Ndaaniʼ Biblia qué rieeteʼ pa malu nga chaquiʼ tuuxa ora maʼ guti.

Stale relatu stiʼ Biblia ruzeeteʼ guyuu biaje bizaaquicabe xcuerpu binni ni maʼ guti o dxita ladi (Jos. 7:25; 2 Crón. 34:4, 5). Zándaca guiníʼ ique binni cadi naquiiñeʼ nigaachiʼ ca binni riʼ pur xiixa cosa malu ni bíʼnicaʼ. Peru cadi guiráʼ diʼ biaje zacá ni.

Guzéʼtenu ejemplu stiʼ rey Saúl ne guionnaʼ xiiñiʼ dxi gúticaʼ. Guirácabe gúticabe ora bicaalúcabe ca filisteu. Tobi de ca xiiñiʼ Saúl nga Jonatán, xhamigu dxiña David. Ora gunna chupa chonna israelita ni nabeza Jabés-galaad ni bizaaca riʼ la? yecaacabe guidapaʼ gueʼtuʼ riʼ, bizaaquicabe laacaʼ ne bicaachicabe dxita ládicaʼ, bíʼnicabe ni purtiʼ nadxibalúcabe. Despué bisisaca David laacabe pur ni bíʼnicabe ca (1 Sam. 31:2, 8-13; 2 Sam. 2:4-6).

Biblia ruzeeteʼ zusibani Dios gueʼtuʼ, o zudxiguétabe xquendanabani binni. Pa guzaaquicabe xcuerpu tuuxa ni maʼ guti o pa coʼ, Jiobá zanda gusibani laabe ne gudii laabe ti cuerpu nacubi. Guiníʼ íquenu ni bizaaca guionnaʼ hombrehuiiniʼ hebreu que. Rey Nabucodonosor biʼniʼ mandar gáticabe ndaaniʼ ti horno ni cacaguí. Laacabe qué niníʼ íquecabe qué zanda guindisaʼ Jiobá laacabe de lade gueʼtuʼ pa chaquiʼ xcuérpucabe (Dan. 3:16-18). Zacaca nga zanda guininu de ca xpinni Cristu ni guti lu campu de concentración stiʼ ca nazi ne bizaaquicabe laacaʼ. Ne laaca nuu xpinni Dios ni huayati ora ricaguí xiixa ne qué lica riaana nin ti ndaa de xcuérpucaʼ o ráticaʼ de sti modo. Peru nanna dxíchinu zandisaʼ Dios laacabe (Apoc. 20:13).

Qué zucaalisaa Jiobá guiráʼ ndaa stiʼ ti cuerpu para guindísabe laa. Nánnanu zacá ni pur ni runi Dios ora rindisaʼ cani bibí para guibani guibáʼ. Cásica Jesús «naca ti espíritu», zacaca ora guiasa cani bibí de lade gueʼtuʼ laaca binni que laacabe, ngueca nga zaníʼ íquecabe, ni guni sentírcabe ne cani guietenaláʼdxicabe, peru maʼ né ti cuerpu de espíritu. Nin tindaa de xcuérpucabe de beela qué rinécabe guibáʼ (1 Cor. 15:42-53; 1 Juan 3:2).

Racá ridúʼyanu, modo tiica gatiʼ tuuxa binni nánnanu ziásacaʼ. Nga runi, naquiiñeʼ guni crenu zanda gusibani Dios cani maʼ guti ne nápabe gana gúnibe ni (Hech. 24:15). Dxandíʼ, zándaca qué riénenu ximodo bisibani Dios gueʼtuʼ dxiqué o ximodo chigúnibe ni. Neca zacá, nápanu confianza zanda guni Jiobá ni purtiʼ «bisihuinni be» ni ra gundísabe Jesús lade gueʼtuʼ (Hech. 17:31; Luc. 24:2, 3).

Ora guiníʼ ique ti xpinni Cristu xi guniné ti cuerpu stiʼ ti gueʼtuʼ la? naquiiñeʼ gánnabe ximodo rúnicabe ni neza ra nabézabe, ximodo ruuyaʼ binni ni ne xi rinabaʼ ley gúnicabe (2 Cor. 6:3, 4). Nga runi, cada tobi de ca xpinni Cristu o familia stiʼ nga naquiiñeʼ guʼyaʼ pa zuzaaquiʼ binnilidxi ni maʼ guti o coʼ.