Rietenalaʼdxuʼ la?

Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Ximodo riguixhená ni bizaaca Salomón laanu.

Guluu Dios ndaayaʼ rey Salomón ne biquiiñeʼ laabe para gúnibe xhiiñaʼ. Peru Salomón qué ninanda ca conseju bidii Dios laa dxi biʼniʼ mandar. Bichaganabe ti xiiñidxaapaʼ Faraón, peru cadi ngasi, sínuque laaca bichaganabe stale gunaa ne bidiibe lugar gucaa ca gunaa que laabe guni adorarbe dios ni cadi dxandíʼ. Ndiʼ rusiidiʼ laanu pabiáʼ risaca chuʼnu cuidadu ti cadi gudiʼnu lugar chuʼ xiixa ni guchaa modo riníʼ íquenu (Deu. 7:1-4; 17:17; 1 Rey. 11:4-8) (15/12, yaza 10 dede 12).

Ñee jneza iquiiñeʼ ti guendaxheelaʼ xiixa ni gucueeza laacaʼ para cadi gápacaʼ xiiñicaʼ la?

Qué ruzeeteʼ diʼ Biblia pa cadi jneza iquiiñeʼ binni xiixa para gucueeza laa de gapa xiiñiʼ. Nga runi, cada guendaxheelaʼ naquiiñeʼ guʼyaʼ pa zapa xiiñiʼ. Pa iquiiñecabe xiixa para cadi gápacabe xiiñicabe la? laacabe nga gúʼyacabe ni, peru ni cadi naquiiñeʼ gúnicabe nga iquiiñecabe xiixa para gutiidicabe baʼduʼ (Rom. 14:4, 10-13) (1/1, yaza 6).

Xiñee ti pecadu nga gutiidiʼ xiiñiʼ ti gunaa.

Nabé risaca xquendanabani binni para Dios. Dede ti baʼduhuiiniʼ ni caʼruʼ gale maʼ ruuyabe laa casi ti binni (Sal. 139:16). Lu Ley que gudixhe Dios gaca castigar tuuxa ni guniná ti baʼduhuiiniʼ ni nuuruʼ ndaaniʼ jñaa. Nga runi, tuuxa ni guuti ti baʼduhuiiniʼ ni caʼruʼ gale la? casi ñaca ñuuti ti binni (Éxo. 21:22, 23). (1/1, yaza 6).

Xiñee nánnanu qué zanitilú Guidxilayú lu iza 2012.

Ora ruuyaʼ caadxi binni ximodo nuu calendariu stiʼ ca maya riniʼcaʼ zanitilú Guidxilayú lu iza 2012. Peru qué zaca diʼ nga, purtiʼ Biblia na guyáʼ Guidxilayú para guibani binni luni ne qué ziuu dxi guinitilú ni (Ecl 1:4; Isa 45:18) (1/1, yaza 13).

Xiñee zanda guininu huayuu xpinni Cristu ni bibí pur espíritu ndaaniʼ Guidxilayú riʼ dede lu primé siglu.

Lu ejemplu ra bizeeteʼ Jesús de «trigu» ne «yaga guiʼxhiʼ» que la? «semiá» chaʼhuiʼ ca nga ca «xpinni Dios», o ca xpinni Cristu ni bibí (Mat. 13:24-30, 38). Zaniisi yaga guiʼxhiʼ ne trigu ca juntu dede ora guidxiña dxi guiasa cosecha. Nga runi, neca qué gánnanu tupeʼ nga ca binni ni zeeda gaca casi trigu, zanda guininu huayuu xpinni Cristu ni bibí ndaaniʼ Guidxilayú dede primé siglu hasta ca dxi stinu (15/1, yaza 7).

Xiñee jneza modo bicheeche Pablu diidxaʼ.

Nuu caadxi razón. 1) Jma bicaa íquebe guiniʼbe de Reinu stiʼ Dios ne de Jesucristu. 2) Biyúbibe xi diidxaʼ guiniʼbe para ucuudxibe binni ne chindabe ndaaniʼ ladxidóʼ. 3) Biquiiñebe Stiidxaʼ Dios para bisiénebe laacaʼ. 4) Qué nucheechebe diidxaʼ ora si zanda gúnibe ni, sínuque bíʼnibe ni «siadóʼ ne dede bidxí layú», o dede huadxí (Hech. 28:23) (15/1, yaza 13).

Xi zanda gúninu para cadi gápanu envidia binni.

Caadxi de ca cosa ni zanda gacané laanu nga: gúninu stipa pur gannaxhiinu binni ne guizaaláʼdxinu laacaʼ, guidxaaganu binni runi adorar Dios, gúninu ni jneza, guiechenenu cani cayecheʼ (Rom. 12:15) (15/2, yaza 16 ne 17).

Xi cadi naquiiñeʼ guiaandaʼ laanu ora chigudiʼnu conseju.

Riquiiñeʼ gánnanu xipeʼ nga cayaca. Cadi guicábinu nagueendaca. Chinándanu ni na Stiidxaʼ Dios. Ne pa ganda la? iquiiñenu ca libru ne revista ni rudii xquidxi Dios. Cadi gábinu binni xi naquiiñeʼ guni (15/3, yaza 7 dede 9).

Xiñee gudxi Jesús cani cucaadiaga laa guacaʼ bultu stiʼ tuuxa «chupa kilómetru», pa guinábacabe laa guani «ti kilómetru» (Mat. 5:41).

Lu primé siglu que la? ca romanu nga biʼniʼ mandarcaʼ guidxi Israel, ngue runi zanda gucaacabe tutiica binni guni xhiiñacabe. Ora gudxi Jesús cani cucaadiaga laa sacaʼ chupa kilómetru, pa guinabaʼ tuuxa laacaʼ sacaʼ tobi la? cayábibe laacaʼ guzuubacaʼ stiidxaʼ ca binni ni runi mandar laacaʼ pa canábacaʼ laacabe xiixa ni naquiiñeʼ gúnicabe, peru naquiiñeʼ gúnicabe dxiiñaʼ ca de guidubi ladxidóʼcabe (1/4, yaza 9).