1. Xi ndaayaʼ stiʼ Jiobá rusiecheʼ laanu.

RACALAʼDXIʼ Jiobá guibáninu nayecheʼ, nga runi rudiibe laanu stale ndaayaʼ. Primé, bidiibe laanu guendanabani. Ne zanda iquiiñenu ni para gusisácanu laabe, purtiʼ laabe gucanebe laanu para bidxélanu religión ni dxandíʼ (Sal. 144:15; Juan 6:44). Ne laaca rusihuínnibe nadxiibe laanu ne racanebe laanu gúninu xhiiñabe sin guireʼnu gana (Jer. 31:3; 2 Cor. 4:16). Ne laaca rusihuinni Jiobá rapa laanu, purtiʼ rudii ni caquiiñenu para guizíʼdinu de laa ne zacá chuʼnu galán nezalú ne laaca nuunu lade ca xpinni ni nadxiisaa. Ne cadi ngasi, sínuque cabézanu gudiibe laanu ti cosa nabé sicarú.

2. Xi riníʼ ique chupa chonna de ca xpinni Dios.

² Neca nápanu stale razón para chuʼnu nayecheʼ, nuu xpinni Jiobá riníʼ íquecaʼ qué risaca ni rúnicaʼ. Riníʼ íquecabe qué risácacabe nezalú Jiobá ne qué risaca dxiiñaʼ ni rúnicabe para laa. Zándaca guiníʼ íquecabe qué zanda guibánicabe nayecheʼ. Para laacabe puru guendanagana nga rapa binni lu xquendanabani (Ecl. 11:8).

3. Xi zanda gucaa binni guiníʼ ique qué risaca.

³ Xi zanda gucaa binni guiníʼ ique qué risaca. Zándaca qué nizaaca xiixa ni cabézacaʼ, zándaca huaracaʼ o maʼ bióʼxhocaʼ  (Sal. 71:9; Prov. 13:12; Ecl. 7:7). Laaca naquiiñeʼ gánnanu riguite ladxidoʼno laanu ne rucaani laanu guiníʼ íquenu cadi jneza ni cayúninu neca riuulaʼdxiʼ Dios cani (Jer. 17:9; 1 Juan 3:20). Riquiiñeʼ Binidxabaʼ binni para gucaacaʼ ca xpinni Dios guiníʼ íquecaʼ qué risácacaʼ. Zacaca nga biquiiñeʼ Binidxabaʼ Elifaz para gudxi Job qué risaca binni nezalú Dios. Peru cusiguii si Binidxabaʼ ora guníʼ ca diidxaʼ ca ne laaca cusiguiibe tiempu riʼ (Job 4:18, 19).

4. Xi zazíʼdinu lu tema riʼ.

⁴ Lu Biblia cayabi Jiobá laanu zapa guiráʼ cani cadiʼdiʼ lu guendanagana (Sal. 23:4). Riquiiñebe Stiidxabe para gacanebe laacaʼ. Nabé nandxóʼ Stiidxaʼ Dios, purtiʼ racané ni laanu cueenu intiica cosa ni maʼ ucuaa xcu ndaaniʼ ladxidoʼno. Nga runi, zanda gacané Biblia laanu para cadi guiníʼ íquenu qué risácanu (2 Cor. 10:4, 5). Yanna, guidúʼyanu ximodo zanda iquiiñenu Biblia para cadi gusaana de chuʼnu nayecheʼ. Pa gúninu ni, zacaneni laanu ne laaca zacanenu sti binni.

5. Xi zacané laanu para cadi gusaana de chuʼnu nayecheʼ.

⁵ Guníʼ apóstol Pablu xi zanda gacané laanu para cadi gusaana de chuʼnu nayecheʼ. Gúdxibe ca xpinni Cristu de Corinto: «Laguuya chaahui ximodo nuu tu, pa zuhuaa chaahui tu lu ni runi cre tu» (2 Cor. 13:5). Guiráʼ ni runi crenu zeeda cani ndaaniʼ Biblia. Pa rininu ne rúninu guiráʼ ni rizíʼdinu luni la? zusihuínninu dxandíʼ zuhuaa chaahuinu lu ni runi crenu. Peru cadi naquiiñeʼ gúninu ni riuuláʼdxisinu, sínuque naquiiñeʼ gúninu guiráʼ ni na ca ley stiʼ Dios (Sant. 2:10, 11).

6. Xiñee naquiiñeʼ guidúʼyanu «pa zuhuaa [chaahuinu] lu ni runi [crenu]». (Biiyaʼ foto ni zeeda ra ruzulú tema riʼ.)

⁶ Zándaca gaca nagana para lii gúʼyaluʼ pa zuhuaa chaahuiluʼ lu ni runi creluʼ, jmaruʼ si pa riníʼ íqueluʼ nuu xiixa ni cadi cayúniluʼ jneza. Peru jma risaca modo ruuyaʼ Jiobá laanu; purtiʼ jma jneza modo riníʼ íquebe que laanu (Is. 55:8, 9). Laabe ruuyaʼ chaahuibe ca xpínnibe, cadi para gábibe laacaʼ paraa cucheecaʼ, sínuque para gúʼyabe ca guenda ni nápacaʼ ne gacanebe laacaʼ. Ora riquiiñeluʼ Biblia para gúʼyaluʼ «pa zuhuaa [chaahuiluʼ] lu ni runi [creluʼ]», zanda gánnaluʼ ximodo ruuyaʼ Dios lii. Zacaneni lii gudiiluʼ cuenta dxandíʼ risácaluʼ nezalú Jiobá. Ora guiéneluʼ ni zeeda gácani casi ora nuxhéleluʼ ventana stiluʼ ne gudiiluʼ lugar chuʼ xtuxhu Gubidxa ndaaniʼ lídxiluʼ.

7. Ximodo zanda gacané ca ejemplu stiʼ ca xpinni Dios ni bibani dxiqué laanu.

⁷ Ti modo zanda gúninu ni nga guiníʼ íquenu ca ejemplu stiʼ ca xpinni Dios ni bibani dxiqué. Guníʼ ique xi biʼniʼ sentírcabe ora gúpacabe guendanagana ne xi ñúniluʼ pa ñuuluʼ xlugárcabe. Guidúʼyanu chonna ejemplu ni rusihuinni ximodo zanda iquiiñenu Biblia para guidúʼyanu pa zuhuaa chaahuinu «lu ni runi [crenu]» ne zacá chuʼnu nayecheʼ pur ni cayúninu.

8, 9. 1) Xi guendanagana gupa viuda pobre que. 2) Xi zándaca guníʼ ique viuda que.

⁸ Jesús biiyaʼ ti viuda nabé pobre ndaaniʼ yuʼduʼ stiʼ Jerusalén. Ejemplu stiʼ gunaa riʼ zanda gacané laanu cadi gusaana de chuʼnu nayecheʼ neca nuu cosa ni qué zanda gúninu (biindaʼ Lucas 21:1-4). Xi guendanagana gupa viuda riʼ. Primé, nuube triste purtiʼ guti xheelabe, guiropa, cayuubaʼ ladxidoʼbe purtiʼ lugar de ñacané ca xaíque yuʼduʼ ca gunaa ni caquiiñeʼ tu gacané laacaʼ laga «raxha ca lidxi ca viuda» (Luc. 20:47). Cumu nabé pobre laabe la? bisábabe  chupa monedahuiiniʼ biaʼ runi ganar ti hombre 15 minutu.

⁹ Guníʼ ique xi biʼniʼ sentir viuda riʼ ora guyuu lu patiu stiʼ yuʼduʼ que ne ziné chupa si monedahuiiniʼ. Ñee guníʼ íquebe jma risaca cani bidiibe dxi bibani xheelabe ne maʼ qué risaca cani chigudiibe yanna la? Ñee bituílube ora biiyabe guiráʼ bueltu ni cusaba xcaadxi binni la? Ñee guníʼ íquebe qué zusábabe guiropaʼ monedahuiiniʼ que purtiʼ huaxiéʼ risaca cani la? Ne pa guníʼ íquebe zacá, qué nucueeza diʼ cani laabe: bíʼnibe biaʼ gunda para gacanebe gaca ca dxiiñaʼ ni raca ndaaniʼ yuʼduʼ que.

10. Ximodo bisihuinni Jesús risaca viuda que nezalú Jiobá.

¹⁰ Bisihuinni Jesús nabé risaca viuda que nezalú Jiobá ne zaqueca cani bidii. Laabe guniʼbe «jma stale bisaba viuda riʼ» que ca ricu nuu raqué. Biuʼchaʼ ca monedahuiiniʼ ni bisaba viuda que né cani bisaba xcaadxi binni, peru jma bisisaca Jesús ni bidii gunaa riʼ Jiobá. Ora biʼyaʼ ca tesoreru que ca monedahuiiniʼ riʼ qué niníʼ íquecaʼ pabiáʼ risaca cani para Jiobá. Peru ni jma risaca nga modo ruuyaʼ Jiobá laabe ne cadi xi guiníʼ binni o xi guiníʼ íquebe de laabe. Ñee zanda gacané relatu riʼ laanu para guidúʼyanu pa zuhuaa chaahuinu «lu ni runi [crenu]» la?

11. Xi rusiidiʼ relatu stiʼ viuda que laanu.

¹¹ Racá ridúʼyanu nuu biaje qué zanda gudiʼnu xiixa Jiobá neca racaláʼdxinu gúninu ni. Nuu xpinni Cristu qué randa rucheechecaʼ diidxaʼ biaʼ ñuuláʼdxicaʼ purtiʼ maʼ nagólacaʼ o purtiʼ maʼ huaracaʼ. Peru, ñee tiisi huaxiéʼ rúnicabe guiníʼ íquecabe cadi naquiiñeʼ gudiicabe informe stícabe la? Ne pa nazaacanu ne nahuiininu, zándaca guiníʼ íquenu qué risaca ca hora rúninu purtiʼ huaxiéʼ cani para ca hora runi xquidxi Dios guiráʼ iza. Peru relatu stiʼ viuda riʼ rusiidiʼ ni laanu rusisaca Jiobá guiráʼ stipa ni rúninu para gúninu xhiiñaʼ, jmaruʼ si pa cadxaagalunu xiixa guendanagana. Guníʼ ique  panda hora bíʼniluʼ xhiiñaʼ Dios udubiza. Ñee bíʼniluʼ stipa pur gúniluʼ sti hora jma ora bicheecheluʼ diidxaʼ la? Pa zacá ni, gunna dxichi rusisaca Jiobá ni bíʼniluʼ ca. Ora gúninu biaʼ gándatiʼ lu xhiiñaʼ Jiobá, zanda guininu zuhuaa chaahuinu «lu ni runi [crenu]».

12-14. 1) Ximodo biʼniʼ sentir Elías. 2) Xi razón gupa Elías para guyuu triste.

¹² Ti profeta stiʼ Dios ni láʼ Elías guca ti hombre ni qué ñuu dxi nusaana de ñuni ni na Jiobá ne gupa stale fe. Neca zaqué, ti dxi nabé guyuube triste dede gunábabe Dios guuti laabe. Sicaríʼ guniʼbe: «¡Maʼ biáʼcatiʼ! Biiti naa yanna Jiobá» (1 Rey. 19:4). Ca binni ni qué huayuu dxi guizaaca ni bizaaca profeta riʼ, zándaca guiníʼ íquecaʼ cadi jneza ni guníʼ Elías (Job 6:3). Peru ni guniʼbe que nguepeʼ nga ni cayuni sentirbe. Qué nidxiichiné Jiobá laabe ora gunábabe gátibe, sínuque gucané laabe.

¹³ Xiñee guyuu Elías triste yaʼ. Cadi xadxí de gunábabe gátibe biʼniʼ Jiobá ti milagru ra bisihuinni laa nga Dios ni dxandíʼ. Despué de milagru que biiticabe 450 profeta stiʼ Baal (1 Rey. 18:37-40). Zándaca guleza Elías ñuni adorar guidxi que Jiobá, peru qué ñácani zaqué. Biseendaʼ tidxi reina Jezabel laabe zuuti laabe. Cumu bidxíbibe ñuuti reina que laabe la? bixooñelube ladu gueteʼ, gudíʼdibe Judá ne yendabe lu ti desiertu (1 Rey. 19:2-4).

¹⁴ Ora biaana Elías stubi, guníʼ ique qué risaca dxiiñaʼ biʼniʼ. Gúdxibe Jiobá: «Qué risacadiáʼ jma que ca bixhozegolaʼ». Né ca diidxaʼ riʼ bisihuínnibe qué risácabe cásica qué risaca dxita ladi ca bixhozególabe. Guníʼ íquebe qué iquiiñebe ne qué risácabe para Jiobá ne para binni.

15. Ximodo bisihuinni Jiobá risácaruʼ Elías para laa.

¹⁵ Peru maʼ gadxé modo guníʼ ique Jiobá, Dios ni jma nandxóʼ, de Elías. Para Jiobá nabé risácabe ne biyubi modo gánnabe ni. Xi biʼniʼ Jiobá yaʼ. Biseendaʼ ti ángel para guquidxi fe stibe. Ne laaca bidii ni gudobe ne ni guebe ti guni huantarbe cuarenta dxi dede chindabe lu dani Horeb. Ne ora guníʼ ique Elías laa si cayuni ni na Jiobá ndaaniʼ guidxi Israel, biluíʼ Dios laabe cadi zaqué diʼ ni. Laaca bidii Dios laabe xcaadxi dxiiñaʼ ne bíʼnibe cani. Nabé stale cosa galán guleendú Elías purtiʼ gucané Jiobá laa ne gúpabe stipa para gúnibe xhiiñaʼ Jiobá casi profeta (1 Rey. 19:5-8, 15-19).

16. Ximodo huayacané Jiobá lii.

¹⁶ Ejemplu stiʼ Elías zanda gacané ni lii para gúʼyaluʼ pa zuhuaa chaahuiluʼ lu ni runi creluʼ ne chuʼluʼ nayecheʼ ra gúniluʼ xhiiñaʼ Jiobá. Ximodo yaʼ. Primé, guníʼ ique guiráʼ modo huayacané Jiobá lii. Ñee huayacané tuuxa xpinni Cristu lii, casi ti binnigola, ora cadxaagaluluʼ guendanagana la? (Gál. 6:2.) Ñee huayacané Biblia, ca libru ne ca revista o ca guendaridagulisaa ca lii para iguidxi fe stiluʼ la? Ora gacané tobi de cani bizéʼtenu ca lii, guníʼ ique Jiobá nga cayacané lii ne bidii xquíxepeʼ laabe (Sal. 121:1, 2).

17. Xi pur rusisaca Jiobá laanu.

¹⁷ Guiropa, zándaca quite ladxidoʼno laanu ora guiníʼ íquenu qué risácanu. Ni jma risaca nga modo ruuyaʼ Jiobá laanu (biindaʼ Romanos 14:4). Qué rusisaca Jiobá laanu pur cani rúninu, sínuque purtiʼ runi adorarnu laabe ne qué rusaananu laabe. Ne cásica Elías, zándaca qué riníʼ íqueluʼ pabiáʼ maʼ stale bíʼniluʼ lu xhiiñaʼ Jiobá. Zándaca sin gudiiluʼ cuenta maʼ gucaneluʼ chupa chonna  xpinni Cristu ra ridagulisaaluʼ. Ne zándaca huayunadiaga chupa chonna binni de Dios pur dxiiñaʼ ni rúniluʼ.

18. Xi rusihuinni ca dxiiñaʼ ni rudii Dios laanu ndaaniʼ xquidxi.

¹⁸ Ne guionna, ora gudiicabe lii ti dxiiñaʼ ra ridagulisaaluʼ guníʼ ique zacá nga cusihuinni Jiobá cayuulaʼdxiʼ ni cayúniluʼ (Jer. 20:11). Cásica bizaaca Elías, zándaca guireeluʼ gana ora guiníʼ íqueluʼ cadi cabeenduluʼ gastiʼ lu dxiiñaʼ ni cayúniluʼ o purtiʼ riníʼ íqueluʼ qué zanda ugaandaluʼ xiixa ni gudixhe íqueluʼ ndaaniʼ xquidxi Dios. Pa zacá riníʼ íqueluʼ o pa coʼ la? nápaluʼ ti dxiiñaʼ nabé risaca. Xi laani yaʼ. Gucheecheluʼ stiidxaʼ Dios ne gácaluʼ testigu stiʼ Jiobá. Cadi gusaana de gúniluʼ ni na Dios. Zacá zanda gácaluʼ tobi de ca binni ni gudxi Jesús «biuu, guieche nia lii» (Mat. 25:23).

19. Ximodo biʼniʼ sentir hombre bicaa Salmo 102.

¹⁹ Nabé triste guyuu hombre bicaa Salmo 102. Guyuube zaqué purtiʼ gúpabe xiixa yuubaʼ ne qué ñápabe stipa para nudxiilube ca guendanagana stibe (ra ruzulú capítulo 102 stiʼ Salmo). Ca diidxaʼ guniʼbe que bisihuinni cani pabiáʼ naná modo nuube ne biʼniʼ sentirbe stúbibe (Sal. 102:3, 4, 6, 11). Guníʼ íquebe maʼ qué risácabe nezalú Jiobá (Sal. 102:10).

20. Xiñee naquiiñeʼ guni orarnu pa riuu ora runi sentirnu qué risácanu nezalú Dios.

²⁰ Neca zaqué, gunda biquiiñeʼ salmista que xquendanabani para gusisaca Jiobá. Biblia na: «Purtiʼ maʼ biiyadxibe dede lugar nandxóʼ ra nuube, dede guibáʼ maʼ biiyadxí Jiobá guidxilayú, para gucaadiaga ora ricaalaʼdxiʼ tuuxa ni deguyoo, para gulá tuuxa ni maʼ nexheʼ gatiʼ; ti guiníʼ binni lá Jiobá ndaaniʼ guidxi Sión, ne gusisácacaʼ laabe Jerusalén» (Salmo 102:19-21). Casi ruzeeteʼ Salmo 102, ca binni ni zuhuaa dxiichiʼ lu ni runi cré, zándaca guidxaagalucaʼ xiixa guendanagana ne nisi laani guicá íquecaʼ. Salmista que biʼniʼ sentir «casi ti maniʼ ripapa ni zuba stubi ique yoo», casi ñaca nisi ca guendanagana stibe nga guníʼ íquebe (Sal. 102:7). Pa riuu ora runi sentirluʼ zacá, bixheleʼ ladxidoʼloʼ nezalú Jiobá cásica biʼniʼ salmista que. Ca oración bíʼnibe zanda gacané cani lii ti cadi guiníʼ íqueluʼ qué risácaluʼ nezalú Jiobá. Cayabi Jiobá laanu «zucaadiágabe oración stiʼ cani qué gapa tu gacané laa, ne qué zucaanabe oración sticaʼ» (Sal. 102:17). Biʼniʼ cré guiráʼ ni na ca diidxaʼ ca.

21. Xi zacané laanu chuʼnu jma nayecheʼ.

²¹ Laaca racané Salmo 102 laanu chuʼnu jma nayecheʼ. Guyuu salmista que nayecheʼ purtiʼ gudixhe ique chuʼ gaxha de Dios (Sal. 102:12, 27). Gutadxí ladxidoʼbe ora gúnnabe nuuca Jiobá para gacané ca xpinni ora guidxaagalucaʼ guendanagana. Nga runi, pa riníʼ íqueluʼ qué risácaluʼ nezalú Jiobá, ne pur nga qué randa rúniluʼ biaʼ ñuuláʼdxiluʼ lu xhiiñabe la? gudxi laabe xi cayuni sentirluʼ. Cadi guinábasinu Dios gacané laanu lu ca guendanagana stinu, sínuque laaca galán guinábanu ganna «binni lá Jiobá» (Sal. 102:20, 21).

22. Ximodo zanda gusiéchenu ladxidóʼ Jiobá.

²² Casi maʼ bidúʼyanu ca, zanda iquiiñenu Biblia para gacané laanu guidúʼyanu pa zuhuaa dxiichinu lu ni runi crenu, ne gánnanu risácanu para laabe. Cadi guiaandaʼ laanu laga nabáninu lu guidxilayú stiʼ Binidxabaʼ ziuu ora zaníʼ íquenu qué risaca ni rúninu ne zareʼnu gana. Peru pa qué gusaana de gúninu xhiiñaʼ Jiobá, zusiéchenu ladxidóʼ ne zulá laanu (Mat. 24:13).