GUIDÚʼYANU xi bizaaca George Naish lu iza 1923, dxi nuube ti lugar ra dxaʼ guiibaʼ ni riquiiñeʼ lu guerra, guidxi Saskatoon, provincia stiʼ Saskatchewan (Canadá). Ora culuíʼ nabe caadxi trozo de 18 metru de ziuulaʼ gunabadiidxabe: «Xi para ca trozo riʼ». Gúdxicabe laabe biquiiñeʼ cani para bíʼnicabe torre ni biquiiñeʼ casi seña dxi cayaca primé guerra ni guca guidubi Guidxilayú. Gudiʼdiʼ si tiempu bisiene George Naish: «Guníʼ iqueʼ zanda iquiiñedu cani para gúnidu torre stiʼ radiu, zacá nga para gápadu ti radiu ni iquiiñeʼ para gusíʼdidu binni de Dios». Lu iza 1924 guyuu primé estación de radiu stiʼ ti religión guidxi Canadá: canal CHUC.

Cumu nabé naroʼbaʼ guidxi Canadá, biaʼca naroʼbaʼ Europa la? biáʼsipeʼ biquiiñeʼ radiu que para bireeche diidxaʼ. Florence Johnson, tobi de cani biʼniʼ dxiiñaʼ lu estación ni nuu Saskatoon, guníʼ: «Pur biquiiñedu radiu riʼ gunda bisíʼdidu jma binni de Dios, dede ca lugar ra qué ñanda nindadu laasidu. Cumu nacubi bihuinni radiu tiempu que la? nabé riuulaʼdxiʼ binni gucaadiaga guiráʼ ni ridiʼdiʼ raqué». Lu iza 1926, ca Binni Ruundaʼ Biblia (zacá binibiáʼ binni ca testigu stiʼ Jiobá dxiqué) maʼ gúpacaʼ radiu sticaʼ ndaaniʼ tapa guidxi stiʼ Canadá. a

Xi rucaadiaga binni lu radiu que yaʼ. Rucaadiágacaʼ diidxaʼ riuundaʼ stiʼ ti neza binni ridagulisaa nuu guidxi que ora maʼ cayuundacaʼ ne caadxi músicu o né ti orquesta nahuiiniʼ. Laaca bitiidicabe libana ne guyuu caadxi binni ni maʼ cayuíʼ diidxaʼ de lu Biblia. Amy Jones, tobi de cani guyuu lade ca binni que rietenalaʼdxiʼ: «Ora maʼ canagucheecheʼ diidxaʼ ne ugapadiuxeʼ binni, nuu tu rabi naa: “Lii nga riniuʼ lu radiu que njaʼ”».

Ndaaniʼ guidxi Halifax (Nueva Escocia), ca Binni Ruundaʼ Biblia bíʼnicaʼ sti cosa nacubi lu radiu: gunábacabe binni guiníʼ ra nuucabe para guinabadiidxaʼ xiixa ni racalaʼdxiʼ ganna de lu Biblia. Tobi de ca xpinni Cristu que bicaa: «Nabé guyuulaʼdxiʼ binni modo cayúnicabe. Riníʼ stale binni ra nuucabe dede qué randa ricábicabe guiracaʼ».

 Peru cásica guca tiempu bibani apóstol Pablu, gadxé gadxé modo biʼyaʼ binni ni rusiidiʼ ca Binni Ruundaʼ Biblia (Hech. 17:1-5). Caadxi binni guyuulaʼdxiʼ ni binadiaga. Guzéʼtenu de Hector Marshall, ora binadiágabe de libru Estudios de las Escrituras lu radiu, gunábabe xhoopaʼ volumen de laani. Guidúʼyanu xi bisiénebe ra gudiʼdiʼ tiempu: «Guníʼ iqueʼ zanda iquiiñeʼ ca libru que para gusiideʼ binni guiráʼ domingu ndaaniʼ yuʼduʼ». Peru dxi biluxe bíʼndabe primé volumen stini, gudixhe íquebe gusaanabe yuʼduʼ que. Beeda gácabe tobi ni rucheeche diidxaʼ né stale gana ne bíʼnibe ni na Jiobá dede dxi gútibe lu iza 1998. Neza ra rindani Gubidxa stiʼ guidxi Nueva Escosia, bicaadiaga ti coronel láʼ John A. MacDonald libana ni láʼ: «Reinu si nga zanda gacané binni guidxilayú» (El Reino, la esperanza del mundo). Sti dxi que gúdxibe ti xpinni Cristu: «Neegueʼ bicaadiaga ca binni de Cabo Bretón caadxi diidxaʼ, ne qué huayuu dxí gunadiaga binni ca diidxaʼ sicarú riʼ neza ra nabézanu».

Peru cadi guiráʼ binni guyuulaʼdxiʼ ni. Ca xaíque yuʼduʼ nabé bidxiichicaʼ. Ndaaniʼ guidxi Halifax, guníʼ caadxi católicu zunidecaʼ estación ni riquiiñeʼ ca Binni Ruundaʼ Biblia para gusiidicaʼ binni. Ca xaíque stiʼ yuʼduʼ bicaacaʼ gobiernu gucueeza ca xpinni Cristu, ne lu iza 1928 málasi guníʼ gobiernu que maʼ qué zudii permisu ca Binni Ruundaʼ Biblia para gusiidicaʼ lu radiu. Cumu cadi jneza ni biʼniʼ gobiernu que la? ngue runi gudiiziʼ ca xpinni Cristu caadxi guiʼchiʼ ni láʼ Who Owns the Air? (Tuu nga xpixuaanaʼ ca onda stiʼ radiu). Peru qué ñanda diʼ nucaacabe gobiernu nuchaa ni maʼ guníʼ.

Peru, neca huaxiéʼ ca xpinni Jiobá ni nuu Canadá, qué nireecaʼ gana. Isabel Wainwright cusiene: «Ruluíʼ maʼ biʼniʼ ganar ca xhenemígudu laadu pur ngue. Peru nannaʼ qué nudii Jiobá lugar nucueeza gobiernu laadu pa ñaca zaqué nga racaláʼdxibe guireeche diidxaʼ. Ni bizaaca iza que bicaani laadu guyúbidu sti modo jma risaca para gucheechedu stiidxaʼ Reinu». Lugar de niquiiñeʼ ca Binni Ruundaʼ Biblia de Canadá radiu para gucheechecaʼ diidxaʼ la? bizulú yegánnacaʼ binni dede ralidxi. Neca zaqué, guyuu ti tiempu nabé biquiiñeʼ radiu para ganna binni de Dios, ngue runi guníʼ coronel que: «Qué huayuu dxí gunadiaga binni ca diidxaʼ sicarú riʼ». (Cani naguu chaahuiʼ xquidxi Dios guidxi Canadá.)

[Nota]

[Imagen ni zeeda lu yaza 32]

(1) Radiu ni nuu Edmonton (Alberta) (2) Xpinni Cristu ni cayuni chaahuiʼ biaaniʼ stiʼ radiu nuu Toronto (Ontario) (3) Lugar ra nuu CHUC guidxi Saskatoon (Saskatchewan)

[Ni caníʼ yaza 32]

«Riníʼ stale binni ra nuucabe dede qué randa ricábicabe guiracaʼ»