1, 2. 1) Xiñee zándaca guyuu xquendanabani Moisés ra naxoo. (Biiyaʼ foto ni cá ra ruzulú tema riʼ.) 2) Xiñee qué nidxibi Moisés pa nidxiichi faraón.

FARAÓN nga ti rey ni biʼniʼ guiráʼ ni gucalaʼdxiʼ. Ca binni de Egipto gúpacaʼ laabe casi ti dios. Ti libru na: Guníʼ ique binni «guirútiruʼ jma nuu xpiaaniʼ ne jma nadipaʼ que laabe» (When Egypt Ruled the East [Dxi biʼniʼ mandar Egipto ca guidxi ni riaana ladu rindani Gubidxa]). Para guidxibi ca binni de Egipto faraón la? riguu íquebe ti corona ne lucuá ni cá ti cobra ni nuuca listu para uquiichiʼ. Cobra ni cá lucuabe que rusihuínnini nuuca faraón listu para gucaalú tutiica xhenemigu. Yanna bixuiʼlú ximodo biʼniʼ sentir Moisés ora gudxi Jiobá laa: «Zuseendaʼ lii ra nuu Faraón, ne zabeeluʼ xquidxeʼ de Egipto» (Éx. 3:10).

² Guizáʼ bidxiichi faraón ora yetidxi Moisés laa xiná Jiobá. Gudiʼdiʼ si gaʼ plaga ndaaniʼ guidxi Egipto, gudxi faraón Moisés: «Qué chuʼ dxi guiníʼ íqueluʼ gueeda guuyaluʼ naa sti biaje, purtiʼ dxi lii guʼyuʼ naa, zátiluʼ» (Éx. 10:28). Ante guiree Moisés ra nuube gúdxica laabe zati baʼduʼ lugola stibe (Éx. 11:4-8). Últimu, biʼniʼ mandar Moisés guiráʼ familia israelita guuticaʼ ti chiva o ti dendxuʼ barracu —maniʼ riʼ nabé risácame para ca egipciu ni biʼniʼ adorar dios Ra— ne uneʼcaʼ rini stime ra puertaʼ lídxicaʼ (Éx. 12:5-7). Qué nidxibi  diʼ Moisés pa nidxiichi faraón. Xiñee yaʼ. Biblia na gúpabe fe ngue runi bizuubabe stiidxaʼ Jiobá, qué «nidxibi be rey que neca cadxiichi né laabe, ne bidxii lú be neza ze be purti casi ñaca cayuuya be Dios neca qué rihuinni» (biindaʼ Hebreos 11:27, 28).

3. Xi chiguizíʼdinu de fe ni gupa Moisés ora biʼyaʼ «Dios neca qué rihuinni».

³ Ñee naguidxi nuu fe stinu casi ñaca nidúʼyanu Dios la? (Mat. 5:8.) Guidúʼndanu ejemplu stiʼ Moisés sti biaje ti ganda iguidxi fe stinu ne guidúʼyanu Jiobá casi ti binni ni nabani. Ximodo gucané fe ca laabe para cadi nidxíbibe binni. Ximodo bisihuínnibe runi crebe zuni Dios cani maʼ bidii stiidxaʼ. Bidxiilú Moisés neza zeʼ casi ñaca ñuuyaʼ Dios neca qué rihuinni. Yanna, ximodo gucané ngue laabe iguidxi fe stibe dxi bidxaagalúnebe xquídxibe guendanagana yaʼ.

4. Xi ñándaca niníʼ ca binni ni qué gapa fe de Moisés.

⁴ Ca binni ni qué gapa fe, ñanda niniʼcaʼ gastiʼ qué zanda guni Moisés para gucaalú faraón. Lu naʼ faraón nuu xquendanabánibe ne guiráʼ cani naguixhe íquebe gúnibe. Ne Moisés peʼ gunabadiidxaʼ Jiobá: «Tu nacaʼ para chaaʼ nezalú Faraón ne para cueeʼ ca xiiñiʼ Israel de Egipto yaʼ» (Éx. 3:11). Zándaca guníʼ íquebe: «Ñee jneza nga guibiguetaʼ Egipto la? laga pa guchiicheʼ faraón yaʼ. Peru pa naa raca cuarenta iza bixooñeluáʼ de raqué yaʼ».

5, 6. Xi gucané Moisés guidxibi Jiobá lugar de nidxibi faraón.

⁵ Ante guibiguetaʼ Moisés Egipto, bisiidiʼ Dios laabe ti principiu nabé risaca ne despué bicaabe ni lu libru stiʼ Job: «Ora ridxibi binni Jiobá... rusihuinni nuu xpiaaniʼ» (Job 28:28). Para gacané Jiobá laabe guidxíbibe ne gusihuínnibe nuu xpiaanibe, biluíʼ laabe xiñee gadxé laa de binni, purtiʼ laa nga Dios ni jma nandxóʼ. Sicaríʼ gunabadiidxaʼ laabe: «Tu bizáʼ ruaa binni. Tu rudii lugar chuʼ binni mudu o binni ni qué runadiaga o chuʼ binni ciegu o binni ni ruuyaʼ chaahuiʼ. Naa Jiobá, naa nga runeʼ cani» (Éx. 4:11).

⁶ Xi bisiidiʼ Jiobá laabe né ni gudxi laabe riʼ yaʼ. Bisiidiʼ laabe cadi naquiiñeʼ guidxíbibe. Jiobá ngue cuseendaʼ laabe, ne laca laa nga chigudii guiráʼ ni iquiiñebe para guiniʼbe ni racalaʼdxiʼ. Ne cadi guiaandaʼ laanu gastiʼ nga faraón nezalú Jiobá, Dios ni jma nandxóʼ. Ne laaca cadi deruʼ primé biaje ngue chuʼ ca xpinni Dios ra naxoo pur nuucaʼ lu náʼ ca egipciu. Zándaca bietenalaʼdxiʼ Moisés modo bilá Jiobá Abrahán, José ne dede bilá laabe lu náʼ xcaadxi faraón ni guyuu dxiqué (Gén. 12:17-19; 41:14, 39-41; Éx. 1:22–2:10). Cumu «cayuuya [Moisés] Dios neca qué rihuinni» la? qué nidxibi ora guyé nezalú faraón ne ora guníʼ dede primé ne últimu diidxaʼ gudxi Jiobá laa.

7. Ximodo gucané fe ni gupa ti gunaa Testigu laa.

⁷ Laaca pur fe ni gupa ti gunaa Testigu ni láʼ Ella nga gucané laa para cadi guidxibi binni. Lu iza 1949 gunaazeʼ KGB laabe Estonia, gúxhacaʼ lari ládibe ne bizuhuaacaʼ laabe nezalú ca pulicia ni nahuiiniʼ. Sicaríʼ guníʼ Ella: «Guizáʼ bituiluáʼ, peru gutadxí ladxiduáʼ ne maʼ qué nuchiiñaʼ xquendabiaaneʼ naa ora bineʼ orar Jiobá». Despué biseguyoocabe laabe stúbibe chonna gubidxa ndaaniʼ ti cuartuhuiiniʼ ra nacahui. Laabe guniʼbe: «Naduxhuʼ bicaa ca pulicia que ridxi ne guniʼcaʼ: “¡Zuyúbidu modo cadi lica guietenalaʼdxiʼ binni lá Jiobá ndaaniʼ guidxi Estonia! ¡Lii cheluʼ lu ti campu de concentración ne xcaadxi cheʼ Siberia!”. Ne óraque guniʼcaʼ para guni búrlacaʼ naa: “¡Paraa nuu Jiobá stiuʼ pue!”». Ñee zuni cré gunaa Testigu riʼ zacané Jiobá laa la? o zudiibe lugar guchibi binni laabe. Ora gunabadiidxaʼ ca hombre cayuni burla laabe que xi cá íquebe gúnibe, gúdxibe laacaʼ: «Nabé maʼ guníʼ iqueʼ ni cayaca riʼ, jma ñuuladxeʼ nidaguayuaaʼ ne cadi gusaana de gacaʼ xhamiguaʼ Jiobá que chuaaʼ libre ne maʼ qué chuuláʼdxibe ni cayuneʼ». Gunna xpinni Cristu riʼ  dxandíʼ nabani Jiobá casi nabani ca hombre zuhuaaʼ nezalú. Cumu gúpabe fe Jiobá la? qué nucheenebe laa.

8, 9. 1) Xi zanda gacané laanu para cadi guidxíbinu binni. 2) Tu cadi naquiiñeʼ gusiaandanu pa chuʼ tu guchibi laanu.

⁸ Ni zacané laanu para cadi chuʼ xiixa ni guchibi laanu nga fe ni nápanu Jiobá. Pa gacalaʼdxiʼ gobiernu gucueeza laanu de guni adorarnu Dios, zándaca guiníʼ íquenu lu nácabe nga nuu xquendanabáninu ne guiráʼ cani naguixhe íquenu gúninu. Ne zándaca guinabadiidxanu laca laanu: «Ñee jneza nga guneruáʼ ni na Jiobá ne guchiicheʼ gobiernu la?». Cadi guiaandaʼ laanu: ni zacané laanu para cadi guidxíbinu binni nga fe ni nápanu Dios. Biblia na: «Tuuxa ni ridxibi binni la? reeda gácani ti trampa para laa, peru cani runi cré Jiobá la? rápabe laacaʼ» (Proverbios 29:25). Caquiiñeʼ Jiobá ca diidxaʼ riʼ para gucaa laanu guiníʼ íquenu: «Xiñee ndiʼ cadxíbiluʼ ti hombre ni zadxiña dxi gatiʼ pue, ne xiñee cadxíbiluʼ xiiñiʼ binni guidxilayú ni zeeda gaca casi guixi gaʼ yaʼ» (Is. 51:12, 13).

⁹ Cadi gusiáʼndanu Jiobá, Bixhózenu ni jma nandxóʼ. Laabe ruuyabe ca binni ni cayuniná ca gobiernu malu, riabe ne racanebe laacaʼ (Éx. 3:7-10). Neca chuunu nezalú ca binni risaca stiʼ gobiernu para guininu de cani runi crenu, cadi guiaandaʼ laanu ca diidxaʼ guníʼ Jesús: «Cadi chuʼ tu xizaa xi iníʼ tu nezalú cabe o xi gabi tu laacabe. Purti ora ma zuhuaa tu nezalú cabe la? zadxela tu xi iníʼ tu» (Mat. 10:18-20). Nin ti gobiernu ne nin ti binni ni runi xhiiñacaʼ qué zanda gucaalucaʼ Jiobá. Pa gúninu stipa pur iguidxi fe stinu yanna, zadúʼyanu Jiobá casi ti binni nabani ni racalaʼdxiʼ gacané laanu.

10. 1) Xi gudxi Jiobá ca israelita gúnicaʼ lu beeu nisán iza 1513 ante de ca dxi stiʼ Jesús. 2) Xiñee bizuubaʼ Moisés stiidxaʼ Dios.

¹⁰ Lu beeu nisán iza 1513 ante de ca dxi stiʼ Jesús, gudxi Jiobá Moisés ne Aarón gábicaʼ ca israelita cuicaʼ ti dendxuʼ barracu o ti chiva ni nazaaca ne guuticaʼ laame ne guneʼcaʼ rini stime ra puertaʼ lídxicaʼ (Éx. 12:3-7). Neca qué huayuu dxi guni ca israelita ngue, peru despué bicaa apóstol Pablu gupa Moisés fe: «Ne laca purti bini cre be Dios, nga runi biʼni be ni gudxi Dios laabe, binéʼ be rini irá ra puerta sti ca binni Israel dxa gueela que, ti qué guiuu ángel guuti lugola sticaʼ» (Heb. 11:28). Nanna Moisés runi Jiobá cani riníʼ, ngue runi biʼniʼ crebe dxandíʼ zati ca baʼduʼ lugola stiʼ ca binni de Egipto.

11. Xiñee gudixhená Moisés xcaadxi israelita.

¹¹ Zándaca nuu ca xiiñiʼ Moisés Madián, ti lugar ni riaana zitu de Egipto ne ra guirutiʼ guniná laacaʼ (Éx. 18:1-6). Para cadi «guiuu ángel guuti lugola» stiʼ ca israelita gudxi Moisés laacaʼ xi naquiiñeʼ gúnicaʼ. Zaqué bisihuínnibe nadxiibe binni. Biblia na «oraqueca biseendaʼ tidxi Moisés ca binnigola stiʼ Israel ne gúdxibe laacaʼ: “Lacuee [...] ne laguuti maniʼ ni chiguiquiiñeʼ lu pascua”» (Éx. 12:21).

12. Xi diidxaʼ risaca nga maʼ biʼniʼ mandar Jiobá laanu gucheechenu.

¹² Cayacané ca ángel xquidxi Jiobá para gábicaʼ binni ca diidxaʼ risaca riʼ: «Laidxibi Dios ne lausisaca laa, purti ma bidxiña dxi cuidxi cuenta binni. Lausisaca ni bizáʼ ibáʼ ne guidxilayú ne nisadóʼ ne ra rindani nisa» (Apoc. 14:7). Yanna nga caquiiñeʼ gucheechenu ca diidxaʼ ca. Naquiiñeʼ quíxhenanu binni para ganda guireecaʼ ndaaniʼ Babilonia guidxi roʼ «ti qué [chuʼcaʼ] lu enda ruchee stini» (Apoc. 18:4). Cani zeeda gaca «xcaadxi dendxu» cayacanecaʼ ca xpinni Cristu ni bibí pur espíritu santu para ganda gacanecaʼ binni guni ni na Dios (Juan 10:16; 2 Cor. 5:20).

13. Xi zacané laanu gucheechenu diidxaʼ de guidubi ladxidoʼno.

¹³ Nanna dxíchinu «ma bidxiña dxi cuidxi [Dios] cuenta binni» ne nánnanu caquiiñeʼ gucheechenu diidxaʼ casi cayabi Jiobá laanu. Lu ti visión gucuaa apóstol Juan biiyaʼ «tapa ángel zuhuaa idapa ladu guidxilayú, cucueeza ca bi» (Apoc. 7:1). Ñee nápanu fe para ganda  guidúʼyanu ca ángel ni maʼ nuu listu para gundaa bi stiʼ ca dxi jma nagana ni chigunitilú guidxilayú malu riʼ la? Pa zacá ni, zucaani laanu gucheechenu diidxaʼ de guidubi ladxidoʼno.

14. Xi rucaa laanu chitídxinu binni malu gusaana neza qué iquiiñeʼ stiʼ.

¹⁴ Laanu, cani dxandíʼ xpinni Cristu, maʼ xhamígunu Jiobá ne nánnanu zabáninu sin qué chuʼ dxi gátinu. Peru laaca nánnanu naquiiñeʼ quíxhenanu ca binni malu para gusaanacaʼ neza qué iquiiñeʼ sticaʼ ti ganda guibánirucaʼ. Biblia na: «Tobi ni rapa maʼ bineʼ lii ndaaniʼ lidxi Israel, ne naquiiñeʼ gucaadiágaluʼ ni guiniéʼ ne naquiiñeʼ gábiluʼ laacabe ni gabeʼ lii. Ora gabeʼ ti binni qué iquiiñeʼ: “Dxandipeʼ zátiluʼ”, ne cadi caguixhenaluʼ laabe ne cadi cayaʼbuʼ laabe xi naquiiñeʼ gúnibe para cadi gátibe, pur nácabe binni qué iquiiñeʼ zátibe, peru zanabaʼ cuenta lii pur rini bixhiibe. Peru pa quixhenaluʼ binni qué iquiiñeʼ ca, ne dxandipeʼ qué naʼ gusaana guendaquéiquiiñeʼ stiʼ ne neza malu canazá la? laapebe zátibe pur bicheebe; peru lii, maʼ bilaluʼ xquendanabániluʼ» (Ezequiel 3:17-19). Dxandíʼ, cadi nga si nga razón nápanu para gucheechenu diidxaʼ. Rucheechenu diidxaʼ purtiʼ nadxiinu Jiobá ne nadxiinu binni. Lu ejemplu guníʼ Jesús de samaritanu que, bisiidibe laanu ximodo rusihuinni binni nadxii ne riaʼ stobi. Zanda guinabadiidxanu laca laanu: «Ñee riaʼyaʼ binni casi biʼniʼ samaritanu que la? Ñee rucaani naa gucheecheʼ diidxaʼ la?». Cadi gácanu casi xa sacerdote ne levita bizeeteʼ Jesús lu ejemplu stiʼ que ne guiree cueenu para cadi gucheechenu diidxaʼ (Luc. 10:25-37). Pa nápanu fe lu ca ni maʼ bidii stiidxaʼ Dios laanu ne pa nadxiinu binni la? zúninu biaʼ gándatiʼ ante guinitilú guidxilayú malu riʼ.

15. Xiñee biʼniʼ sentir ca israelita casi ora maʼ qué gápacaʼ pa ladu checaʼ.

¹⁵ Cumu gupa Moisés fe «Dios neca qué rihuinni» la? gucaneni laa ora guyuu ca israelita ra naxoo bireesicaʼ de ndaaniʼ guidxi Egipto. Biblia na: «Óraque gundisalú ca xiiñiʼ Israel, ne biiyacaʼ zeeda ca egipciu luguiacaʼ; ne guizáʼ bidxibi ca xiiñiʼ Israel ne bizulú bicaacaʼ ridxi Jiobá» (Éx. 14:10-12). Cadi naquiiñeʼ nidxibi ca israelita ora bizaaca ngue. Xiñee yaʼ. Purtiʼ maca guníʼ Jiobá: «Zudiee lugar gaca ladxidóʼ Faraón naguidxi, ne laa zinanda laacabe, ne zusisacaʼ naa nezalú Faraón ne ca soldadu stiʼ; ne zanna ca egipciu naa nga Jiobá» (Éx. 14:4). Neca gudixhená Jiobá laacabe peru qué ñápacabe fe. Nezalúcabe nuu nisadóʼ Xiñáʼ que ne nagana para tiidicabe ni, neza déchecabe zeeda dxiña ca soldadu stiʼ faraón ne carru sticaʼ, ne ti hombre de 80 iza nga cayabi laacabe xi gúnicabe. Biʼniʼ sentírcabe casi ora maʼ qué gápacabe pa ladu chécabe.

16. Ximodo gucané fe stiʼ Moisés laa ora gudiʼdiné guidxi que nisadóʼ Xiñáʼ.

¹⁶ Peru qué nidxibi Moisés. Xiñee yaʼ. Pur fe ni gúpabe qué nidxíbibe ora bíʼyabe nisadóʼ que ne ora bíʼyabe ejércitu que. Casi ora biiyabe «modo chigulá Jiobá» guidxi que ne nánnabe zadinde Dios pur laacabe. Biblia na: «Óraque gudxi Moisés guidxi que: “Cadi guidxíbitu. Laguzuhuaa dxiichiʼ ne laguuyaʼ modo chigulá Jiobá laatu yannadxí. Purtiʼ ca egipciu ni cayuuyatu yannadxí, maʼ qué zuuyarutu laacaʼ, coʼ, maʼ qué ziuuruʼ dxi. Jiobá zadinde pur laatu, ne laatu qué zúnitu gastiʼ”» (Éxodo 14:13, 14). Fe ni gupa Moisés que biquidxi ni fe stiʼ guidxi que ne guluuni gana laacaʼ. Biblia na: «Ne laca purti bini cre cabe Dios, nga runi gunda udiʼdi cabe Nisadóʼ Xiñá que, casi ñaca nidiʼdi cabe ra nabidxi. Ne ra ucalaʼdxi ca binni Egipto nidiʼdi casi udiʼdi cabe la? bilaahua caʼ» (Heb. 11:29). Óraque «bizulú guidxi Israel bidxibi Jiobá ne gupa fe Jiobá ne Moisés siervu stiʼ» (Éx. 14:31).

17. Xi zusihuinni pa naguidxi nuu fe stinu.

¹⁷ Maʼ cadi candaa laaca ziuu xquendanabáninu ra naxoo. Ora maʼ guzulú Armagedón la? ca gobiernu ni nuu yanna riʼ, mápeca binitilucaʼ guiráʼ religión ni jma naroʼbaʼ que religión stinu (Apoc. 17:16). Lu ti profecía zeeda lu Biblia bichaaga Jiobá ca xpinni casi ti guidxi ni qué gapa lindaa, guirutiʼ cayapa laa, cadi cá tranca ne qué gapa puertaʼ (Ezeq. 38:10-12, 14-16). Ca binni ni qué gapa fe, riníʼ íquecaʼ guirutiʼ zanda gulá laanu. Yanna, ñee naquiiñeʼ guidxíbinu la?

18. Xiñee cadi naquiiñeʼ guidxíbinu ora gueeda ca dxi jma nagana.

¹⁸ Qué gápanu nin ti razón para guidxíbinu. Xiñee yaʼ. Purtiʼ maʼ guníʼ Jiobá zucaalúcabe ca xpinni, peru laaca maʼ guniʼbe zápabe laacaʼ. Biblia na: «Ne dxi que, dxi gueeda Gog para gucaalú Israel, napa xidé —maʼ guníʼ Jiobá, Señor ni jma nandxóʼ— quibaʼ xiana stinneʼ. Ne ora maʼ cadxiicheʼ, ora maʼ daʼyaʼ xiana, napaʼ xidé guiniéʼ» (Ezeq. 38:18-23). Zanitilú guiráʼ cani gacalaʼdxiʼ guniná xquidxi Jiobá. Pa guni crenu de guidubi ladxidoʼno zacané Jiobá laanu ora gueeda dxi «naroʼbaʼ ne ruchibi» stiʼ la? zanda gúʼyanu modo gulá Jiobá binni ne zacá qué zaxélenu de laabe (Joel 2:31, 32).

19. 1) Xiñee zanda guininu nabé guca xhamigu Moisés Jiobá. 2) Xi zabeendunu pa guzúʼbanu stiidxaʼ Jiobá lu guiráʼ ni gúninu.

¹⁹ ¡Maʼ cadi candaa zaca stale cosa risaca! Nga runi, cadi gusaana de gúʼyanu «Dios neca qué rihuinni». Ora guidúʼndanu Stiidxabe guiráʼ dxi ne guni orarnu laabe gatigá, zacané cani laanu chuʼnu jma gaxha de Jiobá ne gaca xhamígunu laa. Nabé guca xhamigu Moisés Jiobá ne bidii Dios laabe poder para gunda bíʼnibe stale cosa. Nga runi, ruzeeteʼ Biblia binibiáʼ chaahuiʼ Jiobá laabe (Deut. 34:10). Pa gápanu fe cásica gupa Moisés, laaca zaca xhamígunu Jiobá casi ñaca nidúʼyanu laa neca qué rihuinni. Pa guzúʼbanu stiidxabe lu guiráʼ ni gúninu la? Biblia cayabi laanu «zúnibe ca neza [stinu] derechu» (Prov. 3:6).