ROALD ne Elsebeth nga ti guendaxheelaʼ ni napa jma de 50 iza. Raca chupa chonna iza gulézacabe Bergen, guiropa guidxi jma risaca stiʼ Noruega. Galán nabánicabe ndaaniʼ guidxi que, purtiʼ gastiʼ cadi cayaadxaʼ laacabe raqué. Laacabe ne guiropaʼ xiiñicabe, Isabel ne Fabian, guyuucabe ndaaniʼ ti neza binni ridagulisaa ni nuu xquídxicabe. Roald nga tobi de ca binnigola nuu raqué ne Elsebeth naca precursora. Ca xiiñicabe, Isabel ne Fabian rucheechecaʼ diidxaʼ né stale gana.

Gudixhe ique familia riʼ chigucheeche diidxaʼ ti semana ti lugar zitu. Ngue runi, lu beeu septiembre iza 2009, dxi napa Fabian 18 iza, yené Roald ne Elsebeth laacabe Nordkinn, ti península ni nuu lu condadu stiʼ Finnmark, ladu guiaʼ stiʼ círculo polar ártico. Raqué nuu ti guidxi huiiniʼ láʼ Kjøllefjord, ra bidxaagacabe xcaadxi xpinni Cristu ni gudixhe ique chigucheeche diidxaʼ lugar que cásica laacabe. Roald guníʼ: «Cumu gudixheʼ chaahueʼ tiempu stinneʼ la? gunda bicheecheʼ diidxaʼ ti semana. Biluxe si semana que guizáʼ nayecheʼ bineʼ sentir pur bineʼ dxiiñaʼ nabé sicarú riʼ». Peru málasi bizaaca xiixa ni cadi cabézabe. Xi laani yaʼ.

Roald guníʼ: «Nin cadi caníʼ iqueʼ pa ninabadiidxaʼ Mario, ti precursor de Finnmark, laadu pa zanda chindézadu Lakselv para gacanedu ti neza binni ridagulisaa ra nuu 23 ni rucheeche diidxaʼ». Qué liica nidxela Roald xi niníʼ ora gunabadiidxaʼ Mario laa xiixa ni cadi cabeza. Laabe cusiénebe: «Naa ne Elsebeth maca riníʼ íquedu zándaca zadxiña dxi chigacanedu sti lugar ra caquiiñeʼ tu gucheeche diidxaʼ. Peru cá íquedu gúnidu ni ora maʼ cadi nabezané ca xiiñidu laadu». Peru dxi maʼ zinécabe chupa chonna gubidxa de cucheechecabe diidxaʼ lugar que, bidii Roald cuenta pabiáʼ caquiiñeʼ ca binni que guiziidicaʼ de Dios. Óraque nga caquiiñeʼ ca binni que tu gacané laacaʼ, cadi despué. Guidúʼyanu xi guníʼ Roald ra gudiʼdiʼ dxi: «Guizáʼ guníʼ iqueʼ ni gunabadiidxaʼ Mario naa que, dede qué ñanda ñaseʼ chupa chonna gueelaʼ». Cumu nuu Mario gunibiáʼ Roald ne binnilidxi neza binni ridagulisaa ni nuu Lakselv, ni riaana ladu gueteʼ stiʼ Kjøllefjord la? bidxiibabe familia que ndaaniʼ carru stibe ne bisabe 240 kilómetru para yenebe laacaʼ gunibiaʼcaʼ ca xpinni Cristu nuu lugar que.

Andreas, tobi de ca binnigola nuu raqué, yené laacabe para gunibiáʼcabe lugar que ne Yoo stiʼ Reinu ra ridagulisaacaʼ. Galán modo bidxaagalú ca xpinni Cristu nuu raqué laacabe ne gúdxicaʼ Roald ne Elsebeth ziuucaʼ nayecheʼ pa chindézacabe raqué para gacanécabe laacaʼ guireeche diidxaʼ. Ne dede cuxidxi huiiniʼ Andreas ora gudxi Roald ne Fabian maʼ biyubi dxiiñaʼ gúnicabe, maʼ cayaadxaʼ si guiniʼnécabe binni ni rudii dxiiñaʼ raqué para guihuinni pa zanda gúnicabe ni. Yanna, xi gúnicabe yaʼ.

Primeca ni guníʼ Fabian nga: «Qué racaladxediáʼ guiaanaʼ raríʼ». Qué liica ñuuláʼdxibe nindézabe ndaaniʼ ti guidxi huiiniʼ ne nusaanabe ca xhamígube ni biniisinebe ndaaniʼ neza binni ridagulisaa ra maca riebe. Ne laaca cayaadxaruʼ para guiluxe gúʼndabe de electricista. Peru ora gunabadiidxacabe Isabel, dxiqué napa 21 iza, pa ñuulaʼdxiʼ nindeza raqué la? guníʼ: «¡Ngapeʼ nga ni cá iqueʼ guneʼ dede dxi nahuiineʼ!». Peru laaca guniʼbe: «Cada guiníʼ iqueʼ ni, rinabadiidxaʼ laca naa pa biaʼsi ngue ni chiguneʼ. Ñee zabanaʼ ca xhamiguaʼ la? Ñee ziaanaʼ lade ca binni ridagulisaa ra maca riaaʼ purtiʼ qué rácapeʼ nagana para naa guneʼ xhiiñaʼ Jiobá raqué la?». Elsebeth laaca guníʼ: «Bineʼ sentir cudii Jiobá laadu ti dxiiñaʼ, peru laaca guníʼ iqueʼ cadi xadxí de biʼniʼ chaahuidu lídxidu ne maʼ stale cosa nápadu lu veinticinco iza ni maʼ gudiʼdiʼ».

Biluxe si semana de cucheeche Roald ne binnilidxi diidxaʼ raqué, bibiguétacaʼ Bergen. Neca biaʼ 2,100 kilómetru nuu Bergen de Lakselv, qué nusaana de niníʼ íquecabe ca xpinni Cristu de lugar que. Elsebeth guniʼruʼ: «Qué nusaanaʼ de ñuneʼ orar Jiobá ne laaca qué nusaanaʼ de ninieniáʼ ca xpinni Cristu ni binibiaʼdu raqué. Ruséʼndadu foto ra nuucabe ne laaca ruseendacabe ra nuudu ne rinidu ximodo cayé ni laadu». Roald guniʼruʼ: «Caquiiñeʼ guicaaʼ tiempu para guiníʼ iqueʼ pa biaʼsi ngue chindézadu raqué. Laaca caquiiñeʼ guuyaʼ xi dxiiñaʼ zanda gúnidu para gápadu ni tiidinedu dxi. Qué nusaanaʼ de ñuneʼ orar Jiobá ne de ñabeʼ binnilidxeʼ ne ca xpinni Cristu ni maʼ huayuni dxiiñaʼ riʼ xi cá iqueʼ guneʼ». Fabian guníʼ: «Cada guiníʼ iqueʼ ni, jmaruʼ si rudieeʼ cuenta qué gapaʼ nin ti razón para guiniéʼ qué ziaaʼ. Qué nusaanaʼ de ñuneʼ orar Jiobá ne chaahuiʼ chaahuiʼ gucaneni naa quixhe iqueʼ chigacaniáʼ raqué». Xi bizaaca né Isabel yaʼ. Gúcabe precursora lade ca binni ni ridagulisaanebe ti chuʼbe listu pa málasi chindézacabe lugar que. Dxi maʼ zinebe xhoopaʼ beeu de nácabe precursora ne jma maʼ ribeebe tiempu para gúʼndabe Biblia, bidiibe cuenta maʼ zanda chigacanebe raqué.

Ra zidiʼdiʼ dxi jma maʼ ziyuulaʼdxiʼ Roald ne binnilidxi chigacanecaʼ sti lugar ne bíʼnicaʼ stale cosa para ganda ugaandacaʼ ni gudixhe íquecaʼ. Neca nabé galán riguíxecabe Roald ra runi dxiiñaʼ ne riuulaʼdxiʼ guni ni, gunabaʼ gudiicabe permisu laa ti iza. Peru cumu rapa patrón stibe gana gucuudxi laabe para guiaanabe la? gudxi laabe zanda gúnibe dxiiñaʼ chupa semana ne guiziiláʼdxibe xhoopaʼ. Roald guníʼ: «Maʼ qué ñuneʼ ganar stale biaʼ bineʼ ganar dxiqué, peru gastiʼ qué ñaadxaʼ laadu».

Elsebeth guniʼruʼ: «Xheelaʼ gudxi naa guuyaʼ pa ganda guidxelaʼ ti yoo Lakselv ne guquixheʼ yoo ni nápadu Bergen. Neca bidii dxiiñaʼ laadu, peru gunda bínidu ni. Despué bidxela ca xiiñidu ra gúnicaʼ dxiiñaʼ chupa chonna ora si, ne yanna maʼ racanecaʼ laadu para sidu guendaró ne xcaadxi cosa ni riquiiñedu».

 Isabel rietenalaʼdxiʼ: «Cumu nabé nahuiiniʼ guidxi ra yendézadu que la? guca nagana para naa guidxelaʼ ti dxiiñaʼ para cadi gusaanaʼ de gacaʼ precursora. Ne ruluíʼ qué ñuu dxi nidxelaʼ ti dxiiñaʼ». Neca zaqué, gunda gúpabe guiráʼ ni caquiiñebe, purtiʼ rúnibe intiica dxiiñaʼ guidxélabe, neca chupa chonna hora si gudiicabe laabe dxiiñaʼ ti dxi. Primé iza de nuube raqué, bíʼnibe dxiiñaʼ gaʼ lugar. Xi bizaaca né Fabian yaʼ. Laabe guniʼbe: «Para ganda gunduuxeʼ carrera stinneʼ la? caquiiñeʼ guneʼ dxiiñaʼ né ti electricista ni jma nanna que naa, ne bidxelaʼ tobi ndaaniʼ guidxi Lakselv. Despué gudideʼ examen stinneʼ ne bidxelaʼ ra guneʼ dxiiñaʼ de electricista chupa chonna si ora».

Marelius ne Kesia xheelabe, gudixhe íquecaʼ chigacanecaʼ ra jma caquiiñeʼ tu gucheeche diidxaʼ. Marelius napa 29 iza yanna riʼ, laa guníʼ: «Ni bicaa naa guiníʼ iqueʼ pa zanda gucheecheʼ diidxaʼ jma nga guiráʼ ca libana ni rudiicabe lu ca guendaridagulisaa roʼ ni rusiene de dxiiñaʼ runi ca precursor ne pabiáʼ nayecheʼ modo riníʼ ca precursor ni tiidiʼ raqué de dxiiñaʼ ni cayúnicaʼ». Kesia napa 26 iza, ne nagana guca para laa chindeza sti lugar zitu de ca binnilidxi. Laabe guniʼbe: «Cásipeʼ guiníʼ iqueʼ maʼ chigusaanaʼ ca binni ni nadxieeʼ maca nuaaʼ triste». Sti cosa ni bicueeza Marelius de gaca precursor nga xhiiñaʼ, purtiʼ laabe rúnibe dxiiñaʼ guidubi dxi para quíxebe saca lídxibe. Laabe guniʼbe: «Biʼniʼ orardu Jiobá para gacané laadu guchaʼdu modo nabánidu ne pur ngue gunda yegacanedu sti lugar ra jma caquiiñeʼ tu gucheeche diidxaʼ». Ni bíʼnicabe primé nga guleecabe tiempu para gúʼndacabe Biblia. Despué bitoocabe lídxicabe, bisaanacabe dxiiñaʼ ni gúpacabe ne lu beeu agosto 2011 yendézacabe ndaaniʼ guidxi Alta ladu guiaʼ de Noruega, raqué cayúnicabe de precursor. Para ganda gápacabe ni tiidinécabe dxi, Marelius runi dxiiñaʼ de contador ne Kesia runi dxiiñaʼ ndaaniʼ ti tienda.

Knut ne Lisbeth, ti guendaxheelaʼ ni napa jma de treinta iza, biale de laacaʼ chigacanecaʼ sti lugar ora bíʼndacaʼ guiráʼ ca relatu ni zeeda lu Anuario ni cuzeeteʼ de ca xpinni Cristu ni rigacané ra jma caquiiñeʼ tu gucheeche diidxaʼ. Lisbeth rietenalaʼdxiʼ: «Ni bidúʼndadu de ca xpinni Cristu que bicaacani laadu guiníʼ íquedu pa zanda chindézadu sti guidxi. Qué gannaʼ xipeʼ naquiiñeʼ guneʼ, purtiʼ qué niníʼ iqueʼ pa ti binni casi naa ñanda ñuni ni». Neca zacá, bíʼnicabe ni caquiiñeʼ gúnicabe. Knut guníʼ: «Bitoʼdo yoo huiiniʼ ni nápadu, ne para ganda cuʼ chaahuidu ti ndaa bueltu la? yebiʼdu ralidxi jñaaʼ. De raqué gudixhe íquedu chuudu ti iza lade ca binni ridagulisaa ni riníʼ inglés ni nuu guidxi Bergen, ra rié jñaa Lisbeth, para gánnadu ximodo rireeche diidxaʼ sti guidxi». Qué nindaa guníʼ Knut ne Lisbeth maʼ nuucaʼ listu para chindézacaʼ sti lugar ne guyécabe Uganda, ti guidxi nuu Africa, nabé zitu riaana lugar que de ra nuucabe. Ximodo rúnicabe para gácacabe precursor ne gápacabe ni caquiiñecabe yaʼ. Guiráʼ iza ribiguétacabe Noruega para gúnicabe dxiiñaʼ chupa beeu.

Ximodo huayuni sentir ca xpinni Cristu riʼ pur cucheechecaʼ diidxaʼ yaʼ. Roald guníʼ: «Yanna jma maʼ napa binnilídxidu tiempu para chuʼcaʼ juntu que dxi guyuʼdu Bergen. Yanna jma maʼ nuudu tobi si ne laaca  riéchedu guidúʼyadu jma ziyannaxhii ca xiiñidu Jiobá». Laaca guniʼbe: «Maʼ qué ricá íquedu gápadu stale cosa ne maʼ bidiʼdu cuenta qué risaca cani».

Elsebeth bidii cuenta caquiiñeʼ guiziidiʼ sti diidxaʼ. Xiñee yaʼ. Purtiʼ neza binni ridagulisaa ni nuu Lakselv laaca rucheechecaʼ diidxaʼ Karasjok, ti lugar ra jma riníʼcabe diidxaʼ sami. Ca binni ni riníʼ diidxaʼ riʼ nabézacaʼ ladu guiaʼ stiʼ Noruega, Suecia, Finlandia ne Rusia. Para ganda guiniʼné Elsebeth ca binni que de stiidxaʼ Dios la? gupa xidé guyebe ti cursu para guiziidibe diidxaʼ sami ne yanna maʼ nanna huiinibe diidxaʼ riʼ. Xi huabeendube ra rusiidibe ca binni riʼ de Dios lu stiidxacaʼ yaʼ. Rihuinni nayecheʼ nuu Elsebeth pur modo guníʼ: «Ruundaniáʼ xhoopaʼ binni Biblia raríʼ ne nuaaʼ nayecheʼ lugar riʼ».

Yanna guzéʼtenu de Fabian sti biaje, laabe maʼ nácabe precursor ne siervu ministerial. Fabian ne Isabel, gucanecaʼ chonna de cani rucheeche diidxaʼ nuu raqué, purtiʼ caquiiñeʼ chuʼ tu gacané laacaʼ para ganda gucheechecaʼ diidxaʼ né stale gana lade ca binni ridagulisaa. Yanna jma maʼ runi guionna binni riʼ xhiiñaʼ Jiobá. Dede guyuunisa chupa de laacaʼ ne gúcacaʼ precursor auxiliar lu beeu marzo 2012. Lade guionnaʼ binni gucanécabe que nuu ti dxaapahuiiniʼ ni bidii xquíxepeʼ Isabel ne Fabian pur modo gucanecaʼ laabe. Fabian guníʼ: «Cani guniʼbe que yendácani dede ndaaniʼ ladxiduáʼ. ¡Guizáʼ galán runi sentir binni ora gacané tuuxa!». Isabel guníʼ: «Lugar ra rucheecheʼ diidxaʼ riʼ maʼ gucaneni naa guieneʼ ni na Salmo 34:8: “Lagudii cuenta ne laguuyaʼ pabiáʼ nachaʼhuiʼ Jiobá”». Ne sicaríʼ biluxe guniʼbe: «¡Guizáʼ nayecheʼ nuaaʼ raríʼ!».

Marelius ne Kesia jma huaxiéʼ cosa nabaninecaʼ, peru nayecheʼ runi sentircaʼ. Casi ndaaniʼ neza binni ridagulisaa ni nuu guidxi Alta, lugar ra yendézacabe maʼ nuu 41 ni rucheeche diidxaʼ. Marelius guníʼ: «Ora rietenaláʼdxidu modo bibánidu dxiqué ne modo nabánidu yanna, rudiʼdu cuenta pabiáʼ nayecheʼ nuudu. Rudiʼdu xquíxepeʼ Jiobá purtiʼ nácadu precursor lugar riʼ. Gástiruʼ sti cosa ni jma gusiecheʼ laadu». Kesia guniʼruʼ: «Biziideʼ guneʼ cré zanda gacané Jiobá laadu ne dxandipeʼ huayápabe laadu. Ne yanna ra maʼ nuaaʼ zitu de ca binnilidxeʼ maʼ bidieeʼ cuenta jma rusisacaʼ tiempu riuʼdu juntu. Qué liica racaʼ arrepentir de ca cosa ni gudixhe íquedu gúnidu».

Ximodo huayuni sentir Knut ne Lisbeth ndaaniʼ guidxi Uganda yaʼ. Knut guníʼ: «Gudiʼdiʼ tiempu para biaʼdu lugar que ne modo nabani binni raqué. Nuu tiru riuubaʼ ndaanidu ne nuu tiru qué rápadu nisa ne biaaniʼ, peru ridúʼndanedu guiráʼ binni ni racalaʼdxiʼ guiziidiʼ». Lisbeth guníʼ: «Nuu caadxi guidxi huiiniʼ media hora si de ra nabézadu, peru qué liica huareeche diidxaʼ ca lugar que. Dxi yendadu raqué bidxéladu binni ni ruundaʼ Biblia ne gunábacaʼ laadu gusíʼdidu laacaʼ. Nabé nayecheʼ runi sentirdu pur cusíʼdidu ca binni nachaʼhuiʼ riʼ».

Nanna dxíchinu riecheʼ Jesucristu, Xaíque stinu, ora guʼyaʼ dede guibáʼ modo ziroobaʼ dxiiñaʼ ni bizulú, purtiʼ caziidiʼ binni de Dios lu guidubi naca Guidxilayú. Guiráʼ xpinni Dios riuucaʼ nayecheʼ ora rúnicaʼ ni na mandatu ni bisaanané Jesús laacaʼ: «Laché irá xixé guidxi, lachiusiidi irá xixé binni sa nanda naa» (Mat. 28:19, 20).