Ca scuela ra rusiidiʼ Dios laanu: tobi de ca modo rusihuinni Jiobá nadxii laanu

JIOBÁ nga maestru «Ni jma nanna gusiidiʼ» (Is. 30:20). Nabé nadxii Dios laanu, nga runi riuulaʼdxiʼ gusiidiʼ laanu. Tobi de ca ejemplu ni rusihuinni zacá ni nga ni rúnibe né Jesús: «ruluíʼ be laa irá ni runi be», purtiʼ nadxiibe laa (Juan 5:20). Ne laaca pur nadxiibe laanu nga cusiidibe laanu ximodo guininu jneza. Laanu, ca testigu stiʼ Jiobá, rúninu stipa pur gusisácanu laabe ne gacanenu sti binni (Is. 50:4).

Cásica riuulaʼdxiʼ Jiobá gusiidiʼ laanu, zacaca nga runi cani nuu lu Comité ni Ruuyaʼ xi Guizíʼdinu stiʼ Grupu ni Zaniruʼ, riquiiñecabe chii scuela para gusiidicabe guirá cani rapa gana guiziidiʼ ne ca ni zanda guni guiráʼ ni rinábacabe. Ñee ruuyaluʼ pabiáʼ nadxii Jiobá laanu ra cudii laanu ca scuela riʼ la?

Runi invitardu laatu gúʼyatu ximodo raca ca scuela ra riziidiʼ ca xpinni Cristu ne gúʼndatu xi huaníʼ caadxi de cani maʼ guyé. De racá gunabadiidxaʼ laca lii: «Xi zanda cueenduáʼ de ca scuela ra rusiidiʼ Dios laanu».

 NI RIBEENDUNU DE CANI RUSIIDIʼ DIOS

Modo rusiidiʼ Jiobá, Dios ni nadxii laanu, racaneni para guibáninu galán, racaneni gánnanu xi gúninu ora guidxaagalunu xiixa guendanagana ne racaneni laanu gucheechenu diidxaʼ né guendanayecheʼ (2 Cor. 13:11). Casi biziidiʼ ca primé xpinni Cristu, laaca racanécabe laanu para gusíʼdinu binni «guni ca irá» ni biʼniʼ mandar Jesús laanu (Mat. 28:20).

Neca qué zanda chuunu guiráʼ scuela riʼ, peru zabeendunu ni galán pa chuunu neca tobi de laacani. Ne laaca zanda gúninu guirá ni cazíʼdinu lu xquendanabáninu. Ne pa gucheechenu diidxaʼ né tuuxa ni maʼ guyé lu tobi de ca scuela riʼ, zanda guizíʼdinu de laa ne zacá zucheechenu diidxaʼ jma galán.

Nga runi gunabadiidxaʼ laca lii: «Ñee zanda chaaʼ tobi de ca scuela riʼ la?».

Laanu, ca xpinni Jiobá ridúʼyanu casi ti ndaayaʼ naroʼbaʼ nga chuunu ca scuela riʼ ne guizíʼdinu de laacani. Ribézadu chuʼtu jma gaxha de Dios pur guiráʼ ni guiziiditu ne gacaneni laatu para gúnitu guirá dxiiñaʼ ni nápatu ndaaniʼ xquidxi Dios. Dxiiñaʼ ni jma caquiiñeʼ gúninu nga gucheechenu ca diidxaʼ nacubi ne galán stiʼ Reinu.

[Cuadru ni zeeda lu yaza 13-17]

CA SCUELA RA RUSIIDIʼ DIOS LAANU

Scuela stiʼ cani Rucheeche Diidxaʼ

Xi para ni: Racaneni ca xpinni Cristu gánnacaʼ gucheechecaʼ diidxaʼ ne gusiidicaʼ stiidxaʼ Dios jma jneza.

Pabiáʼ rindaa ni: Rácani guiráʼ semana.

Paraa rácani: Ndaaniʼ ca Yoo stiʼ Reinu. Cani zanda cheʼ: Guiráʼ cani qué rusaana de guidagulisaa, cani runi cré cani rusiidiʼ Biblia ne nabani casi ti xpinni Cristu.

Ximodo ricá lá binni: Naquiiñeʼ guiniʼnécabe binnigola ni ruuyaʼ modo raca Scuela stiʼ cani Rucheeche Diidxaʼ.

Sharon, laa huará de esclerosis lateral amiotrófica, ne pur nga qué rizabe. Laabe guniʼbe: «Scuela stiʼ cani Rucheeche Diidxaʼ huasiidini naa guundaʼ jma ne gusiideʼ binni módopeʼ naquiiñeʼ gácani, laaca maʼ gucaneni naa guuyaʼ xi caquiiñeʼ sti binni para ganda gusiideʼ laacaʼ jma de Dios».

Arnie, ti binnigola ni riganna ca neza binni ridagulisaa guníʼ: «Dxi gucaʼ baʼduʼ qué niniéʼ galán purtiʼ napaapaʼ ruaaʼ ne nabé guca nagana para naa guuyadxiéʼ lú binni ora maʼ canieniáʼ laa. Yanna, rudieeʼ xquíxepeʼ Jiobá pur scuela riʼ, gucaneni naa para guiníʼ iqueʼ zanda guneʼ stale cosa, ne gucaneni naa gannaʼ guicaaʼ bi ora maʼ caniéʼ ne guiníʼ iqueʼ xi chiguiniéʼ. Nabé riuuladxeʼ gucané scuela riʼ naa para gusisacaʼ Dios lade ca binni ridagulisaa ne ra rucheecheʼ diidxaʼ».

 Scuela para cani Nacubi yendá Betel

Xi para ni: Para gacaneni ca betelita ni nacubi yendá gúnicaʼ xhiiñacaʼ jneza.

Pabiáʼ rindaa ni: Rindaani dieciséis semana, ne rácani cuarenta y cinco minutu cada semana.

Paraa rácani: Betel.

Cani zanda cheʼ: Cani maʼ nabeza Betel ne cani runi invitárcabe para guni dxiiñaʼ raqué ti iza o jma.

Ximodo ricá lá binni: Betel rucaa lácabe.

Demetrius, laabe guyebe scuela riʼ lu iza 1980, ne guniʼbe: «Scuela que gucaneni naa gannaʼ modo guundaʼ ne laaca gucaneni naa guneʼ dxiiñaʼ Betel stale iza. Ca maestru que, cani biziideʼ ne ca conseju gucuaaʼ raqué gucanécani naa gudieeʼ cuenta nadxii Jiobá naa ne racalaʼdxiʼ cheni naa galán laga nuaaʼ Betel».

Kaitlyn guníʼ: «Gucaneni naa guiníʼ iqueʼ jma risaca gacaʼ ti binni ni runi ni na Jiobá guiráʼ ora. Scuela para cani Nacubi yendá Betel gucaneni naa gusisacaʼ Jiobá ne gunebiaʼyaʼ laabe, gunebiaʼyaʼ lídxibe ne xquídxibe».

Scuela stiʼ Xhiiñaʼ Reinu

Xi para ni: Para gusiidini ca binnigola ni riganna ca neza binni ridagulisaa, ca binnigola ne nuu biaje né ca siervu ministerial para gúnicaʼ dxiiñaʼ ni nápacaʼ ra ridagulisaacaʼ ne ndaaniʼ xquidxi Dios (Hech. 20:28). Ruuyacabe xi guendanagana napa ca binni ridagulisaa, xiixa ni zándaca guizaaca ne xi caquiiñeʼ gaca nagueendaca. Grupu ni zaniruʼ riguixhe padxí gácani ne nuu biaje rindaa chupa chonna iza para gácani.

Pabiáʼ rindaa ni: Para ca binnigola ni riganna neza binni ridagulisaa, rindaani chupa o chupa gubidxa arondaʼ, para ca binnigola rindaani ti dxi arondaʼ ne para ca siervu ministerial rindaani ti dxi.

Paraa rácani: Jma rácani ndaaniʼ ti Yoo stiʼ Reinu ne nuu biaje rácani ra raca guendaridagulisaa roʼ.

Cani zanda cheʼ: Ca binnigola ni riganna neza binni ridagulisaa, ca binnigola ne ca siervu ministerial.

Ximodo ricá lá binni: Betel runi invitar binnigola ni riganna ca neza binni ridagulisaa, ne laa ruseendaʼ invitación stiʼ ca binnigola ne ca siervu ministerial.

«Neca huaxiéʼ dxi nga riécabe scuela riʼ, peru riziidicabe stale luni, racaneni ca binnigola cadi gusaana de chuʼcaʼ nayecheʼ ne gúnicaʼ xhiiñaʼ Jiobá casi hombre ni zaniruʼ, casi na Biblia. Cani nacubi ne cani maʼ xadxí de cayuni dxiiñaʼ riʼ riziidicaʼ gápacaʼ ca dendxuʼ stiʼ Dios ne guiníʼ íquecaʼ tobi si.» Quinn

«Scuela riʼ racaneni para gusisácanu cani rizíʼdinu de Dios, riguixhenani laanu de ca guendanagana ne rudiini conseju ni naquiiñeʼ chinándanu para gápanu ca dendxuʼ huiiniʼ stiʼ Dios. Nabé nachaʼhuiʼ Jiobá.» (Michael.)

 Scuela stiʼ ca Precursor Regular

Xi para ni: Para gacaneni ca precursor ti ganda gucheechecaʼ diidxaʼ jma jneza (2 Tim. 4:5).

Pabiáʼ rindaa ni: Chupa semana.

Paraa rácani: Betel riníʼ paraa, peru jma rácani ndaaniʼ ti Yoo stiʼ Reinu.

Cani zanda cheʼ: Cani napa ti iza de precursor regular o jma. a

Ximodo ricá lá binni: Ca precursor ni zanda cheʼ scuela riʼ maca cá lacaʼ, ne binnigola ni riganna ca neza binni ridagulisaa nga rudii invitación stícabe.

Lily guníʼ: «Ra scuela riʼ biziideʼ gudxieeluáʼ ca guendanagana rapaʼ ora chigucheecheʼ diidxaʼ ne cani rapaʼ lu xquendanabaneʼ. Jma maʼ rieneʼ ni ruundaʼ, jma galán modo rusiideʼ ne jma nannaʼ iquiiñeʼ Biblia. Jma maʼ nannaʼ ximodo gacaniáʼ binni, racaniáʼ ca binnigola ne racaniáʼ guiniisi neza binni ridagulisaa».

Brenda maʼ guyé scuela riʼ chupa biaje, laa cusiene: «Gucaneni naa quixhe iqueʼ guneʼ guiráʼ ni na Dios, chuʼ xquendabiaaneʼ nayá ne cadi gusaana de gacaniáʼ sti binni. ¡Nabé nachaʼhuiʼ Jiobá!».

[Nota]

Scuela para ca Binnigola ni nuu ndaaniʼ ca neza Binni ridagulisaa

Xi para ni: Racaneni ca binnigola gúnicaʼ xhiiñacaʼ ra ridagulisaacaʼ ne guiene chaahuicaʼ ni rusiidiʼ Dios.

Pabiáʼ rindaa ni: Gaayuʼ gubidxa.

Paraa rácani: Betel riníʼ paraa, peru jma rácani ndaaniʼ ti Yoo stiʼ Reinu o ra raca guendaridagulisaa roʼ.

Cani zanda cheʼ: Ca binnigola.

Ximodo ricá lá binni: Betel runi invitar laacabe.

Guidúʼyanu xi guníʼ chupa chonna de cani guyé scuela riʼ lu clase 92 ni guca Estados Unidos:

«Nabé gucané scuela riʼ naa; bicaani naa guuyaʼ ximodo nuaaʼ ne guuyaʼ ximodo zanda gacaniáʼ ca dendxuʼ stiʼ Jiobá.»

«Yanna jma zanda uguaaʼ gana ca xpinni Cristu ra gusiideʼ laacaʼ ni cá lu Biblia.»

«Qué ziaandaʼ diʼ naa guiráʼ ni biziideʼ riʼ biaʼ dxi guibaneʼ.»

Scuela para ca Binnigola ni riganna ca neza Binni ridagulisaa ne Xheelacaʼ

Xi para ni: Para gacaneni ca binnigola ni riganna ca neza binni ridagulisaa ne ca binnigola ni riganna ca guendaridagulisaa roʼ, purtiʼ nadipaʼ modo rúnicaʼ dxiiñaʼ para gusiidicaʼ stiidxaʼ Dios, zacá zacanécabe ca binni ridagulisaa jma jneza (1 Tim. 5:17; 1 Ped. 5:2, 3).

Pabiáʼ rindaa ni: Chupa beeu.

Paraa rácani: Betel riníʼ paraa.

Cani zanda cheʼ: Ca binnigola ni riganna ca neza binni ridagulisaa ne ca binnigola ni riganna ca guendaridagulisaa roʼ.

Ximodo ricá lá binni: Betel runi invitar ca binnigola riʼ ne xheelacabe.

«Yanna jma maʼ rusisácadu dxiiñaʼ ni napa Jesús casi Xaíque ndaaniʼ xquidxi Dios. Riénedu pabiáʼ risaca uguʼdu gana ca xpinni Cristu ne chuʼ ca binni ridagulisaa tobi si. Ti cosa ni jma biaana ndaaniʼ íquedu nga neca zanda gudiʼdu conseju ne gábidu tuuxa cadi jneza canazá, ni jma naquiiñeʼ gúnidu nga gacanedu ca xpinni Cristu gánnacaʼ nadxii Jiobá laacaʼ.» (Joel, primé clase guca, 1999.)

 Scuela ra riziidiʼ ca Hombre ni caʼruʼ guichaganáʼ gúnicaʼ Xhiiñaʼ Dios

Xi para ni: Gacaneni ca binnigola ne ca siervu ministerial ni caʼruʼ guichaganáʼ gúnicaʼ jma dxiiñaʼ ndaaniʼ xquidxi Jiobá. Stale de cani rié scuela riʼ ruseendacabe laacaʼ ndaaniʼ xquídxicaʼ ra jma caquiiñeʼ tu gucheeche diidxaʼ. Xcaadxi de laacabe zanda guseendacabe laacaʼ sti guidxi roʼ, pa guiníʼcabe zanda chécabe. Nuu tu zanda gaca precursor especial ti tiempu ca lugar nuu jma zitu para guzulúcabe xhiiñaʼ Reinu ne gacanécabe guiroobaʼ dxiiñaʼ ca raqué.

Pabiáʼ rindaa ni: Chupa beeu.

Paraa rácani: Betel riníʼ paraa, peru jma rácani ndaaniʼ ti Yoo stiʼ Reinu o ra raca guendaridagulisaa roʼ.

Cani zanda cheʼ: Ca hombre ni caʼruʼ guichaganáʼ de 23 ne 62 iza, ni nazaaca ne racalaʼdxiʼ chigacané ca lugar ra jma caquiiñeʼ (Mar. 10:29, 30). Jma zanda cheʼ cani napa chupa iza de precursor regular o ni maʼ ziné chupa iza de binnigola o siervu ministerial ne qué huasaana ni.

Ximodo ricá lá binni: Ra raca guendaridagulisaa de chupa gubidxa ridagulisaa cani riuulaʼdxiʼ cheʼ scuela riʼ para gánnacaʼ jma de laani.

Rick guyé clase 23 ni guca Estados Unidos, laa guníʼ sicaríʼ: «Ra guyaaʼ scuela riʼ biiyaʼ ximodo gucané espíritu stiʼ Jiobá naa para bichaaʼ modo naa. Ora gudii Jiobá lii ti dxiiñaʼ, zacanebe lii para gúniluʼ ni. Pa guicá íqueluʼ gúniluʼ ni na Dios lugar de gúniluʼ ni racaláʼdxiluʼ la? zudiibe stipa lii».

Sicaríʼ guníʼ Andreas, laa cucheeche diidxaʼ Alemania: «Ora ruuyaʼ modo runi xquidxi Jiobá dxiiñaʼ tiempu riʼ, reeda gácani ti milagru para naa. Cani biziideʼ raqué gucanécani naa para guneʼ guiráʼ dxiiñaʼ ni caquiiñeʼ gaca. Stale de ca ejemplu zeeda lu Biblia laaca bisiidiʼ cani naa ti cosa nabé risaca: gacaniáʼ ca xpinni Cristu ne guneʼ ni na Jiobá nga ni dxandíʼ rusiecheʼ binni».

Scuela para ca Guendaxheelaʼ ni naca xpinni Cristu

Xi para ni: Para guiziidicabe jma ti zacá iquiiñeʼ Jiobá laacabe ne iquiiñeʼ xquidxi Dios laacabe para gúnicabe xhiiñaʼ jma jneza. Stale de cani rié scuela riʼ ruseendacabe laacaʼ sti lugar ra jma caquiiñeʼ tu gucheeche diidxaʼ ndaaniʼ xquídxicaʼ, ne xcaadxi ruseendacabe laacaʼ sti guidxi roʼ, pa guiniʼcaʼ zanda checaʼ. Nuu tu zanda gaca precursor especial ti tiempu ca lugar nuu jma zitu para guzulúcabe xhiiñaʼ Reinu ne gacanécabe guiroobaʼ dxiiñaʼ ca raqué.

Pabiáʼ rindaa ni: Chupa beeu.

Paraa rácani: Rácani Estados Unidos, ne lu beeu septiembre 2012 zuzulú zácani ndaaniʼ xcaadxi guidxi roʼ. Jma rácani ndaaniʼ ti Yoo stiʼ Reinu o ra raca guendaridagulisaa roʼ.

Cani zanda cheʼ: Ca guendaxheelaʼ ni napa 25 ne 50 iza ne nuucaʼ nazaaca, nuucaʼ listu para checaʼ ra jma caquiiñeʼ tu gucheeche diidxaʼ ne gácacabe casi Isaías, purtiʼ laa guníʼ: «¡Raríʼ nuaaʼ! Biseendaʼ naa» (Is. 6:8). Naquiiñeʼ gápacabe chupa iza de bichaganácabe ne chupa iza de precursor ne qué huasaanacabe ni. Naquiiñeʼ gapa hombre ca chupa iza de cayuni dxiiñaʼ de binnigola o siervu ministerial.

Ximodo ricá lá binni: Ra raca guendaridagulisaa de chonna gubidxa ridagulisaa cani riuulaʼdxiʼ cheʼ scuela riʼ para gánnacaʼ jma de laani. Pa lu ca guendaridagulisaa roʼ raca xquídxiluʼ qué ridagulisaacabe para guiníʼcabe de scuela riʼ ne rápatu gana chetu ni la? zanda gucaatu ra yoo Betel ni ruuyaʼ dxiiñaʼ raca xquídxitu.

«¡Cani riziidiʼ binni lu xhono semana riʼ ruchaani xquendanabani ca guendaxheelaʼ ni racalaʼdxiʼ guni jma lu xhiiñaʼ Jiobá! Laadu maʼ gudixhe íquedu guibánidu né biaʼ caquiiñesidu ti ganda iquiiñedu tiempu stidu né guendabiaaniʼ.» Zacá guníʼ (Eric ne Corina, xagueteʼ; laacaʼ guyecaʼ primé clase lu iza 2011.)

Scuela stiʼ Galaad stiʼ Watchtower

Xi para ni: Rusiidini cani rié scuela riʼ para gúnicaʼ dxiiñaʼ casi misioneru ca lugar ra nuu stale binni, gácacabe binnigola ni riganna ca neza binni ridagulisaa o betelita. Dxiiñaʼ stícabe nga gacanécabe guidxi ra chécabe para gucheechecaʼ diidxaʼ jma jneza ne gacanécabe Betel guni xhiiñaʼ jma jneza.

Pabiáʼ rindaa ni: Gaayuʼ beeu.

Paraa rácani: Centro Educativo stiʼ Watchtower (Patterson, Nueva York).

Cani zanda cheʼ: Ca guendaxheelaʼ ni maca cayuni dxiiñaʼ de misioneru sti guidxi ne qué huayecaʼ scuela riʼ, ca precursor especial, ca binnigola ni riganna ca neza binni ridagulisaa o ca betelita. Naquiiñeʼ gápacabe chonna iza de cayúnicabe dxiiñaʼ sin cuezadxícabe. Laaca naquiiñeʼ gánnacabe inglés, gúʼndacabe ne gucaacabe ni.

Ximodo ricá lá binni: Grupu ni Ruuyaʼ Modo Raca Dxiiñaʼ Betel runi invitar laacabe para guinábacabe ni.

Lade ne Monique, de Estados Unidos, yanna riʼ cayúnicabe dxiiñaʼ África. Lade guníʼ: «Scuela stiʼ Galaad riʼ gucaneni laadu para chuudu sti lugar lu Guidxilayú, ne chuʼdu listu para gúnidu jma lu xhiiñaʼ Jiobá ne gacanedu ca xpinni Cristu».

Monique guníʼ: «Cumu runeʼ guiráʼ ni biziideʼ lu Stiidxaʼ Dios la? racaneni naa chuaaʼ nayecheʼ ratiica guseendacabe naa. Ora maʼ nuaaʼ nayecheʼ ruuyaʼ nabé nadxii Jiobá naa».

Scuela para Grupu ni Ruuyaʼ Modo Raca Dxiiñaʼ Betel ne Xheelacaʼ

Xi para ni: Para gacanécabe cani ruuyaʼ modo raca dxiiñaʼ Betel ti guʼyaʼ chaahuicaʼ dxiiñaʼ raca ndaaniʼ cani. Gúʼyacabe ca dxiiñaʼ runi ca neza binni ridagulisaa, cani runi ca binnigola ni riganna ca neza binni ridagulisaa ne cani riganna ca guendaridagulisaa roʼ. Laaca ruuyacabe ni raca ra ribiʼxhiʼ diidxaʼ, ra raca imprimir ne ra ruseendacabe libru ne revista sti lugar.

Pabiáʼ rindaa ni: Chupa beeu.

Paraa rácani: Centro Educativo stiʼ Watchtower (Patterson, Nueva York).

Cani zanda cheʼ: Naquiiñeʼ gaca hombre ca tobi de cani nuu lu Grupu ni Ruuyaʼ Modo Raca dxiiñaʼ Betel o binnigola ni ruuyaʼ modo raca dxiiñaʼ ndaaniʼ guidxi ca o tuuxa ni maʼ bisaanacabe dxiiñaʼ ca lu náʼ.

Ximodo ricá lá binni: Grupu ni Zaniruʼ runi invitar ca binnigola riʼ ne xheelacaʼ.

Lowell ne Cara, laacaʼ guyecaʼ lu clase 25 ne cayúnicaʼ dxiiñaʼ Nigeria. Lowell guníʼ: «Scuela riʼ bisietenalaʼdxiʼ naa naquiiñeʼ guneʼ ca dxiiñaʼ stinneʼ modo racalaʼdxiʼ Jiobá ti chuuláʼdxibe cani, neca napaʼ stale dxiiñaʼ o intiica dxiiñaʼ cayuneʼ. Laaca nabé bieeteʼ lu scuela que pabiáʼ risaca gannaxhiidu ca xpinni Cristu cásica nadxii Jiobá laacaʼ».

Cara guníʼ: «Qué liica riaandaʼ naa xiixa ni gúdxicabe laadu: pa cayaca nagana para gusiéneluʼ xiixa la? biindaʼ chaahuiʼ de laani ante gusiéneluʼ ni sti binni».