GUIZÁʼ cadxibi Fernando. * Gudxi chupa binnigola ni nuu ra ridagulisaabe laabe racaláʼdxicaʼ guiníʼnecaʼ laabe. Maʼ raca chupa chonna iza, cada biaje chiganna superintendente de circuito laacabe, rabi ca binnigola laabe xi naquiiñeʼ gúnibe para guicaabe jma dxiiñaʼ lade ca binni ridagulisaa. Ra zidiʼdiʼ dxi, riníʼ ique Fernando pa zedandá ti dxi gaca binnigola ra ridagulisaa. Yanna maʼ yeganna superintendente de circuito laacabe sti biaje. Xi gabi ca binnigola laabe yanna yaʼ.

Tobi de ca binnigola que biindané laabe 1 Timoteo 3:1 ne gudxi laabe maʼ bedandá nombramientu stibe casi binnigola. Cumu cucaadiaga chaahuiʼ Fernando guiráʼ ni cayabi ca binnigola que laa la? guizáʼ bidxagayaa ne gunabadiidxaʼ: «Ximodo nouʼ la?». Gudxi hermanu que ni laabe sti biaje ne guizáʼ biecheʼ Fernando óraque. Ne ora bieeteʼ ni lade ca binni ridagulisaa guizáʼ biéchecaʼ.

Ñee malu nga guicá ique tuuxa ugaanda xiixa guenda lade ca xpinni Cristu la? Cadi malu diʼ ni. Sicaríʼ guníʼ apóstol Pablu: «Pa nuu tuuxa cá ique gaca xaíque [o binnigola, TNM] sti ca xpinni Cristu la? jneza ni cá ique guni» (1 Tim. 3:1). Pur ni na ca diidxaʼ riʼ, stale xpinni Cristu nagueenda riniisicaʼ ndaaniʼ xquidxi Dios, ne pur nga nuu stale binnigola ne siervu ministerial ndaaniʼ xquídxibe. Peru cumu cadale ca neza binni ridagulisaa la? caquiiñeʼ guni ti xpinni Cristu stipa para «gaca xaíque» o binnigola ra ridagulisaa. Ximodo nga jma jneza zanda gúnicabe ni yaʼ. Ñee naquiiñeʼ chuʼ tuuxa ni racalaʼdxiʼ gaca binnigola xizaa ne nisi maʼ cabeza ni cásica guyuu Fernando la?

Ca diidxaʼ «cá ique» zeeda ni de ti diidxaʼ griegu ni riníʼ gacalaʼdxiʼ xiixa ne guni stipa pur ugaanda ni. Rucaa ni laanu guiníʼ íquenu de tuuxa ni cayuni stipa pur guchuuguʼ ti cuananaxhi ni nanda lu ti rama stiʼ ti yaga. Peru cadi caníʼ diʼ Pablu naquiiñeʼ guicá íquepeʼ tuuxa gaca binnigola. Xiñee yaʼ. Purtiʼ ni racalaʼdxiʼ tuuxa ni cá ique gaca binnigola nga guni ti dxiiñaʼ «jneza», ne cadi pur guiree lá si binnigola.

 Stale de cani naquiiñeʼ guni tuuxa ni racalaʼdxiʼ gaca binnigola zeedacani lu 1 Timoteo 3:2-7 ne Tito 1:5-9. Ora bizeeteʼ ti binnigola ni láʼ Raymond de laacani, guníʼ: «Ni jma risaca para naa nga tu clase binni nácanu. Nannaʼ risaca nga ganna binni gusiidiʼ ne guiníʼ jneza, peru laaca naquiiñeʼ guibani jneza, ganna gucueeza laa, cuʼ xpiaaniʼ, cadi guni gastiʼ para guiníʼ binni laa, ganna guidxaagalú binni ne chuʼ razón».

Ti hermanu ni riníʼ ique jneza rusihuinni nabani nayá ne qué ribaʼnaʼ, ngue runi guirutiʼ riníʼ mal de laa. Nanna gucueeza laa, nuu xpiaaniʼ, riuu razón, nabani nayá; nga runi, ca hermanu runi cré zanda gacanebe ca binni ridagulisaa ne zacanebe laacaʼ ora guidxagalucaʼ xiixa guendanagana. Cumu nánnabe guidxagalube binni la? riguube gana ca hombrehuiiniʼ, ca dxaapahuiiniʼ ne cani nacubi cadagulisaané laacabe. Ne cumu riuuláʼdxibe gúnibe ni jneza la? riguixhedxibe ladxidóʼ ca binni huará ne cani maʼ nagola. Qué rusihuínnibe ca guenda riʼ para si gácabe binnigola, sínuque para gacanebe binni. *

Ca binnigola ni nuu ndaaniʼ cada neza binni ridagulisaa zanda gudiicaʼ conseju ne cuʼcaʼ gana cani «cá ique gaca» binnigola ra ridagulisaa. Peru xpinni Cristu ni racalaʼdxiʼ gaca binnigola ca nga naquiiñeʼ guni guiráʼ ni rinabaʼ Stiidxaʼ Dios laa guni. Henry, ti xpinni Cristu ni maʼ ziné stale iza de naca binnigola guníʼ: «Pa racaláʼdxiluʼ gácaluʼ binnigola, naquiiñeʼ gúniluʼ dxiiñaʼ nadipaʼ para gúniluʼ ni rinabaʼ Dios lii». De raqué, bizeetebe ni na Eclesiastés 9:10, ne guniʼbe: «“Guiráʼ ni guidxela naluʼ guni, biʼniʼ ni ne stale stipa”, o né guiráʼ stipa stiluʼ. Pa guinabaʼ ca binnigola lii gúniluʼ xiixa, bíʼnini de guidubi ladxidoʼloʼ. Guyuu nayecheʼ ra gúniluʼ intiica dxiiñaʼ ni gudiicabe lii gúniluʼ ra ridagulisaaluʼ, dede né ora gunduubaluʼ. Cadi guiaandaʼ lii ruuyaʼ ca binni ridagulisaa stipa rúniluʼ lu ca dxiiñaʼ stiluʼ». Nga runi, pa racaláʼdxiluʼ gácaluʼ binnigola biʼniʼ dxiiñaʼ para ugaandaluʼ ni ne bisihuinni zanda gúniluʼ intiica dxiiñaʼ gudiicabe lii. Cadi lica naquiiñeʼ gusihuínniluʼ lu xquendanabániluʼ nácaluʼ ti binni ni rudxiibaʼ laca laa (Mat. 23:8-12).

Chupa chonna xpinni Cristu ni racalaʼdxiʼ ugaanda xiixa guenda lade ca binni ridagulisaa zándaca gábicabe ca binnigola xiixa cosa ni gusihuinni xi racaláʼdxicabe o gucaacabe ca binnigola guni ni racaláʼdxicabe. Xcaadxi xpinni Cristu ridxiichicaʼ ora gudii ca binnigola laacaʼ xiixa conseju. Galán guni ca xpinni Cristu riʼ guinabadiidxacaʼ: «Ñee cuyubeʼ ni riuuladxesiáʼ o dxandipeʼ racaladxeʼ gapaʼ ca dendxuhuiiniʼ stiʼ Jiobá la?».

Cadi guiaandaʼ laanu nuu sti cosa ni naquiiñeʼ guni cani racalaʼdxiʼ gaca binnigola. Stiidxaʼ Dios na: «Lasá jneza ti guʼya cabe ximodo ibani cabe» (1 Ped. 5:1-3). Ximodo zanda chinándacabe ni na textu riʼ yaʼ. Pa nácacabe binnigola o pa coʼ, naquiiñeʼ gúnicabe ni jneza ne cadi guicá íquecabe ni cadi jneza, gápacabe paciencia ne guni huantárcabe ca guendanagana gápacabe. Peru naquiiñeʼ gánnacabe cadi purtiʼ gueeda gácacabe binnigola guiníʼ íquecabe maʼ qué zucheecabe (Núm. 12:3; Sal. 106:32, 33). Zándaca chuʼ ti xpinni Cristu guiníʼ: «Cayune jneza», peru zándaca guʼyaʼ tuuxa nuu xiixa ni cadi cayúnibe jneza, ne napa razón para guiníʼ ni (1 Cor. 4:4). Nga runi, pa ti binnigola iquiiñeʼ Biblia para gudii laabe ti conseju de guidubi ladxidóʼ, naquiiñeʼ gucaadiágabe laa ne cadi guidxiichibe. De racá, naquiiñeʼ chinándabe conseju ni gudiicabe laabe.

Chupa chonna xpinni Cristu ruuyaʼ nabé xadxí para gueeda gaca binnigola. Pa maʼ napa iza de «cá ique[luʼ] gaca[luʼ] xaíque» o binnigola, ñee riuu biaje rireeluʼ gana la? Pa zacá ni, cadi guiaandaʼ lii proverbio ni zeeda lu Biblia riʼ: «Ora cueza binni xiixa ne qué gácani la? rusiuubani ladxidóʼ, peru ora reeda gaca ni racalaʼdxiʼ binni zeeda gácani casi ti yaga ni rudii guendanabani» (Prov. 13:12).

Nabé riuubaʼ ladxidóʼ tuuxa ora riníʼ ique qué zanda ugaanda xiixa guenda ndaaniʼ xquidxi Dios. Ne ngapeʼ nga bizaaca Abrahán. Gudxi Jiobá laabe zápabe ti xiiñibe, peru gudiʼdiʼ iza qué ñapa Sara ti xiiñibe (Gén. 12:1-3, 7). Dxi maʼ nagólabe guniʼbe: «Jiobá, ni jma nandxóʼ lu guidubi naca guibáʼ ne guidxilayú, xi gudiiluʼ naa pue. Maʼ chigateʼ ne caʼruʼ gapa xiiñeʼ. [...] Caʼruʼ gudiiluʼ naa ti xiiñeʼ». Neca gudxi Jiobá laabe zuni ni maʼ guníʼ, gudiʼdiʼ biaʼ sti catorce iza para beeda gaca ni gudxi Jiobá laabe (Gén. 15:2-4; 16:16; 21:5).

Yanna, ñee pur ngue maʼ qué ñuube nayecheʼ ra bíʼnibe xhiiñaʼ Jiobá la? Coʼ, purtiʼ laabe nanna dxíchibe zuni Jiobá ni maʼ guníʼ. Ngue runi, gulézabe ni chigudii Jiobá laabe. Apóstol Pablu bicaa: «Ne uleza Abraham sin nixhacalaʼdxi dede bidxiña dxi ucuaa ni uníʼ Dios zudii laa» (Heb. 6:15). Despué, Dios ni jma napa poder bidii laabe stale ndaayaʼ, jma de ni cabézabe. Yanna, xi rizíʼdinu de ejemplu stiʼ Abrahán yaʼ.

Pa riuuláʼdxiluʼ gácaluʼ binnigola peru maʼ gudiʼdiʼ iza ne cadi nácaluʼ ni, cadi guireeluʼ gana; gupa confianza Jiobá. Cadi gusaana de chuʼluʼ nayecheʼ ra gúniluʼ xhiiñabe. William, ti xpinni Cristu ni maʼ  gucané stale hermanu para guiniisi lu stiidxaʼ Dios, guníʼ: «Caquiiñeʼ tiempu para guni binni ni rinabaʼ Biblia. Ca guenda stiʼ tuuxa hermanu ne modo laa rihuínnicani chaahuiʼ chaahuiʼ pur modo nabani ne pur modo runi ni guinábacabe laa. Nuu tu riníʼ ique zahuinni naca ti binni risaca ora ugaanda xiixa guenda lade ca binni ridagulisaa. Peru cadi zacá diʼ ni, purtiʼ zándaca maʼ nisi laani guicá ique. Ni jma risaca nga cadi gusaana de gúninu xhiiñaʼ Jiobá, gasti naca paraa nuunu o xi gúninu».

Ti xpinni Cristu guleza jma de chii iza para beeda gaca binnigola. Guniʼbe de ni cayeeteʼ lu capítulo 1 stiʼ libru stiʼ Ezequiel, ne bisiénebe xi bisiidiʼ ni laabe: «Zigusá Jiobá xquidxi ni zeeda gaca carru stiʼ, ne zinebe ni biaʼ nabe. Qué runi diʼ Jiobá ca cosa ca ora racaláʼdxinu, sínuque ora nabe. Neca guizáʼ ñuuladxeʼ ñacaʼ binnigola, nannaʼ qué risaca diʼ ni racaladxeʼ o ni rabeʼ jma galán para naa. Zándaca ni racaladxeʼ ca cadi nga diʼ nga ni na Jiobá caquiiñeʼ».

Pa cabézaluʼ chuʼ dxi gácaluʼ binnigola, biyubi modo chuʼ ca binni ridagulisaa nayecheʼ. Ne pa ruluíʼ candaa para ugaandaluʼ ni la? gupa paciencia. Raymond, xpinni Cristu ni maca bizéʼtenu que, guníʼ: «Ora ruyubi tuuxa nisi para laa, qué riuu nayecheʼ. Ora nisi cabeza tuuxa ti guenda qué riuu nayecheʼ ra guni xhiiñaʼ Jiobá». Nga runi, biʼniʼ stipa pur gápaluʼ ca guenda ni rudii espíritu stiʼ Dios binni, ne ni jma naquiiñeʼ gápaluʼ nga paciencia. Biquidxi fe stiluʼ ra gúʼndaluʼ Biblia. Bicheeche diidxaʼ jma ne gucané binni guidxiña Dios. Gucané binnilídxiluʼ para gúnicaʼ xhiiñaʼ Jiobá ne biindané laacabe gueelaʼ runi adorartu Dios. Ora nuuluʼ né ca hermanu, biʼniʼ stipa pur gacaneluʼ laacaʼ. Pa gúniluʼ zacá, ziuuluʼ nayecheʼ laga cabézaluʼ gácaluʼ binnigola.

Biiyaʼ tiempu ni cabézaluʼ riʼ casi ti tiempu ni cudii Jiobá lii para gúniluʼ cani zeeda lu Biblia ne gápaluʼ ca guenda ni naquiiñeʼ gapa ti xpinni Cristu ne gacaneluʼ ca binni ridagulisaa; qué racalaʼdxiʼ Jiobá guireeluʼ gana o chuʼluʼ triste purtiʼ maʼ xadxí de cabézaluʼ gápaluʼ xiixa guenda. Cani runi xhiiñaʼ Dios de guidubi ladxidóʼ, racanebe laacaʼ ne rudiibe laacaʼ ndaayaʼ. Ne cadi guiaandaʼ lii ora rudii Jiobá ndaayaʼ stiʼ qué redaneni «yuubaʼ» (Prov. 10:22).

Neca maʼ xadxí de cabézaluʼ, nuuruʼ stale cosa ni zanda gúniluʼ para guiniisiluʼ ndaaniʼ xquidxi Dios. Qué zusiaandaʼ Jiobá stipa ni cayúniluʼ pur gápaluʼ ca guenda ni naquiiñeʼ gapa ti xpinni Cristu ne dxiiñaʼ nadipaʼ ni cayúniluʼ ndaaniʼ xquidxi Dios, ne gucané binnilídxiluʼ chuʼ gaxha de Dios. Guyuu nayecheʼ ra gúniluʼ xhiiñaʼ Jiobá, gastiʼ naca xi dxiiñaʼ gudiicabe lii gúniluʼ.