1, 2. 1) Pabiáʼ risaca «iníʼ né [nu] Dios de idubi ladxidóʼ [no]». 2) Xi naquiiñeʼ guinabadiidxanu laca laanu.

 TI HOMBRE ni biʼniʼ dxiiñaʼ huaxhinni guníʼ sicaríʼ: «Ora mayaca guirá gueelaʼ nga jma nagana gataná binni». Ne zaqueca nga riníʼ ca binni ni ribee xcaandaʼ. Ca dxi stinu, zacagá nga guendanagana ni ridxaagalú ca xpinni Cristu, purtiʼ mayaca guiluxe guidxilayú cahui stiʼ Binidxabaʼ riʼ (Rom. 13:12). ¡Yanna nga jma caquiiñeʼ gatananu! Nga runi, naquiiñeʼ chuʼ xpiaaninu ne cadi gusaana de chinándanu ni na conseju ni zeeda lu Biblia: «Iníʼ né [nu] Dios de idubi ladxidóʼ [no]» (1 Ped. 4:7).

² Cumu nabáninu ra mayaca guiluxe guidxilayú stiʼ Binidxabaʼ la? galán guinabadiidxanu laca laanu: «Ñee risaca para naa guneʼ orar la? Ñee runeʼ guiráʼ clase oración la? Ñee runeʼ orar gatigá la? Ñee runeʼ orar pur xcaadxi binni, o jma nga rinabaʼ ni caquiiñeʼ ne ni riuuladxesiáʼ la? Pabiáʼ risaca guneʼ orar ti ganda guilaʼyaʼ».

3. Bizeeteʼ chupa chonna clase de oración ni zanda gúninu.

³ Lu carta ni bicaa apóstol Pablu ra nuu ca xpinni Cristu de Éfeso, biquiiñebe ca diidxaʼ «guiráʼ clase oración» (Efes. 6:18, TNM). Cadi dxandíʼ ora runi orarnu rinábanu Jiobá gudii ni caquiiñenu ne gacané laanu gaca chaahuiʼ ca guendanagana stinu la? Jiobá, Dios «ni rucaadiaga oración», zucaa diaga ca oración stinu (Sal. 65:2). Peru laaca galán gánnanu zanda gúninu xcaadxi clase oración, casi oración para gusisácanu Jiobá, para gudiʼnu xquíxepeʼ Dios ne para guinábanu laabe xiixa.

4. Xiñee cadi naquiiñeʼ gusaana de gusisácanu Jiobá lu ca oración stinu.

⁴ Nápanu stale razón para gábinu Jiobá diidxaʼ ni gusisaca laabe. Casi ora guiníʼ íquenu «guiráʼ cani bizaʼbe pur poder stibe» ne «pabiáʼ  nandxoʼbe» la? rucaacani laanu gusisácanu laabe. Biblia na: «Lagusisaca laabe purtiʼ rusihuinni guiráʼ ni bizaʼbe pabiáʼ poder stibe. Lagusisaca laabe purtiʼ nabé nandxoʼbe» (Salmo 150:2). Lu ca versículo stiʼ Salmo 150, 13 biaje rieeteʼ gusisácanu Jiobá. Ne sti hombre ni gudixhe chaahuiʼ sti Salmo biindaʼ de guidubi ladxidóʼ sicaríʼ: «Gadxe biaje ti dxi rusisacaʼ lii purtiʼ jneza ca ley stiluʼ» (Sal. 119:164). Nanna dxíchinu naquiiñeʼ gusisácanu Jiobá. Ñee cadi dxandíʼ galán nusisácanu Jiobá «gadxe biaje», o gatigá la?

5. Ora rudiʼnu xquíxepeʼ Dios lu ca oración stinu, ximodo zacané ni laanu.

⁵ Gudiʼnu xquíxepeʼ Dios nga sti clase oración ni zanda gúninu. Pablu gudxi ca xpinni Cristu ni nuu Filipos ca diidxaʼ riʼ: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa» (Filip. 4:6). Cumu nabáninu lu ca últimu dxi riʼ ne guiráʼ ladu nuu binni ni qué rudii xquíxepeʼ ora gacané sti binni laa la? nga runi, naquiiñeʼ gudiʼnu xquíxepeʼ Jiobá pur guiráʼ ndaayaʼ rudii laanu ti cadi gácanu casi binni guidxilayú (2 Tim. 3:1, 2). Naquiiñeʼ chuʼnu cuidadu para cadi guicá modo naca ca binni riʼ laanu. Gudiʼnu xquíxepeʼ Dios ora guni orarnu laa la? zacané ni laanu, ziuʼnu nayecheʼ ne qué zácanu casi ca binni ni «nisi canadxiichi stubi caʼ, ne cananíʼ ca binni» (Jud. 16). Ca hombre ni naca xaíque ndaaniʼ lidxi zanda gacanecaʼ xheelacaʼ ne ca xiiñicaʼ ora gudiicaʼ xquíxepeʼ Dios lu oración sticaʼ.

6, 7. Pora nga zanda guinábanu Dios gacané laanu, ne xi zanda guinábanu lu oración stinu.

⁶ Ora guni orarnu Dios laaca zanda guinábanu laabe gacanebe laanu de guidubi ladxidoʼno. Pora nga zanda gúninu ni yaʼ. Zanda gúninu ora sanándacabe laanu ne ora nápanu xiixa guendahuará malu. Peru ñee óraca si nga naquiiñeʼ guni orarnu de guidubi ladxidoʼno la?

⁷ Para guicábinu guendarinabadiidxaʼ riʼ, guidúʼyanu oración ni biʼniʼ Jesús, ne guidúʼyanu xi guniʼbe de lá Dios, Reinu stiʼ ne ora guniʼbe gaca ni na Dios (biindaʼ Mateo 6:9, 10). Nabé cayaca stale cosa malu ndaaniʼ guidxilayú riʼ ne ca gobiernu ca qué ganda gacanecaʼ binni gapa ni iquiiñeʼ. Nga runi, naquiiñeʼ guinábanu Bixhózenu ni nuu guibáʼ guisaca lá ne iquiiñeʼ Reinu stiʼ para cuee Binidxabaʼ de Guidxilayú. Laaca galán guinábanu gaca ni na Jiobá ndaaniʼ Guidxilayú riʼ cásica cayaca ni guibáʼ. Nga runi, naquiiñeʼ gatananu ne gúninu guiráʼ clase oración.

8, 9. Xiñee cadi naquiiñeʼ guininu cadi jneza ni biʼniʼ Pedru ne xcaadxi apóstol que pur gúsicaʼ ndaaniʼ jardín ni láʼ Getsemaní.

⁸ Neca guluu apóstol Pedru gana ca xpinni Cristu ti ganda guiníʼnecaʼ Dios de idubi ladxidoʼcaʼ la? ti biaje, laapebe nga qué ñúnibe ni na ca diidxaʼ ca, purtiʼ laabe nga tobi de ca discípulo ni gusiʼ ora cayuni orar Jesús ndaaniʼ jardín ni láʼ Getsemaní. Maestru stícabe gudxi laacabe ca diidxaʼ riʼ: «Lagataná ne lainíʼ né Dios». Peru laacabe qué ñúnicabe ni (biindaʼ Mateo 26:40-45).

⁹ Ñee zaninu cadi jneza ngue biʼniʼ Pedru ne xcaadxi apóstol que purtiʼ gúsicaʼ la? Cadi guiaandaʼ laanu nabé maʼ bidxágacabe dxi que pur guiráʼ ni bíʼnicabe. Gudixhe chaahuicabe guiráʼ ni biquiiñecabe lu Pascua que ne bíʼnicabe ni. Despué gudixhestí Jesús Guendaroxhi stiʼ Señor, ti ganna ca xpínnibe modo guietenaláʼdxicaʼ guendaguti stibe (1 Cor. 11:23-25). «Biluxe biinda si cabe ti cantu, biree cabe ze cabe lu dani Olivo» guzácabe  zitu ndaaniʼ ca calle stiʼ guidxi Jerusalén (Mat. 26:30, 36). Ne zándaca maʼ gudiʼdiʼ galaa gueelaʼ ngue. Pa ñaca ñuunenu laacabe ndaaniʼ jardín ni láʼ Getsemaní que zándaca laaca nicá bacaandaʼ laanu. Lugar de nidindené Jesús ca apóstol stiʼ purtiʼ maʼ bidxágacaʼ la? gúdxibe laacaʼ né diidxaʼ nadóʼ: «Neca ndaani ladxidóʼ to racalaʼdxi tu guni tu jneza peru cuerpu stitu nagueenda riguudxi».

10, 11. 1) Xi biziidiʼ Pedru gueelaʼ gusiʼ ndaaniʼ jardín ni láʼ Getsemaní que. 2) Xi riziidiluʼ de ni bizaaca Pedru.

¹⁰ Nabé naná modo biziidiʼ Pedru ti cosa nabé risaca gueelaʼ gusiʼ ndaaniʼ jardín ni láʼ Getsemaní. Jesús maca guníʼ ca diidxaʼ riʼ: «Irá tu zaxele tu de naa yanna gueelaʼ». Peru Pedru guníʼ: «Neca ixele irá cabe de lii, peru naa qué ziuu dxi ixele de lii». Neca gudxi Jesús laabe zaniʼbe qué runibiaʼbe laa chonna biaje la? guníʼrube: «Neca gate nia lii, peru qué ziuu dxi inié qué runebiaʼya lii» (Mat. 26:31-35). Ne casi guníʼ Jesús que, guníʼ Pedru qué runibiáʼ laabe. Ora bidiibe cuenta ni bíʼnibe la? «yeguuna be dede uyuu yuuba ladxidóʼ be» (Luc. 22:60-62).

¹¹ Pur ni bizaaca Pedru, biziidibe cadi guiníʼ íquebe laasibe zanda gúnibe intiica ni gápabe gana ne ra biʼniʼ orarbe bidiibe cuenta Dios si nga zanda gacané laabe. Ngue runi bicaabe ca diidxaʼ riʼ: «ti ganda iníʼ né tu Dios de idubi ladxidóʼ to». Ñee rúninu ni na ca diidxaʼ riʼ la? Pa qué gusaana de guni orarnu, zusihuínninu runi crenu zacané Jiobá laanu (Sal. 85:8). Zacaca nga naquiiñeʼ guietenaláʼdxinu ca diidxaʼ guníʼ apóstol Pablu: «Pa nuu tu na ma zuhuaa chaahui la? guuya gá qué guiaba» (1 Cor. 10:12).

12. Xiñee nabé galán ejemplu ni bisaana Nehemías para laanu.

¹² Guiníʼ íquenu ejemplu stiʼ Nehemías, laabe gúcabe coperu stiʼ rey persa Artajerjes lu siglu V ante de ca dxi stiʼ Jesús. Laabe nga tobi de ca xpinni Jiobá ni biʼniʼ orar Dios de guidubi ladxidóʼ. Biblia ruzeeteʼ chupa chonna gubidxa «biaanabe sin ñobe gueta ne biʼniʼ orarbe Dios ni nuu guibáʼ» pur modo nabani ca judíu que Jerusalén (Neh. 1:4). Ora gunabadiidxaʼ Artajerjes laabe xiñee nabé triste nuube ne xi racaláʼdxibe guinábabe laa la? oraqueca biʼniʼ orar Nehemías «Dios ni nuu guibáʼ» (Neh. 2:2-4). Xi guleendube yaʼ.  Bicabi Jiobá oración stibe ne zaqué gunda gucanebe binni xquídxibe (Neh. 2:5, 6). ¡Nabé biquidxi ngue fe stiʼ Nehemías!

13, 14. Xi naquiiñeʼ gúninu para cadi gusaana de gaca fe stinu naguidxi neca gacalaʼdxiʼ Binidxabaʼ cuee gana laanu.

¹³ Ora qué rusaana de guni orarnu casi biʼniʼ Nehemías, racané ni laanu iguidxi fe stinu. Binidxabaʼ qué riá diʼ laanu ne jma rucaalú laanu ora guʼyaʼ cadi zuhuaʼnu dxiichiʼ. Pa nápanu xiixa guendahuará malu o nápanu depresión, zándaca guiníʼ íquenu qué rusisaca Dios ca hora rúninu cada beeu ora rucheechenu diidxaʼ. O zándaca guchiiñaʼ xquendabiaaninu laanu pur xiixa cosa ni qué ñúninu jneza. Ni racalaʼdxiʼ Binidxabaʼ nga guiníʼ íquenu qué risácanu ne zacá gusirabe fe stinu. Peru pa «iníʼ né [nu] Dios de idubi ladxidóʼ [no]», zanda gaca fe stinu naguidxi. Ne cadi guiaandaʼ laanu fe ca nga zeeda gaca casi ti escudu ni naazenu «ti ganda usuíʼ [nu] ca flecha ni cá gui ni undaa binidxaba laa[nu]» (Efes. 6:16).

¹⁴ Pa cadi gusaana de guni orarnu Dios, ziuʼnu listu para guidxaagalunu xiixa guendanagana ni gusihuinni pa naguidxi nuu fe stinu. Xi zanda gúninu pa chuʼ xiixa ni gacalaʼdxiʼ guxheleʼ laanu de Dios yaʼ. Guietenaláʼdxinu ejemplu stiʼ Nehemías ne nagueendaca guni orarnu Dios, purtiʼ laasibe nga zanda gacanebe laanu para gudxíʼlunu ca guendanagana gápanu ne ganda guni huantarnu.

15. Xi guendarinabadiidxaʼ naquiiñeʼ gúninu laca laanu de oración ni rúninu.

¹⁵ Gunabaʼ Jesús Dios cadi gusaana de gaca fe stiʼ Pedru naguidxi (Luc.22:32). Epafras, ti xpinni Cristu ni bibani lu primé siglu, bíʼnibe cásica  biʼniʼ Jesús ne biʼniʼ orarbe de guidubi ladxidoʼbe pur ca xpinni Cristu de Colosas, ne Pablu gudxi laacabe ca diidxaʼ riʼ: «Qué riaana dxí be de iníʼ né be Dios pur laatu de idubi ladxidóʼ be. Rinaba be uzuhuaa chaahui tu, ne ucaa ique tu guni tu irá ni na Dios» (Col. 4:12). Galán guinabadiidxanu laca laanu: «Ñee runeʼ orar de guidubi ladxiduáʼ pur ca xpinni Cristu ni nabani lu guidubi guidxilayú la? Ñee gatigá runeʼ orar pur ca xpinni Cristu ni cayuniná xiixa desgracia laacaʼ la? Padxí nga últimu biaje bineʼ orar pur cani zaniruʼ ndaaniʼ xquidxi Dios yaʼ. Padxí nga últimu biaje bineʼ orar pur ca xpinni Cristu ni ridagualisaaniáʼ ni napa xiixa guendanagana yaʼ».

16. Ñee zanda gacanenu tuuxa pa guni orarnu pur laa la?

¹⁶ Ca oración ni rúninu pur sti binni zanda gacané ni laacaʼ (biindaʼ 2 Corintios 1:11). Cadi purtiʼ si stale xpinni Cristu guni orar pur tuuxa binni zucaacaʼ Jiobá guni ni canábacaʼ, sínuque ruuyaʼ Dios pabiáʼ nadxiicabe binni riʼ ne rizaaláʼdxicabe laa ora guicabi Jiobá oración stícabe. Nga runi, naquiiñeʼ gusisácanu guenda nápanu ne guni orarnu pur xcaadxi binni. Cásica Epafras, naquiiñeʼ gusihuínninu nadxiinu ca xpinni Cristu ora guni orarnu de guidubi ladxidoʼno pur laacaʼ. Zacá ziuʼnu jma nayecheʼ, purtiʼ «jma nayeche ni rudii que ni rica» (Hech. 20:35).

17, 18. Xi zabeendunu pa «iníʼ né [nu] Dios de idubi ladxidóʼ [no]».

¹⁷ Ante guiníʼ Pablu: «Casi ñaca ma chi irá gueelaʼ ne ma zeda yaba xpiaani dxi» la? Guníʼrube: «Ne laganna ma ora ireeche bacaandaʼ, purti ma zeda yuba dxi [guilanu]. Jma gaxha nuu ni yanna, cadi casi dxi bini cre nu» (Rom. 13:11, 12). Mayaca guidxiña dxi guilanu ne maʼ cadi candaa zabáninu ndaaniʼ guidxilayú cubi stiʼ Dios. Naquiiñeʼ gatananu ne cadi gudiʼnu lugar chuʼ xiixa ni cuee tiempu stinu para cadi guni orarnu Jiobá, sínuque «iníʼ né [nu] Dios de idubi ladxidóʼ [no]». Pa gúninu zacá zacané ni laanu guyúbinu gudiʼnu xquendanabáninu Dios para gúninu ni na laga cabézanu dxi stiʼ Jiobá (2 Ped. 3:11, 12). Pur modo nabáninu zusihuínninu pa nexhenanu ne pa runi crenu maʼ cadi candaa zanitilú guidxilayú malu riʼ. Nga runi guinínenu «Dios sin guiaana dxí [nu]» (1 Tes. 5:17). Cásica biʼniʼ Jesús, laaca naquiiñeʼ guni orarnu Dios ora maʼ nuunu stúbinu. Pa qué guni orarnu Dios nagueenda nagueenda ca la? jma gaxha ziuʼnu de laabe (Sant. 4:7, 8). Nga nga ndaayaʼ jma naroʼbaʼ nápanu.

¹⁸ Biblia na: «Dxi uyuu Cristu ndaani guidxilayú, unaba lu Dios nulá laa de enda guti que, dede biina ne bicaa ridxi. Bicaa diaga Dios laabe purti qué nudxiiba be laca laabe sínuque biʼni be irá ni na» (Heb. 5:7). Nabé gunabaʼ Jesús Bixhoze gacané laa ne qué nucheenebe laa biaʼ dxi bibánibe ndaaniʼ Guidxilayú. Pur ni biʼniʼ Jesús, bisibani Jiobá laabe ne bidii laabe ti guendanabani ni qué ziuu dxi guiluxe guibáʼ. Pa cadi gusaana de «iníʼ né [nu] Dios de idubi ladxidóʼ [no]» la? laaca qué zuchéʼnenu Bixhózenu ni nuu guibáʼ neca guidxaagalunu guendanagana, ne zacá zanda guicaanu guendanabani ni qué ziuu dxi guiluxe.