Ne cadi nga si, sínuque irá ni ma qué iquiiñe ni para naa, purti ma binebiaʼya Cristu Jesús Señor stinneʼ, ne laa si risaca para naa. Bisaana irá xixé ni para zinanda laabe, ne ma casi guixi a ni para naa, purti ni jma racaladxe nga laabe» (Fili. 3:7, 8). Cásica guirutiʼ ribanaʼ ti bolsa guixi ni maʼ bisaʼbiʼ la? zaqueca qué ñuubaʼ ladxidóʼ Pablu pur ca cosa risaca ni bisaana, purtiʼ para laabe zeeda gácacani casi guixi.
13, 14. Ximodo zanda chinándanu ejemplu stiʼ apóstol Pablu.
13 Xi naquiiñeʼ gúninu pa gudiʼnu cuenta jma caníʼ íquenu guiráʼ cani bisaananu dxiqué yaʼ. Caquiiñeʼ chinándanu ejemplu stiʼ Pablu. Ximodo yaʼ. Ra gusisácanu guiráʼ cani nápanu yanna. Dxandíʼ, zanda chuʼnu nayecheʼ purtiʼ nuunu gaxha de Jiobá ne rusisácabe laanu pur qué huasaana de guzúʼbanu stiidxabe (Heb. 6:10). Ne nin ti cosa ni gudii guidxilayú riʼ laanu qué liica zanda guchaaganu ni né guiráʼ ca ndaayaʼ ni cudii Dios laanu yanna ne guiráʼ cani chigudiibe laanu despué (biindaʼ Marcos 10:28-30).
14 Xi zanda gúninu para guzúʼbanu stiidxaʼ Dios yaʼ. Lu xcaadxi versículo ni zeeda despué Pablu peʼ cuzeeteʼ xi gucané laa. Sicaríʼ guniʼbe: «Rusiaanda irá ni ma udiʼdiʼ, ne rudxiee luaʼ ni cabeza naa neza ziaaʼ» (Fili. 3:13). Apóstol ca bizeeteʼ chupa cosa ni naquiiñeʼ gúninu. Primé la? caquiiñeʼ gusiáʼndanu ca cosa ni maʼ bisaananu ne cadi gunítinu stipa ne tiempu stinu para guiníʼ íquenu guiráʼ ni gúpanu dxiqué. Ne guiropa, caquiiñeʼ gudxíʼlunu para ugaandanu premiu stinu, casi runi ti binni ni ziguxooñeʼ para guni ganar.
15. Ximodo racané ejemplu stiʼ xcaadxi xpinni Dios laanu.
15 Laaca galán guiníʼ íquenu ejemplu stiʼ ca xpinni Dios ni bibani dxiqué o cani nabani yanna, para gacanécani laanu ti cadi gusaana de guyadxinu cani nuu nezalunu. Guzéʼtenu ejemplu stiʼ Abrahán ne Sara. Laacabe bisaanacabe ca cosa sicarú gúpacabe Ur, xquídxicabe, peru Stiidxaʼ Dios na «pa nucaa ique cabe nibigueta cabe guidxi ra biree cabe la? ñanda ca nibigueta cabe raqué» (Heb. 11:13-15). Peru qué ñúnicabe ni. Sti ejemplu ni nápanu nga stiʼ Moisés. Primé biaje bireebe de Egipto, bisaanabe stale cosa risaca ni qué huayuu dxi gusaana sti israelita. Peru Biblia na qué nibánabe cani bisaanabe, sínuque para laabe «jma risaca acaná be casi ucaná Cristu, que ñapa be irá ni nuu ndaani guidxi Egipto, purti bicaa ique be ni chi udii Dios laabe» (Heb. 11:26).
CA COSA NI BININÁ LAANU DXIQUÉ
16. Ximodo zándaca guni sentirnu ora guietenaláʼdxinu xiixa ni bíninu dxiqué.
16 Dxandíʼ, cadi guiráʼ diʼ ni bizaacanu dxiqué zusiéchecani ladxidoʼno. Zándaca cuchiiñaruʼ xquendabiaaninu laanu pur xiixa cosa malu bíninu dxiqué (Sal. 51:3). Zándaca cadxiichinu purtiʼ guluu jnézacabe laanu (Heb. 12:11). O zándaca guiníʼ íquenu cadi jneza ni bíʼnicabe laanu ne dede yanna nuuruʼ ni ndaaniʼ íquenu (Sal. 55:2). Intiica ni bizaacanu, xi zanda gúninu para cadi nisi maʼ caníʼ íquenu de laani yaʼ. Guidúʼyanu chonna cosa ni zacané laanu.
17. 1) Xiñee guníʼ Pablu «jma huaxiéʼ risaca lade irá ca xpinni Dios». 2) Xi biʼniʼ Pablu para qué nusaana de ñuni ni na Dios.
17 Cani cadi jneza bíninu dxiqué. Apóstol Pablu guníʼ ique «jma huaxiéʼ risaca lade irá ca xpinni Dios» (Efe. 3:8). Laaca laabe guniʼbe xi pur guníʼ íquebe zaqué, nabe: «Purti uzaya nanda ca xpinni Dios» (1 Cor. 15:9). Nánnanu biuubaʼ ladxidoʼbe cada guidxagalube ti xpinni Cristu ni guzanándabe dxiqué. Peru cadi pur guiráʼ ni bíʼnibe dxiqué nusaana de ñúnibe ni na Dios, sínuque jma guníʼ íquebe modo guca Dios nachaʼhuiʼ né laabe (1 Tim. 1:12-16). Ne bisihuínnibe guyuube nayecheʼ pur modo bicheechebe diidxaʼ. Tobi de ca cosa ni gudixhe íquebe gusiaandabe nga guiráʼ ni cadi jneza bíʼnibe dxiqué. Laaca galán gúninu zacá. Pa jma guicá íquenu modo rilaselaʼdxiʼ Jiobá laanu ne cadi gudiʼnu lugar guchiiñaʼ xquendabiaaninu laanu pur xiixa ni cadi jneza bíninu dxiqué, jma zaguixhe íquenu gúninu xhiiñaʼ Jiobá.
18. 1) Xi zazaaca pa guidaʼnu xiana pur xiixa conseju ni bidiicabe laanu dxiqué. 2) Ximodo zanda chinándanu conseju stiʼ Salomón ora uguu jnézacabe laanu.
18 Ora uguu jnézacabe laanu. Zándaca guidaʼnu xiana pur xiixa conseju ni bidiicabe laanu dxiqué. Peru pa gúninu zacá jma ziuʼnu triste, zadxiichinu dede zareʼnu gana (Heb. 12:5). Pa guicaanu conseju ni gudiicabe laanu peru despué maʼ qué chinándanu conseju ca la? pur gana si bidiicabe ni laanu. Ora guizaacanu zacá, galán chinándanu conseju bidii Salomón: «Gudaapi dxiichiʼ ca conseju ca. Cadi gundaaluʼ ni. Gúpani, purtiʼ laani nga xquendanabániluʼ» (Pro. 4:13). Caquiiñeʼ gúninu cásica runi ti binni ni zigusá carru stiʼ lu carretera ora guʼyaʼ ti seña: ruzuubaʼ diidxaʼ ne rinanda ni gábini laa (Pro. 4:26, 27; biindaʼ Hebreos 12:12, 13).
19. Ximodo zanda gápanu fe cásica Habacuc ne Jeremías.
19 Ora guizaacanu xiixa ni cadi jneza. Pa bíʼnicabe laanu xiixa ni cadi jneza o guni sentirnu ruluíʼ zacá ni la? zándaca cazaacanu ni bizaaca Habacuc. Laabe qué ñénebe xiñee cudii Jiobá lugar gaca stale cosa ni cadi jneza (Hab. 1:2, 3). Xi gúninu ora guni sentirnu zacá yaʼ. Nabé risaca gápanu fe casi gupa Habacuc, laabe guniʼbe: «Ziecheniáʼ Jiobá; dxandipeʼ ziecheniáʼ Dios ni rulá naa» (Hab. 3:18). Ne cásica guleza Jeremías gacané Jiobá laa, laanu laaca naquiiñeʼ gúninu zacaca. Naquiiñeʼ guni crenu zuni chaahuiʼ Jiobá guiráʼ ni cadi jneza ni cazaacanu ora naquiiñeʼ gúnibe ni (Lam. 3:19-24).
20. Ximodo zinándanu conseju bidii Jesús: «Laguietenalaʼdxi xi uca xheela Lot».
20 ¡Nabé galán tiempu nabáninu riʼ! Cadúʼyanu cazaaca stale cosa ni qué huayuu dxi guihuinni, ne nuuruʼ stale cosa ni zadúʼyanu. Nga runi, caquiiñeʼ chuunu biaʼ zeʼ xquidxi Jiobá. Ximodo zanda gúninu nga yaʼ. Caquiiñeʼ guyadxinu cani nuu nezalunu ne cadi guyadxinu cani maʼ bisaananu. Pa gúninu zacá, zinándanu conseju bidii Jesús ora guníʼ: «Laguietenalaʼdxi xi uca xheela Lot».
[Nota]
a Diidxaʼ griegu ni biquiiñeʼ Pablu para guiníʼ «guixi» riniʼni «cani maʼ qué zaquiiñeʼ» ni maʼ «biaana para gó biʼcuʼ» ne laaca riniʼni «guiʼ» «xiixa ni qué zabiguetaʼ canaʼ binni». Ti hombre ni nabé biindaʼ de Biblia na caníʼ Pablu de «ti cosa ni maʼ naquiiñeʼ gusaʼbiʼ binni purtiʼ maʼ nayuudxuʼ ni ne qué risaca ni».
[Guendarinabadiidxaʼ stiʼ párrafo]
