1. Xi guiráʼ zanda gúninu pur bizáʼ Dios laanu casi laa.

NUU binni riníʼ: «Gubi baʼduʼ riʼ bixhoze». Riníʼ binni ca diidxaʼ riʼ ora maʼ caníʼ de ti xcuidi ni nabé yendee bixhoze o jñaa. Jiobá nga Bixhózenu ni nuu guibáʼ ne de laabe nga ridá guendanabani (Sal. 36:9). Ne laanu, ca xiiñibe ni nuu ndaaniʼ Guidxilayú, laaca yendeenu laabe. Bizaʼbe laanu casi laabe, nga runi, randa riníʼ íquenu ne riguixhe íquenu xi gúninu, ne laaca randa rápanu xhamígunu (Gén. 1:26).

2. Xi zanda gacané laanu para gaca xhamígunu Dios.

² Zanda gaca xhamígunu Jiobá, purtiʼ nadxiibe laanu ne purtiʼ nápanu fe laabe ne Xiiñibe. Jesús guníʼ: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Stale binni huayaca xhamígucaʼ Jiobá. Guzéʼtenu chupa de laacaʼ.

3, 4. Xiñee guca xhamigu Abrahán Jiobá ne xiñee maʼ qué ñaca xhamigu ca israelita que laabe.

³ Sicaríʼ guníʼ Jiobá de bixhozegola ca israelita: «Abrahán, xhamiguaʼ» (Is. 41:8). Lu 2 Crónicas 20:7 laaca rieeteʼ naca Abrahán xhamigu Dios. Xiñee gunda guca xhamigu hombre riʼ  Dios ni bizáʼ laa yaʼ. Purtiʼ gúpabe fe (Gén. 15:6; biindaʼ Santiago 2:21-23).

⁴ Ca binni ni za de Abrahán nga beeda gácacaʼ guidxi Israel ni guyuu dxiqué ne gúpacaʼ Jiobá casi Bixhózecaʼ ne Xhamígucaʼ. Peru despué maʼ qué ñaca xhamígucabe laabe. Xiñee yaʼ. Purtiʼ maʼ qué ñuni crécabe pa zuni Dios cani maʼ bizabiruaa.

5, 6. 1) Ximodo beeda gaca xhamíguluʼ Jiobá. 2) Xi naquiiñeʼ guinabadiidxanu.

⁵ Ora jma guiziidiluʼ de Jiobá, jma zaguidxi fe stiluʼ ne jma zannaxhiiluʼ laabe. Bietenalaʼdxiʼ dxi biziidiluʼ nuu ti Dios ni nabani ne zanda gaca xhamíguluʼ laa. Ne dxi biziidiluʼ guiranu rucheʼnu pur qué nuzuubaʼ Adán stiidxaʼ Dios. Óraque biéneluʼ cadi guiráʼ binni nuu gaxha de Dios (Col. 1:21). Peru laaca biéneluʼ nadxii Bixhózenu ni nuu guibáʼ ca xiiñiʼ, nuu gaxha de laanu ne rizaalaʼdxiʼ laanu. Ne bizulú guca xhamíguluʼ Dios ora gúnnaluʼ bidiibe Xiiñibe para gatiʼ pur laanu ne biʼniʼ creluʼ zanda guilaluʼ pur guendaguti stibe.

⁶ Ora riníʼ íquenu modo bibáninu dxi cadi nácanu xpinni Jiobá, galán guinabadiidxanu: «Ñee zeʼ dxi jma ziyaca xhamiguaʼ Dios la? Ñee jma napaʼ confianza Jiobá la? Ñee jma ziyannaxhieeʼ laabe ra zidiʼdiʼ dxi la?». Stobi de ca hombre ni ruzeeteʼ Biblia guca xhamigu Jiobá nga Gedeón. Guidúʼyanu ximodo zanda chinándanu ejemplu stibe.

7-9. 1) Xi bizaaca Gedeón, ne xi guleendube. (Biiyaʼ dibuju ni zeeda ra ruzulú tema riʼ.) 2) Ximodo jma zanda gaca xhamígunu Jiobá.

⁷ Gedeón, ti hombre ni guca juez ndaaniʼ guidxi Israel, biʼniʼ xhiiñaʼ Jiobá tiempu cadiʼdiʼ guidxi riʼ lu guendanagana, despué de guyuucaʼ lu Layú ni Bizabiruaa Dios gudii laacaʼ. Lu capítulo 6 stiʼ Jueces rieeteʼ ora yeganna ti ángel stiʼ Jiobá laabe ndaaniʼ guidxi Ofrá, dxi cucaalú ca madianita guidxi Israel. Nga runi, cadi caguibi diʼ Gedeón trigu lu layú, sínuque caguíbibe ni ndaaniʼ ti lagar, purtiʼ raqué nga zanda gucaachibe ni nagueenda. Nabé bidxagayaa Gedeón ora guyé ti ángel ra nuu ne gudxi laabe nácabe ti «hombre nadxibalú ne nadipaʼ». Neca nanna Gedeón bilá Jiobá ca israelita dxi guyuucaʼ Egipto, peru gunabadiidxabe ángel que pa dxandíʼ zacané Jiobá laacabe. Óraque guníʼ ángel que pur Jiobá ne gudxi laabe zacané Dios laabe.

⁸ Gedeón caníʼ ique ximodo zanda gulá «Israel de lu náʼ Madián». Peru Jiobá bicabi laabe: «Purtiʼ qué zusaanaʼ lii, ne dxandipeʼ zuni ganarluʼ Madián casi ñaca ñuni ganarluʼ ti hombre si» (Juec. 6:11-16). Zándaca caníʼ íquebe ximodo zanda guni ganarbe guidxi riʼ, ngue runi, gunábabe Jiobá gudii laabe ti seña. Racá ridúʼyanu biiyaʼ Gedeón Jiobá casi ti binni nabani.

⁹ Ni bizaaca despué biquidxi ni fe stiʼ Gedeón ne gucaneni laabe para chuʼbe jma gaxha de Dios. Bíʼnibe ti guendaró ne bizuhuaabe ni nezalú ángel que. Ora bidiiñe vara stiʼ ángel que guendaró que oraqueca gucuá gui ni, ne raqué bidii Gedeón cuenta Jiobá ngue biseendaʼ ángel que. De bidxíbibe ne bicaabe ridxi: «¡Ay, Jiobá, Señor ni jma nandxóʼ, purtiʼ maʼ biiyaʼ ángel stiʼ Jiobá!» (Juec. 6:17-22). Pur ni guca que, ñee maʼ qué ñaca xhamigu Gedeón Dios stiʼ la? Coʼ. Sínuque guyuube jma gaxha de Dios. Gedeón binibiáʼ chaahuiʼ Jiobá ne zacá gudixhedxí Dios ladxidóʼ. Nga runi, bíʼnibe ti altar ne gulee labe ni: «Jiobá-salom», lu hebreu riniʼni «Jiobá nga guendariuudxí». Biblia na: «Jiobá gudxi laabe: “Guyuudxí. Cadi guidxíbiluʼ. Qué zátiluʼ”. Ngue  runi biʼniʼ Gedeón ti altar para Jiobá, ne gulee laabe ni Jiobá-salom, ne dede yanna zacá lani. Ne nuuruʼ ni ndaaniʼ guidxi Ofrá ra nabeza ca abí-ezrita» (Jueces 6:23, 24). Yanna laanu ora riníʼ íquenu guiráʼ ni rudii Jiobá laanu guiráʼ dxi, rudiʼnu cuenta dxandíʼ Xhamígube laanu. Ne ora qué rusaana de guni orarnu laabe, jma ratadxí ladxidoʼno ne jma raca xhamígunu laabe.

10. Casi ruzeeteʼ Salmo 15:3, 5, xi rinabaʼ Jiobá laanu para ganda gácanu xhamigu.

¹⁰ Para ganda gaca Xhamigu Jiobá laanu naquiiñeʼ gúninu caadxi cosa. Lu Salmo 15 bisiene David xi naquiiñeʼ guni binni para «cueza ndaaniʼ tienda» stiʼ Jiobá, o gaca xhamígucaʼ Dios (Sal. 15:1). Guidúʼyanu chupa de ca cosa ni rinabaʼ Jiobá laanu: cadi guininu mal de binni ne gúninu ni jneza lu guiráʼ cosa. David bicaa ti binni ni xhamigu Jiobá nga «ni qué riníʼ mal de binni [...] [ne] qué riná guicaa xiixa para guniná tuuxa ni qué guzaabiʼ» (Sal. 15:3, 5).

11. Xiñee cadi naquiiñeʼ guininu mal de binni.

¹¹ Lu sti salmo, bicaa David: «Bicueeza ruaaluʼ para cadi guiniʼluʼ cosa malu» (Sal. 34:13). Pa qué chinándanu conseju riʼ ne guininu mal de binni la? zuxhéleni laanu de xcaadxi xpinni Cristu ne de Bixhózenu ni nuu guibáʼ. Ora riníʼ binni mal de stobi cusihuinni cayuni ni na Binidxabaʼ, xhenemigu Dios. Diidxaʼ diablo zeedani de ti diidxaʼ griegu ni riníʼ «tuuxa ni riníʼ xiixa ni cadi dxandíʼ de stobi». Nga runi, ora gápanu cuidadu xi rininu de sti binni la? zacané ni laanu chuʼnu jma gaxha de Jiobá. Ne jmaruʼ si naquiiñeʼ chuʼnu cuidadu de cani rúninu ne ni rininu de cani zaniruʼ ndaaniʼ xquidxi Dios (biindaʼ Hebreos 13:17 ne Judas 8).

12, 13. 1) Xiñee naquiiñeʼ gúninu guiráʼ cosa jneza. 2) Xi ribeendunu ora rúninu ca cosa ca jneza.

¹² Nabé runibiáʼ binni ca xpinni Jiobá, purtiʼ rúnicaʼ ni jneza. Apóstol Pablu bicaa: «Lainíʼné Dios pur laadu, purti nanna du nayá ladxidóʼ do nezalú be, ne ni racalaʼdxi du nga irá ni guni du, guni du jneza» (Heb. 13:18). Ne cumu maʼ gudixhe íquenu gúninu guiráʼ cosa jneza la? qué racaláʼdxinu gúninu xiixa ni guniná ca xpinni Cristu. Pa rúnicabe xhiiñanu, cadi guquiichinanu laacabe ne quíxenu laacabe biaʼ maʼ gúdxinu laacabe. Cumu xpinni Cristu laanu la? rúninu ni jneza né ca binni runi xhiiñanu ne zaqueca rúninu né guiráʼ binni. Yanna, pa rúninu xhiiñaʼ ti xpinni Cristu, naquiiñeʼ chuʼnu cuidadu ti cadi gacaláʼdxinu gúnibe jma pur laanu.

¹³ Stale biaje runadiáganu binni ni cadi naca Testigu riníʼ galán runi sentir ora runiné laanu dxiiñaʼ. Guzéʼtenu ni guníʼ ti director stiʼ ti empresa ni rucuí yoo ora biʼyaʼ runi ca Testigu ni maʼ bidii stiidxacaʼ. Laa guníʼ: «Rúnitu guiráʼ ni maʼ guniʼtu» (Sal. 15:4). Ora rúninu zacá, jma raca xhamígunu Jiobá, Bixhózenu ni nuu guibáʼ, ne laaca rusisácanu laabe.

14, 15. Ximodo zanda gacanenu sti binni para gaca xhamigu Jiobá.

¹⁴ Stale binni neca nánnacaʼ nuu Dios, peru ora maʼ canagucheechenu diidxaʼ rudiʼnu cuenta qué ruuyacaʼ laabe casi xhamígucaʼ. Ximodo zanda gacanenu laacabe yaʼ. Guidúʼyanu xi gudxi Jesús 70 discípulo stiʼ ora biseendabe laacaʼ chigucheechecaʼ diidxaʼ: «Irá ra yoo ra chuʼ tu, nirudóʼ lainaba lu Dios cuʼ ndaaya ca binni nuu raqué. Ne pa gaca cabe nachaʼhui ne laatu la? zaguu Dios  ndaaya laacabe. Peru pa coʼ la? ma laatu nga cuʼ Dios ndaaya ne cadi laacabe» (Luc. 10:5, 6). Ziuulaʼdxiʼ binni guiziidiʼ de Dios pa guinínenu laacaʼ casi rinínenu ti xhamígunu. Pa guicábinu binni ni qué riuulaʼdxiʼ gucaadiaga laanu né diidxaʼ nadóʼ la? zacané ni laacabe para cadi guidxiichicabe ne gucaadiágacabe laanu sti dxi.

¹⁵ Ora ridxaaganu binni ni qué naʼ gusaana religión stiʼ o ca costumbre ni rúnicaʼ neca cadi zeedacani lu Biblia, laaca naquiiñeʼ guinínenu laacabe né diidxaʼ nadóʼ. Ne laaca galán ridxaagalunu ca binni ni cayacaná ne racalaʼdxiʼ guiziidiʼ jma de Dios ora rigánnacaʼ laanu ra ridagulisaanu. Lu tema ni riree gatigá ni láʼ «Gucané Biblia laacabe para bichaacabe» zeeda stale ejemplu ra cayeeteʼ guyuulaʼdxiʼ binni modo bidxaagalú ca xpinni Cristu laacaʼ.

16. Ximodo zanda gaca xhamígunu Jiobá ne guninenu laa dxiiñaʼ.

¹⁶ Stale biaje ca binni ni runi dxiiñaʼ juntu nabé raca xhamígucaʼ. Nga runi, laanu cani maʼ bidiʼnu xquendanabáninu Jiobá, ti ndaayaʼ nga gaca xhamígunu laabe ne guninenu laabe dxiiñaʼ (biindaʼ 1 Corintios 3:9). Ora rucheechenu diidxaʼ ne racanenu binni gaca xpinni Cristu, riziidiʼ chaahuinu de ca guenda stiʼ Bixhózenu ni nuu guibáʼ. Ne laaca ridúʼyanu ximodo racané espíritu santu stiʼ Dios laanu para gúninu dxiiñaʼ riʼ.

17. Ximodo rusihuinni ca guendaridagulisaa roʼ ca Xhamigu Jiobá laanu.

¹⁷ Ora jma gucheechenu diidxaʼ, jma gaxha riuʼnu de Jiobá, purtiʼ ridúʼyanu ximodo racané Jiobá laanu ne rucueeza ca binni ni rucaalú dxiiñaʼ ni rúninu. Ne cadúʼyanu xi guiráʼ rudii Jiobá laanu para gánnanu xi naquiiñeʼ gúninu. Guiníʼ íquenu xi guiráʼ rusiidibe laanu lu ca guendaridagulisaa ne lu ca libru ne revista ni nápanu. Guiráʼ ni rieeteʼ lu ca guendaridagulisaa roʼ ca rusihuínnicani nadxiibe laanu ne nánnabe xi guendanagana nápanu ne xi caquiiñenu. Ti familia bicaa ti carta para gudii xquíxepeʼ pur ti guendaridagulisaa de chonna gubidxa ni guyecaʼ. Sicaríʼ bicaacaʼ: «Yendá guiráʼ ni bieeteʼ lu guendaridagulisaa que ndaaniʼ ladxidoʼdo. Bidúʼyadu pabiáʼ nadxii Jiobá cada tobi de laadu, ne racaláʼdxibe guiree guiráʼ ni gúnidu jneza». Sti guendaxheelaʼ de Alemania ni guyé ti guendaridagulisaa de ti dxi ndaaniʼ guidxi Irlanda, bidiicaʼ xquíxepeʼ ca xpinni Cristu de raqué pur modo bidxaagalúcabe laacaʼ, ne nacaʼ: «Peru jmaruʼ si rudiʼdu xquíxepeʼ Jiobá ne Rey Jesucristu. Purtiʼ laacabe nga gulícabe laadu para chuʼdu ndaaniʼ xquidxi Dios, ne cadi riníʼ si ca xpínnibe naquiiñeʼ chuʼ binni tobi si, sínuque rihuinni rúnicaʼ  ni lu xquendanabánicaʼ. Guiráʼ ni bizaacadu dxi guyuudu guendaridagulisaa riʼ ndaaniʼ guidxi Dublín, gucané cani laadu guietenaláʼdxidu pabiáʼ sicarú nga guninedu laatu xhiiñaʼ Jiobá».

18. Xi naquiiñeʼ guinabadiidxanu laca laanu para gánnanu pa dxandíʼ xhamígunu Jiobá.

¹⁸ Jma raca xhamigu binni ora ruíʼ diidxaʼ. Ca dxi stinu riʼ, nabé riquiiñeʼ binni Internet, red social ne ruseendaʼ mensaje para guiniʼné sti binni. Peru, ñee laaca ribeenu tiempu para guinínenu Jiobá, Dios ni naca Xhamígunu la? Nánnanu laabe nga Dios «ni rucaadiaga oración» (Sal. 65:2). Peru, ñee gatigá ribeenu tiempu para guinínenu laabe la?

19. Xi zanda gúninu pa raca nagana para laanu gábinu Jiobá xi cayuni sentirnu.

¹⁹ Chupa chonna de ca xpinni Dios raca nagana para laacaʼ guxhélecaʼ ladxidoʼcaʼ ne gábicaʼ Dios xi guiráʼ runi sentircaʼ. Peru Jiobá racalaʼdxiʼ gábinu laa xii nga ni nuu ndaaniʼ ladxidoʼno ora guni orarnu laa (Sal. 119:145; Lam. 3:41). Ne pa qué ganda guininu ni cayuni sentirnu, zanda gacané Biblia laanu. Pablu bicaa ca diidxaʼ riʼ para ca xpinni Cristu de Roma: «Peru ora qué ganda idxela nu xi iní nu la? ricaalaʼdxi si nu, ne Espíritu que riníʼ pur laanu ra nuu Dios. Purti nanna Dios xi nuu ndaani ladxidóʼ irá binni, ne riene xi na Espíritu, purti modo pe na be, modo que pe rinaba Espíritu pur ca xpinni be» (Rom. 8:26, 27). Ora guidúʼndanu ca libru ni zeeda lu Biblia casi Job, Salmos ne Proverbios zacanécani laanu gábinu Jiobá xi nuu ndaaniʼ ladxidoʼno.

20, 21. Ximodo riguixhedxí ca diidxaʼ ni bicaa Pablu lu Filipenses 4:6, 7 ladxidoʼno.

²⁰ Ora guidxaagalunu guendanagana, galán chinándanu conseju ni bidii Pablu ca xpinni Cristu de Filipos: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa». Ora guinínenu Dios cadi gudiʼnu lugar chuʼ xiixa ni guchiiñaʼ laanu, ti gudiibe stipa laanu ne gatadxí ladxidoʼno. Pablu guníʼ: «Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filip. 4:6, 7). Naquiiñeʼ gudiʼnu xquíxepeʼ Jiobá purtiʼ riguixhedxibe ladxidoʼno ne rápabe xquendabiaaninu.

²¹ Ora runi orarnu Jiobá jma raca xhamígunu laa. Nga runi, galán chinándanu conseju riʼ: «Lainíʼ né Dios sin guiaana dxí tu» (1 Tes. 5:17). Naquiiñeʼ chuʼnu jma gaxha de Dios ne gúninu ni canábabe laanu. Nga zacané laanu guiníʼ íquenu guiráʼ ni zabeendunu pa gápanu Jiobá casi Bixhózenu, Dios stinu ne Xhamígunu.