1, 2. 1) Xi gudixhe ique Moisés guni dxi napa 40 iza. (Biiyaʼ dibuju ni zeeda ra ruzulú tema riʼ.) 2) Xiñee gulí Moisés gacaná casi ca israelita.

NANNA Moisés xi guiráʼ ñanda ñapa ndaaniʼ guidxi Egipto. Ruuyabe guiráʼ yoo ngola ni napa ca binni ricu, ne laapebe nabézabe ra lidxi rey. «Biziidi be irá ni nanna ca binni Egipto», zándaca biziidibe astronomía, matemática, arquitectura, biziidibe xcaadxi diidxaʼ ne gúnnabe de historia ne de ciencia (Hech. 7:22). Ñanda ñápabe stale bidxichi, ñácabe ti binni risaca o ñápabe xcaadxi cosa ni qué ñanda ñapa sti egipciu.

² Neca zacá, dxi nápabe 40 iza gudixhe íquebe gúnibe xiixa ni guca nagana para faraón ne binnilidxi guiene. Qué lica niguixhe íquebe nibánibe casi ribani ti egipciu, sínuque gulibe gácabe casi ca israelita ni nuu de esclavu. Xiñee yaʼ. Purtiʼ gúpabe fe (biindaʼ Hebreos 11:24-26). Cumu gúpabe fe la? «casi ñaca cayuuya be Dios neca qué rihuinni», purtiʼ nánnabe zuni guiráʼ ni maʼ guníʼ (Heb. 11:27).

3. Xi chonna guendarinabadiidxaʼ zacábinu lu tema riʼ.

³ Cásica Moisés, laanu laaca naquiiñeʼ gápanu fe ti ganda guiénenu gastiʼ nga rudii guidxilayú riʼ laanu, ne zacá casi ñaca nidúʼyanu Jiobá. Nga runi, naquiiñeʼ gácanu casi ca binni ni napa fe (Heb. 10:38, 39). Para ganda iguidxi fe stinu, guidúʼndanu ni rieeteʼ de Moisés lu Hebreos 11:24-26. Ne guicábinu ca guendarinabadiidxaʼ riʼ: Ximodo gucané fe ca laabe para gunda bicaanabe ca cosa ni cadi jneza riuulaʼdxiʼ binni guni.  Dxi bicaalú xcaadxi binni laabe, ximodo gucané fe stibe para bisisácabe xhiiñaʼ Jiobá. Ne xiñee «bicaa ique be ni chi udii Dios laabe».

4. Xi bidii Moisés cuenta rizaaca ca binni ni runi guiráʼ ni rinabaʼ beela ladi laa.

⁴ Cumu gupa Moisés fe la? bidiibe cuenta chupa chonna si gubidxa nga riuu binni nayecheʼ ora runi guiráʼ ni rinabaʼ beela ladi laa. Peru xcaadxi binni zándaca gadxé modo niníʼ ique. Xiñee yaʼ. Purtiʼ neca runi adorar ca binni de Egipto stale bidóʼ ne rúnicaʼ dxiiñaʼ de espiritismo, beeda gácacaʼ ti guidxi nadipaʼ ni runi mandar guidubi guidxilayú, peru ca xpinni Jiobá, nácacaʼ esclavu. Neca zacá, nanna Moisés zanda guchaa Dios modo nuucaʼ. Ruluíʼ galán nabani ca binni ni ricá ique guni ni riuulaʼdxiʼ, peru Moisés nanna dxichi zanitilú ca binni malu. Nga runi, qué ninabe «ñeche né be irá ni ñapa be, [...] chupa chonna si gubidxa».

5. Ximodo zanda gucáʼnanu guiráʼ ni rinabaʼ beela ládinu laanu yaʼ.

⁵ Ximodo zanda gucáʼnanu guiráʼ ni rinabaʼ beela ládinu laanu yaʼ. Ni zacané laanu nga gánnanu chupa chonna si gubidxa nga rusiecheʼ cani binni. Fe ni nápanu, cayacané ni laanu guidúʼyanu «canitilú guidxilayú ne irá ni nuu ndaani» (1 Juan 2:15-17). Guiníʼ íquenu xi zazaaca ca binni ni rucheené Dios ne qué naʼ gaca arrepentir. Casi ñaca zuhuaacabe «ti lugar ra ruxooñeʼ ñeecabe» ne qué zandaa ziábacabe (Sal. 73:18, 19). Ora chuʼ xiixa guquiinde laanu gucheʼnu, galán guinabadiidxanu: «Ximodo ñuuladxeʼ nibaneʼ despué yaʼ».

6. 1) Xiñee qué niná Moisés «ñaca xiiñi xiñi dxaapa rey Faraón». 2) Xiñee rábiluʼ jneza ni gudixhe ique Moisés guni.

⁶ Laaca gucané fe stiʼ Moisés laa para ganna xi naquiiñeʼ guni. Biblia ruzeeteʼ: «Ne zaqueca bini cre Moisés Dios dxi ma huaniisi, ngue runi qué ñuulaʼdxi ñaca xiiñi xiñi dxaapa rey Faraón» (Heb. 11:24). Qué niníʼ íquebe ñápabe ti puestu risaca lade ca binni runi xhiiñaʼ rey ne niquiiñebe guiráʼ bidxichi ñápabe para ñúnibe xhiiñaʼ Dios ne ñacanebe ca israelita. Cumu nabé gunnaxhiibe Jiobá la? gudixhe íquebe gúnibe ni na de guidubi ladxidoʼbe, xhiálmabe ne stipa stibe (Deut. 6:5). Pur ni gudixhe íquebe gúnibe, qué ñápabe stale guendanagana. Ne despué, laca lu náʼ ca israelita que biaana stale de ca tesoro ni qué ninabe nicaabe (Éx. 12:35, 36). Biaritiʼ beeda gaca faraón nezalú Jiobá ne biiti laabe (Sal. 136:15). Peru Moisés qué ñati ne biquiiñeʼ Dios laa para chiné ca israelita ne gulabe laacaʼ. Guizáʼ nayecheʼ bibánibe.

7. 1) Casi na Mateo 6:19-21, xi naquiiñeʼ gúninu lu xquendanabáninu. 2) Ximodo bisihuinni ti xpinni Cristu gulí guni ni jneza.

⁷ Pa nahuiiniluʼ ne cayúniluʼ xhiiñaʼ Jiobá, ximodo zacané fe stiluʼ lii gánnaluʼ xi naquiiñeʼ gúniluʼ lu xquendanabániluʼ yaʼ. Galán guiníʼ íqueluʼ xi naquiiñeʼ gúniluʼ. Biʼniʼ cré dxandíʼ zuni Dios ni maʼ guníʼ ne biʼniʼ stipa pur ugaandaluʼ guendanabani ni qué zaluxe ne cadi para guibániluʼ chupa chonna si gubidxa (biindaʼ Mateo 6:19-21). Guidúʼyanu xi gudixhe ique ti bailarina láʼ Sophie guni. Ca grupu de ballet ni nuu Estados Unidos guniʼcaʼ zudiicaʼ laabe chupa chonna beca ne caadxi puestu ni racalaʼdxiʼ xcaadxi binni guicaa. Laabe guniʼbe: «Nabé riuuladxeʼ guidxagayaacabe ni runeʼ, ne dede bineʼ sentir jma risacaʼ que ca xcompañeraʼ. Peru cadi nayecheʼ guyuaaʼ». De raqué biiyabe videu ni láʼ Los jóvenes preguntan... ¿Qué haré con mi vida? Sophie guníʼ: «Bidieeʼ cuenta napaʼ guiráʼ ni rudii guidxilayú riʼ ne rusisaca binni naa, peru maʼ cadi cayuneʼ adorar Jiobá de guidubi ladxiduáʼ. Bineʼ orar de guidubi ladxiduáʼ ne gudixheʼ iqueʼ gusaanaʼ de gacaʼ bailarina». Ximodo runi sentirbe  yanna yaʼ. Laabe guniʼbe: «Qué ribánadiaʼ modo bibaneʼ dxiqué. Guizáʼ nayecheʼ modo nabaneʼ yanna. Naa ne xheelaʼ nácadu precursor. Qué runibiáʼ diʼ stale binni laadu ne laaca qué gápadu stale cosa risaca; peru nápadu Jiobá, ca binni ni ridúʼndanedu de Biblia ne cani naguixhe íquedu ugaandadu ndaaniʼ xquidxi Dios. Qué lica racaʼ arrepentir».

8. Xi conseju zanda gacané cani nahuiiniʼ guiníʼ íquecaʼ xi gúnicaʼ lu xquendanabánicaʼ.

⁸ Nanna Jiobá xii nga ni jma galán para lii. Moisés gunabadiidxaʼ: «Yanna, guidxi Israel, xi canabaʼ Jiobá Dios stiluʼ lii, sínuque guidxiʼbuʼ laabe, saluʼ lu ca neza stibe, ne gannaxhiiluʼ laabe, ne guʼnuʼ ni nabe de guidubi ladxidoʼloʼ ne guidubi xhiálmaluʼ; gápaluʼ ca mandamientu stiʼ Jiobá ne ca ley cayuneʼ mandar lii yannadxí, para cheni lii jneza» (Deut. 10:12, 13). Yanna laga nahuiiniluʼ, gudixhe ique gúniluʼ xiixa ni cadi cuee tiempu stiluʼ para ganda gannaxhiiluʼ Jiobá ne «guʼnuʼ ni nabe de guidubi ladxidoʼloʼ ne guidubi xhiálmaluʼ». Gunna dxichi pa quixhe íqueluʼ gúniluʼ ni nabe la? zie ni «lii jneza».

9. Xiñee nagana biiyaʼ Moisés dxiiñaʼ ni bidii Dios laa.

⁹ Para Moisés la? jma risaca gacaná «casi ucaná Cristu» que «irá ni nuu ndaani guidxi Egipto» (Heb. 11:26). Ne zacá nga beeda gácabe casi «Cristu», o ni «Bibí». Xiñee zanda guininu nga yaʼ. Purtiʼ gulí Jiobá laabe para cueebe xquidxi de Egipto. Nánnabe nagana dxiiñaʼ que ne dede zacanabe, o ziuu tu zaníʼ mal de laabe. Ti biaje dede biʼniʼ burla ti israelita laabe né ca diidxaʼ riʼ: «Tu gulí lii para gácaluʼ príncipe ne juez luguiadu» (Éx. 2:13, 14). Despué, Moisés peʼ gunabadiidxaʼ Jiobá: «Ximodo nga naluʼ gucaadiaga Faraón naa» yaʼ (Éx. 6:12). Para ganda guni huantarbe ora gucaalúcabe laabe, biʼniʼ orarbe Jiobá ne gúdxibe laa guiráʼ ni cuchibi laabe. Ximodo gucané Jiobá laabe para gunda bíʼnibe dxiiñaʼ nadipaʼ ni bidii laabe yaʼ.

10. Ximodo bisiidiʼ Jiobá Moisés para gunda biʼniʼ dxiiñaʼ ni bidiibe laa.

¹⁰ Primé, gudxi Jiobá Moisés: «Dxandipeʼ ziuaaniáʼ lii» (Éx. 3:12). Guiropa, jma gúpabe fe Jiobá ora bisiene laabe tobi de ca cosa ni riníʼ lá o xlá: «Naa zeeda gacaʼ ni gacalaʼdxeʼ» (Éx. 3:14, nota). * Guionna, bidii Jiobá laabe poder para gúnibe milagru ti gusihuínnibe dxandíʼ laa biseendaʼ laabe (Éx. 4:2-5). Ne guidapa, biseendaʼ Jiobá Aarón para chiné laabe, guiníʼ pur laabe ne gacané laabe gúnibe dxiiñaʼ gucuaabe (Éx. 4:14-16). Dxi mayaca gatiʼ Moisés, gunna dxichi rusiidiʼ Dios ca xpinni ti ganda gúnicaʼ intiica dxiiñaʼ gudiibe laacaʼ, ngue runi gúdxibe Josué, hombre ni chiguiaana lugar stibe: «Jiobá nga ni zaniruʼ nezaluluʼ. Zazanerube lii. Qué zusaanabe lii. Cadi guidxíbiluʼ» (Deut. 31:8).

11. Xiñee nabé bisisaca Moisés dxiiñaʼ gucuaa.

¹¹ Ora biʼyaʼ Moisés cayacané Jiobá laa, bisisaca dxiiñaʼ gucuaa ne biiyaʼ jma risaca ni que «irá ni nuu ndaaniʼ guidxi Egipto». Ni jma risaca para laabe nga gúnibe xhiiñaʼ Dios ni jma nandxóʼ que gúnibe xhiiñaʼ faraón. Jma bisisácabe gácabe «Cristu», o ni gulí Jiobá, que gácabe príncipe ndaaniʼ guidxi Egipto. Guluu Jiobá ndaayaʼ Moisés purtiʼ biʼniʼ ni jneza. Ngue runi, nabé guca xhamígube Jiobá ne bidii laabe stale poder para ganda chinebe ca israelita lu Layú ni Bizabiruaa Dios gudii laacaʼ (Deut. 34:10-12).

12. Xii nga dxiiñaʼ risaca ni rudii Jiobá laanu.

¹² Laanu laaca nápanu ti dxiiñaʼ risaca ni gúninu. Gucheechenu stiidxaʼ Reinu, cásica biʼniʼ apóstol Pablu ne xcaadxi xpinni Dios (biindaʼ 1 Timoteo 1:12-14).  Guiranu nga nápanu ndaayaʼ de gúninu dxiiñaʼ riʼ (Mat. 24:14; 28:19, 20). Nuu xpinni Cristu naca precursor, siervu ministerial ne binnigola para gacané xcaadxi xpinni Cristu ni nuu ra ridagulisaa. Peru zándaca guiníʼ ca binnilídxinu ni cadi naca Testigu ne xcaadxi binni qué risaca ca dxiiñaʼ ni bidii Jiobá laanu gúninu o dede guiniʼcaʼ pur gana si ca stipa ni cayúninu (Mat. 10:34-37). Pa gudiʼnu lugar cueecabe gana laanu, zándaca guiníʼ íquenu qué risaca ca stipa ni cayúninu o qué zanda gúninu dxiiñaʼ ni gucuaanu. Yanna, ximodo zanda gacané fe stinu laanu cadi guireʼnu gana yaʼ.

13. Ximodo racané Jiobá laanu gúninu ca dxiiñaʼ ni rudii laanu.

¹³ Guinábanu Jiobá gacané laanu ne guni crenu dxandíʼ zúnibe ni. Gábinu laabe ca cosa ni cuchibi laanu. Cadi guiaandaʼ laanu laabe nga bidiibe dxiiñaʼ riʼ ne laca laabe nga gacanebe laanu gúninu ni. Ximodo yaʼ. Zacanebe laanu cásica gucanebe Moisés. Primé, laabe cayábibe laanu: «Naa dxandipeʼ zudieeʼ stipa lii. Dxandipeʼ zacaniáʼ lii. Ya, naa dxandipeʼ naazeʼ dxiicheʼ ladu derechu stiluʼ» (Is. 41:10). Guiropa, laabe cayábibe laanu zanda guni crenu cani maʼ guniʼbe. Sicaríʼ nabe: «Zuneʼ ni maʼ guniéʼ. Ni maʼ gudixhe iqueʼ guneʼ, laaca zuneʼ» (Is. 46:11). Guionna, rudii Dios laanu «enda nandxóʼ» stiʼ (2 Cor. 4:7). Ne guidapa, racané Bixhózenu ni nadxii laanu para ganda gúninu dxiiñaʼ stinu ora riguu xcaadxi xpinni Cristu gana laanu ne ora racanecaʼ laanu (1 Tes. 5:11). Ora rusiidiʼ Jiobá laanu para gúninu ca dxiiñaʼ ni rudii laanu la? riguidxi fe stinu ne jma rusisácanu cani que ca tesoro ni nuu ndaaniʼ guidxilayú riʼ.

14. Xiñee nanna dxichi Moisés zacaa ni chigudii Dios laa.

¹⁴ «Bicaa ique [Moisés] ni chi udii Dios laa[...]» (Heb. 11:26). Neca qué ganna chaahuiʼ Moisés xi chiguizaaca despué, bidiibe lugar gacané cani laabe gánnabe xi naquiiñeʼ gúnibe. Cásica Abrahán, laabe laaca nanna dxíchibe zanda guindisaʼ Dios cani maʼ guti (Luc. 20:37, 38; Heb. 11:17-19). Cumu bicaa íquebe ni chigudii Dios laabe la? qué niníʼ íquebe pur gana si gudiʼdiʼ cuarenta iza dxi cuxooñelube de faraón ne cuarenta iza dxi guzabe lu desiertu. Neca qué ñánnabe ximódopeʼ chiguni Dios guiráʼ ni maʼ bidii stiidxaʼ, gúpabe fe casi ñaca ñuuyabe «ni chi udii Dios laabe».

15, 16. 1) Xiñee naquiiñeʼ guicá íquenu premiu ni chigudii Dios laanu. 2) Xi ndaayaʼ ñuuláʼdxiluʼ nicaaluʼ ora guni mandar Reinu stiʼ Dios.

 ¹⁵ Yanna laanu yaʼ, ñee rucaa íquenu «ni chi udii Dios» laanu la? Cásica Moisés, laaca qué gánnanu ximódopeʼ chiguni Dios cani maʼ guníʼ. Tobi de ca cosa ca nga «qué ganna [nu] padxí» guzulú ca dxi jma nagana (Mar. 13: 32, 33). Peru jma nánnanu de Paraísu ni chiguni Dios que Moisés. Neca qué gánnanu xi guirapeʼ chiguni Jiobá, peru modo maʼ guniʼbe guibani binni ora guni mandar Reinu stibe zacané cani laanu guicá íquenu premiu ni chiguicaanu. Ora guxuíʼlunu ximodo chigaca guidxilayú cubi ca, zucaani laanu gúninu xhiiñaʼ Reinu primé lu xquendanabáninu. Xiñee yaʼ. Quíxhenu ti ejemplu, ñee niziʼluʼ ti yoo pa qué gánnaluʼ ximodo nuuni la? Coʼ njaʼ. Zacaca nga qué niquíʼñenu xquendanabáninu para gúninu xhiiñaʼ Jiobá pa nánnanu qué zúnibe ni maʼ guniʼbe. Ñee racané fe stinu laanu para guʼyaʼ chaahuinu ximodo zabáninu ora guni mandar Reinu stiʼ Dios laanu la? Zacá nga naquiiñeʼ gácani.

¹⁶ Para cadi gusiaandanu ximodo zabáninu ndaaniʼ Paraísu ni chigudii Jiobá laanu, naquiiñeʼ guxuíʼlunu maʼ nuunu ndaaniʼ ni. Ora ridúʼndanu relatu stiʼ ca binni ni bibani ante de Cristu, guiníʼ íquenu xi guinabadiidxanu laacabe ora maʼ guiásacabe lade gueʼtuʼ ne xi guinabadiidxacabe laanu de modo bibáninu lu ca últimu dxi riʼ. Guiníʼ íquenu pabiáʼ nayecheʼ ziuʼnu ora gunibiaʼnu ca binnilídxinu ni maʼ xadxí de guti ne gábinu laacaʼ guiráʼ ni biʼniʼ Dios pur laacaʼ; ne guiníʼ íquenu pabiáʼ nayecheʼ ziuʼnu ora guizíʼdinu de ca maniʼ guiʼxhiʼ ne guidúʼyanu maʼ nadoʼcaʼ; ne chaahuiʼ chaahuiʼ ziuʼnu jma gaxha de Jiobá, purtiʼ ziyácanu binni qué gapa donda...

17. Pa cadi gusiáʼndanu premiu chigudii Dios laanu, ximodo zacané ni laanu.

¹⁷ Pa cadi gusiaandanu premiu chigudii Dios laanu la? zacané ni laanu cadi gusaana de gúninu xhiiñaʼ Dios, chuʼnu nayecheʼ ne quixhe íquenu gúninu cani zanda gacané laanu ugaandanu guendanabani ni qué zaluxe. Sicaríʼ bicaa Pablu: «Pa cá lú nu ni caʼru iduʼya nu la? qué zaxhacalaʼdxi nu de cueza nu ni» (Rom. 8:25). Neca bicaabe ca diidxaʼ riʼ para ca xpinni Cristu ni bibí né espíritu santu, laaca zanda gacanécani guiráʼ ca xpinni Cristu. Cumu naguidxi fe stinu la? zabézanu sin guireʼnu gana «ni chi udii Dios» laanu, neca caʼruʼ guicaanu premiu ca. Cásica Moisés, qué riníʼ íquenu pur gana si maʼ bíninu ni na Dios ca iza maʼ gudiʼdiʼ ca. Nanna dxíchinu «zanitilú ni rihuinni yanna riʼ, peru qué ziuu dxi initilú ni qué rihuinni» (biindaʼ 2 Corintios 4:16-18).

18, 19. 1) Xiñee naquiiñeʼ gúninu stipa para iguidxi fe stinu. 2) Xi zadúʼyanu lu sti tema ca.

¹⁸ Racané fe stinu laanu para guidúʼyanu cani «caʼru ihuinni [...], peru casi ñaca ma caduʼya nu ni yanna» (Heb. 11:1). Binni ni qué gapa fe, qué riene pabiáʼ risaca guni ni na Jiobá. Para laacabe la? zeeda gaca ca cosa ni rizíʼdinu de Dios casi ti «enda huati si» (1 Cor. 2:14). Peru laanu cabézanu guibáninu sin qué chuʼ dxi gátinu ne guidúʼyanu guibani ca gueʼtuʼ, ne nga nga ca cosa ni qué lica riníʼ ique binni pa ziuu dxi gaca. Cásica ca filósofo, biiyacaʼ Pablu casi ti hombre «ni caníʼ huaahua», zacaca nga riníʼ ique binni de laanu ora rábinu laacaʼ cani chiguni Jiobá (Hech. 17:18).

¹⁹ Cumu nabézanu ndaaniʼ ti guidxilayú ra qué gapa binni fe la? naquiiñeʼ gúninu stipa para iguidxi fe stinu. Guinábanu Jiobá «cadi guiaadxa fe» laanu (Luc. 22:32). Cásica Moisés, cadi guiaandaʼ laanu xi rizaaca binni ora gucheené Jiobá, pabiáʼ risaca nga gúninu xhiiñabe ne cadi gusiaandanu guendanabani ni qué zaluxe ni chigudiibe laanu. Ñee nuuruʼ ni zanda guizíʼdinu de ejemplu stiʼ Moisés la? Nuuruʼ. Lu sti tema ca zadúʼyanu ximodo gucané fe stibe laabe gúʼyabe «Dios neca qué rihuinni» (Heb. 11:27).